79
Quaj ntsuag vem yog Yeluxalee puam tsuaj
Axas zaaj nkauj.
1Au Vaajtswv, lwm haiv tuabneeg
tau txeem moog rua huv koj qub txeeg qub teg,
puab tau ua rua koj lub tuam tsev
kws dawb huv qas tsw huv,
puab tau muab Yeluxalee ua pob taag.
2Puab muab koj cov qhev tej cev tuag
rua tej laj daav sau nruab ntug noj,
hab muab koj cov tuabneeg
kws dawb huv tej nqaj rua tej tsaj qus
huv nplajteb noj.
3Puab muab tej tuabneeg nuav
cov ntshaav nchuav lug
yaam le dej puag ncig Yeluxalee,
hab tsw tshuav leejtwg muab puab log.
4Peb raug tej tuabneeg zej zog thuaj luag,
hab raug tej tuabneeg kws nyob ib ncig peb
luag hab saib tsw taug.
5Au Yawmsaub, yuav ntev le caag?
Koj yuav chim moog ib txhws le lov?
Koj txujkev khib yuav hlawv yaam le
suavtawg kub moog le lov?
6Thov koj muab koj txujkev chim nchuav
rua sau cov tuabneeg kws tsw paub koj,
hab rua sau tej tebchaws
kws tsw tuav koj lub npe thov.
7Vem yog puab tau rhuav tshem Yakhauj
hab muab nwg tej chaw nyob
tso tseg pam taag.
8Thov tsw xob muab peb tej laug tej kev txhum
coj lug rau txem rua peb.
Thov koj taab ncuab peb sai sai nuav
vem peb poob qeg kawg le.
9Au Vaajtswv kws yog peb txujkev cawm dim,
thov paab peb lauj,
vem yog saib rua koj lub npe
kws muaj fwjchim ci ntsaa quas ab.
Thov cawm peb hab zaam peb lub txem
vem yog saib rua koj lub npe.
10Ua caag ib tsoom tebchaws yuav has tas,
“Puab tug Vaajtswv nyob hovtwg?”
Thov kuas ib tsoom tebchaws paub
taab meeg peb lub qhov muag tas
yog koj pauj taub koj cov qhev tej ntshaav
kws ndwg lug.
11Thov kuas cov kws raug nteg
lub suab quaj nrov
tuaj txug ntawm koj xubndag.
Thov koj swv koj tug fwjchim luj
tuav cov raug txem tuag txujsa.
12Au tug Tswv, thov pauj tej kws
cov kws nyob ib ncig peb thuaj luag koj
xyaa npaug rua ntawm puab lub xubndag.
13Peb kws yog koj haiv tuabneeg,
yog koj paab yaaj
kws nyob huv koj lub tshaav zaub
yuav ua koj tsaug ib txhws,
peb yuav qhuas koj
ib tam dhau ib tam moog le.