86
Thov Vaajtswv paab
Tavi tej lug thov.
1Au Yawmsaub, thov tig ntsej noog hab teb kuv,
tsua qhov kuv pluag hab txom nyem.
2Thov tsom kwm kuv txujsa ca
tsua qhov kuv fwm koj.
Thov cawm koj tug qhev kws tso sab rua koj.
Koj yog kuv tug Vaajtswv.
3Au tug Tswv, thov koj hlub kuv
tsua qhov kuv quaj thov koj
taag naj taag nub.
4Au tug Tswv, thov pub
kuas koj tug tub qhe zoo sab
tsua qhov kuv muab hlo kuv lub sab rua koj.
5Au tug Tswv, koj yog tug kws zoo kawg
hab zaam txem,
koj txujkev hlub muaj nplua quas mag
rua cov kws hu thov koj.
6Au Yawmsaub, thov tig ntsej
noog kuv tej lug thov,
thov noog kuv lub suab taij thov.
7Nub kuv raug txom nyem ceblaaj
kuv thov hu koj vem koj yeej yuav teb kuv.
8Au tug Tswv, dhau koj lawm tsw muaj
ib tug timtswv twg yuav zoo cuag le koj,
hab tsw muaj ib teg num twg
kws yuav zoo cuag le koj teg num.
9Au tug Tswv, txhua haiv tuabneeg
kws koj tau tswm lug yuav tuaj pe
rua ntawm koj xubndag,
hab yuav qhuas koj lub npe
kuas tau koob meej.
10Tsua qhov koj luj kawg
hab ua teg num phemfwj kawg,
koj tuab leeg txhad yog Vaajtswv.
11Au Yawmsaub, thov koj qha
koj txujkev rua kuv
sub kuv txhad ua tau
lawv le koj txujkev tseeb,
thov paab kuas kuv ua hlo ib sab
paub ntshai koj lub npe.
12Au tug Tswv kws yog kuv tug Vaajtswv,
kuv yuav ua koj tsaug kawg kuv lub sab
hab kuv yuav qhuas koj lub npe
kuas tau koob meej moog ib txhws.
13Tsua qhov koj txujkev hlub kws ruaj khov
luj kawg rua kuv,
hab koj tau tso kuv tug ntsuj plig dim
lub qhov tub tub huv tub tuag teb lug.
14Au Vaajtswv, cov tuabneeg khaav theeb
tau sawv tseeg tiv kuv,
ib paab tuabneeg kws ua nruj ua tswv
nrhav txuv kuv txujsa,
puab tsw quav ntsej koj hab.
15Au tug Tswv, koj yog tug Vaajtswv
kws khuvleej hab hlub,
koj tsw chim sai,
koj txujkev hlub kws ruaj khov
hab koj txujkev ncaaj kws tso sab tau
muaj nplua quas mag.
16Thov tig khuvleej kuv,
thov pub zug rua koj tug qhev,
hab cawm koj tug nkauj qhev tug tub.
17Thov ua ib yaam txujci
qha koj txujkev hlub rua kuv,
sub cov kws ntxub kuv txhad pum
hab raug txaaj muag,
vem Yawmsaub, koj tau paab kuv
hab nplig kuv lub sab.
86
Tej Lus Thov Vajtswv Pab
1Tus TSWV, thov koj mloog
thiab teb kuv tej lus thov,
vim kuv tas kev cia siab thiab qaug
zog heev lawm.
2Thov cawm kom kuv dim ntawm txojkev tuag,
rau qhov kuv yeej hwm koj;
thov cawm kuv uas yog koj tus tubtxib,
kuv cia siab ntsoov rau koj.
3Koj yog kuv tus Vajtswv, thov koj hlub kuv;
kuv thov ib hnub tsaus ntuj ntais.
4Tus TSWV, thov pab kom koj tus
tubtxib tau kev zoo siab,
vim kuv tej lus thov twb tuaj txog
koj lawm.
5Koj yeej ua zoo rau peb thiab zam
peb lub txim,
koj txojkev hlub uas tsis paub kawg
muaj rau txhua tus uas thov koj.
6Tus TSWV, thov koj mloog kuv tej
lus thov;
mloog kuv lub suab quaj uas thov koj pab kuv.
7Thaum kuv muaj kev ntxhov siab kuv hu txog koj,
koj yeej teb kuv tej lus thov.
8Tus TSWV, tsis muaj dua lwm tus
vajtswv zoo cuag koj,
tsis muaj leejtwg txawj ua tau tej
txujci zoo li koj ua.
9Txhua haivneeg uas koj tau tsim
yuav tuaj txhos caug pehawm koj;
lawv yuav qhuas koj lub npe uas zoo kawg nkaus.
10Koj yog tus muaj hwjchim loj thiab
ua tau tej txujci tseemceeb;
koj tib leeg xwb thiaj yog Vajtswv.
11Tus TSWV, thov koj qhia kom kuv
paub ua raws li koj lub siab nyiam,
kuv yuav hwm koj ntawm lub siab ncaj ncees;
thov pub kom kuv muaj lub siab
dawb paug pehawm koj.
12Tus TSWV uas yog kuv tus Vajtswv,
kuv yuav qhuas koj lub npe kawg siab kawg ntsws;
thiab kuv yuav tshaj tawm koj lub
npe kom nrov ncha mus ibtxhis.
13Koj txojkev hlub muaj nyob mus tsis
paub kawg li!
Koj tau cawm kuv dim ntawm lub qhov tuag los.
14Vajtswv, cov neeg khavtheeb pheej
tuaj tawmtsam kuv;
cov neeg siab phem pheej nrhiav
yuav muab kuv tua povtseg,
cov neeg ntawd yog cov uas tsis quav
ntsej koj li.
15Tiamsis tus TSWV, koj yog tus uas
muaj kev hlub
thiab yog tus Vajtswv uas muaj kev
hlub tshua;
koj ibtxwm muaj lub siab ntev, siab
zoo thiab ua ncaj ncees.
16Thov koj tig los cuag kuv thiab
hlub tshua kuv;
thov txhawb kuv lub zog thiab cawm
kuv;
rau qhov kuv muaj lub siab dawb paug pehawm koj
ib yam li koj tus tubtxib ua muab siab npuab koj.
17Tus TSWV, thov qhia koj txojkev ua
siab dawb siab zoo rau kuv;
cov neeg uas ntxub kuv yuav raug kev txajmuag,
thaum lawv pom koj pub kuv muaj
kev zoo siab thiab pab kuv.