26

Ixaj Nyob Hauv Tebchaws Nkelales

¹Rov muaj dua kev tshaib nqhis nyob hauv lub tebchaws ntawd, ib yam li tiam uas thaum Anplahas tseem ua neej nyob. Ixaj thiaj li mus cuag Anpimelej uas yog cov Filitees tus vajntxwv hauv lub nroog Nkelales. ²Tus TSWV los tshwm rau Ixaj pom thiab hais rau nws tias, “Koj tsis txhob khiav mus rau nram tebchaws Iziv; nyob twjywm hauv lub tebchaws no ntawm thaj chaw uas kuv qhia rau koj nyob. ³Nyob twjywm ntawm no xwb, kuv yuav nrog nraim koj nyob thiab foom koob hmoov rau koj. Kuv yuav muab tagnrho lub tebchaws no pub rau koj thiab koj cov xeebntxwv. Kuv yuav nco ntsoov tej lus uas kuv tau cog tseg rau koj txiv Anplahas lawm. ⁴Kuv yuav pub kom koj muaj xeebntxwv coob npaum li tej hnubqub saum nruab ntug, thiab kuv yuav muab tagnrho lub tebchaws no pub rau lawv. Thiab kuv yuav foom koob hmoov ntawm koj cov xeebntxwv mus rau txhua haivneeg uas nyob thoob ntiajteb. ⁵Kuv yuav foom koob hmoov rau koj, rau qhov Anplahas mloog kuv lus thiab coj raws li kuv tej kevcai thiab tej lus samhwm txhua lo.”
⁶Yog li ntawd, Ixaj thiaj nyob twjywm hauv lub nroog Nkelales. ⁷Thaum cov txivneej uas nyob hauv lub nroog ntawd nug txog Ixaj tus pojniam, nws teb lawv hais tias, Lenpekas yog nws tus muam xwb. Nws tsis kam qhia hais tias, Lenpekas yog nws tus pojniam, rau qhov Lenpekas zoo nkauj heev, Ixaj ntshai nyob tsam cov txivneej uas nyob hauv lub nroog ntawd tua nws povtseg thiab yuav Lenpekas. ⁸Thaum Ixaj thiab Lenpekas tseem nyob hauv lub nroog ntawd, Vajntxwv Anpimelej nyob hauv tsev xauj ntawm qhovrai pom Ixaj thiab Lenpekas tabtom sib tawb. ⁹Anpimelej thiaj tso neeg mus hais rau Ixaj hais tias, “Lenpekas twb yog koj tus pojniam ntag los sav! Vim li cas koj tseem hais tias, nws yog koj tus muam xwb?”
Ixaj teb vajntxwv hais tias, “Yog kuv qhia rau sawvdaws hais tias nws yog kuv tus pojniam, nyob tsam muaj neeg siab phem muab kuv tua povtseg thiab yuav Lenpekas.”
¹⁰Anpimelej rov hais tias, “Yog li cas koj thiaj ua li no rau peb? Yog kuv cov pejxeem ib tug txivneej cia li mus nrog koj tus pojniam pw, ces koj yog tus uas coj txojkev txhaum ntawd los rau peb.” ¹¹Anpimelej thiaj ceebtoom rau nws cov pejxeem hais tias: “Yog leejtwg lam mus zes tus txivneej no tus pojniam, mas yuav muab tus ntawd tua povtseg.”
¹²Ixaj cog qoobloo rau hauv lub tebchaws ntawd, thiab xyoo ntawd nws sau tau qoobloo ntau tshaj cov noob uas nws cog lawm ib puas npaug, rau qhov tus TSWV foom koob hmoov rau nws. ¹³Ixaj vammeej zuj zus thiab ua ib tug neeg npluanuj heev. ¹⁴Rau qhov Ixaj muaj tej tsiaj txhu uas yog yaj thiab nyuj coob, thiab nws tseem muaj tubtxib coob kawg li, thiaj ua rau cov neeg Filitees khib heev. ¹⁵Lawv thiaj muab tej qhovtshij uas nws txiv Anplahas cov tubtxib khawb thaum nws tseem ua neej nyob txhub tas huv tibsi lawm.
¹⁶Ces Anpimelej thiaj hais rau Ixaj hais tias, “Koj cia li khiav tawm hauv peb lub tebchaws no mus. Rau qhov koj muaj hwjchim tshaj peb lawm.” ¹⁷Yog li ntawd, Ixaj thiaj khiav tawm hauv lub nroog ntawd thiab mus rub tsevntaub nyob rau hauv lub Hav Nkelales, nws nyob qhov ntawd tau ib ntus. ¹⁸Nws thiaj li rov qab khawb cov qhovtshij uas thaum ub nws txiv Anplahas khawb cia lawm dua ib zaug ntxiv, rau qhov tom qab uas Anplahas tuag lawm, cov Filitees tau tuaj muab tej qhovtshij no txhub tas lawm. Ixaj tis npe rau cov qhovtshij no raws li tej qub npe uas thaum nws txiv tis rau lawm.
¹⁹Ixaj cov tubtxib mus khawb ib lub qhovtshij hauv lub hav ntawd thiab txawm muaj dej txhawv tawm los. ²⁰Ces cov neeg yug yaj hauv lub nroog Nkelales tuaj nrog Ixaj cov neeg yug yaj sib txeeb thiab hais tias, “Cov qhovtshij no yog peb tug.” Yog li ntawd, Ixaj thiaj muab lub qhovtshij ntawd tis npe hu ua “Sib Txeeb.”
²¹Ixaj cov tubtxib rov khawb dua ib lub qhovtshij, thiab lawv tseem rov txeeb lub qhovtshij ntawd dua, yog li ntawd, nws thiaj tis npe rau lub qhovtshij ntawd hu ua “Sib Ntxub.” ²²Nws thiaj khiav tawm ntawm thaj chaw ntawd mus khawb dua ib lub qhovtshij. Nyob qhov ntawd lawv tsis muaj kev sib cav sib ceg txog lub qhovtshij no ntxiv lawm, yog li ntawd, nws thiaj tis npe rau lub qhovtshij ntawd hu ua “Muaj Av Dav.” Nws hais tias, “Nimno tus TSWV pub peb muaj av dav nyob hauv lub tebchaws no, thiab peb yuav muaj kev vammeej nyob ntawm no mus li.”
²³Ixaj thiaj tawm ntawm qhov chaw ntawd thiab mus rau tom Npesenpas. ²⁴Hmo ntawd tus TSWV thiaj los tshwm rau nws pom thiab hais rau nws tias, “Kuv yog koj txiv Anplahas tus Vajtswv ntag. Koj tsis txhob ntshai, kuv nrog nraim koj nyob. Kuv yuav foom koob hmoov rau koj thiab pub rau koj muaj xeebntxwv coob raws li kuv tau coglus rau kuv tus tubtxib Anplahas lawm.” ²⁵Ixaj thiaj teeb tau ib lub thaj rau ntawd thiab pehawm tus TSWV. Ces nws txawm rub nws lub tsevntaub nyob rau qhov ntawd, thiab nws cov tubtxib rov khawb dua ib lub qhovtshij.

Ixaj thiab Anpimelej Sib Coglus

²⁶Anpimelej coj Ahuxas uas yog nws tus tuavxam thiab Fikaules uas yog nws tus thawj tubrog nrog nws tuaj hauv lub nroog Nkelales tuaj cuag Ixaj. ²⁷Ixaj thiaj nug hais tias, “Vim li cas nimno nej thiaj tuaj cuag kuv? Yav nram ntej nej twb tsis nrog kuv ua phoojywg thiab nej twb ntiab kuv tawm hauv nej lub tebchaws lawm?”
²⁸Lawv teb hais tias, “Nimno peb paub hais tias muaj tus TSWV nrog nraim koj nyob, thiab peb xav hais tias tsimnyog peb yuav tsum tau los sib hais kom haum thiab coglus rau koj. Peb xav kom koj coglus rau peb ²⁹hais tias koj yuav tsis ua phem rau peb, ib yam li peb tsis tau ua phem rau koj. Peb yeej ua zoo rau koj thiab tso koj mus kaj siab lug. Peb paub hais tias, nimno tus TSWV foom koob hmoov rau koj lawm.” ³⁰Ixaj thiaj npaj tau ib rooj mov rau lawv, lawv thiaj noj thiab haus txaus nkaus. ³¹Tagkis sawv ntxov lawv peb leeg ntawd nyias los lees nyias lus thiab nias homthawj rau nyias daim ntawv. Ces Ixaj txawm xa lawv sawv kev mus tsev kaj siab lug lawm.
³²Hnub ntawd Ixaj cov tubtxib thiaj los piav qhia rau nws hais txog lub qhovtshij uas lawv tau mus khawb ntawd. Lawv hais tias, “Peb mus nrhiav tau ib lub qhovtshij lawm.” ³³Ixaj thiaj tis npe rau lub qhovtshij ntawd hu ua “Coglus.” Vim li ntawd thiaj ua rau lub nroog Npesenpas tau lub npe no.

Exaus Ob Tug Pojniam uas Yog Neeg Txawv Tebchaws

³⁴Thaum uas Exaus hnubnyoog muaj plaub caug xyoo, nws yuav tau cov neeg Hitis ob tug ntxhais los ua pojniam, Yudis yog Npelais tus ntxhais thiab Npasemas yog Eloos tus ntxhais. ³⁵Ob tug nyab no ua rau Ixaj thiab Lenpekas ua neej lwj siab kawg li.

26

Yiha hab Anpimelej

¹Tom qaab nuav tebchaws Khana‑aa rov raug kev tshaib plaab, ib yaam le tam kws thau Aplahaa tseed ua neej nyob, mas Yiha txhad tswv moog cuag cov Filixatee tug vaajntxwv Anpimelej nraag lub moos Kelas. ²Yawmsaub txhad tshwm lug rua Yiha pum hab has tas, “Tsw xob moog nyob nraag Iyi tebchaws, ca le nyob huv lub tebchaws kws kuv qha rua koj xwb. ³Nyob huv lub tebchaws nuav ib ntus xwb, kuv txhad le nrug koj nyob hab foom koob moov rua koj. Kuv yuav muab tej tebchaws nuav huvsw pub rua koj hab koj caaj ceg. Kuv yuav ua kuas tej lug kws kuv tub cog tseg ruaj rua koj txwv Aplahaa lawd tav huvsw. ⁴Kuv yuav ua rua koj caaj ceg fuam vaam coob yaam le cov nub qub sau nruab ntug hab yuav muab tej tebchaws nuav huvsw pub rua puab. Ib tsoom tebchaws huv lub nplajteb yuav tau koob moov ntawm koj caaj ceg lug ⁵vem yog Aplahaa noog kuv lug hab ua lawv le kuv has hab tuav rawv kuv tej lug nkaw hab kuv tej kaab ke hab kuv tej kevcai huvsw.”
⁶Yiha txhad nyob ntawm Kelas. ⁷Thaus cov txwvneej huv lub moos hov nug txug nwg tug quaspuj nwg txawm teb puab tas, “Yog kuv le muam xwb,” tsua qhov nwg ntshai, nwg tsw kaam leeg tas “Yog kuv quaspuj.” Nwg xaav tas tsaam cov txwvneej hov tsua muab nwg tua vem yog puab xaav yuav Lenpekha tsua qhov nwg zoo nkauj kawg le. ⁸Thaus Yiha nyob hov ntawd tau ntev loo mas cov Filixatee tug vaajntxwv Anpimelej xauj qhov rais pum Yiha tawb tawb Lenpekha kws yog nwg quaspuj. ⁹Tes Anpimelej txawm hu Yiha tuaj cuag nwg hab has tas, “Lenpekha tub yog koj le quaspuj nev, ua caag koj daag has tas, yog koj le muam nua?” Yiha teb vaajntxwv has tas, “Tsua qhov kuv xaav tas tsaam luas tsua muab kuv tua vem xaav yuav nwg.” ¹⁰Anpimelej txawm has tas, “Koj ua daabtsw le nuav rua peb 'os? Tsaam muaj ib tug twg tsua nkaag hlo moog nrug koj quaspuj pw tes kuj yog koj coj txem lug rua peb.” ¹¹Anpimelej txhad has tawv rua cov pejxeem suavdawg tas, “Yog leejtwg ua le caag rua tug yawm nuav hab nwg tug quaspuj mas yuav raug muab tua pov tseg xwb.”
¹²Yiha cog qoob cog loos huv tebchaws hov mas xyoo hov nwg sau tej qoob tau ib puas npaug lug, vem yog Yawmsaub foom koob foom moov rua nwg. ¹³Yiha muaj txag vaam meej zuj zug caj tuam lospaav nplua nuj heev. ¹⁴Nwg muaj tej nam paab tshws tej paab yaaj tej paab nyuj hab muaj tub maab tub qhe coob mas cov Filixatee khib sab heev rua nwg. ¹⁵Cov Filixatee tub muab aav txhub txhua lub qhov dej kws thau u nwg txwv Aplahaa tseed ua neej nyob es Aplahaa tej tub qhe khawb ca lawd huvsw. ¹⁶Anpimelej txawm has rua Yiha tas, “Koj ca le tswv ntawm peb moog vem koj muaj zug dua peb lawm.”
¹⁷Yiha txhad tawm qhov ntawd tswv moog tsuam chaw nyob rua ntawm lub haav Kelas tes nwg txawm nyob ntawd. ¹⁸Yiha txhad muab tej qub qhov dej kws thau u nwg txwv Aplahaa tseed ua neej nyob es khawb ca lawd khawb dua, vem yog thaus Aplahaa tuag lawd cov Filixatee muab tej qhov dej hov txhub taag lawm. Mas Yiha txhad tis npe rua tej qhov dej hov lawv le kws thau nwg txwv tub tis ca lawd. ¹⁹Thaus Yiha cov tub qhe khawb ntawm haav Kelas mas khawb tau ib lub qhov dej txhawv zoo heev. ²⁰Tassws cov tuabneeg Kelas kws yug tsaj txawm nrug Yiha cov tub qhe yug tsaj sws caav has tas, “Lub qhov dej yog peb le huas.” Yiha txhad tis npe rua lub qhov dej hov hu ua Exe⚓ vem puab nrug nwg sws caav.
²¹Puab rov khawb dua ib lub qhov dej mas cov Kelas kuj nrug puab sws caav txug lub qhov dej hov hab. Yiha txhad tis npe rua lub qhov dej hov hu ua Xina.⚓ ²²Nwg kuj tswv tawm qhov ntawd moog khawb dua ib lub qhov dej mas tsw muaj tuabneeg sws caav txug lub qhov dej hov, nwg txhad tis npe rua lub qhov dej hov hu ua Lehaunpau,⚓ mas nwg has tas, “Nwgnuav Yawmsaub pub chaw rua peb nyob lawm mas peb yuav vaam meej rua huv lub tebchaws nuav lauj.”
²³Yiha kuj tawm qhov ntawd moog rua peg Npe‑awsenpa. ²⁴Mo hov Yawmsaub tshwm lug rua Yiha pum hab has rua nwg tas, “Kuv yog koj txwv Aplahaa tug Vaajtswv, koj tsw xob ntshai tsua qhov kuv yeej nrug nraim koj nyob hab kuv yuav foom koob moov rua koj hab kuv yuav ua rua koj caaj ceg fuam vaam coob vem yog kuv saib rua kuv tug tub qhe Aplahaa.” ²⁵Yiha txawm tib ib lub thaaj rua hov ntawd hab nwg tuav Yawmsaub lub npe thov Yawmsaub. Nwg tsaa tsev ntaub nyob hov ntawd hab nwg cov tub qhe kuj khawb dua ib lub qhov dej rua ntawd hab.

Yiha hab Anpimelej cog lug sws raug zoo

²⁶Anpimelej hab nwg tug tim xyoob Ahuxa hab nwg tug thawj rog Fikhau txawm tawm huv Kelas tuaj tshaam Yiha. ²⁷Yiha nug puab has tas, “Ua caag mej tsua yuav tuaj tshaam kuv? Mej tub ntxub ntxub kuv es muab kuv ntab tswv tawm moog nev?” ²⁸Puab teb has tas, “Peb pum tseeb tas Yawmsaub nrug nraim koj nyob peb txhad has tas, Ca peb hab koj sws cog lug twv tseg hab nrug koj cog lug sws raug zoo has tas ²⁹koj yuav tsw ua phem le caag rua peb yaam le kws peb tub tsw ua ib nyuag qhov phem rua koj le, peb tsuas yog ua zoo rua koj xwb hab peb xaa koj moog zoo tso sab quas lug. Nwgnuav Yawmsaub tub foom koob moov rua koj lawm.” ³⁰Tes Yiha txawm paam ib tsum mov lug rua puab mas puab txhad noj txhad haus. ³¹Taagkig tom qaab puab sawv ntxuv ntxuv lug sws cog lug twv tseg taag Yiha le xaa puab moog, puab txhad moog ua tso sab quas lug. ³²Tuab nub hov Yiha cov tub qhe lug has rua nwg txug lub qhov dej kws puab khawb tau lawm has tas, “Peb ntswb dej lawm.” ³³Yiha muab lub qhov dej hov tis npe hu ua Sinpa,⚓ mas txhad hu lub moos hov ua Npe‑awsenpa⚓ txug naj nub nwgnuav.
³⁴Thaus Exau noob nyoog muaj plaub caug xyoo nwg yuav Npe‑awli kws yog tuabneeg Hithai tug ntxhais Yunti ua quaspuj, hab nwg yuav Eloo kws yog tuabneeg Hithai tug ntxhais Npaxema ua quaspuj. ³⁵Cov nyaab nuav ua rua Yiha hab Lenpekha ob tug lub neej nyuaj sab kawg le.