1Tus TSWV teb Yauj hauv nthwv cua daj cua dub tuaj hais tias: 2“Koj yog leejtwg, koj thiaj tuaj nug kuv lub tswvyim, koj tej lus tsis muaj hauvpaus hauvntsis li los sav? 3Nimno koj cia li sawv khov kho ib yam li tus txivneej yawg thiab cia li teb tej lus uas kuv yuav nug koj. 4Thaum kuv tsim lub ntiajteb koj puas nyob ntawd? Yog koj paub txhij paub txhua, koj cia li qhia rau kuv saib; 5leejtwg yog tus uas hais tias yuav tsim lub ntiajteb loj li cas? Leejtwg yog tus muab hlua ntsuas lub ntiajteb? Koj paub tej no huv tibsi los? 6Yam dabtsi tuav tej ncej uas txheem lub ntiajteb no kom khov? Leejtwg yog tus txhos tus ncej zeb uas txheem lub ntiajteb? 7Hnub ntawd thaum kaj ntug txoog, tej hnubqub hu nkauj ua ke thiab tej timtswv saum ntuj qw zoo siab.
8“Leejtwg yog tus uas kaw rooj qho dej hiavtxwv thaum hiavtxwv phwj yaws hauv nruab tiv txwv tuaj? 9Kuv yog tus uas ua kom huab laum nkaus hiavtxwv thiab ua kom qhov tsaus ntuj qhwv nkaus dej hiavtxwv. 10Kuv tu kom muab ciam dej ciam av rau hiavtxwv nyob, thiab muab ntsia liaj lub rooj qho tsis pub dej tawm. 11Kuv hais rau dej hais tias, ‘Kuv tsuas pub koj puv txij no xwb, tsis pub puv dhau! Koj lub zog uas ntas tuaj tsuas pub ntas tuaj txog txij no xwb.’
12“Yauj, txij thaum koj xeevxwm ua neej los txog nimno, koj puas tau hais kom lub hnub tawm tuaj? 13Thaum sawv ntxov koj puas tau kom tshav ntuj ci tuaj ziab ntiajteb thiab co kom cov neeg siab phem tawm hauv tej chaw uas lawv nkaum los? 14Tej duab tshav ntuj ntawd ua rau sawvdaws pom tej toj roob hauv pes sawv ntshais ntsho ib yam li tej ntaub uas luag muab nthuav pom tej nre tais meej nriav, thiab pom tseeb li lub yeem homthawj uas luag nias rau av nplaum. 15Nruab hnub pom kev rau cov neeg siab phem ua tsis tau phem thiab txwv tsis pub lawv ua nruj ua tsiv.
16“Koj twb mus txog hauv qhov uas hiavtxwv txhawv lawm los? Koj twb mus hauv qabthu dej hiavtxwv los lawm los? 17Twb muaj neeg coj koj mus saib lub roojvag uas quas tubtuag teb uas tsaus ntuj nti lawm los? 18Koj puas paub hais tias lub ntiajteb no loj li cas? Yog koj paub, koj cia li qhia kuv saib!
19“Koj puas paub hais tias tus duab ci yog ci qhov twg tuaj? Lossis qhov tsaus ntuj yog los qhov twg los? 20Koj puas qhia tau kom tej duab ci thiab duab tsaus, ci thiab tsaus mus txog txij twg lossis hais kom rov los nyob qhov qub? 21Kuv xav hais tias koj ua tau, rau qhov koj twb laus heev lawm, thiab thaum tsim ntiajteb koj twb nyob ntawd ntag!
22“Koj puas tau mus pom tej txhab uas kuv cia ntim daus thiab lawg? 23Kuv npaj tej ntawd cia rau lub sijhawm uas muaj kev txomnyem thiab hnub uas muaj kev tsov kev rog. 24Koj twb mus txog ntawm qhov chaw uas lub hnub tawm tuaj lossis ntawm qhov chaw uas cov cua sab hnubtuaj ntsawj tuaj lawm los?
25“Leejtwg yog tus khawb kwj rau nag los thiab qhib kev rau xob nroo? 26Leejtwg yog tus tso nag los rau tej toj roob hau pes uas tsis muaj neeg nyob? 27Leejtwg yog tus ywg dej rau thaj av uas qhuav nkig nkuav kom tej nroj tsuag hlob taus? 28Leejtwg yog tej nag thiab tej lwg txiv? 29Leejtwg yog tej dej nkoog thiab tej te niam? 30Tej ntawd ua rau dej khov tawv cuag pobzeb thiab ua rau nplaim hiavtxwv nkoog khov kho.
31“Koj puas yog tus uas muab cov hnubqub Txhiaj Txivmim los teeb ua ib ntsau lossis muab cov hnubqub Pojsua Kwvntas cais nyias nyob nyias? 32Puas yog koj ua rau tej hnubqub tig tau mus los haum lub caij lub nyoog lossis qhia kev rau tej hnubqub Ntsau loj thiab Ntsau me? 33Koj paub tej kevcai uas luag tswjhwm saum nruab ntug, thiab koj muab tau tej kevcai ntawd los siv rau hauv lub ntiajteb no los?
34“Koj puas hais tau kom tej huab tso nag los rau koj? 35Yog koj hais kom xob laim, nws puas tawm tuaj hais rau koj tias, ‘Kuv nyob ntawm no?’ 36Leejtwg qhia rau tus qaibdeg hais tias tus dej Niles yuav huam tuaj lossis leejtwg qhia rau tus lauqaib hais tias nag yuav los? 37Leejtwg muaj kev txawj ntse suav txheeb tej huab thiab hais kom tej huab ntawd tso nag los 38rau tej plua av kom nplaum ua tej thooj?
39“Koj puas nrhiav tau nqaij rau tej tsov ntxhuav noj, thiab ua kom tej menyuam tsov ntxhuav tsau plab, 40thaum lawv nkaum hauv qhov tsua lossis pw hauv lawv tej qhov? 41Thaum uablag tshaib plab thiab ya rau ub rau no, leejtwg yog tug pub rau uablag noj, thiab pub rau uablag tej menyuam uas quaj thov kuv?
38
Yawmsaub has
1Mas Yawmsaub teb huv cua daaj cua dub tuaj rua Yauj tas, 2“Leejtwg has tej lug kws tsw muaj qaabhau tshaum tej kws kuv npaaj tseg lawd tsaus ntuj quas nti lawm? 3Ca le sa hlaab khov kho yaam le ib tug txwvneej yawg, kuv yuav nug koj, koj yuav tsum teb kuv.
4“Thaus kuv pua daim kws tag lub nplajteb koj nyob hovtwg? Yog koj nkaag sab, ca le qha rua kuv. 5Leejtwg yog tug hom tas lub nplajteb yuav tswm luj le caag? Koj yeej paub tag los maj! Leejtwg muab hlua ntsuag lub nplajteb? 6Daim taw tag lub nplajteb txawb rua sau daabtsw? Leejtwg pua thawj daim laag zeb tswm lub nplajteb, 7rua thaus cov nub qub ci hu nkauj qhuas thaus kaaj ntug txoog, hab cov tubkhai ntuj⚓ suavdawg qw zoo sab xyiv faab?
8“Leejtwg muab qhov rooj thaiv dej havtxwv ca, rua thaus dej tshwm plawg huv nplajteb lub plaab lug? 9Yog thaus kuv tswm fuab ua tsoog tsho rua havtxwv naav, hab muab qhov tsaus ntuj nti ua daim ntaub qhwv havtxwv, 10hab tu nrwm rua dej nyob hab ua qhov rooj ua laag taav rua, 11hab has tas, ‘Koj moog tau deb npaum le nuav xwb, tsw xob moog dhau nrwm, koj tej nthwv dej kws khaav quas ntxhas tsuas ndaas txwj le nuav xwb.’
16“Koj nkaag txug huv qhov kws dej havtxwv txhawv lug, lossws moog rua huv tej chaw nraim nreeg huv nruab tiv txwv lawm lov? 17Lub qhov rooj kev tuag raug muab qha rua koj pum lov, lossws koj pum qhov tsaus ntuj nti lub rooj qho lawm lov? 18Koj tub paub lub nplajteb luj hab daav le caag lawm lov? Yog koj paub tej nuav huvsw lawm, ca le has.
19“Txujkev kws moog txug qhov kaaj lub tsev nyob rua hovtwg, hab qhov tsaus ntuj lub chaw nyob, nyob rua hovtwg 20sub koj txhad coj tau qhov kaaj qhov tsaus ntuj moog rua huv nwg lub chaw, hab paub txujkev kws moog rua nwg lub tsev? 21Nyab koj paub tsua qhov tub yug koj lawm, hab koj le noob nyoog tub ntau kawg lawm.
22“Koj tub moog rua huv tej txhaab kws rau daus xwb daus npu, lossws pum tej txhaab kws rau dej lawg lawm lov? 23Tej hov yog kuv npaaj ca rua thaus kws raug ceblaaj, hab nub kws sws tua hab ua rog. 24Txujkev kws moog rua lub chaw faib qhov kaaj tawm lug, hab lub chaw kws cua saab nub tuaj tawm moog rua sau lub nplajteb nyob hovtwg?
25“Leejtwg rhawv kwj rua tej nthwv naag lug, hab rhawv kev rua xub tua, 26sub txhad tso naag lug rua sau lub tebchaws kws tsw muaj tuabneeg nyob, hab lug rua sau lub tebchaws ntuj nraag teb do kws tsw muaj leejtwg nyob, 27sub lub tebchaws kws raug muab tso tseg nyob do cuas txhad le tsau npo, hab ua rua lub tebchaws tuaj nroj tsuag?
28“Naag muaj txwv hab lov? Leejtwg yug tau dej lwg lug? 29Dej lawg tawm huv leejtwg lub plaab mivnyuas lug, hab leejtwg yug tau tej te kws poob sau ntuj lug, 30ua rua dej tawv le pob zeb, hab nplaim dej havtxwv nkoog?
31“Koj khi tau tej nub qub Txhaj Txwv Mim ua ib ntsau, lossws daws tau txuj hlua khi nub qub Puj Sua Kwv Ntaas lov? 32Koj coj tau tej nub qub moog lug lawv le nwg lub caij lub nyoog, lossws coj tau nub qub Khais hab nwg cov mivnyuas kev lov? 33Koj paub tej kevcai kws kaav lub ntuj lov? Koj tsaa tau lub ntuj kaav lub nplajteb lov?
34“Koj tsaa tau suab hu moog txug tej fuab, ua kuas naag lug hlub nyaab laum nkaus koj lov? 35Koj khaiv tau tsag lig xub tawm moog lov? Hab tsag lig xub has rua koj tas, ‘Peb nyob ntawm nuav,’ lov? 36Leejtwg pub tswvyim rua us dej dawb, lossws qha rua tug lauv qab to taub?⚓ 37Leejtwg muaj tswvyim suav tau tej fuab? Leejtwg yuav nchuav tau lub naab dej sau ntuj lug, 38rua thaus tej moov aav ndwg lug ua ib pawg, hab tej cos aav sws tuav ruaj?
39“Koj tum tau nqaj rua tsuv ntxhuav noj, hab pub tau rua tej thaav tsuv ntxhuav noj tsau lov, 40rua thaus tsuv pw plab lua rua huv nwg lub qhov tsua, lossws pw zuv rua huv lub chaw nraim? 41Leejtwg npaaj nqaj rua uab voj noj, rua thaus nwg mivnyuas quaj rua Vaajtswv, hab thaus moog moog lug lug vem yog tshaib plaab?