12

Mose Mborqv Hingh Nyei Hungh

1Daaux naaiv mingh gorngv I^saa^laa^en Mienh yiem Jor^ndaen Ndaaih dong bung maengx mborqv hingh aengx caangv duqv ninh mbuo nyei deic-bung wuov deix hungh, se yiem Aannon Horngz mingh taux Hemon Mbong, liemh yietc zungv Aa^laa^mbaa Deic dong bung maengx.
2Aa^mo^lai Mienh nyei Si^honx Hungh yiem Hetv^mbon Zingh. Ninh gunv nyei deic-bung yiem Aannon Horngz-hlen, Aa^lo^e Zingh, se yiem wuov norm horngz mbu'ndongx mingh taux Yapv^mborkc Ndaaih, Ammon Mienh nyei gapv-jaaix, se yietc buonc Gi^le^aatc Deic. 3Ninh yaac gunv Jor^ndaen Ndaaih dong bung nyei Aa^laa^mbaa Deic yiem Kin^ne^letv Koiv-Dorn njiec mingh taux Aa^laa^mbaa Koiv, se Koiv-Nzauv, mingh taux Mbetc Ye^si^motv Zingh njiec naamh bung taux Bitc^gaa Mbong-juoqv.
4Mbaasaan Deic nyei Okc Hungh, se yietc dauh zengc njiec nyei Le^faa^im Mienh. Ninh yiem Atc^taa^lotv Zingh caux E^nden^i Zingh. 5Ninh gunv Hemon Mbong caux Saax^le^kaa Zingh, aengx gunv nzengc Mbaasaan Deic mingh taux Gesu Mienh caux Maa^aa^kaa Mienh nyei gapv-jaaix, se yietc buonc Gi^le^aatc Deic taux Hetv^mbon Zingh nyei hungh, Si^honx, nyei gapv-jaaix.
6Ziouv nyei bou, Mose, caux I^saa^laa^en Mienh mborqv hingh ninh mbuo. Ziouv nyei bou, Mose, yaac zorqv ninh mbuo nyei deic-bung jiu bun Lu^mben Mienh, Gaatc Mienh caux ndaamv-fingx Maa^natv^se Mienh, benx ninh mbuo nzipc nyei buonc.

Yo^su^waa Mborqv Hingh Nyei Hungh

7Daaux naaiv mingh gorngv taux Yo^su^waa caux I^saa^laa^en Mienh yiem Jor^ndaen Ndaaih fai bung maengx mborqv hingh nyei hungh diex. Ninh mbuo nyei deic-bung yiem Le^mbaa^norn Horngz, Mbaa^an Gaatc Mungv, mingh taux Se^i Deic, Haalakv Mbong. Yo^su^waa zorqv naaiv norm deic-bung ziux I^saa^laa^en Mienh nyei fingx paaiv bun nqoi benx ninh mbuo nzipc nyei buonc, 8se mbong-aiv dorngx, la'aiv dorngx, Aa^laa^mbaa Deic, geh zorng, deic-bung-huaang caux ⟨Negepc.⟩ Naaiv se Hitv^tai Mienh, Aa^mo^lai Mienh, Kaa^naa^an Mienh, Be^litv^si Mienh, Hiwai Mienh caux Ye^mbutc Mienh nyei deic-bung.