12

Klei Y-Yêrêmi Kwưh Krao leh anăn Klei Aê Diê Lŏ Wĭt Lač

¹Ơ Yêhôwa, ih jing pô kpă
tơdah kâo hưn klei kâo kơ ih.
Ƀiădah kâo čiăng blŭ kơ ih djŏ kơ klei kpă ih:
si ngă bruă phung ƀai đĭ kyar leh?
Si ngă phung lhiăr hriê kơ mdrŏng?
²Ih pla leh diñu, diñu mtrŭn agha;
diñu hriê kơ prŏng mâo boh.
Hŏng ƀăng êgei diñu blŭ jăk kơ ih,
ƀiădah ai tiê diñu kbưi hŏng ih.
³Ƀiădah ih, Ơ Yêhôwa, thâo kral kâo leh;
ih ƀuh kâo leh, leh anăn lông dlăng klei mĭn kâo hŏng ih.
Đoh diñu kơ tač msĕ si biăp kơ anôk koh mdjiê,
leh anăn pioh diñu mdê kơ hruê koh mdjiê.
⁴Dŭm boh sui lăn čar srăng kơŭ kyăm,
leh anăn rơ̆k hlăm grăp boh hma srăng dliu krô?
Kyua klei ƀai phung dôk hlăm anăn ngă,
hlô dliê leh anăn čĭm rai luč.
Kyuadah phung mnuih lač,
“Ñu amâo srăng ƀuh ôh klei truh kơ drei.”

⁵“Tơdah ih tuôm êran leh mbĭt hŏng arăng,
leh anăn diñu bi êmăn ih leh,
si ih dưi bi lông êran hŏng aseh lĕ?
Leh anăn tơdah ih lĕ buh hlăm čar hơĭt,
si ih dưi hlăm bhĭt êa krông Yurdan?
⁶Kyuadah wăt phung ayŏng adei ih leh anăn sang ama ih lhiăr kơ ih,
diñu ur driâo čiăng ngă kơ ih.
Đăm knang kơ diñu ôh,
wăt tơdah diñu blŭ klei siam kơ ih dưn.

⁷Kâo lui leh sang kâo,
kâo lui leh mơh ngăn dưn kâo;
kâo jao leh pô ai tiê kâo khăp hlăm kngan phung roh ñu.
⁸Ngăn dưn kâo jing leh kơ kâo
msĕ si sa drei êmông gu hlăm kmrơ̆ng.
Ñu gruh bi kdơ̆ng hŏng kâo;
kyuanăn kâo bi êmut kơ ñu leh.
⁹Ngăn dưn kâo jing kơ kâo msĕ si sa drei tlang mơ̆?
Lu tlang grư̆ dôk jŭm dar čiăng ngă kơ ñu mơ̆?
Nao bi kƀĭn bĕ jih jang hlô dliê,
atăt digơ̆ brei ƀơ̆ng ngăn dưn kâo anăn.
¹⁰Lu phung mgăt biăp bi rai leh đang boh kriăk ƀâo kâo,
diñu juă leh hma kâo,
diñu mjing hma siam kâo msĕ si sa anôk kdrăn tač.
¹¹Diñu brei gơ̆ jing ênguôl leh;
kyua jing ênguôl leh, ñu kơŭ kyăm kơ kâo.
Tar ƀar čar jing ênguôl leh,
kyuadah amâo mâo mnuih uêñ ôh kơ klei anăn.
¹²Phung bi rai truh leh
ti dlông jih jang čŏng čư̆ kla hlăm kdrăn tač;
kyuadah đao gưm Yêhôwa dôk bi rai
mơ̆ng sa knhal lăn truh kơ knhal mkăn;
amâo mâo klei êđăp ênang ôh.
¹³Diñu rah mdiê ƀiădah wiă êruê;
diñu mă bruă suăi ƀiădah amâo mâo boh tŭ dưn ôh.
Brei ih hêñ kơ boh ƀiă diñu wiă,
kyuadah klei Yêhôwa ngêñ ktang snăk.”
¹⁴Snei Yêhôwa lač djŏ kơ jih jang phung riêng gah kâo jhat, phung ngă kơ ngăn dưn kâo brei leh kơ phung ƀuôn sang kâo Israel: “Nĕ anei, kâo srăng buč diñu mơ̆ng čar diñu pô, leh anăn kâo srăng kdjŏng bi mtlaih sang Yuđa mơ̆ng krah diñu. ¹⁵Tơdah leh kâo buč hĕ diñu, kâo srăng lŏ pap kơ diñu, leh anăn lŏ atăt grăp čô kơ ngăn dưn diñu leh anăn kơ čar diñu pô. ¹⁶Leh anăn tơdah diñu kriăng hriăm čiăng thâo săng êlan phung ƀuôn sang kâo, čiăng kat asei hŏng anăn kâo, ‘Tui si Yêhôwa dôk hdĭp,’ msĕ si diñu bi hriăm leh phung ƀuôn sang kâo kat asei hŏng yang Baal, hlăk anăn kâo srăng mdơ̆ng diñu ti krah phung ƀuôn sang kâo. ¹⁷Ƀiădah tơdah sa găp djuê mnuih amâo dôk hmư̆ ôh, snăn kâo srăng buč bi rai hĕ diñu jih nguêč,” Yêhôwa lač.

12

Jeremiah’s Complaint

¹You are always righteous, Lord,
when I bring a case before you.
Yet I would speak with you about your justice:
Why does the way of the wicked prosper?
Why do all the faithless live at ease?
²You have planted them, and they have taken root;
they grow and bear fruit.
You are always on their lips
but far from their hearts.
³Yet you know me, Lord;
you see me and test my thoughts about you.
Drag them off like sheep to be butchered!
Set them apart for the day of slaughter!
⁴How long will the land lie parched
and the grass in every field be withered?
Because those who live in it are wicked,
the animals and birds have perished.
Moreover, the people are saying,
“He will not see what happens to us.”

God’s Answer

⁵“If you have raced with men on foot
and they have worn you out,
how can you compete with horses?
If you stumble⚓ in safe country,
how will you manage in the thickets by⚓ the Jordan?
⁶Your relatives, members of your own family—
even they have betrayed you;
they have raised a loud cry against you.
Do not trust them,
though they speak well of you.

⁷“I will forsake my house,
abandon my inheritance;
I will give the one I love
into the hands of her enemies.
⁸My inheritance has become to me
like a lion in the forest.
She roars at me;
therefore I hate her.
⁹Has not my inheritance become to me
like a speckled bird of prey
that other birds of prey surround and attack?
Go and gather all the wild beasts;
bring them to devour.
¹⁰Many shepherds will ruin my vineyard
and trample down my field;
they will turn my pleasant field
into a desolate wasteland.
¹¹It will be made a wasteland,
parched and desolate before me;
the whole land will be laid waste
because there is no one who cares.
¹²Over all the barren heights in the desert
destroyers will swarm,
for the sword of the Lord will devour
from one end of the land to the other;
no one will be safe.
¹³They will sow wheat but reap thorns;
they will wear themselves out but gain nothing.
They will bear the shame of their harvest
because of the Lord’s fierce anger.”
¹⁴This is what the Lord says: “As for all my wicked neighbors who seize the inheritance I gave my people Israel, I will uproot them from their lands and I will uproot the people of Judah from among them. ¹⁵But after I uproot them, I will again have compassion and will bring each of them back to their own inheritance and their own country. ¹⁶And if they learn well the ways of my people and swear by my name, saying, ‘As surely as the Lord lives’—even as they once taught my people to swear by Baal—then they will be established among my people. ¹⁷But if any nation does not listen, I will completely uproot and destroy it,” declares the Lord.