20

Davi txeeb lub nroog Lanpa

(2Xmy. 11:1, 12:26-31)

 1Thaum txog lub caij ntuj qhua uas yog lub caij uas tej vajntxwv pheej tawm mus ua rog, Yau‑a coj tub rog mus ntaus yeej cov Asmoo lub tebchaws, thiab vij lub nroog Lanpa cia. Tiamsis Davi nyob hauv Yeluxalees xwb. Mas Yau‑a ntaus tau lub nroog Lanpa thiab muab lub nroog ntawd ua puam tsuaj tag. 2Davi hle lub mom kub ntawm lawv tus vajntxwv lub taubhau los. Davi muab luj mas muaj kub hnyav ib tala⚓ thiab muaj ib lub qe zeb hlaws muaj nqes nyob rau hauv. Lawv muab lub mom kub ntawd rau Davi ntoo. Davi sau tej qhov txhia chaw uas txeeb tau hauv lub nroog ntawd ntau kawg li coj mus. 3Nws kuav cov neeg hauv lub nroog ntawd tawm los thiab yuam kom lawv xuas kaw xuas hlau xuas taus ua haujlwm. Davi ua ib yam li no rau cov Asmoo txhua lub moos huvsi. Ces Davi thiab cov tub rog sawvdaws rov mus rau hauv Yeluxalees.

Ua rog rau cov Filixatee

(2Xmy. 21:15-22)

 4Dhau ntawd rov qab ua rog rau cov Filixatee ntawm lub moos Kexaw. Zaum ntawd Xinpekhai uas yog Husa cum tua tau Xipai uas yog neeg loj loj siab siab li noob. Mas cov Filixatee thiaj swb lawm. 5Thiab rov qab ua rog rau cov Filixatee. Mas zaum ntawd Ya‑i tus tub Eehanas tau tua Lami uas yog Kaulia uas yog neeg Ka tus kwv lawm. Lami rab hmuv tus ko luaj li rab nqos ntos ntaub. 6Thiab rov qab ua rog ntawm lub moos Ka, yog lub moos uas muaj ib tug txivneej loj kawg li, muaj rau tus ntiv tes thiab rau tus ntiv taw huvsi muaj nees nkaum plaub tug ntiv tes ntiv taw. Nws yog cov neeg loj loj siab siab li noob. 7Thaum nws twv ntxhias cov Yixayee mas Davi tus tijlaug Sime‑i tus tub Yaunathas kuj muab nws tua kiag. 8Cov neeg no yog cov neeg loj loj siab siab hauv lub moos Ka li noob. Lawv tuag tag rau Davi tes thiab tuag rau Davi cov tub teg tub taws tes.

20

Tavi txeeb lub nroog Lanpa

(2Xmy. 11:1, 12:26-31)

 1Thaus txug lub caij ntuj qhua kws yog lub caij kws tej vaajntxwv pheej tawm moog ua rog, Yau‑a coj tub rog moog ntaus yeej cov Aamoo lub tebchaws, hab vej lub nroog Lanpa ca. Tassws Tavi nyob huv Yeluxalee xwb. Mas Yau‑a ntaus tau lub nroog Lanpa hab muab lub nroog hov ua puam tsuaj taag. 2Tavi hle lub mom kub ntawm puab tug vaajntxwv lub taubhau lug. Tavi muab kiv mas muaj kub nyaav ib talaa⚓ hab muaj ib lub qai zeb hlaws muaj nqes nyob rua huv. Puab muab lub mom kub hov rua Tavi ntoo. Tavi sau tej hov txhua chaw kws txeeb tau huv lub nroog hov ntau kawg le coj moog. 3Nwg kuav cov tuabneeg huv lub nroog hov tawm lug hab yuam kuas puab xuas kaw xuas hlau xuas taus ua num. Tavi ua ib yaam le nuav rua cov Aamoo txhua lub moos huvsw. Tes Tavi hab cov tub rog suavdawg rov moog rua huv Yeluxalee.

Ua rog rua cov Filixatee

(2Xmy. 21:15-22)

 4Dhau hov rov qaab ua rog rua cov Filixatee ntawm lub moos Kexaw. Zag hov Xinpekhai kws yog Husa cum tua tau Xipai kws yog tuabneeg luj luj sab sab le noob. Mas cov Filixatee txhad swb lawm. 5Hab rov qaab ua rog rua cov Filixatee. Mas zag hov Ya‑i tug tub Eehanaa tau tua Lami kws yog Kaulia kws yog tuabneeg Ka tug kwv lawm. Lami raab muv tug ku luaj le raab nqog ntus ntaub. 6Hab rov qaab ua rog ntawm lub moos Ka, yog lub moos kws muaj ib tug txwvneej luj kawg le, muaj rau tug ntiv teg hab rau tug ntiv taw huvsw muaj neeg nkaum plaub tug ntiv teg ntiv taw. Nwg yog cov tuabneeg luj luj sab sab le noob. 7Thaus nwg twv ntxhas cov Yixayee mas Tavi tug tijlaug Sime‑i tug tub Yaunathaa kuj muab nwg tua kag. 8Cov tuabneeg nuav yog cov tuabneeg luj luj sab sab huv lub moos Ka le noob. Puab tuag taag rua Tavi teg hab tuag rua Tavi cov tub teg tub taw teg.