24
Ob lub tawb txwv cua
1Thaus vaajntxwv Nenpukhanexa huv Npanpiloo tub nteg Yehauyakhi tug tub Yekhauniya kws ua Yuta tug vaajntxwv coj tawm huv Yeluxalee ua ke nrug Yuta cov thawj hab tej Kws txawj txhua yaam hab tej Kws tooj Kws hlau, coj moog rua Npanpiloo lawm, Yawmsaub rov qha ib zaaj yug quas toog rua kuv pum le nuav, pum muaj ob lub tawb txwv cua txawb rua ntawm hauv ntej Yawmsaub lub tuam tsev.
2Ib lub tawb muaj cov txwv cua kws zoo heev ib yaam le cov txwv cua kws sav thawj phaum, tassws ib lub tawb muaj cov txwv cua kws tsw zoo hlo le, tsw zoo noj le.
3Mas Yawmsaub has rua kuv tas, “Yelemi, koj pum daabtsw?” Kuv teb tas, “Kuv pum cov txwv cua, pum cov kws zoo kuj zoo kawg le, cov kws phem kuj phem kawg le, tsw zoo noj le.”
4Mas Yawmsaub has tuaj rua kuv tas,
5“Yawmsaub kws yog Yixayee tug Vaajtswv has le nuav tas, ‘Kuj ib yaam le cov txwv cua kws zoo nuav ntaag, kuv yuav suav cov kws raug muab nteg coj tawm huv Yuta lawm yog cov zoo, yog cov kws kuv xaa tawm ntawm qhov chaw nuav moog rua cov Kheentia lub tebchaws.
6Kuv yuav saib xyuas puab kuas puab tau zoo, hab kuv yuav coj puab rov qaab lug rua lub tebchaws nuav. Kuv yuav tsaa puab lub neej kuas sawv, hab kuv yuav tsw muab rhuav lawm. Kuv yuav muab puab cog, yuav tsw muab puab dob lawm.
7Kuv yuav pub puab muaj lub sab kws xaav paub tas kuv yog Yawmsaub. Puab yuav ua kuv haiv tuabneeg, hab kuv yuav ua puab tug Vaajtswv, vem puab yuav rov lug cuag kuv kawg sab kawg ntsws.’ ”
8“Hab Yawmsaub has le nuav tas, ‘Zoo yaam le ua rua cov txwv cua tsw zoo kws noj tsw tau ntawd, kuv yuav ua rua Yuta tug vaajntxwv Xentekhiya hab nwg cov tub teg tub taw hab cov tuabneeg Yeluxalee kws tseed tshuav nyob huv lub tebchaws nuav hab cov kws nyob huv Iyi tebchaws ib yaam le ntawd.
9Kuv yuav ua rua puab ua lub chaw kws ib tsoom tebchaws huv nplajteb suavdawg ceeb hab ntshai, puab yuav raug luas thuaj, tag luas ncauj luas lu, raug luas luag hab ua lu lug tsawm foom rua huv txhua qhov chaw kws kuv lawv puab moog nyob.
10Kuv yuav tso nav ntaaj nav rag hab kev tshaib nqhes hab mob kis lug raug puab moog txug thaus puab puam tsuaj taag huvsw huv lub tebchaws kws kuv muab pub rua puab hab puab tej laug.’ ”
24
Ob lub tawb txiv cev
1Thaum vajntxwv Nenpukhanexa hauv Npanpiloo twb ntes Yehauyakhi tus tub Yekhauniya uas ua Yuda tus vajntxwv coj tawm hauv Yeluxalees ua ke nrog Yuda cov thawj thiab tej Kws txawj txhua yam thiab tej Kws tooj Kws hlau, coj mus rau Npanpiloo lawm, Yawmsaub rov qhia ib zaj yog toog rau kuv pom li no, pom muaj ob lub tawb txiv cev txawb rau ntawm hauv ntej Yawmsaub lub tuam tsev.
2Ib lub tawb muaj cov txiv cev uas zoo heev ib yam li cov txiv cev uas siav thawj phaum, tiamsis ib lub tawb muaj cov txiv cev uas tsis zoo kiag li, tsis zoo noj li.
3Mas Yawmsaub hais rau kuv tias, “Yelemi, koj pom dabtsi?” Kuv teb tias, “Kuv pom cov txiv cev, pom cov uas zoo kuj zoo kawg li, cov uas phem kuj phem kawg li, tsis zoo noj li.”
4Mas Yawmsaub hais tuaj rau kuv tias,
5“Yawmsaub uas yog Yixayee tus Vajtswv hais li no tias, ‘Kuj ib yam li cov txiv cev uas zoo no ntag, kuv yuav suav cov uas raug muab ntes coj tawm hauv Yuda lawm yog cov zoo, yog cov uas kuv xa tawm ntawm qhov chaw no mus rau cov Kheedia lub tebchaws.
6Kuv yuav saib xyuas lawv kom lawv tau zoo, thiab kuv yuav coj lawv rov qab los rau lub tebchaws no. Kuv yuav tsa lawv lub neej kom sawv, thiab kuv yuav tsis muab rhuav lawm. Kuv yuav muab lawv cog, yuav tsis muab lawv dob lawm.
7Kuv yuav pub lawv muaj lub siab uas xav paub tias kuv yog Yawmsaub. Lawv yuav ua kuv haiv neeg, thiab kuv yuav ua lawv tus Vajtswv, vim lawv yuav rov los cuag kuv kawg siab kawg ntsws.’ ”
8“Thiab Yawmsaub hais li no tias, ‘Zoo yam li ua rau cov txiv cev tsis zoo uas noj tsis tau ntawd, kuv yuav ua rau Yuda tus vajntxwv Xedekhiya thiab nws cov tub teg tub taws thiab cov neeg Yeluxalees uas tseem tshuav nyob hauv lub tebchaws no thiab cov uas nyob hauv Iyi tebchaws ib yam li ntawd.
9Kuv yuav ua rau lawv ua lub chaw uas ib tsoom tebchaws hauv ntiajteb sawvdaws ceeb thiab ntshai, lawv yuav raug luag thuam, tiag luag ncauj luag lo, raug luag luag thiab ua lo lus tsawm foom rau hauv txhua qhov chaw uas kuv ntiab lawv mus nyob.
10Kuv yuav tso hniav ntaj hniav riam thiab kev tshaib nqhis thiab mob kis los raug lawv mus txog thaum lawv puam tsuaj tag huvsi hauv lub tebchaws uas kuv muab pub rau lawv thiab lawv tej poj koob yawm txwv.’ ”