11
Yausua kov yeej cov vaajntxwv saab peg
1Thaus lub moos Haxau tug vaajntxwv Yanpi tau nov tej xuv nuav nwg txawm khaiv tuabneeg moog hu lub moos Mantoo tug vaajntxwv Yaunpam, hab lub moos Siloo tug vaajntxwv hab lub moos Asa tug vaajntxwv,
2hab hu cov vaajntxwv kws nyob peg toj sab saab tebchaws peg hab nyob huv Alanpa ntawm Khinelau⚓ saab nraag, hab huv tej pov roob Sefela hab huv Nafauntau kws nyob saab nub poob,
3hab hu cov Khana‑aa kws nyob saab nub tuaj hab saab nub poob, hab hu cov Amaulai, cov Hithai, cov Pelixai, cov Yenpu kws nyob peg toj sab hab cov Hivai kws nyob ntawm taw roob Hawmoo huv Mixapa tebchaws.
4Cov vaajntxwv huv tej moos hov kuj nrug puab tej tub rog huvsw tawm tuaj coob kawg le, ua tej nam paab tub rog coob npaum le tej xuab zeb ntawm ntug havtxwv, muaj neeg hab tsheb neeg ua rog coob kawg.
5Cov vaajntxwv nuav sau zog ua ke tuaj ua yeej rua ntawm lub haav dej Meloo yuav ua rog rua cov Yixayee.
6Mas Yawmsaub has rua Yausua tas, “Koj tsw xob ntshai puab le, tsua qhov pigkig lub swjhawm nuav kuv yuav muab puab taag nrho rua cov Yixayee, puab yuav raug tua tuag huvsw. Koj yuav txav puab cov neeg tej leeg rawg hab muab puab tej tsheb neeg ua rog hlawv huvsw.”
7Yausua hab nwg cov tub rog suavdawg txhad txeem plawg moog ntaus kag puab huv lub haav Meloo.
8Yawmsaub muab puab cob rua huv cov Yixayee txhais teg. Cov Yixayee tua puab hab lawv puab moog txug ncua lub tuam nroog Xaintoo hab txug Milefauma‑i, hab lawv puab moog rua saab nub tuaj moog txug lub haav Mixape, muab puab tua tuag taag tsw tseg ib tug caj sa le.
9Yausua ua rua puab lawv nraim le kws Yawmsaub has, nwg txav puab cov neeg tej leeg rawg hab hlawv tej tsheb ua rog.
10Thaus hov Yausua tig rov lug txeeb lub moos Haxau hab xuas ntaaj tua tug vaajntxwv huv lub moos hov. Ua ntej hov Haxau ua thawj kaav taag nrho tej tebchaws hov.
11Yausua puab xuas ntaaj tua txhua tug kws nyob huv lub moos hov hab ua kuas puam tsuaj taag huvsw, tsw tshuav ib tug caj sa le, hab nwg muab lub moos Haxau hlawv pov tseg.
12Yausua txeeb tau cov vaajntxwv hov tej moos huvsw hab nteg tau cov vaajntxwv hov huvsw, hab xuas ntaaj tua ua kuas puam tsuaj taag huvsw lawv le Mauxe kws yog Yawmsaub tug tub qhe has ca lawd.
13Tassws tej moos kws nyob sau tej lub nyuas pov roob mas cov Yixayee tsw muab hlawv, Yausua tsuas hlawv lub moos Haxau xwb.
14Tej hov txhua chaw kws txeeb tau huvsw ntawm tej moos hov hab tej tsaj txhu mas cov Yixayee kuj coj moog yuav ua puab tug. Puab xuas ntaaj tua txhua tug tuabneeg huvsw puam tsuaj tuag taag huvsw tsw tseg ib tug caj sa le.
15Yawmsaub has le caag rua nwg tug tub qhe Mauxe lawm Mauxe kuj has le hov rua Yausua mas Yausua ua lawv nraim. Nwg tsw tseg ib yaam daabtsw kws Yawmsaub has rua Mauxe lawd tsw ua.
Yausua txeeb lub tebchaws huvsw
16Yausua txeeb tau lub tebchaws hov huvsw le kws has nuav, yog tej toj sab hab Neke hab Kausee tebchaws huvsw, hab tej pov roob Sefela hab Alanpa hab tej toj sab hab tej nruab tag huv Yixayee,
17txwj ncua ntawm roob Halab kws sawv ntawm Xe‑i moog txug ncua Npa‑aa Kas huv lub haav Lenpanoo ntawm taw roob Hawmoo. Yausua nteg txhua tug vaajntxwv huv tej tebchaws hov ntaus hab tua pov tseg.
18Yausua ua rog rua tej vaajntxwv hov txhua tug ntev loo.
19Tsw muaj ib lub moos kws yuav nrug cov Yixayee sws raug zoo, tsuas yog tshwj cov Hivai xwb kws nyob huv lub moos Kinpe‑oo, dua le mas puab ua rog ntaus tau huvsw lug xwb.
20Vem yog Yawmsaub ua rua puab lub sab tawv sub puab txhad sawv lug ua rog rua cov Yixayee mas txhad raug ua kuas puam tsuaj huvsw, tsw tau txais kev khuvleej, tassws raug muab ua puam tsuaj ntxuav du quas lug, lawv le kws Yawmsaub has rua Mauxe.
21Thaus hov Yausua tau tuaj muab cov Anaj kws nyob peg toj sab ntxuav pov tseg kuas tawm huv Heploo, Ntenpi hab Anab hab tawm huv tej toj sab huv Yuta hab tej toj sab huv Yixayee huvsw. Yausua muab tej tuabneeg nuav hab puab tej moos ua puam tsuaj taag huvsw.
22Tsw tshuav ib tug tuabneeg Anaj nyob huv cov Yixayee lub tebchaws le, tsuas yog tshuav ib txha nyob huv Kaxa hab Ka hab Asantau.
23Ua le kws has nuav Yausua txeeb tau lub tebchaws taag nrho lawv le txhua lu lug kws Yawmsaub has rua Mauxe. Hab Yausua muab faib ua qub txeeg qub teg rua cov Yixayee lawv le puab cov quas xeem le feem. Mas lub tebchaws hov txhad su tsw ua rog lawm.
11
Yausuas Tua Yeej Yanpees thiab Cov Tuaj Yanpees Tog
1Thaum Vajntxwv Yanpees uas kav lub nroog Haxaules hnov hais tias, Yausuas thiab nws cov tubrog tua yeej ntau lub nroog lawm, nws xa xov mus rau Vajntxwv Yaunpaj uas kav lub nroog Madoos, tus vajntxwv uas kav lub nroog Simeloos thiab tus vajntxwv uas kav lub nroog Akisas,
2tus vajntxwv uas nyob saum lub laj roob sab qaumteb, tus vajntxwv uas nyob hauv lub Hav Yauladees ntawm Hiavtxwv Kalilais sab qabteb, tus vajntxwv uas nyob ntawm taw roob thiab tus vajntxwv uas nyob ntawm ntug hiavtxwv ze lub nroog Daules,
3thiab Vajntxwv Yanpees hais mus rau cov Kana-as uas nyob raws ob sab ntug Dej Yaudalees, cov Amaules, cov Hitis, cov Pelixes, cov Yenpus uas nyob saum lub laj roob thiab cov Hivis uas nyob ntawm taw roob Helemoos hauv tebchaws Mixepas huv tibsi.
4Lawv coj lawv cov tubrog coob heev tuaj npaum li tej suabzeb ntawm ntug hiavtxwv. Lawv muaj nees thiab tsheb nees ntau kawg li.
5Tagnrho cov vajntxwv no sib sau ua ke tuaj tsuam yeej rau ntawm ntug dej Meloos tua cov Yixalayees.
6Tus TSWV hais rau Yausuas hais tias, “Koj tsis txhob ntshai lawv. Tagkis tav lub caij no, kuv yuav pab cov Yixalayees tua kom lawv tuag tas huv tibsi. Tom qab ntawd koj cia li muab lawv tej nees txiav leegraws thiab hlawv lawv tej tsheb nees.”
7Yausuas thiab nws cov tubrog mus tua lawv cov yeebncuab ntawm tus dej Meloos thaum lawv tsis nco ceevfaj.
8Tus TSWV twb muab cov yeebncuab cob rau cov Yixalayees tes lawm; lawv thiaj caum cov yeebncuab tua mus txog ntawm Milefus Mees thiab Xidoos uas nyob sab qaumteb, thiab mus txog rau ntawm lub hav Mixepas uas nyob sab hnubtuaj. Lawv sib tua mus txog thaum cov yeebncuab tuag tas.
9Yausuas ua rau cov yeebncuab raws li tus TSWV hais rau nws lawm. Yausuas thiaj muab cov yeebncuab tej nees txiav leegraws thiab hlawv lawv tej tsheb nees.
10Yausuas rov los txeeb tau lub nroog Haxaules thiab muab tus vajntxwv uas kav lub nroog ntawd tua. (Thaum ntawd lub nroog Haxaules muaj zog dua lwm lub nroog hauv lub tebchaws ntawd.)
11Lawv muab txhua tus uas nyob hauv lub nroog ntawd tua tuag tas tsis tseg ib tug seem li thiab muab lub nroog hlawv.
12Yausuas tua yeej cov vajntxwv, txeeb tau lawv tej nroog, thiab muab txhua tus neeg tua tuag tas huv tibsi raws li tus TSWV tus tubtxib Mauxes tau hais tseg lawm.
13Tiamsis cov Yixalayees tsis hlawv tej nroog uas nyob saum tej pov roob li, tsuas yog lub nroog Haxaules uas Yausuas muab hlawv lawm xwb.
14Cov Yixalayees nqa tej khoom muaj nqis thiab coj tej tsiaj txhu hauv lub nroog ntawd mus ua lawv tug. Tiamsis lawv muab cov neeg tua tuag tas tsis tseg ib tug seem li.
15Tus TSWV hais rau nws tus tubtxib Mauxes, kom Mauxes hais rau Yausuas thiab Yausuas ua raws li tej lus ntawd. Yausuas thiaj ua txhua yam raws li tej lus uas tus TSWV tau hais rau Mauxes lawm.
Tej Cheebtsam uas Yausuas Txeeb Tau
16Yausuas txeeb tau tagnrho lub tebchaws: cheebtsam uas ua laj roob thiab taw roob, tsis hais qabteb thiab qaumteb tagnrho cheebtsam Nkausees, cheebtsam mojsab qhua uas nyob sab qabteb, thiab tagnrho lub Hav Yauladees.
17-18Cheebtsam sab qabteb txij ntua ntawm lub Roob Halaj uas ze rau ntawm Edoos, thiab sab qaumteb mus txog ntua Npankas hauv lub hav Lenpanoos uas nyob ntawm lub Roob Helemoos sab qabteb. Yausuas ua rog nrog cov vajntxwv uas kav tej cheebtsam ntawd tau ntev loo, tiamsis thaum kawg Yausuas ntes tau cov vajntxwv ntawd thiab muab tua povtseg huv tibsi lawm.
19Tsuas yog tshuav lub nroog Nkinpe-oos uas cov Hivis ib txhia uas nrog cov Yixalayees cog phoojywg thiaj tsis raug tua xwb. Dua li lwm lub nroog raug tua thiab raug rhuav puastsuaj tas.
20Tus TSWV ua kom lawv muaj lub siab tawv tuaj tua cov Yixalayees, yog li ntawd, cov Yixalayees thiaj tsis hlub tshua lawv thiab muab lawv tua puastsuaj tas. Tej no muaj raws li tus TSWV hais rau Mauxes lawm.
21Thaum ntawd Yausuas mus tua thiab rhuav cov neeg Anakees uas loj thiab siab heev uas nyob saum tej laj roob, hauv lub nroog Henploos, lub nroog Denpis, lub nroog Anas thiab tagnrho saum tej laj roob uas cov Yudas thiab cov Yixalayees nyob. Yausuas tua cov neeg thiab rhuav lawv tej nroog puastsuaj tas huv tibsi.
22Tsis tshuav cov Anakees ib tug seem nyob hauv cov Yixalayees lub tebchaws li; tsuas tshuav leej puav nyob hauv Nkaxas, Nkathas thiab Asedaus xwb.
23Yausuas txeeb tau tagnrho lub tebchaws raws li tus TSWV hais tseg rau Mauxes lawm. Yausuas muab lub tebchaws faib rau cov Yixalayees txhua xeem, nyias nyob muaj nyias cheebtsam av.
Cov Yixalayees thiaj tau nyob thajyeeb lug tsis ua rog li lawm.