9

Tus vajntxwv uas yuav los kav

¹Yuav tsis muaj kev tsaus ntuj rau tus uas txeev raug kev txom nyem lwj siab dua li lawm. Yav thaum ub Vajtswv ua rau Xenpuloo tebchaws thiab Nathali tebchaws raug luag saib tsis taus. Tiamsis yav tom qab nws yuav ua kom txojkev ntawm ntug hiavtxwv uas nyob sab dej Yaladee hnub poob tau koob meej, yog Kalilais uas lwm haiv neeg los nyob.
²Cov neeg uas taug txojkev tsaus ntuj
twb pom qhov kaj uas loj kawg lawm.
Cov uas nyob hauv txojkev tuag tus duab tsaus
txojkev kaj ci rau lawv lawm.
³Koj twb pub lub tebchaws nthuav dav
thiab tsav txojkev xyiv fab rau lawv lawm.
Lawv zoo siab xyiv fab rau ntawm koj xubntiag,
yam li xyiv fab rau thaum sau qoob loo,
thiab yam li xyiv fab rau thaum
muab tej uas txeeb tau los sib faib.
⁴Rab quab uas hnyav
thiab tus las ntawm xub pwg
thiab tus qws uas quab yuam lawv,
koj twb muab lov ib yam li hnub
uas ua rau cov Midee lawm.
⁵Txhua nkawm khau
uas tswm av ntseeg mus ua rog,
thiab txhua lub tsho uas raus hauv cov ntshav
yuav raug muab ua taws hlawv
hauv cub hluavtaws.
⁶Muaj ib tug menyuam yug los rau peb,
muaj ib tug tub pub rau peb.
Yuav muab qhov uas kav tebchaws
rau saum nws xubpwg,
thiab nws lub npe yuav hu tias
yog lub chaw sablaj uas phimhwj kawg,
yog Vajtswv uas muaj hwjchim loj kawg,
yog leej txiv uas nyob mus ib txhis,
yog vajntxwv leej tub uas coj kev thaj yeeb.
⁷Nws kev tswjhwm yuav dav zuj zus tuaj,
thiab txojkev thaj yeeb
yuav muaj tsis txawj kawg,
rau saum Davi lub zwm txwv
thiab saum nws lub tebchaws.
Nws yuav txiav txim ncaj thiab ua ncaj ncees
thiaj ua rau lub tebchaws nyob ruaj khov,
thiab tuav lub tebchaws
txij nimno mus ib txhis tsis kawg.
Yawmsaub uas muaj hwjchim loj kawg nkaus
kub siab lug yuav ua tej haujlwm no kom tiav.

Yawmsaub chim rau cov Yixayee

⁸Tus Tswv xa xov mus tawm tsam Yakhauj,
thiab yuav mus raug Yixayee.
⁹Tej pejxeem sawvdaws yuav paub,
yog Efa‑i thiab cov neeg Xamali uas tsab ua loj
thiab lub siab khav theeb hais tias,
¹⁰“Tej thwv cib pob tag lawm,
tiamsis peb yuav siv tej txhib zeb uas txhwm
los ua dua tshiab.
Tej ntoo txiv cev raug muab ntov lawm,
tiamsis peb yuav muab ntoo ciab
cog rau hauv lub qub chaw.”
¹¹Yawmsaub thiaj txhawb
Lexi cov tshawj chim tawm tsam lawv,
thiab tshum lawv cov yeeb ncuab.
¹²Cov Alas uas nyob sab hnub tuaj
thiab cov Filixatee uas nyob sab hnub poob
yuav rua ncauj nqos cov Yixayee.
Txawm li ntawd los nws txojkev chim
kuj tsis thim, thiab nws tseem tsa
nws txhais tes li qub.

¹³Cov pejxeem kuj tsis tig los
cuag tus uas nplawm lawv,
tsis nrhiav Yawmsaub
uas muaj hwjchim loj kawg nkaus.
¹⁴Yawmsaub thiaj li txiav Yixayee
taubhau thiab kotw,
thiab tej nplooj kuj yem
thiab tej tauj deg rau tib hnub.
¹⁵Cov kev txwj laus thiab cov uas muaj meej
yog lub taubhau,
cov cuav xibhwb cev Vajtswv lus
uas qhia tsis tseeb yog kotw.
¹⁶Cov thawj uas coj cov neeg no
tau coj lawv yuam kev,
thiab cov uas lawv coj kuj raug muab nqos.
¹⁷Vim li ntawd Yawmsaub thiaj tsis zoo siab
rau lawv cov hluas,
thiab tsis khuvleej cov menyuam ntsuag
tsis muaj txiv thiab cov poj ntsuam,
rau qhov txhua tus tsis hwm Vajtswv
thiab ua phem thiab txhua lub qhov ncauj
hais tej lus tsis paub qabhau.
Txawm li ntawd los nws txojkev chim
kuj tsis thim, thiab nws tseem tsa
nws txhais tes li qub.

¹⁸Txojkev phem kub hnyiab
yam li hluavtaws kub,
mas kub kiag tej pos kaus ntsaj pos kaus ntsim,
zes taws rau tej hav zoov ntom,
mas hav zoov kub pa ncho
tej niag nthwv rau saud.
¹⁹Lub tebchaws raug muab hlawv
vim yog Yawmsaub uas muaj hwjchim
loj kawg txojkev npau taws.
Cov pejxeem zoo yam li
tej taws uas muab rauv,
tsis muaj ib tug twg
tseg nws cov kwvtij txojsia li.
²⁰Lawv txeeb tau rau sab xis los tseem tshaib,
noj rau sab laug los kuj tsis tsau,
nyias taus nyias noj kwvtij li nqaij.
²¹Manaxe noj Efa‑i, Efa‑i noj Manaxe,
mas ob tug koom tawm tsam Yuda.
Txawm li ntawd los Yawmsaub txojkev chim
kuj tsis thim, thiab nws tseem tsa
nws txhais tes li qub.

9

Tus Vajntxwv uas Yuav Los

¹Txawm li ntawd los yuav tsis muaj kev nyuaj siab rau cov neeg uas twb raug kev txomnyem los lawm. Yav tas los nws tau coj kev txajmuag los rau xeem Xenpuloos lub tebchaws thiab xeem Nathalis lub tebchaws, tiamsis yav tom ntej no mus, txij ntua ntawm ntug dej hiavtxwv Meditelanes sab hnubtuaj mus txog ntua lub tebchaws uas nyob sab ntug Dej Yauladees tim ub, thiab pem Kalilais uas cov neeg txawv tebchaws nyob, nws yuav ua kom lawv rov tau ntsejmuag.

²Cov neeg uas taug kev tsaus ntuj nti tau pom kev kaj nrig.
Lawv nyob hauv lub tebchaws uas tsaus ntuj nti,
nimno tshav ntuj ci kaj nrig rau lawv
lawm.
³Tus TSWV, koj ua rau lawv muaj kev zoo siab heev,
twb yog koj pub lawv tau zoo nyob kaj siab lug.
Lawv txhua tus zoo siab kawg rau tej uas koj tau ua,
ib yam li cov neeg uas zoo siab thaum sau qoobloo
lossis zoo siab ib yam li thaum faib
tej khoom uas mus txeeb tau los.
⁴Rau qhov koj twb muab tus quab uas
tsuam lawv xubpwg,
thiab muab tus nplawm uas luag
nplawm lawv nraubqaum lov lawm.
⁵Txhua nkawm khau uas cov tubrog
rau thiab lawv cov ris tsho uas lo ntshav
yuav muab sau huv tibsi coj mus hlawv.
⁶Muaj ib tug menyuam twb los yug hauv peb cov lawm!
Vajtswv muab ib tug tub pub rau peb!
Thiab nws yuav ua tus kav pab, nws lub npe yuav hu ua
“Tus Tuavxam, tus uas muaj Txujci,
Vajtswv tus muaj hwjchim, Vaj Leej
Txiv tus uas nyob mus ibtxhis,
Vajntxwv tus uas muaj kev thajyeeb.”
⁷Nws kev tswjhwm yuav nthuav loj zuj zus,
thiab kev thajyeeb yuav muaj tsis paub kawg
nyob saum Daviv lub zwmtxwv thiab
thoob plaws nws lub tebchaws.
Txij no mus, nws yuav txhim kho lub
tebchaws
thiab tswjhwm mus rau qhov tseeb
thiab coj ncaj ncees mus ibtxhis tsis kawg.
Tus TSWV uas muaj hwjchim loj kawg nkaus
txiav txim siab yuav ua raws li tej no.

Tus TSWV Yuav Rau Txim Rau Cov Yixalayees

⁸Tus TSWV txiav txim rau Yakhauj cov xeebntxwv thiab lub tebchaws Yixalayees. ⁹Txhua tus neeg yuav paub zaj no, cov Efalayees thiab cov neeg uas nyob hauv lub nroog Xamalis khavtheeb hais tias, ¹⁰“Tej thwvcib twb pob tas lawm, tiamsis peb yuav muab tej pobzeb los txhim rau; twb muab tej nqaj ntoo xikamaus txiav povtseg tas lawm, tiamsis peb muab tej nqaj ntoo thuv uas khov heev los hloov.”
¹¹Tus TSWV tshoov lawv cov yeebncuab siab kom tuaj tawmtsam lawv. ¹²Cov Xilias uas nyob sab hnubtuaj thiab cov Filitees uas nyob sab hnubpoob rua lawv tej qhovncauj tuaj nqos haivneeg Yixalayees. Txawm muaj li ntawd los Vajtswv tseem chim rau lawv, thiab nws txhais tes tseem rau txim rau lawv tsis tseg.
¹³Txawm yog tus TSWV uas muaj hwjchim loj kawg nkaus twb rau txim rau cov Yixalayees lawm los lawv tseem tsis zeem thiab tsis tig rov los cuag tus TSWV li. ¹⁴Tus TSWV yuav ua ib hnub txiav cov Yixalayees tej taubhau, kotw, tej nplooj toovlaj thiab nplooj tauj kom tas huv tibsi povtseg. ¹⁵Tus neeg laus thiab tus muaj meejmom yog lub taubhau, thiab cov cev Vajtswv lus uas lawv qhia tej lus dag yog tus kotw! ¹⁶Cov neeg uas coj tsoom pejxeem no twb yog cov coj lawv yuam kev thiab txhua tus uas lawv coj puavleej raug luag nqos huv tibsi lawm. ¹⁷Vim li ntawd, tus TSWV thiaj tsis zoo siab rau lawv cov tub hluas, thiab nws yuav tsis hlub cov menyuam ntsuag thiab cov pojntsuam, rau qhov txhua tus puavleej tsis hwm tus TSWV thiab muaj lub siab phem kawg li, thiab tej lus uas lawv hais puavleej yog lus phem xwb. Vim yog muaj tej no tus TSWV thiaj chim, thiab nws txhais tes tseem rau txim tsis tseg rau lawv.
¹⁸Cov neeg ua phem tej kev txhaum cig ib yam li lub cubtawg kub tej ntoo pos thiab hmab pos thiab tej toj roob hauv pes ncho pa auv niab. ¹⁹Vim tus TSWV uas muaj hwjchim loj kawg nkaus chim heev, lub tebchaws thiaj raug kub hnyiab, tej neeg thiaj zoo li cov roj uas raug hluav taws kub, tsis muaj leejtwg yuav cawm tau nws tej kwvtij li. ²⁰Cov pejxeem thoob tebchaws xawb txhua tsav yam los noj, tiamsis tsis tsau lawv plab; lawv tseem rov noj lawv cov menyuam! ²¹Cov Manaxes tawmtsam cov Efalayees thiab Efalayees tawmtsam cov Manaxes, thiab ob pab no sib sau tawmtsam cov Yudas. Vim tej no tus TSWV thiaj chim heev, thiab nws txhais tes tseem rau txim tsis tseg rau lawv.