49

Yawmsaub tug qhev

¹Tej tebchaws lawv ntug havtxwv 'e,
ca le noog kuv has,
mej cov tuabneeg kws nyob deb 'e,
ca tig ntsej noog.
Yawmsaub hu kuv txwj thaus nruab thab lug,
nwg tis kuv npe txwj thaus kuv nyob huv kuv nam lub plaab lug.
²Nwg ua kuv lub qhov ncauj ntse le raab ntaaj,
nwg muab kuv nraim rua huv nwg txhais teg tug duab ntxoo.
Nwg muab kuv ua raab xub kws muab txhuam zoo zoo lawm,
nwg muab kuv zais rua huv nwg lub raaj xub.
³Nwg has rua kuv tas,
“Yixayee, koj yog kuv tug qhev,
kuv yuav tau koob meej ntawm koj.”
⁴Tassws kuv has tas,
“Kuv ua num khwv dawb dawb xwb,
kuv nkim kuv tug zug do do qhuav qhawv xwb.
Tassws kuv txujcai nyob ntawm Yawmsaub,
hab kuv tug nqe zug nyob ntawm kuv tug Vaajtswv.”

⁵Yawmsaub yog tug kws puab kuv huv lub plaab lug ua nwg tug qhev
hab coj Yakhauj rov lug cuag nwg
hab qaws Yixayee sau zog ua ke lug cuag nwg,
vem yog kuv tau koob meej ntawm Yawmsaub lub qhov muag,
hab kuv tug Vaajtswv yog kuv tug daag tug zug.
⁶Nwg has tas, “Qhov kws koj yuav
ua kuv tug qhev es tsaa Yakhauj cov xeem sawv
hab pub cov kws tseed tshuav nyob huv Yixayee
rov tau zoo le qub yog ib qho miv miv xwb.
Kuv yuav pub koj ua lub teeb kws ci rua ib tsoom tebchaws,
sub kuv txujkev cawm dim txhad moog txug qaab ntuj kawg.”

⁷Yawmsaub kws yog tug txhwv Yixayee
hab yog tug Dawb Huv huv cov Yixayee,
has le nuav rua tug kws ib tsoom tebchaws saib tsw taug hab ntxub kawg,
yog cov tuabneeg kws kaav le tub qhe, has tas,
“Tej vaajntxwv yuav tsaa muag saib hab sawv tseeg,
cov thawj yuav pum hab yuav pe,
vem Yawmsaub yog tug kws ua ncaaj,
nwg yog tug Dawb Huv huv cov Yixayee,
yog tug kws xaiv koj lawm.”

Yixayee yuav rov zoo le qub

⁸Yawmsaub has le nuav tas,
“Lub swjhawm kws kuv hlub, kuv yuav teb koj,
nub kws cawm dim, kuv yuav paab koj.
Kuv yuav tsom kwm koj
hab pub koj ua lu lug cog tseg rua ib tsoom tuabneeg,
sub txhad le tuav tau lub tebchaws nyob ruaj
hab rov muab tej teb kws nyob do cuas faib ua qub txeeg qub teg,
⁹hab has rua cov kws raug kaw tas, ‘Ca le tawm lug lauj,’
hab has rua cov kws nyob huv qhov tsaus ntuj tas,
‘Ca le tshwm plawg lug.’
Puab yuav nrhav noj ntawm tej ntug kev,
hab sau tej roob do hau yuav ua puab lub tshaav zaub.
¹⁰Puab yuav tsw tshaib tsw nqhes,
tej cua kub hab lub nub yuav tsw hlawv puab
tsua qhov tug kws khuvleej puab yuav coj puab,
nwg yuav coj puab taug kev ze tej qhov dej txhawv.
¹¹Kuv yuav muab kuv tej roob huvsw ua txujkev,
kuv tej nam kev yuav raug muab tswm tsaa ca.
¹²Saib maj, puab yuav lug deb deb lug,
saib maj, puab lug saab peg hab saab nub poob,
hab puab lug tebchaws Xi‑ene⚓ lug.”

¹³Lub ntuj 'e, ca le hu nkauj zoo sab xyiv faab,
lub nplajteb 'e, ca le xyiv faab kawg,
tej roob 'e, ca le tsaa suab hu nkauj,
tsua qhov Yawmsaub nplig nwg haiv tuabneeg lub sab,
hab yuav taab ncuab nwg cov tuabneeg
kws raug kev txom nyem nyuaj sab.

¹⁴Tassws Xi‑oo has tas, “Yawmsaub tso kuv tseg lawm,
kuv tug Tswv nov qaab kuv lawm.”
¹⁵“Tug quaspuj yuav nov qaab nwg tug mivnyuas kws tseed noj mig,
hab tsw taab ncuab tug tub kws nwg yug tau hab lov?
Txawm yog puab tseed nov qaab tau
los kuv yuav tsw nov qaab koj.
¹⁶Saib maj, kuv sais koj rua huv kuv xwb teg,
koj lub ntsaa loog nyob rawv ntawm kuv xubndag.
¹⁷Cov kws tswm khu koj kuj kov yeej cov kws ua kuas puam tsuaj,⚓
cov kws ua rua koj raug tso tseg nyob do cuas
kuj tswv ntawm koj moog lawm.
¹⁸Ca le tsaa muag saib ib ncig hab pum,
puab suavdawg tuaj txoos ua ke, puab tuaj cuag koj.”
Yawmsaub has tas, “Kuv muaj txujsa nyob pum,
koj yuav muab puab lug coj ib yaam le coj tej npauj nyaj npauj kub,
koj yuav muab puab coj ib yaam le tug nkauj nyaab coj npauj.

¹⁹“Txawm yog koj tej chaw raug muab tso tseg nyob do cuas
hab koj lub tebchaws raug lamswm taag,
los nwgnuav koj yeej yuav nqaim dhau
tsw txaus koj cov tuabneeg nyob,
hab cov kws nqog koj yuav nyob deb deb lawm.
²⁰Cov mivnyuas kws yug rua thaus koj quaj ntsuag poob tebchaws
yuav has rua koj lub qhov ntsej tas,
‘Lub chaw nuav nqaim dhau tsw txaus kuv nyob,
ca le nrhav chaw rua kuv nyob.’
²¹Thaus hov koj yuav has huv lub sab tas,
‘Leejtwg yug cov tuabneeg nuav rua kuv?
Kuv cov mivnyuas tuag hab kuv xeeb tsw taug mivnyuas lawm.
Kuv raug poob tebchaws hab raug ntab tswv taag lawm,
mas leejtwg tu cov mivnyuas nuav?
Saib maj kuv raug muab tso tseg nyob tuab leeg,
es cov nuav tawm hovtwg lug?’ ”

²²Vaajtswv Yawmsaub has le nuav tas,
“Kuv yuav tsaa kuv txhais teg cu rua ib tsoom tebchaws,
hab tsaa kuv tug chij rua ib tsoom tuabneeg,
mas puab yuav puag koj cov tub rua ntawm xubndag lug,
hab yuav rws koj cov ntxhais sau xub pwg lug.
²³Tej vaajntxwv yuav ua koj txwv tshab,
hab tej puj vaaj yuav ua koj nam tshab tu koj.
Puab cov nuav yuav khoov ntshws rua huv aav pe koj,
puab yuav yaim moov aav ntawm koj kwtaw.
Tes koj txhad paub tas kuv yog Yawmsaub.
Cov kws tog ntsoov kuv yuav tsw raug txaaj muag.”

²⁴Yuav txeeb tau tej kws tug muaj zug heev lws tau rov lug lov?
Lossws cawm cov kws tug limham ndais ntuj nteg tau kuas dim lov?
²⁵Yawmsaub yeej has le nuav tas,
“Txawm yog cov kws raug tug muaj zug heev nteg lawm
los yuav muab txeeb tau rov lug,
hab tej kws tug limham ndais ntuj lws tau lawm
los yuav cawm kuas dim tau rov lug,
tsua qhov kuv yuav tawm tsaam cov kws tawm tsaam koj,
hab kuv yuav cawm koj tej tub ki kuas dim.
²⁶Kuv yuav ua kuas cov kws quab yuam koj rov noj puab cev nqaj,
hab haus puab tej ntshaav qaug ib yaam le qaug cawv txwv maab.
Mas ib tsoom tuabneeg txhad paub tas kuv yog Yawmsaub
yog koj tug cawmseej, yog tug kws txhwv koj
hab yog Yakhauj tug Vaajtswv kws muaj fwjchim.”

49

Tus TSWV Tus Tubtxib

¹Txhua lub tebchaws uas nyob
deb, cia li mloog kuv hais.
Cov neeg uas nyob deb, tus TSWV twb xaiv kuv
thaum tseem tsis tau yug kuv,
thiab nws yeej tis kuv lub npe thaum kuv tseem nyob
hauv kuv niam plab lawm.
²Nws ua rau kuv tej lus ntse ib yam li
hniav ntaj, nws muab nws txhais tes thaiv kuv.
Nws ua rau kuv zoo ib yam li xibxub uas ntse heev
thiab npaj rawv tos tua lawm xwb.
³Nws hais rau kuv tias, “Cov Yixalayees,
nej yog kuv cov tubtxib, nej yuav ua
rau kuv tau koob meej.”

⁴Kuv hais tias, “Kuv twb ua haujlwm
hnyav heev tiamsis tsis muaj qabhau!
Kuv twb siv kuv lub zog tiamsis tsis
muaj dabtsi tiav.”
Txawm li ntawd los kuv tseem tso
siab rau tus TSWV,
thiab kuv tus TSWV yuav coj nqi zog los rau kuv.

⁵Tus TSWV twb tsa kuv ua nws tus tubtxib
thaum kuv tseem nyob hauv kuv niam plab,
tus TSWV tsa kuv ua nws tus tubtxib
coj nws haivneeg Yixalayees
uas tawg ua sab ua sua lawm rov qab los cuag nws.
Tus TSWV yuav pub kuv tau ntsejmuag,
thiab Vajtswv yog kuv lub zog,
⁶tus TSWV hais rau kuv tias,
“Kuv tus tubtxib, kuv muab tes
haujlwm tseemceeb dua yav tas los lawm rau koj ua;
koj yuav ua rau cov Yixalayees uas
tseem seem nyob rov vammeej tshaj qub.
Tsis yog li ntawd xwb, kuv tseem
yuav cia koj ua lub teeb ci
rau txhua haivneeg kom neeg ntiajteb thiaj yuav dim.”

⁷Tus Vajtswv uas dawbhuv uas cawm
cov Yixalayees dim,
hais rau tus neeg uas raug luag thuam
thiab tus uas raug lwm haivneeg tej nomtswv
cov tubtxib ntxub hais tias,
“Tej vajntxwv yuav pom koj thiab sawv hawm koj,
cov nomtswv yuav pom koj thiab khoov ntshis hawm koj,
rau qhov tus TSWV uas yog cov
Yixalayees tus Vajtswv uas dawbhuv,
nws yog tus ncaj ncees, nws twb xaiv koj cia lawm.”

Txhim Kho Lub Nroog Yeluxalees Dua

⁸Tus TSWV hais rau nws haivneeg hais tias,
“Thaum txog lub sijhawm uas kuv
cawm nej, kuv yuav hlub nej,
kuv yuav tsomkwm nej, kuv yuav teb nej tej lus thov
thiab nej yuav yog kuv lo lus cog tseg
rau lwm haivneeg.
Kuv yuav cia nej rov mus nyob hauv
nej lub tebchaws uas nimno fab hnyo.
⁹Kuv yuav hais rau cov neeg uas raug luag ntes hais tias,
‘Cia li tawm mus!’
thiab hais rau cov neeg uas nyob
hauv qhov tsaus ntuj nti hais tias,
‘Cia li los rau ntawm qhov pom kev!’
Lawv yuav nrhiav noj saum tej roob ib yam li tej yaj;
¹⁰lawv yuav tsis raug kev tshaib
kev nqhis.
Lub hnub thiab tej cua sov tom tiaj
suabpuam yuav tsis kub lawv,
vim tus uas hlub lawv yuav coj lawv kev mus.
Nws yuav coj lawv mus rau ntawm
qhov uas muaj dej txhawv.

¹¹“Kuv yuav rhawv ib txoj niamkev
saum tej roob rau kuv haivneeg taug.
¹²Kuv haivneeg yuav los deb deb los,
lawv yuav los sab qaumteb,
sab hnubpoob thiab los hauv lub nroog Axavas
uas nyob sab qabteb los.”

¹³Lub ntuj, cia li hu nkauj!
Lub ntiajteb, cia li qw zoo siab!
Tej toj roob hauv pes, cia li tsa suab hu nkauj!
Tus TSWV yuav nplig nws haivneeg siab;
nws yuav hlub nws haivneeg uas raug kev txomnyem.

¹⁴Tiamsis cov neeg uas nyob hauv lub
nroog Yeluxalees hais tias,
“Tus TSWV twb tso peb tseg lawm!
Peb tus TSWV tsis nco qab peb lawm.”
¹⁵Yog li ntawd, tus TSWV teb hais tias,
“Puas muaj ib leej niam twg uas tsis
nco qab nws tus menyuam mos,
thiab tsis hlub tus menyuam uas nws yug?
Txawm yog leej niam tsis nco qab
nws tus menyuam los xij,
kuv yuav nco ntsoov nej thiab tsis
tso nej tseg ib zaug li.
¹⁶Yeluxalees, kuv yeej nco ntsoov koj!
Kuv muab koj lub npe sau rau hauv kuv ob lub xibteg,
kuv saib ntsoov koj mus li.

¹⁷“Tshuav tsis ntev cov neeg uas
yuav txhim kho lub nroog Yeluxalees twb yuav los
thiab cov neeg uas rhuav tshem koj
yuav khiav mus.
¹⁸Cia li tsa qhovmuag ntsia ibncig saib tej xwm ntawd,
koj haivneeg tabtom sib sau ua ke,
lawv yuav los cuag koj.
Tus TSWV hais tias, kuv yog tus uas muaj sia nyob,
koj yuav zoo siab rau koj haivneeg ib yam li tus nkauj nyab
zoo siab rau nws tej npauj nyiag npauj kub.

¹⁹“Nej lub tebchaws raug puastsuaj nyob do cuas cia,
nimno lub tebchaws yuav tsis txaus
cov neeg uas tabtom los ntawd nyob.
Thiab cov neeg uas muab koj ua puas tas lawm,
yuav raug luag raws kom khiav mus deb heev.
²⁰Muaj ib hnub nej cov menyuam uas
yug thaum nej raug luag ntes mus,
yuav hais rau nej tias, ‘Lub tebchaws no nqaim rau peb heev,
peb xav kom tau lub tebchaws uas
dav dua lub no thiaj txaus peb nyob!’
²¹Ces koj yuav xav hais tias,
‘Leejtwg yug cov menyuam no rau kuv?
Kuv tej menyuam twb tuag tas thiab
kuv muaj tsis taus menyuam lawm.
Kuv raug luag ntes coj mus nyob rau
lwm lub tebchaws uas deb heev,
tiamsis leejtwg tu cov menyuam no loj hlob?
Kuv twb nyob do cuas cia lawm,
es tej menyuam no tseem los qhov twg los thiab?’ ”

²²Tus TSWV uas muaj hwjchim loj kawg nkaus hais rau nws haivneeg hais tias,
“Kuv yuav co tes rau txhua haivneeg,
thiab qhia rau cov neeg sawvdaws kom puag nej cov tub
ntawm lawv xubntiag thiab ris nej cov ntxhais los tsev.
²³Tej vajntxwv yuav zoo li nej txiv,
tej poj vajntxwv yuav zoo li nej niam.
Lawv yuav khoov ntshis hawm nej
thiab txo hwjchim qis kawg nkaus li.
Ces nej thiaj yuav paub hais tias kuv yog tus TSWV;
cov neeg uas tos rawv kuv pab yuav
tsis nkim lawv lub zog li.”

²⁴Nej puas muaj peevxwm mus muab
tej khoom uas cov tubrog huab tau los?
nej puas muaj peevxwm mus tso cov
neeg uas tus neeg limhiam ntes lawm?

²⁵Tus TSWV teb hais tias,
“Txawm yog cov neeg uas raug cov
tubrog ntes los yuav coj mus,
thiab tej khoom uas cov neeg
limhiam huab tau los yuav coj mus.
Kuv yuav tawmtsam cov neeg uas
tawmtsam nej,
thiab kuv yuav cawm nej cov
menyuam kom dim.
²⁶Kuv yuav ua kom cov neeg uas
tsimtxom nej rov sib tua
ua lwj ua liam ib yam li cov neeg qaug cawv.
Ces thaum ntawd txhua haivneeg
thiaj paub hais tias
kuv yog tus TSWV tus uas yog nej tus Cawmseej
thiab tus uas txhiv nej dim;
kuv yog Yakhauj tus Vajtswv tus uas
muaj hwjchim loj kawg nkaus.”