78
Lub keeb kwm kws Vaajtswv coj cov Yixayee
Zaaj nkauj Maxakh⚓ kws Axas sau.
1Kuv cov tuabneeg 'e,
ca le tig ntsej noog kuv tej lug qha,
mej ca le tig ntsej noog
tej lug ntawm kuv qhov ncauj.
2Kuv yuav rua ncauj has paaj lug,
kuv yuav has tej lug kws muab npog ca
yaav thau u lawm,
3yog has txug tej kws peb tau nov tau paub
kws peb tej laug tau has rua peb.
4Peb yuav tsw muab zais tsw qha
rua puab tej tub ki,
peb yuav pav rua txhua tam
kws saamswm lug
kuas paub txug Yawmsaub tej num
kws tswm nyog qhuas
hab nwg tug fwjchim,
hab tej txujci phemfwj kws nwg tau ua.
5Nwg tau tswm tsaa tej kaab ke
rua huv Yakhauj
hab rhawv kevcai rua huv Yixayee,
yog tej kws nwg has kuas peb tej laug
qha rua puab tej tub ki,
6sub lwm tam txhad le paub txug tej nuav,
yog puab tej tub ki
kws tseed tsw tau yug lug,
mas puab yuav sawv qha
rua puab tej mivnyuas hab,
7sub puab txhad muaj sab vaam
rua huv Vaajtswv
hab tsw nov qaab Vaajtswv tej num
tassws tuav rawv nwg tej lug nkaw,
8txhad tsw ua lawv le puab tej laug
kws yog tam kws tawv ncauj hab faav xeeb,
yog tam kws sab tsw ruaj khov,
hab tsw muaj lub sab xwb rua Vaajtswv.
9Cov tuabneeg Efa‑i coj neev nti
thim ntawm tshaav rog rov qaab
rua nub kws ua rog.
10Puab tsw tuav Vaajtswv tej lug cog tseg
hab tsw kaam ua lawv le
Vaajtswv txuj kevcai.
11Puab tsw ncu txug
tej kws Vaajtswv tub ua lug lawm
hab ncu tsw txug tej txujci phemfwj
kws nwg ua tshwm rua puab.
12Nwg tub ua tej num phemfwj
rua puab tej laug lub qhov muag pum ntsoov
huv Iyi tebchaws hab huv tej laj teb Xau‑aa.
13Nwg muab dej havtxwv faib hlo rua ob saab
ca puab hlaa huv plawv moog,
nwg ua rua dej tauv rua ob saab
yaam le ntsaa loog.
14Nruab nub nwg muab tauv fuab coj puab
mo ntuj nwg ua nplaim tawg ci
coj puab ib mos kaaj ntug.
15Nwg phua tej pob zeb
huv tebchaws moj saab qhua
hab pub dej rua puab haus ntau kawg le
yaam nkaus le txhawv huv qhov tub lug.
16Nwg ua dej txhawv huv phaab zeb lug,
nwg ua dej ndwg lug
yaam nkaus le ib tug nam dej.
17Los puab tseed yimfuab ua txhum rua nwg,
puab faav xeeb rua Vaajtswv
kws Luj Dua Ndais huv ntuj nraag teb do.
18Puab txhob txwm swm Vaajtswv,
puab txhad kuas Vaajtswv
pub tej kws puab nqhes rua puab noj.
19Puab tshev ywg Vaajtswv tas,
“Vaajtswv yuav npaaj tau rooj mov rua peb noj
huv tebchaws moj saab qhua nuav lov?
20Vaajtswv ntaus phaab zeb ua rua dej
txhawv lug hab dej ndwg lug nyaab hlo ntug.
Nwg yuav muab tau mov tau nqaj
rua nwg haiv tuabneeg noj hab lov?”
21Vem le hov, thaus Yawmsaub nov lawm
nwg npau tawg kawg le,
mas muaj suavtawg tshwm plawg rua Yakhauj,
hab nwg chim luj quas zug rua Yixayee,
22tsua qhov puab tsw ntseeg Vaajtswv
hab tsw tso sab rua nwg tug fwjchim
kws cawm tau kuas dim.
23Txawm le caag los nwg tseed
has tau lub ntuj hab qheb tau rooj ntug.
24Nwg tso mana⚓ lug rua puab noj
nwg pub tej mov sau ntuj lug rua puab.
25Tuabneeg tau noj tej tubkhai ntuj tej mov,
Vaajtswv pub mov rua puab noj
nplua quas mag.
26Nwg ua rua cua saab nub tuaj
ntsawj rua sau ntuj
hab nwg swv nwg tug fwjchim
coj tej cua kws nyob saab nraag ntsawj tuaj.
27Nwg tso nqaj lug rua puab
yaam nkaus le tej moov aav,
yog cov noog yaa lug
coob npaum le tej xuab zeb huv havtxwv.
28Nwg tso poob lug rua huv plawv puab lub zog,
poob rua ib ncig puab tej chaw nyob.
29Puab tau noj tsau npo,
vem yog Vaajtswv pub
tej kws puab nqhes rua puab.
30Ua ntej kws puab tsw tau zoo nqhes,
thaus kws nqaj tseed nyob
huv puab qhov ncauj,
31Vaajtswv txujkev npau tawg
tshwm rua puab,
nwg tua puab cov tuabneeg
kws muaj zug heev dua luas pov tseg,
yog nwg muab cov tuabneeg
kws zoo tshaaj huv cov Yixayee pov tseg.
32Txawm yog muaj tej xwm nuav huvsw
los puab tseed ua txhum.
Txawm yog nwg ua tej num phemfwj
los puab tsw ntseeg.
33Nwg txhad ua rua puab lub noob nyoog
pluj taag yaam nkaus le ua paa xwb,
hab ua rua puab lub naj lub xyoos
pluj plag ua rua puab ntshai kawg le.
34Thaus nwg tua puab,
puab kuj lug nrhav nwg,
puab le ntxeev dua sab
hab kub sab quas lug nrhav Vaajtswv.
35Puab le ncu txug has tas
Vaajtswv yog puab txhwb zeb,
Vaajtswv kws Luj Dua Ndais
yog tug kws txhwv puab dim.
36Tassws puab lub ncauj
has lug qaab zwb rua Vaajtswv,
hab puab tug nplaig daag nwg xwb.
37Puab tsw ruaj sab rua nwg,
puab tsw tuav rawv Vaajtswv
tej lug cog tseg.
38Txawm le ntawd
los nwg tseed taab ncuab puab,
nwg zaam puab tej kev txhum
hab tsw ua kuas puab puam tsuaj taag.
Vaajtswv tswj quas nreeg nwg txujkev chim ca,
nwg tsw khawb nwg txujkev
npau tawg huvsw lug.
39Nwg ncu ntsoov tas
puab tsuas yog tuabneeg nqaj tawv xwb,
puab yog cua kws ntsawj moog lawm
tsw rov lug dua le lawm.
40Puab faav xeeb rua Vaajtswv
huv tebchaws moj saab qhua ntau zag,
hab ua rua nwg tu sab
huv ntuj nraag teb do.
41Puab tseed pheej rov swm Vaajtswv sab
hab ua rua tug Dawb Huv
huv cov Yixayee chim heev.
42Puab tsw ncu txug Vaajtswv tug fwjchim,
hab tsw ncu txug nub kws Vaajtswv
txhwv puab dim huv cov tshawj chim lug,
43rua thaus nwg ua tej txujci phemfwj
rua huv Iyi tebchaws
hab ua nwg tej txujci phemfwj
rua huv tej laj teb Xau‑aa.
44Nwg muab puab tej haav dej
ntxeev ua ntshaav taag,
puab txhad haus tsw tau puab tej haav dej.
45Nwg tso tej nam paab yoov ntsuab lug
rua huv puab lug txuv puab,
hab tso qaav lug ua kuas puab puam tsuaj.
46Nwg tso kaab lug txov puab tej qoob,
tso kooj ntaas lug noj puab tej daag zug.
47Nwg tso lawg lug
ntaus puab tej txwv maab puam tsuaj,
hab tso te lug tua puab tej ntoo txwv cua.
48Puab tej nyuj raug lawg ntaus tuag taag,
puab tej nam paab yaaj paab tshws
raug xub tua.
49Nwg tso nwg txujkev chim heev rua sau puab,
yog kev npau tawg kev chim
hab kev txom nyem,
yog paab tubkhai ntuj
kws ua kuas puam tsuaj.
50Nwg qheb kev rua nwg txujkev chim,
nwg tsw tseg puab caj sa le,
nwg muab puab txujsa
cob nkaus rua tej mob phem.
51Nwg muab tej tub hlub huv Iyi tebchaws
tua huvsw,
yog puab thawj tug zug
kws nyob huv Haa tej tsev ntaub.
52Vaajtswv coj nwg haiv tuabneeg
tawm lug ib yaam le coj yaaj,
hab coj puab moog
huv tebchaws moj saab qhua
yaam le paab yaaj paab tshws.
53Nwg coj puab moog tso sab plhuav
puab txhad tsw ntshai.
Tassws dej havtxwv nyaab hlo
puab tej yeeb ncuab.
54Nwg coj puab lug rua huv
nwg lub tebchaws kws dawb huv,
lug txug lub roob
kws nwg txhais teg xws txeeb tau.
55Nwg muab lwm haiv tuabneeg lawv
tawm ntawm puab hauv ntej moog.
Nwg muab lub tebchaws faib
ua qub txeeg qub teg rua puab,
hab ca txhua xeem Yixayee nyob
huv lwm haiv tuabneeg tej tsev ntaub.
56Los puab tseed swm hab faav xeeb
rua Vaajtswv kws Luj Dua Ndais,
hab tsw ua lawv le nwg tej lug.
57Puab tig rov qaab hab faav xeeb
ib yaam nkaus le puab tej laug.
Puab lem quas ceeg yaam nkaus le
raab neev nti kws swv tsw tau.
58Tsua qhov puab ua tej chaw sab teev daab
zwg Vaajtswv npau tawg,
puab txaug tej txoov daab lug
ua rua Vaajtswv khib.
59Thaus Vaajtswv tau nov
mas nwg txhad npau tawg kawg
hab nwg muab Yixayee tso plhuav tseg.
60Nwg tseg hlo nwg lub chaw nyob huv Silau,
yog lub tsev ntaub
kws nwg nyob huv plawv tuabneeg.
61Nwg txhad muab lub swb xaab
kws yog Vaajtswv tug fwjchim
rua yeeb ncuab coj moog,
yog muab nwg tug fwjchim ci ntsaa quas ab
rua huv cov tshawj chim txhais teg.
62Nwg muab nwg haiv tuabneeg
cob rua nav ntaaj
hab nwg npau tawg heev
rua nwg qub txeeg qub teg.
63Suavtawg rhuav tshem
puab tej tub hluas taag
hab puab tej ntxhais hluas
tsw nov suab nkauj ua tshoob.
64Puab cov pov thawj raug ntaaj
tua tuag taag,
cov pov thawj tej quaspuj
tsw paam tsw quaj le.
65Mas tug Tswv txhad sawv tseeg
yaam nkaus le tswm nruab daab ndub lug,
yaam nkaus le ib tug txwvneej
muaj zug qw nrov
vem yog haus cawv txwv maab.
66Nwg ntaus nwg cov yeeb ncuab thim hlo
hab ua rua puab txaaj muag ib txhws le.
67Nwg tsw leeg yuav Yauxej caaj ceg
hab tsw xaiv xeem Efa‑i.
68Nwg xaiv xeem Yuta
hab lub roob Xi‑oo kws nwg hlub.
69Nwg ua lub chaw kws pe nwg
zoo yaam le sau ntuj
hab zoo yaam nkaus le lub nplajteb
kws nwg tswm ca nyob moog ib txhws.
70Vaajtswv xaiv nwg tug qhev Tavi
hab coj nwg tawm huv nkuaj yaaj lug,
71yog coj nwg tawm huv qhov kws yug
cov maum yaaj kws muaj mivnyuas mog
lug ua tug tswv yug yaaj,
yug Yakhauj kws yog Vaajtswv haiv tuabneeg,
yog yug Yixayee
kws yog Vaajtswv qub txeeg qub teg.
72Tavi ua lub sab ncaaj yug puab,
nwg txhais teg kws txawj coj tau puab.