25
Thov Vajtswv coj txoj hauv kev
Davi sau.
1Au Yawmsaub, kuv muab kiag
kuv lub siab rau koj.
2Au kuv tus Vajtswv, kuv tso siab rau koj.
Thov tsis txhob cia kuv raug txaj muag,
tsis txhob cia kuv cov yeeb ncuab
hnyos luag kuv.
3Thov tsis txhob cia ib tug twg uas tos rawv koj
raug txaj muag kiag li.
Cia cov uas mom sim fav xeeb rau koj
poob ntsej muag.
4Au Yawmsaub, thov ua rau kuv paub koj txojkev,
thov qhia koj tej kev rau kuv paub taug.
5Thov koj coj kuv taug koj txojkev tseeb
thiab qhuab qhia kuv
vim koj yog tus Vajtswv uas cawm kuv dim.
Kuv tos rawv koj tas hnub tas hmo.
6Au Yawmsaub, thov koj nco txog
koj txojkev khuvleej
thiab koj txojkev hlub uas ruaj khov,
vim yog tej no twb muaj
thaum ub los lawm.
7Thov tsis txhob nco txog tej kev txhaum
thiab tej kev fav xeeb
uas thaum kuv tseem hluas es kuv ua.
Au Yawmsaub, vim koj txojkev hlub uas ruaj khov
thiab koj txojkev zoo, thov nco txog kuv.
8Yawmsaub yog tus uas zoo kawg
thiab ncaj ncees,
nws thiaj qhuab qhia nws txojkev
rau cov neeg txhaum.
9Nws coj tus uas txo hwjchim
mus qhov uas raug cai,
thiab qhia nws txojkev
rau tus txo lub siab qes qes.
10Yawmsaub tej kev huvsi yog
txojkev hlub uas ruaj khov thiab tso siab tau,
rau txhua tus uas tuav rawv
nws tej lus cog tseg thiab nws tej lus qhia.
11Au Yawmsaub, thov koj saib rau koj lub npe
es zam kuv lub txim
rau qhov lub txim ntawd loj heev.
12Leejtwg yog tus uas hwm
thiab paub ntshai Yawmsaub?
Yawmsaub yuav qhuab qhia tus ntawd
rau hauv txojkev uas tsim nyog nws xaiv.
13Nws yuav tau nyob vam meej heev,
thiab nws tej tub ki yuav tau lub tebchaws
ua lawv teej lawv tug.
14Yawmsaub yuav nrog
cov uas paub ntshai nws ua phoojywg,
thiab nws qhia nws tej lus cog tseg
rau lawv paub.
15Kuv lub qhov muag
pheej ntsia ntsoov rau Yawmsaub,
rau qhov nws rho kuv txhais kotaw
dim hauv txoj hlua cuab.
16Thov koj tig hlub kuv,
rau qhov kuv nyob twm kawv
thiab raug kev txom nyem nyuaj siab.
17Thov pab kuv tej kev nyuaj siab kom ploj mus,⚓
coj kuv tawm hauv txojkev ntxhov siab los.
18Thov tshuaj saib kuv tej kev txom nyem
thiab kev ceeblaj,
thiab daws kuv lub txim huvsi pov tseg.
19Thov tshuaj saib kuv cov tshawj chim
muaj coob npaum twg,
thiab lawv ntxub kuv heev npaum li cas.
20Thov tsom kwm kuv txojsia thiab cawm kuv,
tsis txhob cia kuv raug txaj muag
vim yog kuv cawm siav rau hauv koj.
21Thov txojkev dawb huv
thiab txojkev ncaj ncees tuav kuv cia,
vim kuv tos rawv koj.
22Au Vajtswv, thov txhiv cov Yixayee
dim lawv tej kev ceeblaj huvsi.
25
Thov Vaajtswv coj txuj hauv kev
Tavi sau.
1Au Yawmsaub, kuv muab hlo
kuv lub sab rua koj.
2Au kuv tug Vaajtswv, kuv tso sab rua koj.
Thov tsw xob ca kuv raug txaaj muag,
tsw xob ca kuv cov yeeb ncuab nyos luag kuv.
3Thov tsw xob ca ib tug twg kws tog rawv koj
raug txaaj muag hlo le.
Ca cov kws mom swm faav xeeb rua koj
poob ntsej muag.
4Au Yawmsaub, thov ua rua kuv paub koj txujkev,
thov qha koj tej kev rua kuv paub taug.
5Thov koj coj kuv taug koj txujkev tseeb
hab qhuab qha kuv
vem koj yog tug Vaajtswv kws cawm kuv dim.
Kuv tog rawv koj taag naj taag nub.
6Au Yawmsaub, thov koj ncu txug
koj txujkev khuvleej
hab koj txujkev hlub kws ruaj khov,
vem yog tej nuav tub muaj thau u lug lawm.
7Thov tsw xob ncu txug tej kev txhum
hab tej kev faav xeeb
kws thaus kuv tseed hluas es kuv ua.
Au Yawmsaub, vem koj txujkev hlub kws ruaj khov
hab koj txujkev zoo, thov ncu txug kuv.
8Yawmsaub yog tug kws zoo kawg
hab ncaaj nceeg,
nwg txhad qhuab qha nwg txujkev
rua cov tuabneeg txhum.
9Nwg coj tug kws txu fwjchim
moog qhov kws raug cai,
hab qha nwg txujkev rua tug txu lub sab qeg qeg.
10Yawmsaub tej kev huvsw yog
txujkev hlub kws ruaj khov hab tso sab tau,
rua txhua tug kws tuav rawv
nwg tej lug cog tseg hab nwg tej lug qha.
11Au Yawmsaub, thov koj saib rua koj lub npe
es zaam kuv lub txem
tsua qhov lub txem hov luj heev.
12Leejtwg yog tug kws fwm
hab paub ntshai Yawmsaub?
Yawmsaub yuav qhuab qha tug hov
rua huv txujkev kws tswm nyog nwg xaiv.
13Nwg yuav tau nyob vaam meej heev,
hab nwg tej tub ki yuav tau lub tebchaws
ua puab teej puab tug.
14Yawmsaub yuav nrug
cov kws paub ntshai nwg ua phoojywg,
hab nwg qha nwg tej lug cog tseg
rua puab paub.
15Kuv lub qhov muag pheej
saib ntsoov rua Yawmsaub,
tsua qhov nwg rhu kuv txhais kwtaw
dim huv txuj hlua cuab.
16Thov koj tig hlub kuv,
tsua qhov kuv nyob twm kawv
hab raug kev txom nyem nyuaj sab.
17Thov paab kuv tej kev nyuaj sab kuas pluj,⚓
coj kuv tawm huv txujkev ntxhuv sab.
18Thov tshuaj saib kuv tej kev txom nyem
hab kev ceblaaj,
hab daws kuv lub txem huvsw pov tseg.
19Thov tshuaj saib kuv cov tshawj chim
muaj coob npaum twg,
hab puab ntxub kuv heev npaum le caag.
20Thov tsom kwm kuv txujsa hab cawm kuv,
tsw xob ca kuv raug txaaj muag
vem yog kuv cawm sav rua huv koj.
21Thov txujkev dawb huv
hab txujkev ncaaj nceeg tuav kuv ca,
vem kuv tog rawv koj.
22Au Vaajtswv, thov txhwv cov
Yixayee dim puab tej kev ceblaaj huvsw.