9

Pub nyiaj pab cov xov dawb

¹Tsis tag kuv yuav sau tuaj qhia nej txog qhov uas pab Vajtswv cov xov dawb, ²rau qhov kuv paub tias nej yeej kub siab pab, thiab kuv khav txog nej rau cov neeg hauv lub xeev Makhedaunia paub hais tias, lub xeev Akhaya twb npaj txhij tsaib no los lawm. Thiab qhov uas nej kub siab lug kuj txhob lawv feem coob kom ua ib yam li ntawd. ³Kuv txib cov kwvtij no tuaj xwv tej uas kuv khav txog nej thiaj tsis yog kuv hais do xwb, tiamsis nej yuav npaj kom txhij raws li kuv twb hais tseg lawd. ⁴Yog tsis ua li ntawd yog cov Makhedaunia qee leej nrog kuv tuaj pom tias nej tsis tau npaj txhij, tsis hais nej yuav txaj muag xwb tiamsis peb yuav poob ntsej muag vim qhov uas peb ruaj siab li ntawd. ⁵Vim li no kuv thiaj xav tias yuav tsum thov cov kwvtij no ua kuv ntej tuaj cuag nej thiab npaj tej uas nej cog lus cia tias yuav pub ntawd, kom tej uas npaj ntawd yog tej uas nej zoo siab pub tsis yog tej uas nej raug yuam pub.
⁶Yog li no tus uas tseb tsawg kuj sau tau tsawg, tus uas tseb ntau kuj sau tau ntau. ⁷Txhua tus nyias yuav tsum muab raws li nyias twb xav tseg hauv lub siab lawm, tsis yog yuav khuvxim lossis raug yuam muab, rau qhov Vajtswv hlub tus uas xyiv fab muab. ⁸Thiab Vajtswv muaj peevxwm yuav pub txhua yam koob hmoov rau nej nplua mias kom nej thiaj muaj txhua yam txhij txaus siv rau txhua lub sijhawm thiab nej tseem muaj nplua mias siv rau txhua yam haujlwm zoo thiab. ⁹Raws li muaj lus sau cia hais tias,
“Nws faib rau luag thiab pub rau tej pluag,
nws txojkev ncaj ncees
yuav nyob mus ib txhis.”⚓
¹⁰Tus uas pub noob rau tus uas tseb thiab pub mov rau tus uas noj nws yeej yuav pub noob qoob rau nej thiab yuav tsav tej noob qoob rau nej, thiab yuav tsav tej qoob uas nej sau ntawm nej txojkev ncaj ncees. ¹¹Nej yuav nplua nuj rau txhua yam nej thiaj muaj lub siab dav pub tau rau luag txhua lub sijhawm, thiab yuav ua kom muaj kev ua Vajtswv tsaug rau tej uas hla ntawm peb mus. ¹²Qhov uas ua tes haujlwm no tsis yog pab cov xov dawb uas tu ncua xwb tiamsis yuav ua kom muaj kev ua Vajtswv tsaug loj kawg nkaus. ¹³Thaum luag tshuaj saib nej tes haujlwm no luag yuav qhuas Vajtswv rau qhov uas nej mloog lus kom tsim nyog qhov uas nej txais yuav Khetos txoj xov zoo thiab rau qhov uas nej muaj lub siab dav pub rau lawv thiab pub rau txhua tus. ¹⁴Lawv yuav taij thov Vajtswv pab nej thiab nco txog nej vim Vajtswv txojkev hlub uas nej muaj nplua mias. ¹⁵Ua Vajtswv tsaug rau tej uas nws pub tshaj dhau peb txawj piav tau.

9

Pub nyaj paab cov xuv dawb

¹Tsw taag kuv yuav sau tuaj qha mej txug qhov kws paab Vaajtswv cov xuv dawb, ²tsua qhov kuv paub tas mej yeej kub sab paab, hab kuv khaav txug mej rua cov tuabneeg huv lub xeev Makhentaunia paub has tas, lub xeev Akhaya tub npaaj txhwj tseb nua lug lawm. Hab qhov kws mej kub sab quas lug kuj txhob puab feem coob kuas ua ib yaam le ntawd. ³Kuv khaiv cov kwvtij nuav tuaj sub tej kws kuv khaav txug mej txhad tsw yog kuv has do xwb, tassws mej yuav npaaj kuas txhwj lawv le kuv tub has tseg lawd. ⁴Yog tsw ua le ntawd yog cov Makhentaunia qee leej nrug kuv tuaj pum tas mej tsw tau npaaj txhwj, tsw has mej yuav txaaj muag xwb tassws peb yuav poob ntsej muag vem qhov kws peb ruaj sab le ntawd. ⁵Vem le nuav kuv txhad xaav tas yuav tsum thov cov kwvtij nuav ua kuv ntej tuaj cuag mej hab npaaj tej kws mej cog lug ca tas yuav pub hov, sub tej kws npaaj hov yog tej kws mej zoo sab pub tsw yog tej kws mej raug yuam pub.
⁶Yog le nuav tug kws tseb tsawg kuj sau tau tsawg, tug kws tseb ntau kuj sau tau ntau. ⁷Txhua tug nyag yuav tsum muab lawv le nyag tub xaav tseg huv lub sab lawm, tsw yog yuav khauvxwm lossws raug yuam muab, tsua qhov Vaajtswv hlub tug kws xyiv faab muab. ⁸Hab Vaajtswv muaj peevxwm yuav pub txhua yaam koob moov rua mej nplua quas mag sub mej txhad muaj txhua yaam txhwj txaus swv rua txhua lub swjhawm hab mej tseed muaj nplua quas mag swv rua txhua yaam num zoo hab. ⁹Lawv le muaj lug sau ca has tas,
“Nwg faib rua luas hab pub rua tej pluag,
nwg txujkev ncaaj nceeg yuav nyob moog ib txhws.”⚓
¹⁰Tug kws pub noob rua tug kws tseb hab pub mov rua tug kws noj nwg yeej yuav pub noob qoob rua mej hab yuav tsaav tej noob qoob rua mej, hab yuav tsaav tej qoob kws mej sau ntawm mej txujkev ncaaj nceeg. ¹¹Mej yuav nplua nuj rua txhua yaam mej txhad muaj lub sab daav pub tau rua luas txhua lub swjhawm, hab yuav ua kuas muaj kev ua Vaajtswv tsaug rua tej kws hlaa ntawm peb moog. ¹²Qhov kws ua teg num nuav tsw yog paab cov xuv dawb kws tu ncua xwb tassws yuav ua kuas muaj kev ua Vaajtswv tsaug luj kawg nkaus. ¹³Thaus luas tshuaj saib mej teg num nuav luas yuav qhuas Vaajtswv tsua qhov kws mej noog lug kuas tswm nyog qhov kws mej txais yuav Kheto txuj xuv zoo hab tsua qhov kws mej muaj lub sab daav pub rua puab hab pub rua txhua tug. ¹⁴Puab yuav taij thov Vaajtswv paab mej hab ncu txug mej vem Vaajtswv txujkev hlub kws mej muaj nplua quas mag. ¹⁵Ua Vaajtswv tsaug rua tej kws nwg pub tshaaj dhau peb txawj pav tau.