56

Nau Nkhôm Yor Ndjôt Prăp Nau Brah Ndu Tâm Rnglăp

1Pô aơ Yêhôva lah: "Ndjôt prăp hom nau di, jêh ri ƀư hom nau sŏng srăng, yor lah nau gâp tâm rklaih dăch tât jêh, jêh ri nau sŏng srăng gâp mra gơnh tâm mpơl. 2Ueh maak ngăn ma bunuyh ƀư nau nây, jêh ri ma kon bunuyh djôt prăp păng nâp, nơm prăp nar Saƀat mâu ƀư ƀơ̆ păng ôh, jêh ri nkân ti păng mâu ƀư du ntil nau mhĭk ôh." 3Lơi ăn bu năch tâm rnglăp păng nơm đah Yêhôva lah: "Na nê̆ ngăn Yêhôva mra tâm nkhah gâp bơh phung ƀon lan păng." Lơi ăn oh mon nter lah: "Aơ, gâp jêng du n'gâng tơm si kro." 4Yor lah pô aơ Yêhôva lah: "Ma phung oh mon bu chor djôt prăp nar saƀat gâp, săch nau ƀư maak ma gâp, jêh ri djôt prăp nâp nau gâp tâm rnglăp, 5ma khân păng yơh gâp mra ăn tâm ngih gâp jêh ri tâm nkuĭl gâp du nau bu kah gĭt jêh ri du amoh ueh lơn ma phung kon bu klâu jêh ri ma phung kon bu ur. Gâp mra ăn ma khân păng du amoh n'ho ro, bu mâu mra jut lơi ôh.
6Jêh ri phung bu năch tâm rnglăp khân păng nơm đah Yêhôva, gay pah kan ma păng, gay rŏng ma amoh Yêhôva, gay jêng phung oh mon păng, ăp nơm djôt prăp nar Saƀat mâu ƀư ƀơ̆ păng ôh, jêh ri djôt prăp nâp nau gâp tâm rnglăp, 7khân păng yơh gâp mra njŭn leo ta yôk kloh ueh gâp, jêh ri ăn khân păng răm maak tâm ngih gâp mbơh sơm. Mpa khân păng gŭch jêh ri mpa khân păng ƀư brah gâp mra dơn ta kalơ nơng gâp; yor lah ngih gâp bu mra rnha ngih mbơh sơm prăp ma lĕ rngôch phung ndul mpôl bunuyh." 8Kôranh Brah Yêhôva, nơm tâm rƀŭn phung Isarael bu mprơh jêh, lah: "Gâp mra tâm rƀŭn phung êng ma păng, êng đah phung rƀŭn jêh."

Nau Rtăp Rak Ma Phung Isarael Mbah Rup Brah

9Ơ lĕ rngôch mpa bri, Ơ lĕ rngôch mpa tâm krŏng, văch sa hom! 10Phung bunuyh Yêhôva đă gak jêng chieh măt, lĕ rngôch khân păng mâu geh nau gĭt rbăng ôh, lĕ rngôch khân păng jêng so mlo, mâu dơi groh ôh; khân păng kuĕn, khân păng mbơi, khân păng rŏng bêch. 11Lĕ rngôch so nây hay, mâu blau hơm ôh. Khân păng jêng phung rmăk biăp mâu geh nau gĭt rbăng ôh; lĕ rngôch khân păng plơ̆ tĭng trong khân păng nơm, ăp nơm ŭch sa kao ma păng nơm dadê. 12Khân păng lah: "Văch hom, he joi hom dak ndrănh, jêh ri he mra nhêt ndrănh mhe, jêh ri ôi taơ mra jêng tâm ban ma nar aơ, du nar toyh rlau keh."