4
Rooj ntug qheb
1Dhau ntawd kuv saib pum ib lub qhov rooj sau ntuj ceeb tsheej qheb quas lug ca. Hab lub suab kws kuv tau nov ntawd has rua kuv ib yaam le lub suab raaj xyu has tas, “Ca le nce tuaj sau nuav, kuv yuav qha rua koj paub txug tej kws yuav tsum muaj tshwm lug rua thaus dhau nuav lawd.”
2Taamswm ntawd Vaaj Ntsuj Plig kaav taag nrho kuv lub sab, kuv txawm pum muaj ib lub zwm txwv nyob sau ntuj hab muaj ib tug nyob tsawg sau lub zwm txwv ntawd.
3Tug kws nyob tsawg hov saib mas ci zoo le qai zeb hlaws daaj hab qai zeb hlaws lab, hab muaj zaaj sawv puag ncig lub zwm txwv hov ci zoo le qai zeb hlaws ntsuab txho.
4Hab ib ncig lub zwm txwv ntawd muaj neeg nkaum plaub lub zwm txwv, hab muaj neeg nkaum plaub tug kev txwj quas laug nyob sau tej zwm txwv hov. Puab naav tsoog tsho dawb paug hab ntoo lub mom kub sau taubhau.
5Muaj tsag lig xub laim lab quas vog hab xub nroo xub nthe tawm ntawm lub zwm txwv hov tuaj, hab muaj xyaa teg tsau cig laam lug rua ntawm lub zwm txwv ntawd saab xubndag. Tej teg tsau hov yog Vaajtswv xyaa tug ntsuj plig,
6hab ncaaj ntawm lub zwm txwv xubndag muaj ib yaam zoo le havtxwv ntshab le av ci yaam le qai zeb dawb.
Ib ncig ntawm ob saab lub zwm txwv muaj plaub tug tsaj caj sa, muaj qhov muag puv nkaus saab nraus qaum hab saab xubndag.
7Tej tsaj caj sa hov tug ib zoo le tsuv ntxhuav, tug ob zoo le txwv nyuj, tug peb muaj ntsej muag le tuabneeg, tug plaub zoo le ib tug daav kws saamswm yaa.
8Plaub tug tsaj caj sa hov txhua tug muaj rau phob kauj tis, hab muaj qhov muag puv nkaus ib ncig saab sau saab huv, hab puab qw nruab nub mo ntuj tsw tu has tas,
“Dawb huv, dawb huv, dawb huv
yog Vaajtswv kws muaj fwjchim luj kawg nkaus,
yog tug kws ib txwm muaj nyob
hab muaj txujsa nyob hab tseed yuav lug.”
9Thaus tej tsaj caj sa hu nkauj qhuas hab fwm hab ua tsaug tug kws nyob tsawg sau lub zwm txwv, kws yog tug muaj txujsa nyob moog ib txhws tsw kawg,
10tes neeg nkaum plaub tug kev txwj quas laug hov txawm khwb nkaus rua ntawm tug kws nyob sau lub zwm txwv xubndag hab pe hawm tug kws muaj txujsa nyob moog ib txhws tsw kawg, hab hle puab lub mom kub txawb rua ntawm lub zwm txwv lub xubndag, hab has tas,
11“Au tug Tswv kws yog peb tug Vaajtswv,
koj tswm nyog tau meej mom
hab koob meej hab fwjchim luj kawg,
vem koj tswm ib puas tsaav yaam,
hab ib puas tsaav yaam muaj nyob
hab raug tswm lug lawv le koj tub xaav tseg.”
4
Rooj Ntug Ceebtsheej Qhib
1Tom qab ntawd kuv rov ua yogtoog pom dua ib zaj; kuv pom rooj ntug ceebtsheej qhib lug cia.
Lub suab uas thawj zaug kuv hnov hais nrov nrov rau kuv ib yam li lub suab xyu, nimno kuv rov hnov lub suab ntawd hais rau kuv hais tias, “Koj cia li tuaj saum no, kuv yuav muab tej uas yav tom ntej no yuav muaj tshwm los rau koj saib.”
2Tamsim ntawd Vaj Ntsujplig txawm los kav hlo kuv lub siab, kuv pom ib lub zwmtxwv nyob saum ntuj ceebtsheej thiab muaj ib tug zaum saum lub zwmtxwv ntawd.
3Nws lub ntsejmuag ci ib yam li cov qe zeb muaj nqis yapes thiab kanelias, thiab muaj ib tug duab zaj sawv vij lub zwmtxwv. Tus duab zaj ntawd ntsuab ib yam li tej qe zeb muaj nqis uas hu ua emelas.
4Muaj nees nkaum plaub lub zwmtxwv nyob puagncig lub zwmtxwv ntawd, thiab muaj nees nkaum plaub tug txwjlaug uas hnav ris tsho dawb thiab ntoo kausmom kub zaum saum cov zwmtxwv ntawd.
5Muaj xob laim liab vog, xob quaj thiab muaj suab nrov nroo ntws ntawm lub zwmtxwv ntawd tuaj. Muaj xya tes tsau uas cig lam lug ntawm lub zwmtxwv hauv ntej. Xya tes tsau ntawd yog Vajtswv xya tus ntsujplig.
6Nyob ntawm lub zwmtxwv hauv ntej muaj ib qho zoo li hiavtxwv ci li iav pom kev tshab plaws.
Muaj plaub tug qhelunpees sawv vij lub zwmtxwv; plaub tug qhelunpees ntawd muaj qhovmuag thoob plaws sab xubntiag thiab sab tom nraubqaum huv tibsi.
7Thawj tug zoo ib yam li tus tsov ntxhuav; tus ob zoo ib yam li tus heev nyuj; tus peb lub ntsejmuag zoo ib yam li neeg lub thiab tus plaub zoo ib yam li tus dav uas tabtom ya.
8Plaub tug qhelunpees ntawd ib tug muaj rau phab tis, rau phab tis ntawd muaj qhovmuag thoob plaws sab hauv thiab sab nraud huv tibsi. Plaub tug qhelunpees ntawd hu nkauj tas hnub tas hmo hais tias,
“Tus Tswv uas yog Vajtswv tus uas muaj
hwjchim loj kawg nkaus,
yog tus dawbhuv, dawbhuv, dawbhuv, yog tus
uas ibtxwm nyob thaum ub los lawm,
yog tus uas nyob nimno thiab yog tus uas yuav
los yav tom ntej.”
9Txhua zaus uas plaub tug qhelunpees ntawd hu nkauj qhuas tus uas muaj sia nyob mus ibtxhis uas zaum saum lub zwmtxwv thiab ua nws tsaug,
10ces nees nkaum plaub tug txwjlaug txawm txhos caug ntua pehawm tus uas muaj sia nyob mus ibtxhis uas zaum saum lub zwmtxwv, thiab lawv hle lawv tej kausmom kub tso rau ntawm lub zwmtxwv hauv ntej, thiab lawv hais tias,
11“Tus Tswv uas yog peb sawvdaws tus Vajtswv!
Koj yog tus uas muaj hwjchim,
tsimnyog peb sawvdaws hwm koj thiab ua rau koj tau koob meej.
Rau qhov koj yog tus uas tsim ib puas tsav yam huv tibsi;
koj pom zoo tsim tej ntawd thiab pub tej ntawd muaj sia nyob.”