8
Kevcai tsaa Aloo hab nwg cov tub ua pov thawj
(Ts.D. 29:1-37)
5Mauxe has rua cov pejxeem tas, “Nuav yog tej kws Yawmsaub has tas yuav tsum ua.”
6Mauxe txawm coj Aloo hab nwg cov tub tuaj mas muab dej ntxuav puab.
7Nwg muab lub tsho rua Aloo naav, muab hlaab rua sa hab muab lub tsho ntev rua naav hab muab lub tsho efauj rua naav. Nwg muab txuj hlaab sa kws ntus zoo zoo sa lub tsho efauj rua ntawm duav, txhad khi tau lub tsho efauj.
8Mauxe muab lub awv rua Aloo coj hab muab Uli hab Thumi⚓ tso rua huv lub awv.
9Hab nwg muab phuam ua rua Aloo ntoo hab muab pluaj kub kws dawb huv lug sa txuj phuam ntawm hauv plaj, lawv le Yawmsaub has rua Mauxe lawd.
10Mauxe muab cov roj kws swv ua kevcai tsaa lug laub ywg Yawmsaub lub tsev ntaub sws ntswb hab txhua yaam kws nyob huv lub tsev txhad ua tau kevcai tu kuas dawb huv rua Yawmsaub.
11Hab nwg muab cov roj ib qho nchus rua sau lub thaaj xyaa zag, muab laub ywg lub thaaj hab tej pestwj kws swv ntawm lub thaaj huvsw hab lub phaaj hab lub chaw kws txawb lub phaaj txhad ua tau kevcai tu kuas dawb huv rua Yawmsaub.
12Nwg muab cov roj kws swv ua kevcai tsaa ib qho laub ywg rua sau Aloo taubhau ua kevcai tsaa tau nwg hab tu kuas nwg dawb huv rua Yawmsaub.
13Mauxe txawm coj Aloo cov tub lug mas muab tej tsho rua puab naav, muab txuj hlaab rua puab sa hab muab phuam ua rua puab ntoo, lawv le Yawmsaub has rua Mauxe lawd.
14Mauxe txawm coj tug txwv nyuj kws ua kevcai xyeem daws txem tuaj mas Aloo hab nwg cov tub muab teg npuab rua sau tug nyuj kws ua kevcai xyeem daws txem taubhau.
15Mauxe muab tug nyuj hov tua kag hab muab ntiv teg raus huv cov ntshaav ib qho lug pleev cov kub thaaj ua kevcai ntxuav lub thaaj kuas dawb huv hab laub cov ntshaav kws tshuav rua lub taw thaaj, mas txhad tu kuas dawb huv rua Yawmsaub hab ua kevcai ntxuav lub thaaj kev txhum.
16Nwg kuj muab cov npluag roj kws lu plaab nyuv huvsw hab cov npluag roj kws lu lub sab hab cov npluag roj kws lu ob lub raum hab ob lub raum huvsw lug mas Mauxe muab hlawv rua sau lub thaaj.
17Tassws tug nyuj hab daim tawv hab cov nqaj hab tej quav nwg muab hlawv huvsw rua saab nrau lub zog, lawv le Yawmsaub has rua Mauxe lawd.
18Mauxe txawm coj tug txwv yaaj kws ua kevcai hlawv huvsw xyeem tuaj, mas Aloo hab nwg cov tub muab teg npuab rua sau tug yaaj hov taubhau.
19Mauxe kuj muab tug yaaj hov tua kag muab cov ntshaav nchus lu puag ncig lub thaaj.
20Nwg muab tug txwv yaaj hov txav ua tej ywb yaav hab nwg muab lub taubhau hab tej ywb yaav hab cov npluag roj hlawv huvsw.
21Thaus nwg muab dej ntxuav tej plaab nyuv hab tej ceg Mauxe kuj muab tug txwv yaaj hlawv huvsw rua sau lub thaaj ua kevcai hlawv huvsw xyeem ua kuas muaj paa nchu tsw qaab, yog yaam kws muab hlawv kub nyab xyeem rua Yawmsaub, lawv le Yawmsaub has rua Mauxe lawd.
22Mauxe coj dua ib tug txwv yaaj lug yog tug yaaj kws swv ua kevcai tsaa pov thawj, mas Aloo hab nwg cov tub muab teg npuab rua sau tug txwv yaaj hov taubhau.
23Mauxe muab tug yaaj hov tua kag mas muab cov ntshaav ib qho lug pleev Aloo saab taub ntsej xws hab tug taub teg xws hab tug taub taw xws.
24Mauxe kuj coj Aloo cov tub lug mas nwg muab cov ntshaav ib qho lug pleev puab saab taub ntsej xws hab tug taub teg xws hab tug taub taw xws hab nwg muab cov ntshaav nchus kuas lu puag ncig lub thaaj.
25Nwg muab cov npluag roj hab tug kwtwv kws rog rog hab cov npluag roj kws lu plaab nyuv huvsw hab cov npluag roj kws lu lub sab hab cov npluag roj kws lu ob lub raum hab ob lub raum, hab saab ceg xws.
26Nwg txawm rhu ib lub ncuav kws tsw xyaw keeb hab ib lub ncuav ntse roj hab ib lub ncuav nyag nyag huv lub tawb kws muaj cov ncuav tsw xyaw keeb kws nyob ntawm Yawmsaub xubndag, tso rua sau cov npluag roj hab tso rua sau saab ceg xws.
27Nwg muab cov nuav huvsw tso rua huv Aloo hab Aloo cov tub txhais teg nqaa moog cev ua kevcai cev xyeem rua ntawm Yawmsaub xubndag.
28Mauxe tsua txais tej hov ntawm Aloo puab txhais teg muab hlawv rua sau lub thaaj ua ke nrug tug yaaj kws hlawv huvsw xyeem lawd ua kevcai tsaa ua pov thawj, ua kuas muaj paa nchu tsw qaab, yog yaam kws muab hlawv kub nyab xyeem rua Yawmsaub.
29Mauxe muab lub hauv nrob ua kevcai cev xyeem rua ntawm Yawmsaub xubndag. Lub hauv nrob nuav yog Mauxe le feem rhu ntawm tug yaaj kws ua kevcai tsaa pov thawj lug, lawv le Yawmsaub has rua Mauxe lawd.
30Mauxe coj cov roj kws swv ua kevcai tsaa ib qho hab cov ntshaav sau lub thaaj ib qho lug nchus rua Aloo hab Aloo cev tsoog meej mom hab nchus rua Aloo cov tub hab puab tej tsoog meej mom. Mauxe ua le nuav txhad tu tau Aloo hab nwg cev tsoog meej mom hab Aloo cov tub hab puab tej tsoog meej mom kuas dawb huv rua Yawmsaub.
31Mauxe has rua Aloo hab Aloo cov tub tas, “Muab cov nqaj hov hau ntawm lub qhov rooj tsev ntaub sws ntswb hab noj hov ntawd ntxuag cov ncuav huv lub tawb kws xyeem ua kevcai tsaa ua pov thawj, lawv le kuv has rua mej lawd tas Aloo hab nwg cov tub yuav tsum noj.
32Tej nqaj hab tej ncuav kws noj tsw taag mas mej muab hlawv huvsw pov tseg.
33Xyaa nub mej tsw xob tawm ntawm lub qhov rooj tsev ntaub sws ntswb moog hovtwg le moog txug nub kws ua kevcai tsaa mej ua pov thawj tav tsaiv. Txuj kevcai tsaa mej ua pov thawj yuav ua xyaa nub.
34Tej kws ua nub nua yog Yawmsaub has kuas ua lug ntxuav mej le kev txhum txem.
35Mej yuav tsum nyob ntawm lub qhov rooj tsev ntaub sws ntswb xyaa nub nruab nub mo ntuj hab ua tej kws Yawmsaub has ca lawd tsaam tes mej tsua tuag, vem tej nuav yog Yawmsaub has rua kuv ntaag.”
36Aloo hab nwg cov tub kuj ua lawv le Yawmsaub has rua Mauxe lawd txhua yaam huvsw.
8
Kevcai tsa Aloo thiab nws cov tub ua pov thawj
(Kh.D. 29:1-37)
5Mauxe hais rau cov pejxeem tias, “No yog tej uas Yawmsaub hais tias yuav tsum ua.”
6Mauxe txawm coj Aloo thiab nws cov tub tuaj mas muab dej ntxuav lawv.
7Nws muab lub tsho rau Aloo hnav, muab siv rau sia thiab muab lub tsho ntev rau hnav thiab muab lub tsho efauj rau hnav. Nws muab txoj siv sia uas ntos zoo zoo sia lub tsho efauj rau ntawm duav, thiaj khi tau lub tsho efauj.
8Mauxe muab lub awv rau Aloo coj thiab muab Uli thiab Thumi⚓ tso rau hauv lub awv.
9Thiab nws muab phuam rau Aloo ntoo thiab muab pluaj kub uas dawb huv los sia txoj phuam ntawm hauv pliaj, raws li Yawmsaub hais rau Mauxe lawd.
10Mauxe muab cov roj uas siv ua kevcai tsa los hliv ywg Yawmsaub lub tsev ntaub sib ntsib thiab txhua yam uas nyob hauv lub tsev thiaj ua tau kevcai tu kom dawb huv rau Yawmsaub.
11Thiab nws muab cov roj ib qho nchos rau saum lub thaj xya zaus, muab hliv ywg lub thaj thiab tej twj uas siv ntawm lub thaj huvsi thiab lub phaj thiab lub chaw uas txawb lub phaj thiaj ua tau kevcai tu kom dawb huv rau Yawmsaub.
12Nws muab cov roj uas siv ua kevcai tsa ib qho hliv ywg rau saum Aloo taubhau ua kevcai tsa tau nws thiab tu kom nws dawb huv rau Yawmsaub.
13Mauxe txawm coj Aloo cov tub los mas muab tej tsho rau lawv hnav, muab txoj siv rau lawv sia thiab muab phuam rau lawv ntoo, raws li Yawmsaub hais rau Mauxe lawd.
14Mauxe txawm coj tus txiv nyuj uas ua kevcai xyeem daws txim tuaj mas Aloo thiab nws cov tub muab tes npuab rau saum tus nyuj uas ua kevcai xyeem daws txim taubhau.
15Mauxe muab tus nyuj ntawd tua kiag thiab muab ntiv tes raus hauv cov ntshav ib qho los pleev cov kub thaj ua kevcai ntxuav lub thaj kom dawb huv thiab hliv cov ntshav uas tshuav rau lub taw thaj, mas thiaj tu kom dawb huv rau Yawmsaub thiab ua kevcai ntxuav lub thaj kev txhaum.
16Nws kuj muab cov hlab hluas roj uas lo plab hnyuv huvsi thiab cov hlab hluas roj uas lo cov siab thiab cov hlab hluas roj uas lo ob lub raum thiab ob lub raum huvsi los mas Mauxe muab hlawv rau saum lub thaj.
17Tiamsis tus nyuj thiab daim tawv thiab cov nqaij thiab tej quav nws muab hlawv huvsi rau sab nraum ntug zos, raws li Yawmsaub hais rau Mauxe lawd.
18Mauxe txawm coj tus txiv yaj uas ua kevcai hlawv huvsi xyeem tuaj, mas Aloo thiab nws cov tub muab tes npuab rau saum tus yaj ntawd taubhau.
19Mauxe kuj muab tus yaj ntawd tua kiag muab cov ntshav nchos lo puag ncig lub thaj.
20Nws muab tus txiv yaj ntawd txiav ua tej ywb yav thiab nws muab lub taubhau thiab tej ywb yav thiab cov hlab hluas roj hlawv huvsi.
21Thaum nws muab dej ntxuav tej plab hnyuv thiab tej ceg Mauxe kuj muab tus txiv yaj hlawv huvsi rau saum lub thaj ua kevcai hlawv huvsi xyeem ua kom muaj pa ncho tsw qab, yog yam uas muab hlawv kub hnyiab xyeem rau Yawmsaub, raws li Yawmsaub hais rau Mauxe lawd.
22Mauxe coj dua ib tug txiv yaj los yog tus yaj uas siv ua kevcai tsa pov thawj, mas Aloo thiab nws cov tub muab tes npuab rau saum tus txiv yaj ntawd taubhau.
23Mauxe muab tus yaj ntawd tua kiag mas muab cov ntshav ib qho los pleev Aloo sab taub ntsej xis thiab tus taub teg xis thiab tus taub taw xis.
24Mauxe kuj coj Aloo cov tub los mas nws muab cov ntshav ib qho los pleev lawv sab taub ntsej xis thiab tus taub teg xis thiab tus taub taw xis thiab nws muab cov ntshav nchos kom lo puag ncig lub thaj.
25Nws muab cov hlab hluas roj thiab tus kotw uas rog rog thiab cov hlab hluas roj uas lo plab hnyuv huvsi thiab cov hlab hluas roj uas lo cov siab thiab cov hlab hluas roj uas lo ob lub raum thiab ob lub raum, thiab sab ceg xis.
26Nws txawm rho ib lub ncuav uas tsis xyaw keeb thiab ib lub ncuav ntse roj thiab ib lub ncuav nyias nyias hauv lub tawb uas muaj cov ncuav tsis xyaw keeb uas nyob ntawm Yawmsaub xubntiag, tso rau saum cov hlab hluas roj thiab tso rau saum sab ceg xis.
27Nws muab cov no huvsi tso rau hauv Aloo thiab Aloo cov tub txhais tes nqa mus cev ua kevcai cev xyeem rau ntawm Yawmsaub xubntiag.
28Mauxe ho txais tej ntawm Aloo lawv txhais tes muab hlawv rau saum lub thaj ua ke nrog tus yaj uas hlawv huvsi xyeem lawd ua kevcai tsa ua pov thawj, ua kom muaj pa ncho tsw qab, yog yam uas muab hlawv kub hnyiab xyeem rau Yawmsaub.
29Mauxe muab lub hauv nrob ua kevcai cev xyeem rau ntawm Yawmsaub xubntiag. Lub hauv nrob no yog Mauxe li feem rho ntawm tus yaj uas ua kevcai tsa pov thawj los, raws li Yawmsaub hais rau Mauxe lawd.
30Mauxe coj cov roj uas siv ua kevcai tsa ib qho thiab cov ntshav saum lub thaj ib qho los nchos rau Aloo thiab Aloo cev tsoos meej mom thiab nchos rau Aloo cov tub thiab lawv tej tsoos meej mom. Mauxe ua li no thiaj tu tau Aloo thiab nws cev tsoos meej mom thiab Aloo cov tub thiab lawv tej tsoos meej mom kom dawb huv rau Yawmsaub.
31Mauxe hais rau Aloo thiab Aloo cov tub tias, “Muab cov nqaij ntawd hau ntawm lub qhov rooj tsev ntaub sib ntsib thiab noj qhov ntawd ntxuag cov ncuav hauv lub tawb uas xyeem ua kevcai tsa ua pov thawj, raws li kuv hais rau nej lawd tias Aloo thiab nws cov tub yuav tsum noj.
32Tej nqaij thiab tej ncuav uas noj tsis tag mas nej muab hlawv huvsi pov tseg.
33Xya hnub nej tsis txhob tawm ntawm lub qhov rooj tsev ntaub sib ntsib mus qhovtwg li mus txog hnub uas ua kevcai tsa nej ua pov thawj tiav tso. Txoj kevcai tsa nej ua pov thawj yuav ua xya hnub.
34Tej uas ua hnub no yog Yawmsaub hais kom ua los ntxuav nej li kev txhaum txim.
35Nej yuav tsum nyob ntawm lub qhov rooj tsev ntaub sib ntsib xya hnub nruab hnub hmo ntuj thiab ua tej uas Yawmsaub hais cia lawd tsam ces nej ho tuag, vim tej no yog Yawmsaub hais rau kuv ntag.”
36Aloo thiab nws cov tub kuj ua raws li Yawmsaub hais rau Mauxe lawd txhua yam huvsi.