21
Qhuas Vajtswv vim yog twb cawm dim yeeb ncuab
Sau rau tus thawj coj hu nkauj. Yog Davi zaj nkauj.
1Au Yawmsaub, vajntxwv xyiv fab
rau lub zog uas koj pub,
nws zoo siab xyiv fab heev
rau qhov uas koj pab.
2Koj pub raws li nws lub siab ntshaw,
thiab tsis nkaum tes
rau tej uas nws lub qhov ncauj thov.
3Rau qhov koj coj koob hmoov zoo
los ntsib nws,
koj muab lub mom vajntxwv uas tseem kub
rau nws ntoo saum taubhau.
4Nws thov txojsia mas koj kuj pub rau nws,
tau siav loj siav ntev mus ib txhis tsis kawg.
5Nws lub koob meej loj vim yog koj pab,
koj pub nws muaj meej nthawb
thiab hwjchim meej mom.
6Koj yeej pub kom nws tau koob hmoov
mus ib txhis,
thiab pub rau nws tau zoo siab xyiv fab
vim koj nrog nraim nws.
7Vajntxwv tso siab rau Yawmsaub.
Vim muaj tus uas Loj Dua Ntais
txojkev hlub ruaj khov
mas vajntxwv yuav nyob ruaj
tsis ua zog.
8Vajntxwv, koj txhais tes yuav ntes tau
koj cov yeeb ncuab huvsi,
koj txhais tes xis yuav ntes tau
cov uas ntxub koj.
9Thaum koj tshwm plaws los
koj yuav ua rau lawv kub hnyiab
cuag li nyob hauv qhov txos.
Yawmsaub yuav nqos kiag lawv
ua npau taws vog,
thiab hluavtaws yuav hlawv lawv
puam tsuaj tag.
10Koj yuav ua rau lawv tej tub ki
puam tsuaj tag hauv ntiajteb
thiab muab lawv caj ces ua tu noob nrho
hauv ib tsoom neeg.
11Txawm yog lawv ntaus tswvyim phem rau koj
thiab lawv xav tej zaj phem
los lawv yuav ua tsis tau kom tiav.
12Rau qhov koj yuav ua rau lawv khiav mus,
koj yuav twb hneev
ncaj nkaus rau lawv ntsej muag.
13Au Yawmsaub, peb txhawb nqa koj lub zog,
peb yuav hu nkauj
thiab qhuas koj lub hwjchim.
21
Qhuas Vaajtswv vem yog tub cawm dim yeeb ncuab
Sau rua tug thawj coj hu nkauj. Yog Tavi zaaj nkauj.
1Au Yawmsaub, vaajntxwv xyiv faab
rua tug zug kws koj pub,
nwg zoo sab xyiv faab heev
tsua qhov kws koj paab.
2Koj pub lawv le nwg lub sab ntshaw,
hab tsw nkaum teg
rua tej kws nwg lub qhov ncauj thov.
3Tsua qhov koj coj koob moov zoo
lug ntswb nwg,
koj muab lub mom vaajntxwv kws tseem kub
ua rua nwg ntoo sau taubhau.
4Nwg thov txujsa mas koj kuj pub rua nwg,
tau sav luj sav ntev moog ib txhws tsw kawg.
5Nwg lub koob meej luj vem yog koj paab,
koj pub nwg muaj meej thawb
hab fwjchim meej mom.
6Koj yeej pub kuas nwg tau koob moov
moog ib txhws,
hab pub rua nwg tau zoo sab xyiv faab
vem koj nrug nraim nwg.
7Vaajntxwv tso sab rua Yawmsaub.
Vem muaj tug kws Luj Dua Ndais
txujkev hlub ruaj khov
mas vaajntxwv yuav nyob ruaj tsw ua zug.
8Vaajntxwv, koj txhais teg yuav nteg tau
koj cov yeeb ncuab huvsw,
koj txhais teg xws yuav nteg tau
cov kws ntxub koj.
9Thaus koj tshwm plawg lug
koj yuav ua rua puab kub nyab
cuag le nyob huv qhov txus.
Yawmsaub yuav nqog hlo puab
ua npau tawg quas vog,
hab suavtawg yuav hlawv puab
puam tsuaj taag.
10Koj yuav ua rua puab tej tub ki
puam tsuaj taag huv nplajteb
hab muab puab caaj ceg
ua tu noob nrho huv ib tsoom tuabneeg.
11Txawm yog puab ntaus tswvyim phem rua koj
hab puab xaav tej zaaj phem
los puab yuav ua tsw tau kuas tav.
12Tsua qhov koj yuav ua rua puab tswv moog,
koj yuav twb neev
ncaaj nkaus rua puab ntsej muag.
13Au Yawmsaub, peb txhawb nqaa koj tug zug,
peb yuav hu nkauj hab qhuas koj tug fwjchim.