16

Y-Yôp Ngơi Ƀrôk Ma Nau Brah Ndu Ƀư Ma Păng

1Y-Yôp plơ̆ sĭt lah: 2"Gâp tăng jêh âk nau tâm ban pônây; le rngôch khân may
 jêng phung njung leng dơm dam mâu khlay ôh.
3Nau ngơi mâu geh kô̆ mâm dĭng mâu lôch?
 Mbu moh ntrôl dĭng khân may ngơi nây?
4Gâp ŭch dơi ngơi nâm bu khân may ngơi lĕ;
 Tơlah huêng khân may ntrok ăn huêng gâp,
 Gâp dơi ngơi nduyh khân may
 tâm ban lĕ jêh ri rteh bôk ma khân may.
5Biălah nau gâp ngơi dơi ƀư katang khân may,
 jêh ri ma nau gâp ngơi bonh mra ăn hŭch nau ji khân may.
6"Nđâp tơlah gâp ngơi, nau ji gâp mâu hŭnh ôh;
 jêh ri tơlah gâp gŭ rklăk, nau ji mâu du ôh bơh gâp.
7N'hêl nanê̆ aƀaơ Brah Ndu ƀư ăn gâp rgănh jêh,
 Kôranh Brah hŏ ăn roh le rngôch ngih vâl gâp.
8Kôranh Brah hŏ ƀư ma gâp huănh
 nhop jêh, nau nây jêng nau mbơh tâm rdâng đah gâp.
 Nau rgay gâp nây jêng mbơh tâm rdâng ma gâp đŏng,
 Nduyh lah tra năp măt gâp.
9Păng nkhêk jêh gâp dôl păng
 ji nuih, jêh ri joi nau ƀư ma gâp,
 păng rchiăt sêk ŭch lơh gâp;
 nơm rlăng ma gâp uănh ntơ̆ măt ma gâp.
10Khân păng hă mbung ŭch kăp sa gâp,
 tap bom gâp ma nau uănh ntêh;
 khân păng rgum băl ŭch ƀư ma gâp.
11Brah Ndu hŏ jao gâp ma phung
 mâu chroh ôh, jêh ri mƀăr lơi gâp tâm ti phung ƀai.
12Gâp kăl e ueh mpăn, Păng lơh
 ndjơh gâp, Păng glăn trôko gâp jêh ri piăch gâp hăch rhên.
  Păng pla gâp nâm bu mut păng,
13phung djôt hăr na Păng nchueng jŭm gâp.
 Păng pănh pŭng vĕ gâp, mâu blau
 yô̆ ôh; păng ăn hŭk dak play măt gâp ta neh.
14Păng ntâp gâp bluh bah aơ rho ari.
 Rduh lơh gâp nâm bu du huê bunuyh dăng tâm lơh.
15Gâp jĭm ao kroh dâr săk jăn gâp,
 jêh ri gâp pung bôk gâp tâm neh muy.
16Muh măt gâp gŭr yor gâp nhĭm,
 jêh ri gui nau khĭt ta n'gô măt gâp;
17ƀiălah ti gâp mâu ƀư nau ƀai ôh,
 jêh ri nau gâp mbơh sơm jêng kloh rsang.
18Hơi neh, lơi brôi mham gâp!
 jêh ri ăn gâp nter ma nau kon me mâu geh nau nkân ôh.
19Aƀaơ ri ro yơh, Nơm mbơh ma
 gâp gŭ kalơ trôk, jêh ri Nơm ăn nanê̆ ngăn gâp gŭ ta kalơ.
20Phung mĭt jiăng gâp mưch ma gâp…
 Bi gâp nhĭm luh dak măt ma Brah Ndu,
21gay ma Păng king nau di ta nklang
 du huê bunuyh đah Brah Ndu,
 ta nklang kon bunuyh jêh ri nơm chiau meng păng.
22Yorlah hôm djê̆ năm mra tât, jêh nây
 gâp mra hăn trong gâp mâu mra plơ̆ sĭt đŏng ôh.