6

Yixayee raug puam tsuaj

¹Cov uas nyob tsis txob
tsis txhawj hauv Xi‑oo,
thiab cov uas nyob tso siab plhuav
saum lub roob Xamali,
yuav raug txom nyem lauj!
Lawv yog cov uas muaj meej nthawb
hauv lub tebchaws uas ua thawj,
uas cov Yixayee tuaj vam khom.
²Cia li mus tshuaj saib lub moos Khanej,
thiab tawm qhov ntawd mus
rau lub moos loj Hama,
li mus rau nram lub moos Ka
hauv cov Filixatee tebchaws.
Tej moos ntawd zoo dua lub tebchaws
uas nej kav no lov?
Lawv lub tebchaws dav dua
nej lub tebchaws lov?
³Nej tav hnub uas phem ntawd
kom nyob deb,
tiamsis nej coj lub zwm txwv
uas ua limhiam ntais ntuj los ze.
⁴Cov uas pw saum lub txaj kaus ntxhw
thiab nyob xyab luas saum lub rooj ntev,
thiab noj tej menyuam yaj hauv pab yaj
thiab noj tej menyuam nyuj hauv nkuaj,
yuav raug txom nyem lauj!
⁵Lawv hu nkauj ua si
ntxuag suab nkauj nog ncas,
thiab ntaus tej suab nkauj
phim tej nkauj tshiab ib yam li Davi.
⁶Lawv haus kiag tej niag phaj cawv txiv hmab
thiab muab tej roj zoo zoo pleev lawv lub cev,
tiamsis lawv twb tsis quaj ntsuag
txog qhov uas Yauxej raug puam tsuaj.
⁷Vim li no lawv yuav ua thawj pab
uas poob tebchaws,
thiab qhov uas lawv pam noj pam haus
pw xyab luas yuav ploj ntais mus.

⁸Vajtswv Yawmsaub tau tuav
nws lub npe cog lus twv.
Vajtswv Yawmsaub uas muaj
hwjchim loj kawg nkaus hais tias,
“Kuv dhuav qhov uas Yakhauj khav theeb,
thiab ntxub nws tej chaw ruaj khov.
Kuv yuav muab lub nroog no
thiab txhua yam uas nyob hauv
cob rau yeeb ncuab.”

⁹Yog hauv tsev tshuav kaum leej nyob xwb, lawv yuav tuag tag huvsi. ¹⁰Thaum leejtwg li kwvtij tuaj muab tej cev tuag hlawv es yuav nqa tej pob txha tawm hauv tsev, thiab hais rau tus uas nyob chav hauv lub plawv tsev ntawd tias, “Puas tshuav leejtwg nrog koj nyob thiab?” tus ntawd yuav teb tias “Tsis tshuav.” Mas nws yuav hais tias, “Nyob twjywm, tsis txhob hais txog Yawmsaub lub npe kiag li.”

¹¹Saib maj, Yawmsaub yeej hais cia lawm,
mas tej vaj tse loj yuav raug muab
tsoo tawg ua tej dwb daim,
thiab tej tsev me yuav tawg mos nyoos.
¹²Nees dhia saum tej roob tsuas lov?
Muaj leejtwg muab nyuj laij dej hiavtxwv lov?
Nej muab txojkev ua ncaj
ntxeev ua tshuaj lom muaj taug,
thiab muab qhov uas ua ncaj ncees
ntxeev ua cov tshuaj iab.
¹³Nej zoo siab xyiv fab rau hauv
lub moos Laudenpa,⚓ thiab hais tias,
“Qhov uas peb txeeb tau
lub moos Khana‑i⚓ los rau peb,
tsis yog siv peb lub zog lov?”
¹⁴Vajtswv Yawmsaub uas muaj
hwjchim loj kawg nkaus hais tias,
“Yixayee caj ces 'e, saib nawj,
kuv yuav tsa ib haiv neeg
sawv tawm tsam nej,
mas lawv yuav quab yuam nej txij ntua txojkev
uas nkag mus rau hauv lub moos Hama
mus txog lub hav Alanpa.”

6

Cov Yixalayees Raug kev Puastsuaj

¹Kev txomnyem yuav los raug nej cov uas nyob tso siab lug hauv lub nroog Xi-oos thiab nej cov uas nyob kaj siab lug hauv lub nroog Xamalis, nej cov uas yog neeg tseemceeb ntawm haivneeg Yixalayees, thiab nej yog cov uas tsoom pejxeem cia siab rau. ²Nej cia li mus saib lub nroog Kalenes, ces ho mus saib lub nroog Hamas uas loj heev, thiab nqis mus saib cov Filitees lub nroog Nkas. Puas yog cov nroog no zoo tshaj cov Yudas thiab cov Yixalayees ob lub tebchaws? Puas yog lawv tej ciam dej ciam av dav tshaj nej li? ³Nej yeej tsis xav pom hnub uas muaj kev puastsuaj, tiamsis tej uas nej ua tabtom coj hnub ntawd los ze nej lawm. ⁴Kev puastsuaj yuav los raug nej cov uas tau zoo pw saum tej rooj uas pua ntaub tsuj ntaub npuag thiab tua xyuas nyuj thiab thav yaj noj xwb! ⁵Nej nyiam sau tej nkauj tshiab hu ib yam li Daviv thiab hu nrog tej suab nkauj nogncas. ⁶Nej haus tej tais cawv puv phwj yaws thiab muab tej roj tsw qab uas kim kim los pleev ua tsw qab ntxiag, tiamsis nej tsis quavntsej thaum nej pom cov Yixalayees lub tebchaws raug kev puastsuaj. ⁷Yog li ntawd, nej yuav yog thawj pab uas raug luag ntes coj mus rau lwm tebchaws. Qhov uas nej muaj rooj noj rooj haus thiab ua kev lomzem yuav tsis muaj ntxiv lawm.
⁸Tus TSWV uas yog Vajtswv tus muaj Hwjchim Loj kawg nkaus tau coglus ruaj khov tseg hais tias, “Kuv ntxub cov Yixalayees tej kev khavtheeb; kuv ntxub lawv tej vajtse uas ci ntsa iab. Kuv yuav muab nej lub tuamceeb nroog thiab txhua tsav yam uas nyob hauv cob rau nej cov yeebncuab tes.”
⁹Txawm yog ib tsevneeg tshuav kaum leej txivneej xwb los lawv yeej yuav tuag tas huv tibsi. ¹⁰Tus tuag ntawd ib tug kwvtij uas saib kev pam tuag yuav tuaj coj tus tuag tawm hauv tsev mus. Nws yuav nug cov neeg uas nyob hauv lub tsev ntawd hais tias, “Puas muaj lwm tus nrog nej nyob thiab?”
Ces lawv yuav teb hais tias, “Tsis muaj.”
Ces tus kwvtij ntawd yuav hais tias, “Ua twjywm! Peb yuav tsum ceevfaj tsis txhob tuav tus TSWV lub npe li.”
¹¹Thaum tus TSWV tso ncauj lawm, tej tsev tsis hais lub loj lub me yuav puastsuaj tas. ¹²Nees puas khiav tso sasntws tau saum tej roob tsuas? Puas muaj neeg cab nyuj mus laij tau hiavtxwv? Tiamsis nej muab txojkev ncaj ncees hloov mus ua tshuaj lom neeg thiab muab yam zoo hloov ua yam phem.
¹³Nej khav hais tias nej mus txeeb tau lub nroog Laudenpas. Nej khav hais tias, “Peb yeej muaj zog txaus uas mus txeeb tau lub nroog Kalenais los ua peb tug.”
¹⁴Tug TSWV uas yog Vajtswv tus muaj Hwjchim Loj kawg nkaus hais tias, “Cov Yixalayees, kuv tabtom txib cov tubrog txawv tebchaws tuaj tua nej lub tebchaws. Lawv yuav tsimtxom nej txij ntawm lub dawm Hamas sab qaumteb mus txog nram tus dej Alanpas uas nyob sab qabteb.”