21

Cov Yixalayees Yeej Cov Kana-as

¹Thaum cov Kana-as tus vajntxwv uas kav lub nroog Alas hauv tebchaws Kana-as sab qabteb hnov hais tias cov Yixalayees tabtom taug txojkev Athalis los lawm, nws txawm txhij tubrog mus tua lawv thiab ntes tau cov Yixalayees qee leej coj mus ua qhev. ²Ces cov Yixalayees thiaj coglus rau tus TSWV hais tias, “Yog koj pub peb tua yeej cov neeg no, peb yuav muab lawv thiab lawv tej nroog fij hlo rau koj, thiab peb yuav muab lawv ua kom puastsuaj tas huv tibsi.” ³Tus TSWV hnov lawv tej lus thov, thiab nws pab lawv tua yeej cov Kana-as. Vim li no cov Yixalayees thiaj muab cov Kana-as thiab lawv tej nroog ua puastsuaj tas, thiab muab qhov chaw ntawd tis npe hu ua Haulemas.

Muab Tooj Nchuav ua Ib Tug Nab

⁴Cov Yixalayees sawv kev ntawm lub Roob Haules mus rau nram Hiavtxwv Akanpas, lawv yuav lug kev ncig lub tebchaws Edoos. Tiamsis thaum lawv tseem tabtom taug kev mus ntawd, lawv ua tsis taus siab ntev nyiaj kev txomnyem, ⁵lawv txawm cem Vajtswv thiab Mauxes. Lawv yws hais tias, “Vim li cas neb thiaj coj peb tawm nram tebchaws Iziv los kom peb tuag tas rau hauv tiaj suabpuam, qhov chaw uas tsis muaj mov noj thiab tsis muaj dej haus no? Peb noj tsis taus tej zaub mov zoo li no lawm!” ⁶Ces tus TSWV thiaj tso cov nab muaj taug los rau hauv cov Yixalayees, cov Yixalayees coob leej thiaj raug nab tom tuag lawm. ⁷Cov pejxeem thiaj tuaj cuag Mauxes thiab hais tias, “Thaum peb cem tus TSWV thiab cem koj twb yog peb ua txhaum ntag. Nimno thov koj thov tus TSWV muab cov nab no tshem tawm mus.” Yog li ntawd, Mauxes thiaj thov tus TSWV pab cov pejxeem. ⁸Tus TSWV kom Mauxes muab tooj nchuav ua ib tug nab thiab muab mus ntsia rau ntawm ib tug ncej, yog nab tom leejtwg, kom tus ntawd tsa qhovmuag ntsia tus nab tooj ntawd nws thiaj tsis tuag. ⁹Mauxes txawm nchuav tau ib tug nab tooj thiab muab ntsia rau saum ib tug ncej. Thaum nab tom leejtwg yog nws tsa qhovmuag ntsia tus nab tooj ntawd nws txawm tsis tuag.

Cov Yixalayees Los Tom Roob Haules Los Txog Hauv Lub Hav Mau-am

¹⁰Cov Yixalayees mus tsuam yeej rau ntawm Aunpaus. ¹¹Ces lawv sawv kev ntawm Aunpaus mus tsuam yeej rau ntawm Anpalees uas nyob hauv lub tiaj suabpuam ntawm tebchaws Mau-am sab hnubtuaj. ¹²Lawv sawv kev ntawm qhov chaw ntawd mus tsuam yeej rau hauv lub Hav Zeles. ¹³Lawv sawv kev qhov ntawd, thiab mus tsuam yeej rau ntawm tus Dej Alenoos sab qaumteb ntawm lub tiaj suabpuam uas mus tshuam rau tebchaws Amaules. (Tus dej Alenoos yog tus ciam rau lub tebchaws Mau-am thiab lub tebchaws Amaules.) ¹⁴Twb yog li no phau Ntawv uas teev tus TSWV tej kev ua Rog thiaj li hais txog: “… lub zos Vahes uas nyob hauv cheebtsam Xufas thiab hauv tej hav ntawm tus Dej Alenoos, ¹⁵thiab tej kwjha uas nqis mus rau nram lub zos Ales, thiab ntws mus tshuam rau nram ciamteb Mau-am.”
¹⁶Lawv sawv kev qhov ntawd mus txog rau ntawm ib qhov chaw hu ua tej Qhovtshij, yog qhov chaw uas tus TSWV hais rau Mauxes hais tias, “Coj cov pejxeem tuaj ua ke, thiab kuv yuav muab dej rau lawv haus.” ¹⁷Lub sijhawm ntawd, cov Yixalayees zoo siab heev thiab hu zaj nkauj no:
“Tej qhovtshij, nej cia li txhawv dej laub lug tawm los;
Thiab peb yuav zoo siab hu nkauj tos cov dej ntawd.
¹⁸Lub qhovtshij no yog cov nomtswv,
Thiab cov pejxeem tej thawjcoj khawb,
Yog siv vajntxwv tus cwj thiab lawv tej pas nrig khawb ntag.”

Ces lawv thiaj sawv kev ntawm tiaj suabpuam mus rau ntawm Matanas, ¹⁹thiab sawv kev ntawm Matanas mus rau ntawm Nahaliyees, thiab sawv kev ntawm Nahaliyees mus rau ntawm Npamaus, ²⁰thiab sawv kev ntawm Npamaus mus rau ntawm lub hav uas nyob hauv tebchaws Mau-am. Qhov chaw ntawd nyob saum lub ncov roob Pinkas, xyuam yaj lug saib ntsoov rau tim tiaj suabpuam.

Cov Yixalayees Yeej Vajntxwv Xihoos thiab Vajntxwv Aunkas

(2 Kevcai 2.26–3.11)

²¹Cov Yixalayees tso neeg mus thov cov Amaules tus vajntxwv Xihoos hais tias: ²²“Thov pub peb hla nej lub tebchaws mus. Peb thiab peb tej tsiaj yuav tsis pla mus tsuj hauv nej tej teb lossis nej tej vaj txiv hmab, thiab peb yuav tsis haus tej dej hauv nej tej qhovtshij; peb yuav taug txojkev loj ncaj nraim mus kom dhau plaws nej cheebtsam.” ²³Tiamsis Xihoos tsis pub cov Yixalayees hla nws lub tebchaws mus. Nws thiaj txhij nws cov tubrog mus rau ntawm Yahas uas nyob tom tiaj suabpuam thiab mus puav tua cov Yixalayees. ²⁴Tiamsis cov Yixalayees tua cov yeebncuab tuag coob heev rau hauv tshavrog thiab txeeb tau lawv lub tebchaws txij kiag ntawm tus Dej Alenoos sab qaumteb mus txog ntua rau tim Yanpaus, thiab dhau plaws mus rau tim tebchaws Amoos, rau qhov cov tubrog Amoos uas zov ntawm ciamteb siab tawv thiab zov nruj heev. ²⁵Yog li ntawd, cov Yixalayees thiaj txeeb tau tagnrho cov Amaules tej nroog, thiab tseem txeeb tau lub tuamceeb nroog Hesenpoos thiab tej nroog me uas nyob ibncig ntawd huv tibsi. Lawv thiaj mus nyob puv nkaus rau hauv tej nroog ntawd. ²⁶Hesenpoos yog lub tuamceeb nroog uas yog cov Amaules tus vajntxwv Xihoos nyob ntag, thiab nws yog tus uas ntxeev siab ua rog tawmtsam cov Mau-am tus vajntxwv qub thaum ub thiab txeeb tau tagnrho Mau-am lub tebchaws mus txog ntua ntawm tus Dej Alenoos. ²⁷Twb yog vim li ntawd, cov hu nkauj thiaj li hu zaj nkauj no:

“Cia li los rau hauv lub nroog
Hesenpoos uas yog vajntxwv Xihoos lub nroog!
Peb xav pom lub nroog ntawd rov txhim kho dua tshiab.
²⁸Xihoos cov tubrog tawm hauv lub nroog
Hesenpoos tuaj mus ib yam li cov nplaim taws;
Mas nws rhuav lub nroog Ales hauv lub tebchaws Mau-am
thiab nqos tagnrho tej hauv roob pem Alenoos.
²⁹Cov Mau-am, nej yuav raug kev txomnyem lauj!
Nej pe tus mlom Khemaus uas tabtom coj
kev puastsuaj los!
Nej tus vajtswv yuav coj cov txivneej
mus poob kev txomnyem,
thiab cov pojniam yuav raug cov Amaules tus vajntxwv
Xihoos ntes coj mus.
³⁰Tiamsis tamsim no peb twb muab lawv cov xeebntxwv
tua puastsuaj tag,
Txij ntua tom Hesenpoos los txog ntua rau ntawm Dinpoos,
Thiab pib kiag tom Nasees mus ti nkaus rau tim Naufas
uas ze rau ntawm Medenpas.”
³¹Yog li ntawd, cov Yixalayees thiaj li mus nyob puv nkaus rau hauv tebchaws Amaules. ³²Mauxes tso neeg mus soj thiab tua lub nroog Yaxes. Cov Yixalayees txeeb tau lub nroog ntawd nrog tej zos uas nyob ibncig thiab muab cov Amaules uas nyob hauv tej zos ntawd raws tawm khiav huv tibsi lawm.
³³Cov Yixalayees tig rov los thiab taug kev mus rau tom lub zos Npasas. Tus vajntxwv uas kav lub tebchaws Npasas thiaj txhij nws cov tubrog nrog nws mus tua cov Yixalayees rau tom Edele-is. ³⁴Tus TSWV hais rau Mauxes hais tias, “Nej tsis txhob ntshai Aunkas. Kuv yuav pub kom nej tua yeej nws, yeej tagnrho nws cov neeg thiab nws lub tebchaws huv tibsi. Nej yuav ua rau nws ib yam li ua rau Xihoos uas yog tus vajntxwv kav lub nroog Hesenpoos thiab ntag.” ³⁵Yog li ntawd, cov Yixalayees thiaj muab Aunkas, nws cov tub thiab tagnrho nws cov neeg tua tuag tas tsis tshuav ib tug seem li, thiab cov Yixalayees tau los nyob nws lub tebchaws.

21

Cov Khana‑aa ua rog rua cov Yixayee

¹Thaus cov Khana‑aa tug vaajntxwv kws kaav lub moos Alaj kws nyob huv Neke⚓ nov tas cov Yixayee saamswm taug txujkev Athali lug, nwg txawm ua rog rua cov Yixayee hab nteg tau qee leej coj moog lawm. ²Mas cov Yixayee cog lug rua Yawmsaub tas, “Yog koj muab cov tuabneeg nuav rua huv peb txhais teg mas peb yuav muab puab tej moos ua kuas puam tsuaj huvsw le.” ³Yawmsaub kuj noog cov Yixayee lub suab thov, nwg txhad muab cov Khana‑aa rua huv puab txhais teg. Puab txhad muab cov Khana‑aa hab puab tej moos ua puam tsuaj taag huvsw, mas txhad hu thaaj chaw hov hu ua Hauma.⚓

Tug naab tooj

⁴Puab tawm ntawm roob Hau taug txujkev kws moog rua Havtxwv Lab sub txhad zos dhau Entoo tebchaws moog. Thaus puab saamswm taug kev cov pejxeem ua tsw tau sab ntev. ⁵Cov pejxeem txhad thuaj ywg Vaajtswv hab Mauxe has tas, “Ua le caag meb yuav coj peb tawm huv Iyi tebchaws lug tuag rua huv tebchaws moj saab qhua nuav? Vem tsw muaj mov noj tsw muaj dej haus, hab peb dhuav tej zaub mov kws tsw muaj qaabhau nuav hwv lawm.” ⁶Yawmsaub txhad tso naab muaj taug heev lug rua huv cov Yixayee mas cov naab tum puab, cov Yixayee txhad tuag coob heev. ⁷Cov pejxeem txhad tuaj cuag Mauxe hab has tas, “Peb tau ua txhum vem peb tau thuaj ywg Yawmsaub hab koj. Thov koj thov Yawmsaub muab cov naab nuav coj tawm ntawm peb moog.” Mauxe txhad thov Yawmsaub paab cov pejxeem. ⁸Yawmsaub has rua Mauxe tas, “Koj ca le ua ib tug naab muaj taug muab teem rua sau ib tug ncej. Txhua tug kws raug naab tum thaus puab tsaa muag saib tug naab hov mas puab yuav caj sa nyob.” ⁹Tes Mauxe txawm muab tooj lab ua ib tug naab teem rua sau ib tug ncej. Yog leejtwg raug naab tum es nwg tsaa muag saib tug naab tooj hov nwg txhad muaj txujsa nyob.

Cov Yixayee moog txug Mau‑a

¹⁰Cov Yixayee sawv kev moog tsuam chaw nyob rua ntawm Aunpau. ¹¹Puab tsua sawv kev ntawm Aunpau moog tsuam chaw nyob rua ntawm Iye‑anpali huv tebchaws moj saab qhua kws ncaaj Mau‑a saab nub tuaj. ¹²Puab tsua sawv kev hov ntawd moog tsuam chaw nyob rua huv lub haav Xelej. ¹³Puab tsua sawv kev hov ntawd moog tsuam chaw nyob rua ntawm tug dej Anoo saab tid kws yog nyob huv tebchaws moj saab qhua huv cov Amaulai lub tebchaws, tsua qhov tug dej Anoo yog Mau‑a tug nrwm teb, yog nyob Mau‑a hab Amaulai ntu nruab nraab. ¹⁴Vem le nuav huv phoo ntawv kws has txug Yawmsaub ua rog txhad muaj has tas,
“Vahe huv Xufa,
hab tej kwj haav ntawm Anoo,
¹⁵hab tej hauv haav
moog txug ncua lub moos A
hab nthuav moog txug Mau‑a nrwm teb.”
¹⁶Puab tawm hov ntawd moog txug Npe‑aw kws yog lub qhov dej kws Yawmsaub has rua Mauxe tas, “Ca le sau cov pejxeem lug ua ke, kuv yuav pub dej rua puab.” ¹⁷Cov Yixayee txhad hu zaaj nkauj nuav has tas,
“Lub qhov dej ca le txhawv dej lug,
ca peb hu nkauj,
¹⁸yog lub qhov dej
kws cov thawj khawb ca,
yog lub kws cov kws ua hlub
khawb tseg,
puab swv tej cwj nreg
hab tej paas nreg.”
Puab tsua tawm ntawm tebchaws moj saab qhua moog txug Mathana, ¹⁹hab tawm ntawm Mathana moog txug Nahali‑ee, hab tawm ntawm Nahali‑ee moog txug Npamauj, ²⁰hab tawm ntawm Npamauj moog txug lub haav huv Mau‑a tebchaws ze hauv roob Pixaka kws saib ntsoov rua ntuj nraag teb do.⚓

Cov Yixayee kov yeej Xihoo

²¹Cov Yixayee khaiv tuabneeg moog cuag Xihoo kws yog cov Amaulai tug vaajntxwv mas has tas, ²²“Thov ca peb hlaa koj lub tebchaws moog. Peb yuav tsw nkaag rua huv koj tej laj teb koj tej vaaj txwv maab, peb yuav tsw haus koj tej qhov dej. Peb yuav taug Vaajntxwv Txuj nam Kev Luj moog kuas dhau plhawv koj lub tebchaws.” ²³Tassws Xihoo tsw kheev cov Yixayee hlaa nwg lub tebchaws. Nwg txhwj tub rog tuaj tawm tsaam cov Yixayee huv tebchaws moj saab qhua, nwg tuaj nrug cov Yixayee ntaus rog ntawm Yahaj. ²⁴Cov Yixayee xuas ntaaj tua nwg tuag hab txeeb tau nwg lub tebchaws txwj ntawm tug dej Anoo moog txug ncua dej Yanpo moog ti nkaus Aamoo nrwm teb, vem Aamoo nrwm teb ruaj khov. ²⁵Cov Yixayee txeeb tau tej moos nuav huvsw hab cov Yixayee moog nyob huv cov Amaulai txhua lub moos hab nyob huv lub nroog Hesanpoo hab nyob thoob plhawv tej zej zog. ²⁶Hesanpoo yog cov Amaulai tug vaajntxwv Xihoo lub nroog luj. Nwg yog tug kws ua rog rua cov Mau‑a tug vaajntxwv kws kaav ua nwg ntej hab nwg txeeb tau Mau‑a tebchaws huvsw moog txug ncua tug dej Anoo. ²⁷Vem le nuav cov kws txawj phim lug txaj txhad has tas,
“Ca le tuaj rua Hesanpoo,
tuaj rhawv tuaj tswm khu Xihoo lub nroog,
²⁸vem yog muaj suavtawg tawm huv Hesanpoo,
muaj nplaim tawg tawm huv Xihoo lub nroog
moog kub Mau‑a lub moos A
hab cov kws ua hlub huv tej roob Anoo
puam tsuaj taag.
²⁹Mau‑a 'e, koj yuav raug txom nyem lauj,
Khemauj cov tuabneeg 'e,
mej yuav raug puam tsuaj lauj!
Khemauj tau ua rua nwg tej tub
tswv nplaam tebchaws taag,
hab ua rua nwg tej ntxhais poob
rua huv Amaulai tug vaajntxwv Xihoo teg.
³⁰Peb tub tua puab pov tseg huvsw.
Hesanpoo puam tsuaj
moog txug ncua Ntinpoo.
Peb rhuav tshem puab
moog txug ncua Naufa
hab txug ncua Mentenpa.⚓”

Cov Yixayee kov yeej Npasaa tug vaajntxwv Aus

³¹Yog le nuav cov Yixayee txhad tau nyob huv cov Amaulai lub tebchaws. ³²Mas Mauxe khaiv tuabneeg moog tshuaj lub moos Yaxaw, hab puab kuj txeeb tau tej zej zog ib ncig hov hab muab cov Amaulai kws nyob huv lawv tswv moog.
³³Puab tig hlo taug txujkev kws moog peg Npasaa mas Npasaa tug vaajntxwv Aus hab nwg cov pejxeem suavdawg kuj tawm tuaj ua rog rua ntawm Ente‑i. ³⁴Tassws Yawmsaub has rua Mauxe tas, “Tsw xob ntshai nwg tsua qhov kuv tub muab nwg rua huv koj txhais teg, muab hlo nwg cov pejxeem hab nwg lub tebchaws huvsw, mas koj yuav ua rua nwg ib yaam nkaus le koj tub ua rua cov Amaulai tug vaajntxwv Xihoo kws nyob huv Hesanpoo.” ³⁵Puab txhad le tua Aus hab nwg cov tub hab nwg cov pejxeem suavdawg tsw tshuav ib tug le. Puab txhad txeeb hlo nwg lub tebchaws.