1Au Yawmsaub, thov saib rua Tavi, thov ncu txug tej kev ceblaaj txom nyem huvsw kws nwg raug. 2Nwg cog lug twv rua Yawmsaub, hab yeem lug tseg rua Yakhauj tug Vaajtswv kws muaj fwjchim luj kawg has tas, 3“Kuv yuav tsw nkaag moog rua huv kuv lub tsev lossws nkaag rua huv kuv lub txaaj pw. 4Kuv yuav tsw kheev kuv lub qhov muag tsaug zug, lossws kuv daim tawv muag qe, 5moog txug thaus kuv nrhav tau lub chaw rua Yawmsaub nyob, yog lub chaw rua Yakhauj tug Vaajtswv kws muaj fwjchim luj kawg nyob.”
6Peb tub nov txug tej nuav huv lub moos Efatha, peb tub ntswb tej nuav ntawm lub moos Ya‑a tej teb⚓ 7“Ca peb moog rua ntawm Yawmsaub lub chaw nyob, peb pe hawm rua ntawm nwg lub rooj tag taw. 8Au Yawmsaub, thov sawv tseeg moog rua ntawm koj lub chaw nyob, tsw has koj hab lub swb xaab kws qha koj tug fwjchim. 9Thov ca cov pov thawj muab txujkev ncaaj nceeg lug naav, thov ca koj cov tuabneeg kws dawb huv qw zoo sab xyiv faab.” 10Vem yog saib rua koj tug qhev Tavi, thov tsw xob muab tug kws koj laub roj tsaa lawd tso tseg.
11Yawmsaub cog lug tawv rua Tavi, yog tej lug kws tsw muab rhuav le has tas, “Kuv yuav tsaa ib tug tub kws koj yug lug nyob sau koj lub zwm txwv. 12Yog koj cov tub tuav rawv kuv tej lug cog tseg hab tej kws kuv qha puab, mas puab cov tub kuj yuav tau nyob sau koj lub zwm txwv moog ib txhws.”
13Yawmsaub tub xaiv Xi‑oo lawm, nwg xaav muab ua nwg lub chaw nyob, hab has tas, 14“Nuav yog kuv lub chaw nyob moog ib txhws, kuv yuav nyob ntawm nuav vem kuv tub xaav le ntawd lawm. 15Kuv yuav foom koob moov ntau nplua mag rua lub nroog nuav tej kev noj haus, kuv yuav pub nwg cov tuabneeg pluag tau noj tsau npo. 16Kuv yuav muab txujkev cawm dim rua nwg cov pov thawj naav, nwg cov tuabneeg dawb huv yuav qw zoo sab xyiv faab. 17Qhov chaw ntawd kuv yuav pub kuas muaj ib tug kub⚓ tuaj rua Tavi, kuv tub npaaj ib lub teeb rua tug kws kuv laub roj tsaa lawm. 18Kuv yuav muab txujkev txaaj muag rua nwg cov yeeb ncuab naav, tassws nwg lub mom kub yuav ci nplaag rua sau nwg taubhau.”