1

Saulo Guei Seix

1Saulo guei seix mi'aqv. Nqa'haav Ndaawitv mingh daix Aa^maa^lekv Mienh nzuonx daaih, ninh yiem Sikc^laakv hitv i hnoi. 2Taux da'faam hnoi, maaih dauh mienh yiem Saulo nyei ndopv-liuh ciangv daaih. Ninh zuqv jienv lui-houx-huv. M'nqorngv yaac hiaamx jienv nie-mbung. Ninh daaih taux Ndaawitv nyei nza'hmien puoqv njiec ndau baaix.
3Ndaawitv naaic ninh, “Meih yiem haaix daaih?”
 Ninh dau “Yie yiem I^saa^laa^en Mienh nyei ciangv biaux cuotv daaih.”
4Ndaawitv aengx naaic ninh, “Tov meih mbuox yie, sic hnangv haaix nor?”
 Ninh dau gorngv, “Baeqc fingx yiem mborqv jaax gu'nyuoz biaux, yaac maaih mienh zuqc daix daic camv. Saulo caux ninh nyei dorn, Yo^naa^taan, yaac daic mi'aqv.”
5Ndaawitv naaic douc fienx nyei mienh lunx mienh, “Meih hnangv haaix nor hiuv duqv Saulo caux ninh nyei dorn, Yo^naa^taan, daic?”
6Douc fienx nyei mienh lunx mienh gorngv, “Yie jang-jang taux Gin^mbo^aa Mbong, buatc Saulo mbaapv jienv ninh nyei cang. Mborqv jaax cie caux geh maaz baeng zunc jienv ninh daaih fatv aqv. 7Ninh huin nzuonx mangc buatc yie ziouc qaqv heuc yie. Yie gorngv, ‘Yie yiem naaiv oc.’
8“Ninh naaic yie, ‘Meih haaix dauh?’
 “Yie dau, ‘Yie se Aa^maa^lekv Mienh.’
9“Ninh gorngv, ‘Tov meih daaih souv yie ga'hlen daix yie daic, weic zuqc yie zuqc siang, mun haic, mv baac yie corc maiv daic.’
10“Yie ziouc mingh souv jienv ninh nyei ga'hlen daix daic ninh weic zuqc yie hiuv dingc ninh king njiec nor, maiv haih nangh aqv. Yie ziouc muonx ninh nyei hungh ningv yaac zorqv buoz nyei jiemh dorh daaih jiu bun meih, yie nyei ziouv.”
11Ndaawitv ziouc ⟨betv ninh nyei lui.⟩ Gan ninh wuov deix mienh yaac fih hnangv nyei zoux. 12Ninh mbuo nzauh nyiemv, zei maiv nyanc haaix nyungc taux lungh maanz-hmuangx. Ninh mbuo hnangv naaiv nor zoux weic Saulo caux ninh nyei dorn, Yo^naa^taan, yaac weic Ziouv nyei baeqc fingx caux I^saa^laa^en Mienh nyei zeiv-fun zuqc nzuqc ndaauv daix daic.
13Ndaawitv naaic douc fienx wuov dauh mienh lunx mienh, “Meih yiem haaix daaih?”
 Ninh dau, “Yie se yiem deic-bung, ganh fingx mienh nyei dorn, se Aa^maa^lekv Mienh.”
14Ndaawitv gorngv, “Meih weic haaix diuc maiv gamh nziex sung buoz daix Ziouv longc youh orn daaih nyei mienh?”
15Ndaawitv ziouc heuc yietc dauh yiem wuov nyei mienh lunx mienh daaih, gorngv mbuox ninh, “Meih mingh daix ninh maah!” Ninh ziouc daix daic wuov dauh mienh. 16Ndaawitv gorngv mbuox ninh, “Meih daix mienh nyei zuiz meih ganh oix zuqc ndaam-dorng, weic zuqc meih ganh nyei nzuih zoux zorng-zengx gorngv, ‘Yie daix Ziouv longc youh orn daaih nyei mienh.’+”

Ndaawitv Weic Saulo Caux Yo^naa^taan Baaux Nzauh Nyiemv Nyei Nzung

17Ndaawitv weic Saulo caux Saulo nyei dorn, Yo^naa^taan, baaux naaiv diuh nzauh nyiemv nyei nzung. 18Ndaawitv heuc zorqv naaiv diuh nzung njaaux Yu^ndaa Mienh. Nzung fiev jienv Yaasaa nyei Sou. Nzung gorngv,
  19“O I^saa^laa^en Mienh aac,
  meih nyei bieiv zeiv yiem meih nyei dorngx zuqc daix daic mi'aqv.
   Meih nyei mienh henv mienh daic mi'aqv.
  20“Yiem Gatc maiv dungx gorngv naaiv deix sic,
   yaac maiv dungx yiem Atc^ke^lon nyei hei-horngc zunh.
  Nziex Fi^li^saa^die Mienh nyei sieqv njien-youh,
   nzauh heix maiv ⟨jiex gaatv nyei leiz⟩ wuov deix mienh nyei sieqv orn-lorqc.
  21“Gin^mbo^aa Mbong-Aiv aac,
   tov maiv dungx maaih mbiungc fai maaih mbiungc-suiv njoux meih.
   Tov maiv dungx bun meih nyei lingh deic cuotv gaeng-zuangx zoux fongc horc nyei ga'naaiv,
  weic zuqc mienh henv mienh nyei torngv-baaih yiem wuov zuqc maaih uix.
   Saulo nyei torngv-baaih maiv duqv aengx nzaatv youh.
  22Yiem zuqc daix daic nyei mienh nyei nziaamv,
   yiem mienh henv mienh nyei hmei,
  Yo^naa^taan nyei juang-zinx nyei forng-cang maiv daaux nqaang,
  Saulo nyei nzuqc ndaauv yaac maiv zeiz baeqc baeqc nzuonx.
  23“Saulo caux Yo^naa^taan aah!
   Mienh hnamv yaac oix nyei.
  Maiv gunv ziangh fai daic,
   ninh mbuo maiv leih nqoi doic.
  Ninh mbuo i dauh gauh siepv domh jaangv,
   yaac gauh henv jiex sienh.
  24“I^saa^laa^en nyei sieqv aah!
   Oix zuqc weic Saulo nzauh nyiemv.
  Ninh bun meih mbuo zuqv setv siqv nyiemz nyei ciouh dunc,
   bun meih mbuo nyei lui-houx maaih jiem nyei siou-setv zorng.
  25“Mienh henv mienh yiem mborqv jaax ciangv
   king njiec daic mi'aqv.
  Yo^naa^taan yiem I^saa^laa^en hlang nyei dorngx zuqc daix daic.
  26Yie nyei gorx, Yo^naa^taan aac,
   yie weic meih hnyouv mun.
   Yie gengh hnamv haic, jangx haic meih.
  Meih hnamv yie nyei jauv za'gengh mbuoqc horngh haic,
   zungv jiex ndaangc m'sieqv dorn hnamv nyei.
  27“Mienh henv mienh king njiec daic mi'aqv.
   Mborqv jaax nyei wuoqc ginc yaac zuqc mietc mi'aqv.”