1

Hungh Maac Maiv Muangx Hungh Diex Nyei Waac

1Naaiv deix sic cuotv doix zuqc Aa^haa^su^e^latv zoux hungh nyei ziangh hoc. Ninh gunv yietc baeqv nyic ziepc cietv norm saengv, yiem In^ndie Guoqv gunv taux E^ti^o^bie Guoqv. 2Wuov zanc Aa^haa^su^e^latv Hungh yiem Susaax Domh Zingh nyei hungh dinc. 3Ninh zoux hungh da'faam hnyangx wuov hnyangx, ninh weic ninh nyei domh jien fiuv-jien caux zoux hlo nyei mienh mbenc norm domh yinh. Besie caux Mi^ndie nyei baeng-bieiv caux norm-norm saengv nyei saengv-ziouv caux zoux hlo nyei mienh yaac daaih.
4Hungh diex zorqv ninh nyei guoqv nyei zinh zoih siou-setv caux longx jiex, nzueic jiex, njang-laangc jiex nyei ga'naaiv bun mienh mangc buangv yietc baeqv betv ziepc hnoi. 5Naaiv deix hnoi jiex liuz, hungh diex yiem ninh nyei hungh dinc nyei huingx, laatc gu'nyuoz, weic Susaax Domh Zingh zoux hlo zoux faix nyei mienh aengx mbenc norm yinh buangv siec hnoi. 6Yiem wuov huingx maaih buic-ndie-baeqc caux ndie-mbuov corng jienv, yaac longc la'maah hlaang-baeqc caux luoqc bangc la'bieiv-nzueic nyei ndiouh nyei nyaanh kuing nyatv jienv. Maaih jiem-coux, nyaanh coux. Ga'ndiev ndau yaac dimc jienv jaaix haic, nzueic haic nyei la'bieiv biangh biangh wuov. Maaih la'bieiv-baeqc, la'bieiv-siqv, la'bieiv-zou caux ziex nyungc jaaix haic nyei la'bieiv. 7Maaih jiem-zaanv weic zaangh a'ngunc diuv hopv. Zaanv yietc norm caux yietc norm yaac maiv fih hnangv. A'ngunc diuv yaac maaih camv, ziux hungh diex hnyouv jangv mbenc bun zuangx mienh. 8Hopv nyei ziangh hoc ziux leiz hopv, maiv aapv haaix dauh, weic zuqc hungh diex paaiv ziangx ciev diuv mienh bun dauh dauh mienh sueih eix hopv.
9Watv^qaa^ti Hungh Maac yaac yiem Aa^haa^su^e^latv Hungh nyei hungh dinc weic m'sieqv dorn mbenc norm yinh.
10Da'cietv hnoi wuov hnoi, Aa^haa^su^e^latv hopv gau diuv njien-youh haic, ziouc paaiv fu-sux ninh wuov deix siec dauh jien, Me^hu^maan, Mbitc^taa, Haan^mbo^naa, Mbikc^taa, Aa^mbakc^taa, Zetaa caux Kaankaatv, mingh 11dorh Watv^qaa^ti Hungh Maac daaih. Ninh oix zuqc ndongx jienv ninh nyei hungh maac nyei hungh ningv yiem hungh diex nyei nza'hmien bun zoux hlo nyei mienh caux baeqc fingx mangc ninh ndongc haaix nzueic, weic zuqc hungh maac za'gengh! ziangh duqv nzueic haic. 12Wuov deix jien dorh hungh diex nyei waac mingh mbuox hungh maac mv baac Watv^qaa^ti Hungh Maac ngaengc jienv maiv kangv mingh. Hungh diex ziouc qiex jiez! haic hnangv oix njopc douz nor.
13Ziux leiz-fingx, hungh diex caux hiuv duqv doz-leiz toux nyei dunx sic mienh caangh laangh. Ninh ziouc caux naaiv deix maaih cong-mengh hiuv duqv doz-leiz nyei mienh caangh laangh, 14se caux gauh nitv hungh diex fatv wuov deix zoux hlo nyei mienh Kaan^se^naa, Qetaa, Atc^maa^taa, Taansitv, Meletv, Maan^se^naa caux Me^mu^kaan. Naaiv deix siec laanh yiem Besie caux Mi^ndie Guoqv zoux gauh hlo jiex nyei domh jien yaac maaih leiz duqv yiem hungh diex nyei nza'hmien.
15Hungh diex naaic ninh mbuo, “Ziux doz-leiz oix zuqc hnangv haaix nor zoux bun Watv^qaa^ti Hungh Maac? Yie, Aa^haa^su^e^latv Hungh, paaiv jien mingh heuc ninh daaih, ninh yaac maiv muangx yie nyei waac.”
16Me^mu^kaan ziouc dorng jienv hungh diex caux zuangx jien dau, “Watv^qaa^ti Hungh Maac maiv daan dorngc hungh diex ganh hnangv. Ninh yaac zoux dorngc zuangx zoux hlo nyei mienh caux hungh diex gunv norm-norm saengv nyei baeqc fingx, 17weic zuqc hungh maac zoux nyei sic oix sing taux dauh dauh m'sieqv dorn nyei m'normh. Ninh mbuo ziouc mangc piex ninh mbuo nyei nqox aqv. Ninh mbuo oix gorngv, ‘Aa^haa^su^e^latv Hungh paaiv jien dorh Watv^qaa^ti Hungh Maac daaih yiem ninh nyei nza'hmien, mv baac hungh maac ngaengc jienv maiv mingh.’ 18Ih hnoi haaix dauh Besie caux Mi^ndie Guoqv zoux hlo nyei mienh nyei m'sieqv dorn haiz liuz hungh maac zoux nyei sic, ninh mbuo ziouc hnangv wuov nor zoux bun hungh diex nyei yietc zungv zoux hlo nyei mienh. Hnangv naaic ziouc maaih mangc piex nyei sic caux qiex jiez nyei sic cuotv camv.
19Se gorngv horpc hungh diex nyei hnyouv nor, hungh diex oix zuqc njiec lingc yaac fiev jienv Besie caux Mi^ndie Guoqv nyei leiz-latc sou, bun lingc yietc liuz maiv haih goiv yienc. Oix zuqc gorngv, yangh naaiv jiex Watv^qaa^ti Hungh Maac yietc liuz maiv duqv daaih yiem hungh diex nyei nza'hmien aqv. Zungv zuqc tuix bun ganh dauh gauh longx jiex ninh daaih zueiz ninh nyei weic. 20Hnangv naaic, hungh diex njiec nyei lingc zunh buangv ninh hlo haic, jangv haic nyei guoqv wuov zanc, zuangx m'sieqv dorn ziouc taaih ninh mbuo nyei nqox, maiv gunv zaangc horngh fai haac horngh nqox.”
21Naaiv deix waac horpc hungh diex caux ninh nyei jien nyei hnyouv. Hungh diex ziouc ei jienv Me^mu^kaan nyei za'eix zoux. 22Ninh fungx sou mingh taux ninh gunv nyei norm-norm saengv. Yietc norm saengv fiev ziux wuov norm saengv nyei nzaangc, yietc fingx yaac ziux yietc fingx nyei waac, longc gorqv-mienh nyei waac mbuox mouz dauh m'jangc dorn zoux ziouv gunv ninh ganh nyei biauv.