6
Kinte‑oo
1Cov Yixayee ua tej kws Yawmsaub pum tas phem, mas Yawmsaub muab puab cob rua huv cov Mintee txhais teg tau xyaa xyoo.
2Cov Mintee txhais teg tsuj yuam cov Yixayee. Vem tim cov Mintee mas cov Yixayee txhad npaaj chaw nraim cev rua peg tej roob hab huv tej qhov tsua hab tej chaw kws ruaj khov.
3Cov Yixayee cog qoob thaus twg mas cov Mintee hab cov Amalej hab cov tuabneeg kws nyob saab nub tuaj txawm tuaj ua rog rua puab,
4hab tuaj tsuam chaw nyob rua huv lub tebchaws hab muab puab tej qoob loos ua puam tsuaj taag thoob plawg moog txug lub moos Kaxa tsw tseg ib yaam daabtsw ca tau noj le tsw has yaaj nyuj neeg luav huvsw.
5Luas coj hlo tsaj txhu hab lub tsev ntaub tuaj coob yaam nkaus le tej paab kooj ntaas. Tuabneeg hab tej ntxhuav kuj coob suav tsw txheeb. Thaus luas tuaj luas ua rua lub tebchaws pam taag.
6Cov Yixayee txhad poob qeg kawg le vem yog tim cov Mintee. Cov Yixayee txhad quaj thov Yawmsaub paab.
7Thaus cov Yixayee quaj thov Yawmsaub vem yog tim cov Mintee,
8Yawmsaub kuj khaiv ib tug xwbfwb cev Vaajtswv lug tuaj rua huv cov Yixayee. Tug hov has rua puab tas, “Yawmsaub kws yog cov Yixayee tug Vaajtswv has le nuav tas, Kuv coj mej tawm huv Iyi tebchaws lug hab coj mej tawm huv txujkev ua qhev.
9Kuv cawm mej dim huv cov Iyi txhais teg hab dim huv txhua tug kws tswm txom mej txhais teg hab ntab puab tswv ntawm mej hauv ntej moog hab muab puab lub tebchaws rua mej.
10Hab kuv tub has rua mej tas, ‘Kuv yog Yawmsaub yog mej tug Vaajtswv, mej tsw xob pe hawm cov Amaulai tej daab huv lub tebchaws kws mej moog nyob hov.’ Tassws mej tsw quav ntsej kuv tej lug.”
11Yawmsaub tug tubkhai ntuj tuaj nyob tsawg huv qaab Yau‑as le tug ntoo qheb ntawm Aufa, Yau‑as yog Anpiyexaw cum. Yau‑as tug tub Kinte‑oo saamswm ntaus mog huv lub qhov tsuam kua txwv maab sub cov Mintee txhad tsw pum.
12Yawmsaub tug tubkhai ntuj lug tshwm rua Kinte‑oo hab has rua nwg tas, “Koj yog tug kws sab luj sab tuab, Yawmsaub nrug nraim koj.”
13Kinte‑oo txawm has rua nwg tas, “Yawm hlub, thov nug koj, yog Yawmsaub nrug nraim peb lawm ua caag tej xwm txheej nuav tseed tshwm lug raug peb hab? Yawmsaub tej txujci phemfwj kws peb tej laug txeev pav rua peb noog dua twg lawm? Puab pav has tas ‘Yawmsaub coj peb tawm huv Iyi tebchaws lug los tsw yog?’ Tassws nwgnuav Yawmsaub tso peb tseg lawm hab muab peb cob rua huv cov Mintee txhais teg.”
14Yawmsaub tig lug has rua nwg tas, “Ca le swv koj tug zug luj nuav moog cawm cov Yixayee dim huv cov Mintee txhais teg. Yeej yog kuv khaiv koj moog.”
15Kinte‑oo txawm has tas, “Yawm hlub, kuv yuav cawm tau cov Yixayee dim le caag? Swm saib kuv cum yog cum kws qeg kawg huv xeem Manaxe hab kuv tsev tuabneeg kuv yog tug kws miv dhau.”
16Yawmsaub has rua nwg tas, “Kuv yeej yuav nrug nraim koj mas koj yuav ntaus yeej hlo cov Mintee yaam nkaus le ntaus ib tug xwb.”
17Kinte‑oo has rua Yawmsaub tas, “Yog nwgnuav koj txaus sab rua kuv, thov koj ua ib yaam txujci tshwm qha kuv paub tas tug kws nrug kuv has lug nuav yog koj ntaag.
18Thov koj tsw xob tawm ntawm nuav moog, tog txug thaus kuv rov tuaj cuag koj hab coj tej kws muab xyeem tuaj tso rua ntawm koj xubndag.” Mas nwg has tas, “Kuv yuav tog txug thaus koj rov tuaj.”
19Kinte‑oo txawm nkaag rua huv tsev npaaj ib tug mivnyuas tshws hab ib efa⚓ moov mog ua ncuav tsw xyaw keeb. Nwg muab cov nqaj tso rua huv lub choo hab muab cov kua nqaj tso rua huv lub laujkaub coj tuaj xyeem rua nwg huv qaab tsob ntoo qheb.
20Vaajtswv tug tubkhai ntuj has rua Kinte‑oo tas, “Ca le muab cov nqaj hab cov ncuav tsw xyaw keeb tso rua sau lub pob zeb nuav hab laub cov kua nqaj ywg rua sau.” Kinte‑oo kuj ua lawv le ntawd.
21Tes Yawmsaub tug tubkhai txawm muab tug hauv paas nreg huv nwg txhais teg cev moog twb rua cov nqaj hab cov ncuav tsw xyaw keeb. Tes suavtawg txawm cig plawg ntawm lub pob zeb kub tej nqaj hab tej ncuav tsw xyaw keeb taag huvsw. Tes Yawmsaub tug tubkhai txawm pluj plag ntawm nwg qhov muag moog lawm.
22Kinte‑oo txhad paub tas yog Yawmsaub tug tubkhai ntuj tag tag le hab Kinte‑oo has tas, “Au Vaajtswv Yawmsaub nwgnuav kuv tau pum koj tug tubkhai ntuj tim ntsej tim muag, yuav ua le caag lauj?”
23Tassws Yawmsaub has rua Kinte‑oo tas, “Koj tsuas muaj kws nyob kaaj sab quas lug xwb. Koj tsw xob ntshai, koj yuav tsw tuag.”
24Tes Kinte‑oo txawm ua ib lub thaaj rua Yawmsaub rua hov ntawd hab hu lub thaaj hov tas Yawmsaub yog txujkev kaaj sab lug. Naj nub nwgnuav lub thaaj hov tseed nyob ntawm Aufa kws yog Anpiyexaw cum le moos.
25Mas mo ntawd Yawmsaub has rua Kinte‑oo tas, “Ca le muab koj txwv tug txwv nyuj kws ob noob nyoog muaj xyaa xyoo lug, es moog rhuav koj txwv lub thaaj teev daab Npa‑aa pov tseg hab ntuv tug ncej daab Asela kws nyob ntawm lub thaaj ib saab pov tseg.
26Hab ua ib lub thaaj xyeem rua Yawmsaub kws yog koj tug Vaajtswv rua sau lub chaw ruaj khov nuav, swv tej pob zeb lug tib lawv le kevcai, mas muab tug txwv nyuj kws ob hov tua ua kevcai hlawv xyeem, hab muab tug ncej daab Asela kws koj ntuv hov ua tawg rauv hlawv ntaag.”
27Kinte‑oo txawm coj nwg cov tub qhe kaum leej nrug nwg moog ua lawv le Yawmsaub has rua nwg, kuas vem Kinte‑oo ntshai nwg tsev tuabneeg hab ntshai cov tuabneeg huv lub moos hov nwg txhad tsw kaav ua nruab nub nwg txhad ua mo ntuj.
28Nub tom qaab thaus cov tuabneeg huv lub moos sawv ntxuv mas pum lub thaaj teev daab Npa‑aa pob taag hab pum tas tug ncej daab Asela kws nyob ib saab raug muab ntuv lawm hab pum tas muab tug txwv nyuj kws ob xyeem rua sau lub thaaj kws ua tshab hov.
29Puab txawm sws has tas, “Leejtwg ua le nuav nej?” Thaus puab tshuaj tau lawd puab txawm has tas, “Yog Yau‑as tug tub Kinte‑oo ua tej nuav.”
30Tes cov tuabneeg huv lub moos txawm has rua Yau‑as tas, “Ca le muab koj tug tub tuaj rua peb tua pov tseg, tsua qhov nwg rhuav lub thaaj teev tug daab Npa‑aa hab ntuv tug ncej daab Asela kws nyob ntawm ib saab lawm.”
31Tassws Yau‑as has rua txhua tug kws tuaj tawm tsaam nwg has tas, “Mej yuav nyob daab Npa‑aa chaw tuaj tawm tsaam lov? Mej yuav paab daab Npa‑aa has plaub lov? Leejtwg ua txwv lug paab daab Npa‑aa has, tug hov yuav raug muab tua thaus tsw tau kaaj ntug. Yog daab Npa‑aa yog ib tug vaajtswv tag kuj ca nwg has nwg tshaaj plaub, vem yog nwg lub thaaj raug luas rhuav pov tseg lawm.”
32Vem le nuav nub ntawd puab txhad tis npe rua Kinte‑oo has tas Yelunpa‑aa, lub ntsab has tas, “Ca Npa‑aa nwg has nwg le plaub,” vem yog Kinte‑oo rhuav nwg lub thaaj.
33Mas cov Mintee suavdawg hab cov Amalej suavdawg hab cov kws nyob saab nub tuaj sau zog ua ke hlaa tug dej Yalatee tuaj tsuam chaw nyob ntawm lub haav Yile‑ee.
34Tassws Yawmsaub tug Ntsuj Plig lug kaav hlo Kinte‑oo, nwg txawm tshuab raaj kub yaaj hu Anpiyexaw cum nrug nwg moog.
35Nwg tso tuabneeg moog hu thoob plawg Manaxe tebchaws kuas tuaj nrug nwg moog. Hab nwg tso tuabneeg moog hu xeem Asaw xeem Xenpuloo hab xeem Nathali, mas cov tuabneeg nuav kuj tuaj nrug nwg moog ua rog.
36Kinte‑oo has rua Vaajtswv tas, “Yog koj yuav swv kuv txhais teg cawm cov Yixayee lawv le koj has ntawd,
37kuv muab cov plaub yaaj tso rua ntawm tshaav ntaus mog, mas yog lwg ntub cov plaub yaaj xwb es cov aav thoob plawg qhuav qhawv, mas kuv txhad paub tas koj yuav swv kuv txhais teg cawm cov Yixayee lawv le koj tau has.”
38Kuj muaj le ntawd. Nub tom qaab thaus Kinte‑oo sawv ntxuv tseeg hab nwg muab cov plaub yaaj tsu tau ib phaaj dej lwg puv nkaus.
39Mas Kinte‑oo has rua Vaajtswv tas, “Thov koj tsw xob chim rua kuv, thov kuv has dua ib zag xwb. Thov ca kuv swm cov plaub yaaj nuav dua ib zag. Thov ca cov plaub yaaj qhuav qhawv xwb, ca cov aav ntub lwg thoob plawg.”
40Mo hov Yawmsaub kuj ua lawv le ntawd. Cov plaub yaaj mas qhuav qhawv, huas tej aav mas lwg ntub thoob plawg.
6
Kide‑oo
1Cov Yixayee ua tej uas Yawmsaub pom tias phem, mas Yawmsaub muab lawv cob rau hauv cov Midee txhais tes tau xya xyoo.
2Cov Midee txhais tes tsuj yuam cov Yixayee. Vim tim cov Midee mas cov Yixayee thiaj npaj chaw nraim cev rau pem tej roob thiab hauv tej qhov tsua thiab tej chaw uas ruaj khov.
3Cov Yixayee cog qoob thaum twg mas cov Midee thiab cov Amalej thiab cov neeg uas nyob sab hnub tuaj txawm tuaj ua rog rau lawv,
4thiab tuaj tsuam chaw nyob rau hauv lub tebchaws thiab muab lawv tej qoob loo ua puam tsuaj tag thoob plaws mus txog lub moos Kaxa tsis tseg ib yam dabtsi cia tau noj li tsis hais yaj nyuj nees luav huvsi.
5Luag coj kiag tsiaj txhu thiab lub tsev ntaub tuaj coob yam nkaus li tej pab kooj txig. Neeg thiab tej ntxhuav kuj coob suav tsis txheeb. Thaum luag tuaj luag ua rau lub tebchaws piam tag.
6Cov Yixayee thiaj poob qes kawg li vim yog tim cov Midee. Cov Yixayee thiaj quaj thov Yawmsaub pab.
7Thaum cov Yixayee quaj thov Yawmsaub vim yog tim cov Midee,
8Yawmsaub kuj txib ib tug xibhwb cev Vajtswv lus tuaj rau hauv cov Yixayee. Tus ntawd hais rau lawv tias, “Yawmsaub uas yog cov Yixayee tus Vajtswv hais li no tias, Kuv coj nej tawm hauv Iyi tebchaws los thiab coj nej tawm hauv txojkev ua qhev.
9Kuv cawm nej dim hauv cov Iyi txhais tes thiab dim hauv txhua tus uas tsim txom nej txhais tes thiab ntiab lawv khiav ntawm nej hauv ntej mus thiab muab lawv lub tebchaws rau nej.
10Thiab kuv twb hais rau nej tias, ‘Kuv yog Yawmsaub yog nej tus Vajtswv, nej tsis txhob pe hawm cov Amaulai tej dab hauv lub tebchaws uas nej mus nyob ntawd.’ Tiamsis nej tsis quav ntsej kuv tej lus.”
11Yawmsaub tus tubtxib saum ntuj tuaj zaum hauv Yau‑as tus qab ntoo qheb ntawm Aufa, Yau‑as yog Anpiyexaw cum. Yau‑as tus tub Kide‑oo tabtom ntaus mog hauv lub qhov tsuam kua txiv hmab kom cov Midee thiaj tsis pom.
12Yawmsaub tus tubtxib saum ntuj los tshwm rau Kide‑oo thiab hais rau nws tias, “Koj yog tus uas siab loj siab tuab, Yawmsaub nrog nraim koj.”
13Kide‑oo txawm hais rau nws tias, “Yawg hlob, thov nug koj, yog Yawmsaub nrog nraim peb lawm ua cas tej xwm txheej no tseem tshwm los raug peb thiab? Yawmsaub tej txujci phimhwj uas peb tej poj koob yawm txwv txeev piav rau peb mloog dua twg lawm? Lawv piav hais tias ‘Yawmsaub coj peb tawm hauv Iyi tebchaws los los tsis yog?’ Tiamsis nimno Yawmsaub tso peb tseg lawm thiab muab peb cob rau hauv cov Midee txhais tes.”
14Yawmsaub tig los hais rau nws tias, “Cia li siv koj lub zog loj no mus cawm cov Yixayee dim hauv cov Midee txhais tes. Yeej yog kuv txib koj mus.”
15Kide‑oo txawm hais tias, “Yawg hlob, kuv yuav cawm tau cov Yixayee dim li cas? Sim saib kuv cum yog cum uas qes kawg hauv xeem Manaxe thiab kuv tsev neeg kuv yog tus uas me dhau.”
16Yawmsaub hais rau nws tias, “Kuv yeej yuav nrog nraim koj mas koj yuav ntaus yeej kiag cov Midee yam nkaus li ntaus ib tug xwb.”
17Kide‑oo hais rau Yawmsaub tias, “Yog nimno koj txaus siab rau kuv, thov koj ua ib yam txujci tshwm qhia kuv paub tias tus uas nrog kuv hais lus no yog koj ntag.
18Thov koj tsis txhob tawm ntawm no mus, tos txog thaum kuv rov tuaj cuag koj thiab coj tej uas muab xyeem tuaj tso rau ntawm koj xubntiag.” Mas nws hais tias, “Kuv yuav tos txog thaum koj rov tuaj.”
19Kide‑oo txawm nkag rau hauv tsev npaj ib tug menyuam tshis thiab ib efa⚓ hmoov mog ua ncuav tsis xyaw keeb. Nws muab cov nqaij tso rau hauv lub choo thiab muab cov kua nqaij tso rau hauv lub laujkaub coj tuaj xyeem rau nws hauv tsob qab ntoo qheb.
20Vajtswv tus tubtxib saum ntuj hais rau Kide‑oo tias, “Cia li muab cov nqaij thiab cov ncuav tsis xyaw keeb tso rau saum lub pob zeb no thiab hliv cov kua nqaij ywg rau saud.” Kide‑oo kuj ua raws li ntawd.
21Ces Yawmsaub tus tubtxib txawm muab tus hau pas nrig hauv nws txhais tes cev mus twb rau cov nqaij thiab cov ncuav tsis xyaw keeb. Ces hluavtaws txawm cig plaws ntawm lub pob zeb kub tej nqaij thiab tej ncuav tsis xyaw keeb tag huvsi. Ces Yawmsaub tus tubtxib txawm ploj ntais ntawm nws qhov muag mus lawm.
22Kide‑oo thiaj paub tias yog Yawmsaub tus tubtxib saum ntuj tiag tiag li thiab Kide‑oo hais tias, “Au Vajtswv Yawmsaub nimno kuv tau pom koj tus tubtxib saum ntuj tim ntsej tim muag, yuav ua li cas lauj?”
23Tiamsis Yawmsaub hais rau Kide‑oo tias, “Koj tsuas muaj uas nyob kaj siab lug xwb. Koj tsis txhob ntshai, koj yuav tsis tuag.”
24Ces Kide‑oo txawm ua ib lub thaj rau Yawmsaub rau qhov ntawd thiab hu lub thaj ntawd tias Yawmsaub yog txojkev kaj siab lug. Niaj hnub nimno lub thaj ntawd tseem nyob ntawm Aufa uas yog Anpiyexaw cum li moos.
25Mas hmo ntawd Yawmsaub hais rau Kide‑oo tias, “Cia li muab koj txiv tus txiv nyuj uas ob hnub nyoog muaj xya xyoo los, es mus rhuav koj txiv lub thaj teev dab Npa‑as pov tseg thiab ntov tus ncej dab Asela uas nyob ntawm lub thaj ib sab pov tseg.
26Thiab ua ib lub thaj xyeem rau Yawmsaub uas yog koj tus Vajtswv rau saum lub chaw ruaj khov no, siv tej pob zeb los tib raws li kevcai, mas muab tus txiv nyuj uas ob ntawd tua ua kevcai hlawv xyeem, thiab muab tus ncej dab Asela uas koj ntov ntawd ua taws rauv hlawv ntag.”
27Kide‑oo txawm coj nws cov tub qhe kaum leej nrog nws mus ua raws li Yawmsaub hais rau nws, tiamsis vim Kide‑oo ntshai nws tsev neeg thiab ntshai cov neeg hauv lub moos ntawd nws thiaj tsis kav ua nruab hnub nws thiaj ua hmo ntuj.
28Hnub tom qab thaum cov neeg hauv lub moos sawv ntxov mas pom lub thaj teev dab Npa‑as pob tag thiab pom tias tus ncej dab Asela uas nyob ib sab raug muab ntov lawm thiab pom tias muab tus txiv nyuj uas ob xyeem rau saum lub thaj uas ua tshiab ntawd.
29Lawv txawm sib hais hais tias, “Leejtwg ua li no ne?” Thaum lawv tshuaj tau lawd lawv txawm hais tias, “Yog Yau‑as tus tub Kide‑oo ua tej no.”
30Ces cov neeg hauv lub moos txawm hais rau Yau‑as tias, “Cia li muab koj tus tub tuaj rau peb tua pov tseg, rau qhov nws rhuav lub thaj teev tus dab Npa‑as thiab ntov tus ncej dab Asela uas nyob ntawm ib sab lawm.”
31Tiamsis Yau‑as hais rau txhua tus uas tuaj tawm tsam nws hais tias, “Nej yuav nyob dab Npa‑as chaw tuaj tawm tsam lov? Nej yuav pab dab Npa‑as hais plaub lov? Leejtwg ua txiv lus pab dab Npa‑as hais, tus ntawd yuav raug muab tua thaum tsis tau kaj ntug. Yog dab Npa‑as yog ib tug vajtswv tiag kuj cia nws hais nws tshaj plaub, vim yog nws lub thaj raug luag rhuav pov tseg lawm.”
32Vim li no hnub ntawd lawv thiaj tis npe rau Kide‑oo hais tias Yelunpa‑as, lub ntsiab hais tias, “Cia Npa‑as nws hais nws li plaub,” vim yog Kide‑oo rhuav nws lub thaj.
33Mas cov Midee sawvdaws thiab cov Amalej sawvdaws thiab cov uas nyob sab hnub tuaj sau zog ua ke hla tus dej Yaladee tuaj tsuam chaw nyob ntawm lub hav Yile‑ee.
34Tiamsis Yawmsaub tus Ntsuj Plig los kav kiag Kide‑oo, nws txawm tshuab raj kub yaj hu Anpiyexaw cum nrog nws mus.
35Nws tso neeg mus hu thoob plaws Manaxe tebchaws kom tuaj nrog nws mus. Thiab nws tso neeg mus hu xeem Asaw xeem Xenpuloo thiab xeem Nathali, mas cov neeg no kuj tuaj nrog nws mus ua rog.
36Kide‑oo hais rau Vajtswv tias, “Yog koj yuav siv kuv txhais tes cawm cov Yixayee raws li koj hais ntawd,
37kuv muab cov plaub yaj tso rau ntawm tshav ntaus mog, mas yog lwg ntub cov plaub yaj xwb es cov av thoob plaws qhuav qhawv, mas kuv thiaj paub tias koj yuav siv kuv txhais tes cawm cov Yixayee raws li koj tau hais.”
38Kuj muaj li ntawd. Hnub tom qab thaum Kide‑oo sawv ntxov tsees thiab nws muab cov plaub yaj tso tau ib phaj dej lwg puv nkaus.
39Mas Kide‑oo hais rau Vajtswv tias, “Thov koj tsis txhob chim rau kuv, thov kuv hais dua ib zaug xwb. Thov cia kuv sim cov plaub yaj no dua ib zaug. Thov cia cov plaub yaj qhuav qhawv xwb, cia cov av ntub lwg thoob plaws.”
40Hmo ntawd Yawmsaub kuj ua raws li ntawd. Cov plaub yaj mas qhuav qhawv, hos tej av mas lwg ntub thoob plaws.