29

Yeeb ncuab ntaus Yeluxalee

¹Au Ali‑ee,⚓ Ali‑ee 'e, lub nroog kws Tavi tsaa tsev ntaub nyob,
ca le tsaav lub xyoo ntxwv rua lub xyoo,
ca le ua kevcai lawv swjhawm kws teem ca.
²Txawm le caag los kuv yuav ua kuas Ali‑ee raug kev txom nyem nyuaj sab,
hab yuav muaj kev ntsaaj quas lawg hab quaj ntsuag,
hab lub nroog yuav ua rua kuv zoo le lub thaaj kws hlawv xyeem.⚓
³Kuv yuav ua yeej vej puag ncig koj,
hab kuv yuav ua tej chaw tsom faaj vej ntaus koj,
hab tsub aav nce moog tawm tsaam koj.
⁴Koj yuav has huv qhov chaw kws tub kawg huv nplajteb tuaj,
koj tej lug yuav tawm huv tej moov aav huv qhov chaw qeg tuaj,
koj lub suab yuav tawm huv aav tuaj yaam le daab lub suab,
koj tej lug yuav has lug ntxhw huv tej moov aav tuaj.
⁵Koj cov tshawj chim coob coob
yuav zoo le tej moov aav mog,
hab cov kws ua nruj ua tswv yuav zoo le
tej npluag qoob kws yaa pluj taag.
Ib plag ntshws, tuab ntsais muag xwb,
⁶Yawmsaub kws muaj fwjchim luj kawg nkaus yuav lug saib koj,
ua xub nthe hab ntuj qeg hab muaj suab nrov heev,
muaj khaub zeeg cua hab cua daaj cua dub ntsawj,
hab muaj nplaim tawg hlawv du lug.
⁷Mas ib tsoom tebchaws coob coob kws tawm tsaam Ali‑ee,
yog txhua tug kws ntaus nwg hab nwg tej chaw ruaj khov,
hab ua rua nwg raug kev txom nyem nyuaj sab,
puab yuav zoo yaam nkaus le zaaj npau suav
kws ua yug quas toog mo ntuj.
⁸Ib yaam le tug kws tshaib plaab ua npau suav
tas nwg saamswm noj los tswm lug tseed tshaib,
hab ib yaam le tug kws nqhes dej ua npau suav
tas nwg saamswm haus
los tswm lug kuj qaug zug hab tseed nqhes,
mas ib tsoom tebchaws coob coob kws tuaj ntaus lub roob Xi‑oo
yuav zoo ib yaam le ntawd.

Tej lug ntuag

⁹Ca le ua tuabneeg feeb tsw meej hab ua tuabneeg ruag,
ca le rov ua rua mej dig muag tsw pum kev,
ca le qaug tassws tsw yog qaug cawv txwv maab,
ca le qaug paaj qaug poog tassws tsw yog qaug cawv ntxws.
¹⁰Vem Yawmsaub ua rua mej tsaug zug heev,
hab kaw mej lub qhov muag
kws yog cov xwbfwb cev nwg lug,
hab kauv mej lub taubhau
kws yog cov xwbfwb has pum tom hauv ntej.
¹¹Tej yug quas toog nuav huvsw zoo yaam le tej lug kws nyob huv thooj ntawv kws ntaus hom thawj kaw ca lawd rua mej. Thaus luas muab rua ib tug kws txawj nyeem hab has tas, “Nyeem nuav saib,” los tug hov yuav has tas, “Kuv nyeem tsw tau, vem yog ntaus hom thawj kaw lawm.” ¹²Thaus luas muab rua ib tug kws tsw txawj nyeem hab has tas, “Nyeem nuav saib,” nwg kuj has tas, “Kuv tsw txawj nyeem ntawv.”

¹³Tug Tswv has tas,
“Cov tuabneeg nuav laam tuaj ze kuv ntawm lub ncauj,
hab fwm kuv ntawm daim tawv ncauj
tassws puab lub sab nyob deb kuv,
hab puab tsuas yog fwm kuv
lawv le tuabneeg tej kevcai kws cim tau.
¹⁴Vem le nuav kuv yuav ua txujci phemfwj
rua haiv tuabneeg nuav dua,
yog yaam kws phemfwj kawg hab xaav tsw thoob.
Tej tuabneeg kws muaj tswvyim tug tswvyim yuav puam tsuaj moog,
hab tej tuabneeg txawj ntse txujkev txawj ntse yuav pluj taag.”
¹⁵Cov kws muab tej num kws nwg npaaj tseg zais tsw qha Yawmsaub,
yuav raug txom nyem lauj!
Puab ua num huv qhov tsaus ntuj hab puab has tas,
“Leejtwg yuav pum peb? Leejtwg yuav paub?”
¹⁶Mej ntxeev ib puas tsaav yaam.
Yuav suav tas tug Kws puab laujkaub aav
tsuas zoo le aav nplaum xwb lov?
Hab yaam kws tswm tau lug yuav has rua tug kws tswm tas,
“Nwg tsw tau tswm kuv,” nua lov?
Hab yaam kws muab puab tau lug yuav has rua tug kws puab tas,
“Nwg tsw txawj daabtsw le,” nua lov?

Muaj vaam rua yaav tom hauv ntej

¹⁷Tsw yog tshuav tsw ntev lov
kws Lenpanoo yuav caj ua teb ntsu qoob,
hab tej teb ntsu qoob yuav caj ua haav zoov?
¹⁸Nub ntawd cov tuabneeg laag ntseg
yuav nov tej lug huv thooj ntawv,
hab cov tuabneeg dig muag
yuav pum kev huv qhov tsaus ntuj
hab qhov tsaus dub quas ncab.
¹⁹Cov kws tsw muab hlub
yuav rov zoo sab xyiv faab rua huv Yawmsaub,
cov tuabneeg kws pluag yuav zoo sab
rua huv tug Dawb Huv huv cov Yixayee.
²⁰Cov kws ua nruj ua tswv yuav pluj moog,
cov tuabneeg thuaj luag yuav tsw muaj lawm,
hab txhua tug kws nrhav quas ntshws ua phem
yuav raug muab txav pov tseg,
²¹yog cov kws has lug qhau luas cai,
hab ua maab ua hlua cuab tug kws tu plaub ntawm rooj loog,⚓
hab has tsw tseeb qhau tug kws tsw txhum cai.

²²Vem le nuav, Yawmsaub kws txhwv Aplahaa has le nuav txug Yakhauj caaj ceg tas,
“Yakhauj yuav tsw poob ntsej muag dua le lawm,
hab puab lub plhu yuav tsw ntshaus dua le lawm.
²³Thaus puab pum puab tej tub ki
kws kuv txhais teg ua huv plawv puab,
puab yuav xaam pum tas kuv lub npe dawb huv.
Puab yuav fwm Yakhauj tug Tswv kws Dawb Huv,
hab paub ntshai Yixayee tug Vaajtswv.
²⁴Cov kws lub sab yuam kev yuav txawj nkaag sab,
hab cov kws ywg tuj tawg yuav yeem txais kev qhuab qha.”

29

Yeeb ncuab ntaus Yeluxalees

¹Au Ali‑ee,⚓ Ali‑ee 'e,
lub nroog uas Davi tsa tsev ntaub nyob,
cia li tsav lub xyoo ntxiv rau lub xyoo,
cia li ua kevcai raws sijhawm uas teem cia.
²Txawm li cas los kuv yuav ua kom Ali‑ee
raug kev txom nyem nyuaj siab,
thiab yuav muaj kev ntsaj laws
thiab quaj ntsuag,
thiab lub nroog yuav ua rau kuv
zoo li lub thaj uas hlawv xyeem.⚓
³Kuv yuav ua yeej vij puag ncig koj,
thiab kuv yuav ua tej chaw tsom faj vij ntaus koj,
thiab tsub av nce mus tawm tsam koj.
⁴Koj yuav hais hauv qhov chaw uas tob kawg
hauv ntiajteb tuaj,
koj tej lus yuav tawm hauv tej hmoov av
hauv qhov chaw qes tuaj,
koj lub suab yuav tawm hauv av tuaj
yam li dab lub suab,
koj tej lus yuav hais lus ntxhi
hauv tej hmoov av tuaj.
⁵Koj cov tshawj chim coob coob
yuav zoo li tej hmoov av mos,
thiab cov uas ua nruj ua tsiv
yuav zoo li tej npluag qoob uas ya ploj tag.
Ib pliag ntshis, tib ntsais muag xwb,
⁶Yawmsaub uas muaj hwjchim loj
kawg nkaus yuav los xyuas koj,
ua xob nthe thiab ntuj qeeg
thiab muaj suab nrov heev,
muaj khaub zeeg cua
thiab cua daj cua dub ntsawj,
thiab muaj nplaim taws hlawv du lug.
⁷Mas ib tsoom tebchaws coob coob
uas tawm tsam Ali‑ee,
yog txhua tus uas ntaus nws
thiab nws tej chaw ruaj khov,
thiab ua rau nws raug kev
txom nyem nyuaj siab,
lawv yuav zoo yam nkaus li
zaj npau suav uas ua yog toog hmo ntuj.
⁸Ib yam li tus uas tshaib plab
ua npau suav tias nws tabtom noj
los tsim los tseem tshaib,
thiab ib yam li tus uas nqhis dej
ua npau suav tias nws tabtom haus
los tsim los kuj qaug zog thiab tseem nqhis,
mas ib tsoom tebchaws coob coob
uas tuaj ntaus lub roob Xi‑oo
yuav zoo ib yam li ntawd.

Tej lus ntuas

⁹Cia li ua neeg feeb tsis meej
thiab ua neeg ruam,
cia li rov ua rau nej dig muag tsis pom kev,
cia li ntog tiamsis tsis yog
qaug cawv txiv hmab,
cia li ntog puj poog tiamsis tsis yog
qaug cawv ntxwg.
¹⁰Vim Yawmsaub ua rau nej tsaug zog heev,
thiab kaw nej lub qhov muag
uas yog cov xibhwb cev nws lus,
thiab kauv nej lub taubhau uas yog
cov xibhwb hais pom tom hauv ntej.
¹¹Tej yog toog no huvsi zoo yam li tej lus uas nyob hauv thooj ntawv uas ntaus cim kaw cia lawd rau nej. Thaum luag muab rau ib tug uas txawj nyeem thiab hais tias, “Nyeem no saib,” los tus ntawd yuav hais tias, “Kuv nyeem tsis tau, vim yog ntaus cim kaw lawm.” ¹²Thaum luag muab rau ib tug uas tsis txawj nyeem thiab hais tias, “Nyeem no saib,” nws kuj hais tias, “Kuv tsis txawj nyeem ntawv.”

¹³Tus Tswv hais tias, “Cov neeg no
lam tuaj ze kuv ntawm lub ncauj,
thiab hwm kuv ntawm daim tawv ncauj
tiamsis lawv lub siab nyob deb kuv,
thiab lawv tsuas yog hwm kuv
raws li neeg tej kevcai uas cim tau.
¹⁴Vim li no kuv yuav ua txujci phimhwj
rau haiv neeg no dua,
yog yam uas phimhwj kawg
thiab xav tsis thoob.
Tej neeg uas muaj tswvyim lub tswvyim
yuav puam tsuaj mus,
thiab tej neeg txawj ntse txojkev txawj ntse
yuav ploj tag.”
¹⁵Cov uas muab tej haujlwm uas
nws npaj tseg zais tsis qhia Yawmsaub,
yuav raug txom nyem lauj!
Lawv ua haujlwm hauv qhov tsaus ntuj
thiab lawv hais tias,
“Leejtwg yuav pom peb?
Leejtwg yuav paub?”
¹⁶Nej ntxeev ib puas tsav yam.
Yuav suav tias tus Kws puab laujkaub av
tsuas zoo li av nplaum xwb lov?
Thiab yam uas tsim tau los
yuav hais rau tus uas tsim tias,
“Nws tsis tau tsim kuv,” no lov?
Thiab yam uas muab puab tau los
yuav hais rau tus uas puab tias,
“Nws tsis txawj dabtsi li,” no lov?

Muaj vam rau yav tom hauv ntej

¹⁷Tsis yog tshuav tsis ntev lov
uas Lenpanoo yuav ciaj ua teb ntsu qoob,
thiab tej teb ntsu qoob yuav ciaj ua hav zoov?
¹⁸Hnub ntawd cov neeg lag ntseg
yuav hnov tej lus hauv thooj ntawv,
thiab cov neeg dig muag
yuav pom kev hauv qhov tsaus ntuj
thiab qhov tsaus dub nciab.
¹⁹Cov uas tsis muab hlob yuav rov
zoo siab xyiv fab rau hauv Yawmsaub,
cov neeg uas pluag yuav zoo siab
rau hauv tus Dawb Huv hauv cov Yixayee.
²⁰Cov uas ua nruj ua tsiv yuav ploj mus,
cov neeg thuam luag yuav tsis muaj lawm,
thiab txhua tus uas nrhiav ntshis ua phem
yuav raug muab txiav pov tseg,
²¹yog cov uas hais lus qhau luag cai,
thiab ua hmab ua hlua cuab
tus uas tu plaub ntawm rooj loog,⚓
thiab hais tsis tseeb
qhau tus uas tsis txhaum cai.

²²Vim li no, Yawmsaub uas txhiv Aplahas
hais li no txog Yakhauj caj ces tias,
“Yakhauj yuav tsis poob ntsej muag
dua li lawm,
thiab lawv lub plhu yuav tsis ntshaus
dua li lawm.
²³Thaum lawv pom lawv tej tub ki
uas kuv txhais tes ua hauv lawv nruab nrab,
lawv yuav xam pom tias
kuv lub npe dawb huv.
Lawv yuav hwm
Yakhauj tug Tswv uas Dawb Huv,
thiab paub ntshai Yixayee tus Vajtswv.
²⁴Cov uas lub siab yuam kev
yuav txawj nkag siab,
thiab cov uas yws tuj taws
yuav yeem txais kev qhuab qhia.”