1Yawmsaub yog tug luj kawg tswm nyog yuav qhuas nwg kawg rua huv peb tug Vaajtswv lub nroog, yog Yawmsaub lub roob dawb huv 2kws sab hab zoo nkauj kawg, ua rua thoob nplajteb xyiv faab hlo, yog lub roob Xi‑oo kws nyob peg suab,⚓ yog tug tuam vaajntxwv lub nroog. 3Huv tej chaw ruaj khov huv lub nroog hov, mas Vaajtswv qha tas nwg yog lub chaw tiv thaiv kws ruaj khov.
4Saib maj, tej vaajntxwv sau zog ua ke, puab ua ib paab tuaj ua rog. 5Mas thaus puab pum dheev lub nroog hov puab kuj poob sab nthaav, puab ntshai kawg raag tswv taag. 6Puab ntshai ib ce tshee quas nyo hab lwj sab kawg yaam nkaus le tug quaspuj kws ua mob teb, 7hab yaam le thaus cua ntsawj saab nub tuaj nplawm Thasi tej nkoj txwg puam tsuaj taag.
8Peb tau nov le caag peb kuj pum muaj le ntawd rua huv Yawmsaub kws muaj fwjchim luj kawg nkaus lub nroog, kws yog peb tug Vaajtswv lub nroog kws Vaajtswv tsaa kuas nyob ruaj moog ib txhws. 9Au Vaajtswv, peb xaav txug koj txujkev hlub kws ruaj khov rua huv koj lub tuam tsev. 10Au Vaajtswv, lu lug qhuas koj muaj moog thoob plawg qaab ntuj ib yaam le koj lub npe nrov nchaa moog. Koj txhais teg xws puv nkaus txujkev ncaaj nceeg. 11Ca lub roob Xi‑oo zoo sab, ca Yuta tej ntxhais xyiv faab vem yog koj txav txem ncaaj.
12Mej ca le moog ncig lub nroog Xi‑oo, moog puag ncig hlo, hab suav tej chaw tsom faaj. 13Ua tuab zoo saib tej ntsaa loog hab tshuaj saib tej chaw ruaj khov, sub mej txhad has tau rua lwm tam paub tas, 14nuav yog Vaajtswv, yog peb tug Vaajtswv ib txhab ib txhws hab nwg yuav coj peb kev moog ib txhws le.