6

Maiv Dungx Beu Mienh Nyei Zaeqv

  1Yie nyei dorn aah! Se gorngv meih laengz waac beu meih nyei juangc laangz mienh nyei zaeqv,
   fai laengz zoux ndaam-daauh beu ganh dauh mienh nyei zaeqv,
  2se gorngv meih gorngv nyei waac hlopv zuqc meih,
   meih nyei nzuih gorngv nyei waac ndoh jienv meih,
  3yie nyei dorn aah! Meih oix zuqc hnangv naaiv nor zoux njoux meih ganh,
   weic zuqc meih zuqc yiem meih nyei juangc laangz mienh nyei buoz-ndiev mi'aqv.
  Mingh aqv, mingh lorz meih nyei juangc laangz mienh aengx nyiemc ganh zoux faix qaqv tov.
  4Maiv dungx bun meih nyei m'zing njipv jienv m'njormh,
   maiv dungx bun m'zing-ndopv nyuix.
  5Oix zuqc njoux ndutv ganh hnangv njaih leih ndutv zaeng hlaang mienh nyei buoz,
   yaac hnangv norqc biaux ndutv zaeng koux mienh nyei buoz-ndiev.

Maiv Dungx Lueic

  6Mienh lueic mienh aah! Meih oix zuqc mingh zaah mangc nziouv,
   hnamv taux nziouv zoux nyei jauv ziouc duqv cong-mengh.
  7Nziouv maiv maaih bieiv zeiv,
   maiv maaih jien, maiv maaih haaix dauh gunv,
  8mv baac nqaai gorng ninh liuc leiz nyanc hopv,
   gaatv gaeng-zuangx nyei ziangh hoc yaac siou nyanc nyei ga'naaiv.
  9Mienh lueic mienh aah! Meih oix bueix taux haaix zanc?
   Meih oix m'njormh taux haaix zanc cingx jiez sin daaih?
  10Aengx bueix dangh, m'njormh dangh,
   qopv jienv buoz m'njormh da'hngatv dangh,
  11jomc nyei jauv ziouc hnangv janx-zaqc liemh zeih taux.
   Dangx-donx nyei jauv daaih hnangv mienh dorh jienv wuoqc ginc daaih taux.

Orqv Mienh Nyei Setv Mueiz

  12Maiv lamh longc nyei orqv mienh
   jiex naaiv jiex wuov gorngv-baeqc.
  13Ninh nyapc m'zing,
   fengx zaux,
    buoz yaac nuqv jienv,
  14hnyouv pien daav orqv nyei za'eix,
   zanc-zanc coqv-huv.
  15Weic naaiv ninh oix liemh zeih zuqc zeqc naanc,
   nduqc dangh hnangv zuqc baaic waaic nzengc, maiv haih zorc.

Ziouv Nzorng Nyei Siec Nyungc

  16Ziouv nzorng nyei maaih juqv nyungc,
   ninh gamh nziev nyei, youx nyei maaih siec nyungc.
  17Maaih m'zing-jaax hlang,
   gorngv-baeqc nyei nzuih,
  buoz daix maiv zoux dorngc nyei mienh,
  18hnyouv daav orqv nyei za'eix,
   zaux tiux siepv nyei mingh lorz orqv nyei sic,
  19zoux jaav zorng-zengx nyei mienh tauv qiex kungx cuotv gorngv-baeqc nyei waac,
   caux mienh yiem ninh nyei gorx-youz mbu'ndongx coqv lunc mienh.

Kuinx Simv Nqoi Buangh Liouh Nyei Jauv

  20Yie nyei dorn aah! Oix zuqc gan longx meih nyei die hatc nyei waac,
   yaac maiv dungx guangc meih nyei maa njaaux nyei jauv-louc.
  21Oix zuqc zanc-zanc zaangh jienv meih nyei hnyouv,
   yaac kuangx jienv meih nyei jaang.
  22Meih yangh jauv, ninh mbuo ziouc dorh meih,
   meih bueix nyei ziangh hoc, ninh mbuo oix beu jienv meih.
   Meih nyie daaih, ninh mbuo yaac caux meih gorngv.
  23Weic zuqc naaiv deix hatc nyei waac zoux norm dang,
   njaaux nyei waac zoux njang.
  Gorngv-njaaux, mborqv njaaux se
   benx jauv bun mienh duqv maengc ziangh,
  24weic beu jienv meih, tengx meih simv nqoi orqv nyei m'sieqv dorn,
   leih nqoi buangh liouh nyei auv gorngv yuoqc mienh nyei nzuih mbiaangc.
  25Maiv dungx yiem hnyouv hanc ninh nzueic nyei jauv,
   yaac maiv dungx bun ninh nyei m'zing baeng zuqc meih.
  26Weic zuqc mienh haih longc yietc norm njuov nyei jaax-zinh cingv maaic sin nyei m'sieqv dorn,
   mv baac hienx nqox nyei auv zungv zorqv mienh jaaix mienh nyei maengc.
  27Mienh haih qam jienv douz
   yaac maiv bun ninh nyei lui zuqc douz buov duqv nyei fai?
  28Mienh haih yangh zieqc jienv douz nyei douz-taanx gu'nguaaic mingh,
  yaac maiv zuqc douz buov zaux fai?
  29Haaix dauh mingh caux ganh dauh mienh nyei auv yaac fih hnangv nyei.
   Maiv maaih haaix dauh hluo liuz ninh yaac maiv zuqc dingc zuiz.
  30Se gorngv mienh hnyouv sie ziouc nimc ga'naaiv tengx ninh beuv,
   mienh mangc piex ninh maiv zeiz?
  31Se gorngv ninh zuqc zorqv ninh oix zuqc buih siec gouv,
   zungv bun nzengc ninh nyei biauv zong maaih nyei ga'naaiv.
  32Mv baac mienh hienx auv ninh hnamv duqv hngongx haic.
   Haaix dauh hnangv naaiv zoux zungv bun ninh ganh zuqc mietc.
  33Ninh zuqc mun, zuqc nyaiv,
   ninh zuqc baaic hmien, yietc liuz maiv haih sortv guangc.
  34Weic zuqc m'jangc dorn hanc, ninh m'daaih qiex jiez,
   taux jaauv win nyei ziangh hoc ninh maiv nyaangc zingh aqv.
  35Ninh maiv longc haaix nyungc buih bun ninh.
   Bun zingh nyeic ndongc haaix camv ninh hnyouv maiv nqaai.