1

Da'yietv Buonv

(Singx Nzung 1-41)

Singx Nzung 1

Zien Orn-Lorqc

  1Maaih orn-lorqc nyei mienh se
   maiv muangx mienh waaic mienh nyei za'eix,
  maiv yangh zuiz-mienh nyei zaux-mbiec,
   yaac maiv caux huotv Tin-Hungh nyei mienh juangc jauv yangh.
  2Daaux nzuonx ninh a'hneiv Ziouv nyei leiz-latc,
   ziu yiex fei-fangv ninh nyei leiz.
  3Ninh se hnangv diuh ndiangx zuangx wuov ndoqv-hlen,
   ziux ziangh hoc cuotv biouv,
  normh yaac maiv nqaai.
   Yiem ninh zoux nyei nyungc-nyungc duqv longx.
  4Mv baac mienh waaic mienh zungv maiv hnangv naaic.
   Ninh mbuo se hnangv mbieqv
   zuqc nziaaux buonc nzaanx mingh nor.
  5Taux siemv zuiz nyei ziangh hoc
   mienh waaic mienh oix zuqc Tin-Hungh dingc zuiz,
    zuiz-mienh yaac maiv duqv caux gapv zunv nyei kuv mienh yiem.
  6Weic zuqc Ziouv ziux goux kuv mienh nyei jauv,
   mv baac orqv mienh nyei jauv-louc zungv oix zuqc mietc.