17

Thov Vajtswv pab dim kev tsim txom

Davi tej lus thov.

¹Au Yawmsaub, thov tig ntsej mloog
tej uas kuv teev lus ncaj ncees,
thiab mloog kuv lub suab hu.
Thov tig ntsej mloog kuv lub qhov ncauj
lo lus thov uas tsis muaj ib lus dag li.
²Thov koj tu kom kuv ua tus uas muaj cai,
thov koj tsa muag ntsia qhov uas ncaj ncees.

³Yog koj tshuaj saib kuv lub siab
thiab tuaj saib kuv hmo ntuj,
yog koj sim kuv lawd koj yuav tsis pom
ib qho phem nyob hauv kuv li,
kuv lub qhov ncauj kuj tsis hais ib los txhaum.
⁴Tej haujlwm uas neeg ua
mas vim muaj koj tej lus
uas tawm hauv koj qhov ncauj los
kuv thiaj tsis ua raws li
cov neeg limhiam ntais ntuj ua.
⁵Kuv txhais kotaw thiaj li taug nraim koj txojkev,
kuv txhais kotaw tsis plam li.

⁶Au Vajtswv, kuv thov hu koj,
rau qhov koj yuav teb kuv tej lus thov.
Thov tig ntsej mloog kuv, mloog kuv tej lus thov.
⁷Thov koj ua koj txojkev hlub ruaj khov
uas phimhwj kawg tshwm los.
Koj yog tus uas cawm cov neeg uas nrhiav
chaw cawm siav ntawm lawv tej yeeb ncuab
rau ntawm koj sab xis.
⁸Thov tsom kwm kuv
yam nkaus li tsom kwm lub ntsiab muag,
thov nthuav koj li kooj tis roos kuv,
⁹kom dim tau cov neeg limhiam
uas ua kom kuv puam tsuaj
thiab dim tau kuv tej yeeb ncuab
uas vij kuv xav tua kuv.
¹⁰Lawv tsis muaj lub siab khuvleej,
lawv lub qhov ncauj hais lus khav theeb xwb.
¹¹Lawv taug kuv neev taw,
nimno lawv vij puag ncig kuv lawm,
lawv soj kuv xav muab kuv pov rau hauv av.
¹²Lawv zoo yam nkaus li tus tsov ntxhuav
uas xav xav dua nqaij,
zoo yam nkaus li tus thav tsov ntxhuav
uas zov kev tos tom.

¹³Au Yawmsaub, cia li sawv tsees,
tawm tsam lawv, muab lawv qhau.
Thov koj siv koj rab ntaj tso kuv txojsia
dim ntawm cov neeg limhiam.
¹⁴Au Yawmsaub, thov koj txhais tes cawm kuv
dim ntawm cov neeg uas lawv li feem
yog nyob hauv ntiajteb no xwb.
Thov cia lawv tej plab saws tej uas koj
tau khaws cia rau lawv lawd kom puv nkaus,
thov kom lawv tej tub ki tau saws
ntau tshaj plaws
thiab tseem tshuav rau
lawv tej menyuam yaus saws thiab.
¹⁵Kuv tus kheej mas kuv yuav pom
koj lub ntsej muag vim kuv txojkev ncaj ncees,
thaum kuv tsim los kuv yuav txaus siab
rau qhov uas pom koj tus yam ntxwv lawm.

17

Tus Neeg Tsis Muaj Txim Thov Vajtswv

¹Tus TSWV, thov koj mloog tej
lus uas kuv thov yuav kev ncaj ncees,
thov koj tig pobntseg mloog kuv lub
suab quaj uas thov koj pab!
thov koj mloog kuv tej lus thov uas yog lus tseeb.
²Koj yuav txiav txim ncaj rau kuv,
rau qhov koj yog tus paub qhov tseeb.

³Koj yog tus paub kuv lub siab.
Thaum tsaus ntuj koj los cuag kuv,
koj tshuaj kuv thiab tsis pom ib qho phem
uas kuv ua nyob hauv kuv lub siab li.
Kuv tsis hais lus phem ⁴li luag tej;
kuv hwm koj tej lus samhwm
thiab tsis tau taug txojkev uas cov neeg yuam cai taug.
⁵Kuv ibtxwm taug koj txojkev xwb,
thiab kuv yeej tsis yuam kev li.

⁶Vajtswv, kuv thov koj rau qhov koj
yeej yuav teb kuv tej lus thov;
yog li ntawd, thov koj tig los saib kuv
thiab mloog kuv tej lus thov.
⁷Thov qhia koj txojkev hlub uas loj
kawg rau kuv thiab cawm kuv,
koj sab tesxis cawm cov neeg uas
khiav lawv cov yeebncuab.

⁸Thov tiv thaiv kuv ib yam li koj
txuag koj lub qhov muag,
thov muab kuv zais rau hauv qab koj
phabtis tus duab ntxoov ntxoo
⁹kom kuv tsis txhob raug cov neeg siab phem tua.

Kuv cov yeebncuab uas xav muab
kuv tua kom tuag nyob ibncig kuv.
¹⁰Lawv hais tej lus khavtheeb thiab tsis hlub leejtwg li.
¹¹Tamsim no lawv nyob ncig kuv tas li lawm,
lawv ntsia ntsoov kuv thiab yuav
muab kuv thawb kom ntog.
¹²Lawv zoo li cov tsov ntxhuav uas zov
rawv tos kev tom kuv,
lawv xav dua kom kuv ntuag ua tej daim.

¹³Tus TSWV, thov koj cia li los
tawmtsam kuv cov yeebncuab thiab ua kom lawv swb!
Thov siv koj rab ntaj cawm kuv ntawm cov neeg
siab phem txhais tes,
¹⁴cawm kom kuv dim ntawm cov neeg
uas ntshaw khoom ntiajteb.
Thov siv tej kev txomnyem uas koj
npaj tseg lawm rau txim rau lawv;
thov tseg kom txaus rau lawv tej menyuam
thiab tseg ibtxhia rau lawv cov xeebntxwv.

¹⁵Tiamsis kuv yuav pom koj, rau qhov
kuv tsis tau ua txhaum;
thaum kuv tsim los kuv yuav txaus siab heev,
rau qhov kuv pom koj tim ntsej tim muag.