68
Vaajtswv kov yeej
Sau rua tug thawj coj hu nkauj. Yog Tavi zaaj nkauj. Yog zaaj nkauj hu.
1Thov Vaajtswv sawv tseeg,
thov ca nwg cov yeeb ncuab
tswv tawg ua saab ua sua,
thov ca cov kws ntxub nwg
tswv ntawm nwg hauv ntej moog.
2Tej paa nchu raug lawv
yaa taag moog le caag,
thov koj muab puab lawv tswv taag
ib yaam le ntawd.
Cab ntaab yaaj pes ntsuav
rua ntawm suavtawg le caag,
kuj thov ca cov tuabneeg limham puam tsuaj
ntawm Vaajtswv lub xubndag le ntawd.
3Thov ca cov tuabneeg ncaaj nceeg xyiv faab,
ca puab zoo sab xyiv faab
rua ntawm Vaajtswv xubndag,
ca puab qw zoo sab hlo.
4Ca le hu nkauj rua Vaajtswv,
ca le hu nkauj qhuas nwg lub npe,
ca le tsaa suab hu nkauj
rua tug kws caij fuab.
Nwg lub npe yog Yawmsaub,
ca le qw zoo sab hlo
rua ntawm nwg xubndag.
5Vaajtswv kws nyob huv
nwg lub chaw dawb huv
nwg ua cov mivnyuas kws
tsw muaj txwv leej txwv,
hab tuav cov puj ntsuag txujcai.
6Vaajtswv pub cov kws tsw muaj vaag muaj tse
tau vaaj tau tsev nyob,
nwg tso cov kws raug kaw
tawm lug nyob kaaj sab hlo,
tassws cov kws faav xeeb nyob
huv lub tebchaws kws qhuav nkig nkuav.
7Au Vaajtswv,
thaus koj coj koj haiv tuabneeg moog,
thaus koj moog huv tebchaws moj saab qhua,
8lub nplajteb tseeg quas nkawg,
lub ntuj tso naag lug
taab meeg Vaajtswv xubndag,
yog Vaajtswv ntawm lub roob Xinai,
kws yog Yixayee tug Vaajtswv.
9Au Vaajtswv, koj tso naag lug
heev thoob plawg.
Thaus koj qub txeeg qub teg qaug zug,
koj txhawb kuas rov muaj zug.
10Koj paab yaaj lug nyob rua huv.
Au Vaajtswv, vem koj ua zoo
koj txhad pub rua cov kws txom nyem.
11Tug Tswv has nwg tej lug,
mas cov kws coj xuv zoo coob kawg le,
12has tas, “Tej vaajntxwv hab puab tej tub rog
tswv lawm, puab tswv taag lawm.”
Cov quaspuj kws nyob huv tsev
kuj muab tej hov txhua chaw
kws txeeb tau lug faib.
13Txawm yog mej cov kws
pw huv plawv tej nkuaj yaaj,
los mej tau moj zeeg nquab taug
kws kauj tis luam nyaj,
plaub tis luam tseem kub.
14Thaus tug kws muaj fwjchim lujv kawg nkaus
ua rua tej vaajntxwv tswv ua saab ua sua,
mas daus xwb daus npu tau lug
rua sau lub roob Xamoo.
15Lub roob kws muaj fwjchim luj huv Npasaa 'e,
lub roob kws muaj ntau lub ncov
huv Npasaa tebchaws 'e,
16lub roob kws muaj ntau lub ncov 'e,
ua le caag koj yuav saib
ua khib sab quas tsawv rua lub roob
kws Vaajtswv xaiv ca ua nwg lub chaw nyob,
kws yog lub chaw kws Yawmsaub
yuav nyob moog ib txhws?
17Tug Tswv tuaj ntawm Xinai tuaj
rua huv lub chaw dawb huv
muaj tsheb ua rog khov kho
quas txheeb quas vaam lub nrug nwg ua ke.
18Koj nce rua sau lub roob sab,
coj cov kws nteg tau nrug koj moog
hab txais tej tshaav ntuj ntawm tej tuabneeg,
txawm yog cov kws faav xeeb los kuj pub hab,
sub koj kws yog Vaajtswv Yawmsaub
txhad lug nyob hov ntawd.
19Ca le qhuas tug Tswv⚓ kws naj nub
rws peb lub nraa.⚓
Vaajtswv yog peb txujkev cawm dim.
20Peb tug Vaajtswv
yog tug Vaajtswv kws cawm dim.
Qhov kws dim kev tuag
nyob ntawm Vaajtswv Yawmsaub.
21Vaajtswv yuav tsoo nwg cov yeeb ncuab
lub taubhau kuas tawg,
yog cov kws taug txujkev txhum
lub taj taubhau kws muaj plaubhau ntev.
22Yawmsaub has tas, “Kuv yuav coj puab
rov ntawm Npasaa lug,
kuv yuav coj puab tawm
huv qaab havtxwv lug,
23sub mej txhais kwtaw
txhad tau kwm puab cov ntshaav
hab mej cov dev tug nplaig
txhad tau yaim tej tshawj chim cov ntshaav.”
24Au Vaajtswv, koj cov tuabneeg
ua tsheej ib paab tshwm plawg tuaj lawm,
yog kuv tug Vaajtswv
kws yog kuv tug vaajntxwv paab tuabneeg,
nkaag rua huv lub chaw kws pe hawm koj.
25Cov kws hu nkauj moog ua ntej,
cov kws ntaus nkauj nog ncaas
ua tom qaab kawg,
cov hluas nkauj npuaj nruag ntxhas
tuaj nruab nraab.
26Mej kws yog Yixayee cov noob 'e,
ca le qhuas Vaajtswv,
ca le qhuas Yawmsaub rua thaus
cov tuabneeg coob coob tuaj txoos ua ke.
27Xeem Npeeyamee kws yog paab
tsawg dua tej moog ua ntej,
Yuta cov thawj kws nyob
ua tej paab coob coob
hab Xenpuloo cov thawj
hab Nathali cov thawj moog lawv qaab.
28Au Vaajtswv, thov koj npaaj
koj tug fwjchim lug.
Au Vaajtswv, thov koj ua koj tug zug tshwm lug
ib yaam le koj tub ua paab peb lug lawm.
29Vem yog muaj koj lub tuam tsev
huv Yeluxalee
mas tej vaajntxwv txhad coj tshaav ntuj
tuaj pub rua koj.
30Thov koj txwv tej tsaj qus
kws nyob huv tej haav lojkov,
yog paab txwv nyuj hab cov mivnyuas nyuj
kws yog ib tsoom tuabneeg,
moog txug thaus puab txu fwjchim
es coj nyaj daim tuaj pub rua koj.
Thov koj ua rua cov tuabneeg
kws nyam ua rog tswv ua saab ua sua taag.⚓
31Thov ca puab coj tej tooj lab
huv Iyi tebchaws lug,
ca Khuj⚓ tebchaws maaj tsaa teg rua Vaajtswv.
32Ib tsoom tebchaws huv nplajteb 'e,
ca le hu nkauj rua Vaajtswv,
ca le hu nkauj qhuas tug Tswv,
33yog tug kws caij cov fuab sau ntuj
kws yeej nyob ib txhab ib txhws lug.
Noog maj, nwg xaa nwg lub suab tawm moog,
yog lub suab kws muaj fwjchim luj.
34Ca le qhuas tas Vaajtswv muaj fwjchim,
nwg fwjchim meej mom nyob sau cov Yixayee,
nwg tug fwjchim nyob sau nruab ntug.
35Vaajtswv nyob huv lub chaw kws pe nwg
mas txaus ntshai kawg,
nwg yog cov Yixayee tug Vaajtswv,
nwg pub nwg tug zug hab nwg tug fwjchim
rua nwg haiv tuabneeg.
Ca le qhuas Vaajtswv.