2

Xyaum raws li Yexus uas txo hwjchim

¹Vim li no, yog nej muaj kev txhawb siab rau hauv Khetos, thiab muaj kev nplij siab ntawm txojkev sib hlub, thiab muaj kev sib raug zoo rau hauv Vaj Ntsuj Plig, thiab muaj qhov uas ib leeg mob siab rau ib leeg thiab ib leeg khuvleej ib leeg li cas lawm, ²kuj cia li ua rau kuv zoo siab xyiv fab kawg nkaus vim nej muaj lub siab xav ib yam nkaus, muaj lub siab hlub ib yam nkaus, thiab koom ua ib lub siab thiab koom xav ib yam nkaus. ³Tsis txhob ua siab hlob txeeb ua ib yam dabtsi rau yus lossis tsab ua loj tiamsis yuav tsum txo hwjchim xam pom lwm tus zoo dua yus. ⁴Nej tsis txhob nyias xam pom nyias tus kheej xwb yuav tsum xam pom lwm tus thiab. ⁵Nej cia li muaj lub siab yam li no rau hauv nej ib yam li muaj rau hauv Yexus Khetos.

⁶Nws yeej zoo ib yam li Vajtswv
tiamsis nws tsis suav tias yuav txeeb
qhov uas sib luag li Vajtswv rau nws,⚓
⁷tiamsis nws yeem muab txhua yam tso tseg
es saws lub neej zoo li tus qhev
los yug zoo li ib tug neeg.
Thaum nws tshwm los
zoo nkaus ib tug neeg.
⁸nws txo nws tus kheej kom qes
thiab mloog lus mus txog qhov uas tuag,
yog tuag saum ntoo khaublig.
⁹Vim li no Vajtswv thiaj muab nws
tsa siab kawg nkaus
thiab pub lub npe uas siab dhau
tej npe huvsi rau nws,
¹⁰vim lub npe Yexus ntawd
txhua lub hauv caug saum ntuj
thiab hauv ntiajteb thiab hauv qab ntiajteb
yuav txhos caug ntua pe nws,
¹¹thiab txhua tus nplaig yuav lees tias
Yexus Khetos yog tus Tswv,
thiaj ua rau Vajtswv uas yog leej Txiv
tau koob meej ci ntsa iab.

Tsom duab ci rau lub ntiajteb

¹²Yog li ntawd, cov kwvtij uas kuv hlub, ib yam li nej txeev mloog kuv lus tsis tu ncua, tsis yog mloog rau thaum kuv nrog nej nyob xwb tiamsis thaum kuv tsis nrog nej nyob kuj yimhuab yuav mloog, mas nimno nej yuav tsum ntshai tshee hnyo ua lub neej phim nej txojkev dim kom tiav. ¹³Rau qhov Vajtswv ua haujlwm rau hauv nej kom nej muaj lub siab xav thiab muaj peevxwm ua raws li nws lub siab nyiam.
¹⁴Cia li ua txhua yam tsis txhob sib yws sib cav, ¹⁵kom nej thiaj tsis muaj chaw thuam thiab tsis muaj qhov txhaum, ua Vajtswv cov menyuam uas tsis muaj ib qhov phem rau hauv nruab nrab tiam neeg phem thiab nkhaus no, thiab ci rau hauv lawv ib yam li tej hnub qub ci rau lub ntiajteb. ¹⁶Cia li tuav txojlus uas pub txojsia ruaj, xwv kuv thiaj khav tau rau Khetos hnub hais tias kuv tsis tau dhia do do xwb lossis siv zog ua haujlwm tsis muaj qabhau. ¹⁷Txawm yog kuv yuav raug muab hliv ib yam li tej cawv txiv hmab uas hliv xyeem rau saum tej uas nej muab xyeem thiab saum tej haujlwm uas nej ua vim nej ntseeg, kuv kuj zoo siab thiab nrog nej txhua tus zoo siab xyiv fab. ¹⁸Thiab tsim nyog nej yuav zoo siab thiab nrog kuv zoo siab xyiv fab.

Timaute thiab Epafaudita

¹⁹Kuv muaj siab vam rau hauv tus Tswv Yexus tias tsis ntev no kuv yuav txib Timaute tuaj cuag nej, xwv thaum kuv hnov nej xov lawd thiaj txhawb tau kuv lub siab. ²⁰Kuv tsis muaj leejtwg thooj li nws uas mob siab nej tiag tiag. ²¹Vim tias lwm tus sawvdaws nrhiav tej uas muaj qabhau rau lawv xwb, tsis yog nrhiav tej uas muaj qabhau rau Yexus Khetos. ²²Tiamsis nej twb paub Timaute tes haujlwm zoo tias nws nrog kuv koom ua haujlwm rau txoj xov zoo ib yam li ob txiv tub. ²³Vim li no kuv vam tias thaum kuv paub tias yuav muaj xwm li cas tshwm rau kuv ces kuv yuav xa nws tuaj sai sai, ²⁴thiab kuv ruaj siab rau hauv tus Tswv tias tsis ntev no kuv yuav tuaj thiab.
²⁵Kuv pom tias cheem tsum xa Epafaudita tuaj cuag nej. Nws yog kuv kwvtij uas nrog kuv koom ua haujlwm thiab nrog kuv ua tub rog, thiab tseem yog tus tubtxib uas nej txib tuaj tu kuv thiab pab tej uas kuv tu ncua, ²⁶vim nws nco txog nej sawvdaws thiab nws txhawj vim qhov uas nej hnov tias nws muaj mob. ²⁷Nws mob tiag twb yuav tuag, tiamsis Vajtswv khuvleej nws, tsis yog nws tib leeg xwb tseem khuvleej kuv thiab, xwv kuv thiaj tsis raug kev txhawj xeeb tsav ntxiv rau tej kev txhawj. ²⁸Vim li no kuv yimhuab xav xa nws tuaj kom nej thiaj zoo siab qhov uas rov pom nws thiab qhov uas kuv txhawj thiaj li tsawg zuj zus mus. ²⁹Vim li no cia li zoo siab kawg txais nws hauv tus Tswv, thiab hwm cov neeg uas zoo li no, ³⁰rau qhov nws twb yuav tuag vim yog Khetos tes haujlwm, nws sev txojsia zoo siab ua num rau kuv rau tej uas nej ua tsis tau.

2

Xyum lawv le Yexu kws txu fwjchim

¹Vem le nuav, yog mej muaj kev txhawb sab rua huv Kheto, hab muaj kev nplig sab ntawm txujkev sws hlub, hab muaj kev sws raug zoo rua huv Vaaj Ntsuj Plig, hab muaj qhov kws ib leeg mob sab rua ib leeg hab ib leeg taab ncuab ib leeg le caag lawm, ²kuj ca le ua rua kuv zoo sab xyiv faab kawg nkaus vem mej muaj lub sab xaav ib yaam nkaus, muaj lub sab hlub ib yaam nkaus, hab koom ua ib lub sab hab koom xaav ib yaam nkaus. ³Tsw xob ua sab hlub txeeb ua ib yaam daabtsw rua yug lossws tsaab ua luj tassws yuav tsum txu fwjchim xaam pum lwm tug zoo dua yug. ⁴Mej tsw xob nyag xaam pum nyag tug kheej xwb yuav tsum xaam pum lwm tug hab. ⁵Mej ca le muaj lub sab yaam le nuav rua huv mej ib yaam le muaj rua huv Yexu Kheto.

⁶Nwg yeej zoo ib yaam le Vaajtswv
tassws nwg tsw suav tas yuav txeeb
qhov kws sws luag le Vaajtswv rua nwg,⚓
⁷tassws nwg yeem muab txhua yaam tso tseg
es saws lub neej zoo le tug qhev
lug yug zoo le ib tug tuabneeg.
Thaus nwg tshwm lug
zoo nkaus ib tug tuabneeg.
⁸nwg txu nwg tug kheej kuas qeg
hab noog lug moog txug qhov kws tuag,
yog tuag sau ntoo khaublig.
⁹Vem le nuav Vaajtswv txhad muab nwg
tsaa sab kawg nkaus
hab pub lub npe kws sab dhau
tej npe huvsw rua nwg,
¹⁰vem lub npe Yexu hov txhua lub hauv caug
sau ntuj hab huv nplajteb hab huv qaab nplajteb
yuav txhus caug ndua pe nwg,
¹¹hab txhua tug nplaig yuav leeg tas
Yexu Kheto yog tug Tswv,
txhad ua rua Vaajtswv kws yog leej Txwv
tau koob meej ci ntsaa ab.

Tsom duab ci rua lub nplajteb

¹²Yog le ntawd, cov kwvtij kws kuv hlub, ib yaam le mej txeev noog kuv lug tsw tu ncua, tsw yog noog rua thaus kuv nrug mej nyob xwb tassws thaus kuv tsw nrug mej nyob kuj yimfuab yuav noog, mas nwgnuav mej yuav tsum ntshai tshee quas nyo ua lub neej phim mej txujkev dim kuas tav. ¹³Tsua qhov Vaajtswv ua num rua huv mej kuas mej muaj lub sab xaav hab muaj peevxwm ua lawv le nwg lub sab nyam.
¹⁴Ca le ua txhua yaam tsw xob sws ywg sws caav, ¹⁵sub mej txhad tsw muaj chaw thuaj hab tsw muaj qhov txhum, ua Vaajtswv cov mivnyuas kws tsw muaj ib qhov phem rua huv plawv tam tuabneeg phem hab nkhaus nuav, hab ci rua huv puab ib yaam le tej nub qub ci rua lub nplajteb. ¹⁶Ca le tuav txujlug kws pub txujsa ruaj, sub kuv txhad khaav tau rua Kheto nub has tas kuv tsw tau dha do do xwb lossws swv zug ua num tsw muaj qaabhau. ¹⁷Txawm yog kuv yuav raug muab hliv ib yaam le tej cawv txwv maab kws laub xyeem rua sau tej kws mej muab xyeem hab sau tej num kws mej ua vem mej ntseeg, kuv kuj zoo sab hab nrug mej txhua tug zoo sab xyiv faab. ¹⁸Hab tswm nyog mej yuav zoo sab hab nrug kuv zoo sab xyiv faab.

Timaute hab Epafauntita

¹⁹Kuv muaj sab vaam rua huv tug Tswv Yexu tas tsw ntev nuav kuv yuav khaiv Timaute tuaj cuag mej, sub thaus kuv nov mej xuv lawd txhad txhawb tau kuv lub sab. ²⁰Kuv tsw muaj leejtwg thooj le nwg kws mob sab mej tag tag. ²¹Vem tas lwm tug suavdawg nrhav tej kws muaj qaabhau rua puab xwb, tsw yog nrhav tej kws muaj qaabhau rua Yexu Kheto. ²²Tassws mej tub paub Timaute teg num zoo tas nwg nrug kuv koom ua num rua txuj xuv zoo ib yaam le ob txw tub. ²³Vem le nuav kuv vaam tas thaus kuv paub tas yuav muaj xwm le caag tshwm rua kuv tes kuv yuav xaa nwg tuaj sai sai, ²⁴hab kuv ruaj sab rua huv tug Tswv tas tsw ntev nuav kuv yuav tuaj hab.
²⁵Kuv pum tas cheem tsum xaa Epafauntita tuaj cuag mej. Nwg yog kuv kwvtij kws nrug kuv koom ua num hab nrug kuv ua tub rog, hab tseed yog tug tubkhai kws mej khaiv tuaj ua koom rua kuv hab paab tej kws kuv tu ncua, ²⁶vem nwg ncu txug mej suavdawg hab nwg txhawj vem qhov kws mej nov tas nwg muaj mob. ²⁷Nwg mob tag tub yuav tuag, tassws Vaajtswv khuvleej nwg, tsw yog nwg tuab leeg xwb tseed khuvleej kuv hab, sub kuv txhad tsw raug kev txhawj xeeb tsaav rua tej kev txhawj. ²⁸Vem le nuav kuv yimfuab xaav xaa nwg tuaj sub mej txhad zoo sab qhov kws rov pum nwg hab qhov kws kuv txhawj txhad le tsawg zuj zug moog. ²⁹Vem le nuav ca le zoo sab kawg txais nwg huv tug Tswv, hab fwm cov tuabneeg kws zoo le nuav, ³⁰tsua qhov nwg tub yuav tuag vem yog Kheto teg num, nwg sev txujsa ua koom rua kuv rua tej kws mej ua tsw tau.