18

Ndaawitv Mborqv Jaax Duqv Deic-Bung Jangv Jienv Mingh

(Beiv mangc 2 Saa^mu^en 8:1-14)

1Hoz daaih Ndaawitv mingh mborqv hingh Fi^li^saa^die Mienh, zorqv ninh mbuo yiem ninh nyei buoz-ndiev. Ninh yaac caangv duqv Fi^li^saa^die Mienh nyei Gatc Mungv caux huing gormx wuov norm mungv nyei fiuv-laangz.
2Ndaawitv yaac mborqv hingh Mo^apc Mienh. Ninh mbuo ziouc zuqc yiem ninh nyei buoz-ndiev yaac cuotv nzou bun ninh.
3Ndaawitv aengx mingh mborqv So^mbaa nyei hungh, Haa^ndatc^e^se, aengx mborqv jienv mingh taux Haamatv, doix Haa^ndatc^e^se cuotv mingh weic oix caangv oix gunv Yu^fe^ditc Ndaaih hlen nyei dorngx. 4Ndaawitv caangv duqv ninh mbuo mborqv jaax nyei maaz-cie yietc cin jaax, zaangv maaz-cie nyei baeng siec cin dauh, caux yangh ndau nyei baeng i waanc dauh. Ninh hngaqv maaz nyei domh luangc jaan dangx, kungx liouh mborqv jaax cie nyei maaz yietc baeqv dauh hnangv.
5Ndaa^matv^gatc nyei Silie Mienh cuotv daaih tengx So^mbaa nyei hungh, Haa^ndatc^e^se, Ndaawitv daix ninh mbuo i waanc i cin dauh baeng daic. 6Nqa'haav Ndaawitv liepc baeng-ciangv yiem Silie Mienh nyei deic, Ndaa^matv^gatc Zingh. Silie Mienh ziouc zuqc yiem Ndaawitv nyei buoz-ndiev yaac cuotv nzou bun ninh. Maiv gunv Ndaawitv mingh haaix, Ziouv bun ninh hingh jiex.
7Ndaawitv yaac caangv Haa^ndatc^e^se nyei jien nanv jienv nyei jiem-torngv-baaih dorh mingh Ye^lu^saa^lem. 8Ndaawitv aengx mingh Haa^ndatc^e^se nyei i norm zingh, Te^mbaa caux Kun, caangv duqv dongh siqv camv haic. Nqa'haav Saa^lo^morn longc zoux domh dongh siqv bunh caux domh ndiouh caux ziex nyungc dongh siqv nyei jaa-sic.
9Haamatv nyei hungh, To^u, haiz gorngv Ndaawitv mborqv hingh So^mbaa nyei hungh, Haa^ndatc^e^se, nyei yietc zungv jun-baeng, 10ninh paaiv ninh nyei dorn, Haa^ndo^lam, mingh wuic buangh Ndaawitv Hungh, gorngv waac tengx ninh a'hneiv weic ninh duqv mborqv hingh Haa^ndatc^e^se, weic zuqc Haa^ndatc^e^se zanc-zanc mingh caux To^u mborqv jaax. Haa^ndo^lam yaac dorh jienv longc jiem nyaanh caux dongh siqv zoux daaih nyei nyungc-nyungc jaa-sic fungx bun Ndaawitv.
11Ndaawitv Hungh zorqv naaiv deix jaa-sic fungx bun Ziouv caux jienv ninh zorqv yiem maanc guoqv, se yiem E^ndom, Mo^apc, Ammon Mienh, Fi^li^saa^die Mienh caux Aa^maa^lekv Mienh caangv daaih nyei jiem nyaanh fungx bun Ziouv.
12Se^lu^yaa nyei dorn, Aa^mbi^qai, yiem Nzauv-Horngz daix E^ndom Mienh yietc waanc hietc cin dauh. 13Ninh liepc baeng-ciangv yiem E^ndom. E^ndom Mienh ziouc zuqc yiem Ndaawitv nyei buoz-ndiev. Maiv gunv ninh mingh haaix, Ziouv bun Ndaawitv hingh jiex.

Ndaawitv Nyei Jien

(Beiv mangc 2 Saa^mu^en 8:15-18; 20:23-26)

14Hnangv naaic, Ndaawitv gunv gormx nzengc I^saa^laa^en Deic-Bung yaac weic ninh nyei zuangx baeqc fingx zoux horpc, zoux baengh fim. 15Se^lu^yaa nyei dorn, Yo^aapc, zoux gauh hlo jiex nyei domh baeng-bieiv. Aa^hi^lutv nyei dorn, Ye^ho^saa^fatv, zoux fiev sou-daan nyei jien. 16Aa^hi^tupv nyei dorn, Saax^ndokc, caux Aa^mbi^yaa^taa nyei dorn, Aa^hi^me^lekv, zoux sai mienh. Saa^waa^saa zoux sou-biuv. 17Ye^ho^yaa^ndaa nyei dorn, Mbe^nai^yaa, gunv Ke^le^ti Mienh caux Peletv Mienh. Ndaawitv nyei dorn mbuo duqv zoux gauh hlo jiex nyei jien.