135
Qhuas Yawmsaub kws luj kawg
1Ca le qhuas Yawmsaub,
ca le qhuas Yawmsaub lub npe,
mej kws yog Yawmsaub cov tub qhe
ca le qhuas nwg,
2yog mej cov kws sawv ntsug
huv Yawmsaub lub tuam tsev,
yog cov kws sawv ntsug huv peb tug Vaajtswv
tej tshaav puam tuam tsev.
3Ca le qhuas Yawmsaub
vem Yawmsaub yog tug zoo kawg nkaus.
Ca le hu nkauj qhuas nwg lub npe
vem nwg yog tug muaj lub sab hlub.
4Yawmsaub xaiv Yakhauj ca rua Yawmsaub,
hab xaiv Yixayee ua nwg teej nwg tug.
5Tsua qhov kuv paub tas
Yawmsaub yog tug luj kawg,
hab paub tas peb tug Tswv
luj dua tej timtswv huvsw.
6Yawmsaub xaav ua daabtsw,
nwg kuj ua yaam ntawd,
tsw has sau ntuj hab huv nplajteb
hab huv havtxwv hab huv nruab tiv txwv.
7Yawmsaub yog tug kws ua rua tej fuab
sawv tim qaab ntuj kawg tuaj
hab ua muaj tsag lig xub rua thaus naag lug,
hab coj cua tawm
huv nwg lub txhaab cua lug.
8Yawmsaub yog tug kws tua Iyi cov tub hlub,
tsw has tuabneeg hab tsaj txhu.
9Iyi 'e, huv mej Yawmsaub tau ua
tej txujci tseem ceeb hab txujci phemfwj
lug tawm tsaam Falau
hab nwg cov tub teg tub taw suavdawg.
10Nwg ntaus yeej ntau haiv tuabneeg
hab tua tau tej vaajntxwv
kws muaj fwjchim heev,
11yog cov Amaulai tug vaajntxwv Xihoo,
hab Npasaa tug vaajntxwv Aus,
hab cov Khana‑aa tej vaajntxwv huvsw.
12Hab pub puab tebchaws
ua qub txeeg qub teg,
yog pub ua qub txeeg qub teg
rua nwg haiv tuabneeg Yixayee.
13Au Yawmsaub, koj lub npe
nyob moog ib txhws.
Au Yawmsaub, koj lub npe
kws nto moo quas lug
yuav nyob rua txhua tam tuabneeg,
14tsua qhov Yawmsaub yuav tsaa
nwg haiv tuabneeg txujcai,
hab yuav taab ncuab nwg cov tub qhe.
15Ib tsoom tebchaws tej txoov daab
yog nyaj hab kub
kws tuabneeg txhais teg ua.
16Tej txoov daab hov muaj qhov ncauj
los has tsw tau lug,
muaj qhov muag los tsw pum kev,
17muaj qhov ntsej los tsw nov lug,
hab tub tsw muaj paa huv lub qhov ncauj.
18Cov kws ua tej txoov daab hov
kuj zoo ib yaam nkaus le tej txoov daab hov,
cov kws vaam khom tej txoov daab hov
kuj zoo ib yaam nkaus.
19Ib tsoom Yixayee 'e,
mej ca le qhuas Yawmsaub,
Aloo caaj ceg 'e,
mej ca le qhuas Yawmsaub.
20Levi caaj ceg 'e,
mej ca le qhuas Yawmsaub,
mej cov kws fwm hab paub ntshai Yawmsaub,
ca le qhuas Yawmsaub.
21Ca le qhuas Yawmsaub huv Xi‑oo,
tug kws nyob huv Yeluxalee.
Ca le qhuas Yawmsaub.