1

¹Kuv yog Paulus tus uas yog Yexus Khetos ib tug timthawj raws li Vajtswv lub siab nyiam; Vajtswv txib kuv mus qhia Txojmoo Zoo uas Vajtswv tau coglus tseg hais tias tus uas nrog Yexus Khetos sib raug zoo yuav tau txojsia. ²Timautes, tus tub uas kuv hlub.
Thov Vajtswv tus uas yog peb leej Txiv thiab peb tus Tswv Yexus Khetos foom koob hmoov rau koj thiab pab kom koj tau nyob kaj siab lug.

Lus ua Tsaug thiab Lus Txhawb Zog

³Timautes, kuv yog tus uas muab siab rau ua Vajtswv tes haujlwm ib yam li kuv cov yawgkoob ibtxwm ua los lawm; txhua zaug uas kuv thov Vajtswv pab koj, tsis hais nruab hnub lossis hmo ntuj, kuv yeej nco ntsoov ua Vajtswv tsaug. ⁴Kuv tseem nco ntsoov thaum wb yuav sib ncaim, koj quaj quaj. Nimno kuv nco koj thiab xav pom koj heev. Yog kuv pom koj lawm yuav zoo kuv siab kawg li. ⁵Kuv nco ntsoov hais tias koj muab siab rau ntseeg ib yam li koj pog Lau-is thiab koj niam Enikes. Nimno kuv cia siab hais tias koj tseem muab siab rau ntseeg, ⁶kuv thiaj hais rau koj hais tias koj yuav tsum siv lub tswvyim uas Vajtswv pub rau koj thaum kuv tsa tes rau koj thiab xa koj mus ua haujlwm. ⁷Rau qhov tus Ntsujplig uas Vajtswv pub rau peb yeej xav kom peb muaj lub siab tawv. Nws yuav ua haujlwm rau hauv peb lub siab kom peb muaj hwjchim, kom muaj lub siab hlub lwm tus, thiab kom peb paub tswj peb lub siab.
⁸Koj tsis txhob txajmuag ua timkhawv txog peb tus Tswv zaj thiab tsis txhob txajmuag rau qhov uas kuv raug kaw rau hauv tsev lojcuj. Kuv raug kaw li no twb yog vim kuv ua Yexus Khetos tes haujlwm. Koj yuav tsum ua siab ntev qhia Txojmoo Zoo, txawm yog koj raug kev txomnyem npaum li cas los Vajtswv yeej yuav txhawb koj lub zog kom koj ua tau. ⁹Vajtswv zam txim rau peb, thiab nws xaiv peb los ua nws haivneeg; nws ua li ntawd yog nws hlub peb thiab yog nws pom zoo ua, tsis yog vim peb ua haujlwm zoo. Thaum tseem tsis tau tsim ntuj tsim teb, Vajtswv twb muab txoj koob hmoov ntawd rau peb txhua tus uas ntseeg Yexus Khetos lawm. ¹⁰Nimno peb twb pom txoj koob hmoov ntawd lawm, rau qhov Yexus Khetos tus uas yog peb tus Cawmseej twb los yug rau hauv lub ntiajteb no lawm. Nws rhuav txojkev tuag lub hwjchim thiab nws qhia Txojmoo Zoo rau peb, peb thiaj paub hais tias muaj txojsia uas ntev dhawv mus ibtxhis.
¹¹Vajtswv tsa kuv ua ib tug timthawj thiab ua ib tug xibhwb mus qhia Txojmoo Zoo; ¹²yog li ntawd, kuv thiaj raug kev txomnyem li no. Txawm li ntawd los kuv tsis txajmuag rau leejtwg li, rau qhov kuv paub hais tias tus uas kuv cia siab rau yog tus uas muaj hwjchim. Thiab kuv paub hais tias nws yeej yuav tsomkwm tej uas nws muab tso rau kuv lawm mus txog hnub uas Yexus rov qab los. ¹³Koj yuav tsum muab tej lus tseeb uas kuv qhia rau koj lawm los ua yamntxwv thiab muab siab rau ntseeg thiab hlub lwm tus. Rau qhov Vajtswv xav kom peb txhua tus uas nrog Yexus Khetos sib raug zoo lawm muaj lub siab zoo li ntawd. ¹⁴Koj yuav tsum saib tej uas Vajtswv muab tso rau koj lawm zoo zoo, tsis txhob pub ploj li. Vaj Ntsujplig tus Dawbhuv uas nyob hauv peb txhua tus lub siab yuav pab koj saib tej ntawd.
¹⁵Koj twb paub lawm hais tias cov neeg uas nyob hauv lub xeev Axias Yau tau tso kuv tseg lawm. Cov neeg ntawd muaj ib tug hu ua Finkelus thiab ib tug hu ua Hemaunkenes. ¹⁶Kuv thov Vajtswv hlub Aunexifaulus tsev neeg, rau qhov nws txhawb kuv lub zog ntau zaus los lawm. Nws tsis txajmuag rau qhov uas kuv raug kaw rau hauv tsev lojcuj li. ¹⁷Thaum nws tuaj txog hauv lub nroog Loos, nws kub siab los nrhiav kuv rau txhua qhov, nws thiaj li nrhiav tau kuv. Koj twb paub lawm hais tias thaum kuv tseem nyob hauv lub nroog Efexus, nws tau pab kuv ntau yam. ¹⁸Kuv thov Vajtswv hais tias thaum txog hnub Vajtswv txiav txim, thov Vajtswv hlub nws thiab.

1

¹Povlauj, uas yog Yexus Khetos tus tubtxib raws li Vajtswv lub siab nyiam rau tej lus cog tseg uas muaj txojsia hauv Yexus Khetos, ²hais mus rau kuv tus tub Timaute uas kuv hlub. Thov txojkev hlub, txojkev khuvleej thiab txojkev siab tus ntawm leej Txiv Vajtswv thiab ntawm Yexus Khetos uas yog peb tus Tswv nrog nraim koj.

Muaj siab xib rau txoj xov zoo

³Kuv ua Vajtswv tsaug tus uas kuv muaj lub siab dawb paug ua koom tu ib yam li kuv tej poj koob yawm txwv ua, rau thaum kuv nco txog koj hauv kuv tej lus thov nruab hnub hmo ntuj. ⁴Thaum kuv nco txog koj tej kua muag, kuv xav pom koj thiaj ua rau kuv zoo siab kawg. ⁵Kuv nco txog koj txojkev ntseeg tuaj nruab siab, yog txojkev ntseeg uas koj tais Lau‑i xub muaj thiab koj niam Yuni muaj, mas nimno kuv ntseeg tias kuj muaj nyob hauv koj thiab. ⁶Vim li no kuv thiaj xav hais dua ib zaug rau koj tias yam uas Vajtswv pub rau koj rau thaum kuv muab tes npuab, koj cia li ua kom cig hlob tuaj, ⁷vim Vajtswv tsis pub lub siab ntshai rau peb tiamsis pub lub siab muaj hwjchim thiab kev hlub thiab kev tswj yus tus kheej rau peb.
⁸Vim li no koj tsis txhob txaj muag ua timkhawv txog peb tus Tswv thiab tsis txhob txaj muag txog kuv uas raug kaw vim yog ua nws tes haujlwm, tiamsis cia li koom nrog kuv vam khom Vajtswv lub hwjchim thev kev txom nyem rau txoj xov zoo. ⁹Vajtswv yog tus cawm peb dim thiab hu peb ntawm txojkev dawb huv, tsis yog raws li tej haujlwm uas peb ua tiamsis raws li Vajtswv xav tseg lawm, thiab raws li nws txojkev hlub uas nws pub rau peb hauv Yexus Khetos ua ntej chiv keeb thaum ub los ¹⁰thiab nimno ua tshwm kom pom tseeb ntawm qhov uas peb tus Cawmseej Yexus Khetos tshwm los, yog tus uas rhuav tshem txojkev tuag kom ploj tag thiab ua kom txojsia thiab qhov uas tsis txawj tuag tshwm los ntawm txoj xov zoo. ¹¹Txoj xov zoo ntawd mas kuv raug tsa ua tus tshaj tawm thiab ua tus tubtxib thiab ua tus qhuab qhia, ¹²kuv thiaj raug kev txom nyem li no. Tiamsis kuv tsis txaj muag vim tias kuv paub tus uas kuv ntseeg thiab ntseeg ruaj tias nws muaj peevxwm tsom kwm yam uas kuv muab cob rau nws⚓ mus txog hnub uas teem cia. ¹³Cia li xyaum raws li tej lus qhia raug cai uas koj tau hnov ntawm kuv thiab nyob hauv txojkev ntseeg thiab txojkev hlub uas muaj hauv Yexus Khetos. ¹⁴Cia Vaj Ntsuj Plig dawb huv uas nyob hauv peb pab koj tuav rawv yam tsim txiaj uas muab cob rau koj lawd.
¹⁵Koj kuj paub tias txhua tus uas nyob hauv lub xeev Axia kuj ncaim kuv mus tag lawm, hauv lawv cov ntawd kuj muaj Fikela thiab Hawmaukene. ¹⁶Thov tus Tswv khuvleej Aunexifaula tsev neeg rau qhov nws pheej txhawb kuv lub zog. Nws tsis txaj muag rau kuv txoj saw hlau li, ¹⁷vim thaum nws tuaj txog lub nroog Loos nws siv zog nrhiav kuv kom ntsib li. ¹⁸Thov tus Tswv pub kom nws tau txais tus Tswv txojkev khuvleej rau hnub kawg. Nws tu kuv hauv lub moos Efexau npaum li cas nej kuj paub lawm.