Fiev Bun Hipv^lu Mienh Nyei Fienx
 Naaiv zeiv fienx fiev bun guanh sienx Yesu nyei Hipv^lu Mienh. Naaiv deix mienh laaix sienx Yesu gunv zoux gunv buangh zuqc mienh zoux doqc. Fiev fienx nyei mienh nzauh heix naaiv deix mienh haih cuotv Yesu, ziouc fiev daaih kuinx ninh mbuo sienx longx. Gauh longc jienv jiex, ninh oix bun mienh zieqv duqv Tin-Hungh paaiv Yesu Giduc daaih weic bun mienh haih za'gengh hiuv duqv Tin-Hungh ganh hnangv haaix nor. Ninh ziouc lengc jeiv gorngv buo nyungc jienv jiex nyei zien leiz.
 (1) Yesu Giduc zoux Tin-Hungh nyei Dorn yaac yietc liuz ziangh jienv. Ninh zuqc siouc nyei kouv naanc bun ninh hoqc linc muangx Zaangc Diex nyei waac. Weic zuqc Giduc se Tin-Hungh nyei Dorn ninh zoux gauh hlo jiex Loz-Ngaengc Waac Sou fiev jienv wuov deix zuangx douc waac mienh, yaac zoux gauh hlo zuangx fin-mienh, yaac gauh hlo Mose.
 (2) Tin-Hungh ganh gorngv Yesu zoux yietc liuz ziangh nyei sai mienh, yaac zoux gauh hlo jiex yiem Loz-Ngaengc Waac Sou gorngv wuov deix zuangx sai mienh.
 (3) Mienh sienx kaux Yesu, Tin-Hungh ziouc njoux ninh mbuo leih ndutv zuiz, maiv zuqc gamh nziex, yaac maiv zuqc daic. Zinh ndaangc Hipv^lu Mienh oix zuqc daix saeng-kuv ziec bun Tin-Hungh yaac gan camv-nyungc leiz, mv baac naaiv deix sic kungx zoux nyungc zeiv biux mengh nqa'haav hingv oix cuotv nyei sic. Ih zanc maanc mienh oix zuqc kaux Yesu cingx daaih duqv njoux.
 Ziepc yietv zaang zorqv loz-hnoi maaih mengh dauh sienx longx nyei camv-dauh I^saa^laa^en Mienh zoux nyungc zeiv kuinx doqc fienx nyei mienh sienx longx, maiv dungx cuotv Yesu. Ziepc nyeic zaang kuinx mienh oix zuqc sienx taux daauh taux mueiz, zanc-zanc mangc dingc Yesu, diev jienv nyungc-nyungc kouv caux zuqc mienh zoux doqc nyei sic. Fienx setv mueiz gorngv camv-nyungc kuinx mienh, donv mienh nyei waac.

1:1-3 Jiez gorn waac, Giduc biux mengh nzengc Tin-Hungh

1:4-2:18 Giduc zoux gauh hlo jiex zuangx fin-mienh

3:1-4:13 Giduc zoux gauh hlo jiex Mose caux Yo^su^waa

4:14-7:28 Giduc zoux gauh hlo jiex zuangx sai mienh

8:1-9:22 Giduc liepc jiez nyei ngaengc waac se gauh hlo jiex

9:23-10:39 Giduc siev ninh ganh nyei maengc ziec bun Tin-Hungh se gauh hlo jiex longc saeng-kuv ziec

11:1-12:29 Gauh longc jienv jiex se oix zuqc maaih sienx fim

13:1-25 Kuinx mienh yaac gorngv setv mueiz waac