2

Vajtswv rau txim rau Yeluxalees

¹Tus Tswv⚓ chim thiaj tso huab los
npog nkaus Xi‑oo tus ntxhais lawm lauj!
Nws muab Yixayee lub koob meej
uas nto moo lug laim saum ntuj los
rau hauv pem teb lawm.
Hnub uas nws chim
nws tsis nco txog nws lub rooj tiag taw li.
²Tus Tswv ua rau Yakhauj tej chaw nyob
puam tsuaj tag huvsi tsis khuvleej li,
nws npau taws thiaj muab
Yuda tus ntxhais tej chaw uas ruaj khov ua pob tag,
nws ua rau lub tebchaws thiab cov thawj
poob ti nkaus hauv pem teb
raug txaj muag heev.
³Nws chim heev thiaj muab
Yixayee tus kub lov ntho lawm,
nws nkaum kiag nws txhais tes xis ntawm lawv
rau thaum yeeb ncuab tuaj,
nws hlawv hauv Yakhauj nruab nrab
zoo yam nkaus li hluavtaws hlawv,
mas kub hnyiab thoob plaws ib ncig huvsi.
⁴Nws nta nws rab hneev
yam nkaus li yeeb ncuab,
thiab nws txhais tes xis twb rub kiag hlua hneev
yam nkaus li tshawj chim lawm,
nws tua txhua tus uas peb khav ntxhias
hauv Xi‑oo tus ntxhais lub chaw nyob,
nws muab nws txojkev chim heev
nchuav nthwv rau ib yam li nplaim taws los.
⁵Tus Tswv zoo yam nkaus li yeeb ncuab lawm,
nws ua rau Yixayee puam tsuaj,
nws ua rau lawv tus vajntxwv
tej vaj tse huvsi puam tsuaj,
thiab ua rau lawv tej chaw ruaj khov pob tag.
nws tsav ntxiv kev quaj nyiav
thiab kev quaj ntsuag rau Yuda tus ntxhais.
⁶Nws rhuav tshem nws lub tsev ntaub
ib yam li rhuav lub tsev pheeb suab hauv teb,
thiab nws muab lub chaw uas
ua tej kevcai uas teem tseg rhuav pob tag,
Yawmsaub ua rau tej kevcai uas teem tseg
thiab hnub Xanpatau⚓ ploj tag hauv Xi‑oo lawm,
nws chim npau taws heev thiaj muab
vajntxwv thiab cov pov thawj pov tseg.
⁷Tus Tswv muab nws lub thaj xyeem pov tseg,
thiab fee plhu ntawm
qhov chaw uas pe hawm nws,
nws muab tej ntsa loog
ntawm vajntxwv tsev huvsi cob
rau hauv yeeb ncuab txhais tes.
Yeeb ncuab tsa suab qw ntshu nrooj
hauv Yawmsaub lub tuam tsev ib yam li
hnub uas ua tej kevcai uas teem tseg.
⁸Yawmsaub twb npaj siab yuav muab
Xi‑oo tus ntxhais tej ntsa loog ua kom pob tag,
nws twb muab hlua ntsuas,
nws tsis nkaum nws txhais tes
ntawm qhov uas ua kom puam tsuaj,
nws ua rau tej chaw faj xwm
thiab tej ntsa loog quaj ntsuag
thiab qaug zog tag huvsi.
⁹Xi‑oo tej rooj loog twb pob tag
rau hauv av lawm,
Vajtswv muab tej las rooj
rhuav thiab lov pov tseg lawm.
Xi‑oo tus vajntxwv thiab cov thawj
poob rau hauv lwm haiv neeg lawm.
Txoj kevcai tsis muaj lawm
thiab nws cov xibhwb cev Vajtswv lus
tsis tau txais zaj yog toog ntawm Yawmsaub.
¹⁰Xi‑oo tus ntxhais cov kev txwj laus
kuj nyob twjywm rau hauv pem teb,
lawv tsuab hmoov av rau saum taubhau
thiab hnav khaub seev tsaj,
Yeluxalees tej ntxhais hluas
nyo taubhau ti nkaus hauv pem teb lawm.
¹¹Kuv quaj heev ua qhov muag plooj tag,
kuv lub siab ntxhov kawg,
kuv lub siab ntsws yaj tag
vim kuv haiv neeg tus ntxhais puam tsuaj tag.
thiab tej menyuam yaus
thiab tej menyuam mos liab tsaus muag
tsis nco qab rau hauv tej kev hauv lub nroog.
¹²Lawv quaj rau leej niam hais tias,
“Mov thiab cawv txiv hmab nyob qhovtwg?”
rau thaum lawv tsaus muag tsis ncu qab
zoo yam nkaus li tej uas raug mob
ntawm tej kev hauv lub nroog,
yog thaum lawv txojsia twb yuav tu
rau hauv lawv niam lub xubntiag.

¹³Yeluxalees tus ntxhais 'e,
kuv yuav hais tau dabtsi rau koj?
Kuv yuav muab koj piv txog yam twg?
Xi‑oo tus ntxhais uas dawb huv 'e,
kuv yuav muab koj piv tau rau yam twg,
xwv kuv thiaj nplij tau koj?
Rau qhov koj raug kev puam tsuaj
loj yam li lub hiavtxwv,
leejtwg yuav ua tau rau koj rov zoo li qub?
¹⁴Koj tej xibhwb cev Vajtswv lus
tau pom tej yog toog cuav tsis tseeb
coj los hais rau koj,
lawv tsis qhia koj kev txhaum rau koj paub
xwv koj thiaj rov tau lub neej zoo li qub,
tiamsis lawv tseem cev tej lus cuav
uas coj koj mus yuam kev xwb.
¹⁵Txhua tus uas dua kev mus
kuj npuaj teg luag koj,
lawv thuam luag co hau hnyo
rau Yeluxalees tus ntxhais tias,
“No yog lub nroog uas luag hu tias
zoo nkauj kawg nkaus,
yog lub nroog uas ib tsoom neeg
hauv ntiajteb zoo siab rau lov?”
¹⁶Koj cov yeeb ncuab sawvdaws
qheb ncauj cem koj, lawv thuam luag koj,
lawv zim hniav qas zog rau koj, lawv qw tias,
“Peb twb ua lub nroog no puam tsuaj lawm lauj!
Hnub no yog hnub uas peb tos ntsoov.
Peb twb ntsib thiab peb twb pom lawm lauj!”
¹⁷Yawmsaub twb ua raws li
nws npaj tseg lawm,
nws twb ua tiav raws li nws hais tseg lawm.
Nws muab ua puam tsuaj tsis khuvleej li
raws li nws twb txiav txim siab ntev los lawm.
Nws ua rau yeeb ncuab zoo siab thiab luag koj,
nws tsa koj cov tshawj chim muaj zog heev tuaj.

¹⁸Xi‑oo tus ntxhais lub ntsa loog 'e,
cia li quaj thov tus Tswv,
cia los kua muag ntws nto
nruab hnub hmo ntuj yam li tus dej ntws,
koj tsis txhob so li,
koj tsis txhob cia koj cov kua muag
qhuav ntawm koj lub qhov muag
¹⁹Cia li sawv tsees,
cia li quaj hmo ntuj raws li tej sijhawm,
cia li nchuav tej uas nyob hauv koj lub siab
tawm los yam li dej ntws
rau ntawm tus Tswv lub xubntiag.
Cia li tsa koj ob txhais tes rau nws,
thov cawm koj cov menyuam txojsia
uas tabtom tshaib plab tsaus muag
rau txhua txoj hauv kev.
²⁰Au Yawmsaub, thov tsa muag saib lauj!
Koj txeev ua li no rau leejtwg?
Tsim nyog cov pojniam noj nws cov menyuam
yog tej menyuam uas nws hlub heev lov?
Tsim nyog tus pov thawj
thiab tus xibhwb cev Vajtswv lus
raug muab tua rau lub chaw pe tus Tswv lov?
²¹Tej hluas thiab tej poj koob yawm txwv
tuag pawg lug hauv av ntawm tej kev,
kuv tej ntxhais hluas thiab kuv tej tub hluas
raug hniav ntaj ntog tuag tag lawm,
koj muab lawv tua rau hnub uas koj chim,
muab lawv tua tsis khuvleej li.
²²Koj tau hu cov uas kuv ntshai tuaj
txhua fab tuaj yam nkaus li
hnub uas ua kevcai teem tseg.
Hnub uas Yawmsaub chim
tsis muaj ib tug khiav dim tau
lossis tseem ciaj li.
Cov uas kuv puag rawv thiab tu,
mas kuv cov yeeb ncuab
muab ua puam tsuaj tag.