7

Nathas Cev Vajtswv Lus Rau Daviv

(1 Xwmtxheej Vajntxwv 17.1-15)

¹Vajntxwv Daviv nyob ruaj khov hauv nws lub loog, thiab tus TSWV tsomkwm tsis pub yeebncuab ua phem rau nws. ²Vajntxwv hais rau Nathas tus uas cev Vajtswv lus hais tias, “Koj saib, kuv nyob hauv lub tsev uas muab ntoo ciab ua, tiamsis Vajtswv lub Phijxab nyob hauv lub tsevntaub xwb!”
³Nathas teb hais tias, “Koj yuav ua dabtsi koj cia li ua, rau qhov tus TSWV nrog nraim koj.” ⁴Tiamsis hmo ntawd tus TSWV hais rau Nathas hais tias, ⁵“Koj cia li coj kuv tej lus no mus hais rau kuv tus tubtxib Daviv hais tias, ‘Koj tsis yog tus yuav ua lub tuamtsev rau kuv. ⁶Txij thaum kuv tso cov Yixalayees tawm nram tebchaws Iziv los txog niaj hnub no, kuv yeej tsis nyob hauv lub tuamtsev; kuv nyob hauv lub tsevntaub uas muab kwv tshais chaw tas mus li xwb. ⁷Thaum kuv nrog cov Yixalayees taug kev ntawd, kuv yeej tsis tau nug cov thawjcoj uas kuv tsa ntawd hais tias, vim li cas nej tsis muab ntoo ciab los ua lub tuamtsev rau kuv?’
⁸“Koj cia li mus hais rau kuv tus tub txib Daviv hais tias, tus TSWV uas muaj hwjchim loj kawg nkaus hais rau nws hais tias, ‘Koj yeej yog tus tub yug yaj uas nyob tom tej tiaj nrag xwb. Kuv coj koj los thiab tsa koj ua tus kav kuv haivneeg Yixalayees. ⁹Txhua qhov uas koj mus kuv yeej nrog nraim koj, thiab kuv twb ua rau koj tej yeebncuab swb koj tas lawm. Kuv yuav tsa koj ua ib tug thawjcoj uas muaj meejmom tshaj plaws nyob hauv lub ntiajteb no. ¹⁰Kuv xaiv ib thaj chaw rau kuv haivneeg Yixalayees nyob, kom lawv thiaj muaj ib thaj chaw nyob ua lawv tug, thiaj yuav tsis muaj leejtwg tuaj tsimtxom lawv; cov neeg siab phem thiaj yuav tsis tsimtxom lawv ntxiv li thaum ub lawm, ¹¹txij thaum lawv los nyob hauv lub tebchaws no, kuv tsa cov thawjcoj los kav kuv haivneeg Yixalayees; kuv yuav pab kom koj dim ntawm koj cov yeebncuab thiab kuv yuav pub kom koj muaj xeebntxwv huamvam coob heev. ¹²Thaum koj tuag, luag yuav coj koj mus faus nrog koj cov yawgkoob, kuv yuav tsa koj cov tub ib tug los ua vajntxwv hloov koj, thiab nws yuav tuav lub tebchaws nyob ruaj khov. ¹³Nws yuav ua lub tuamtsev rau kuv, thiab kuv yuav pub nws cajces tau ua vajntxwv mus ibtxhis li. ¹⁴Kuv yuav ua nws txiv thiab nws yuav ua kuv tus tub. Thaum nws ua txhaum, kuv yuav rau txim rau nws ib yam li leej txiv rau txim rau nws tus tub. ¹⁵Tiamsis kuv yuav tsis tshem kuv txojkev pab tawm ntawm nws ib yam li kuv tshem tawm ntawm Xa-ules, tus uas kuv muab txo kom koj thiaj tau ua vajntxwv. ¹⁶Koj yuav muaj xeebntxwv huamvam coob, thiab kuv yuav pub koj lub tebchaws nyob ruaj khov mus ibtxhis. Koj tus nom yuav tsis poob mus ib simneej li.’ ”
¹⁷Nathas qhia txhua yam no rau Daviv raws li Vajtswv hais rau Nathas lawm.

Daviv ua Vajtswv Tsaug

(1 Xwmtxheej Vajntxwv 17.16-27)

¹⁸Vajntxwv Daviv mus rau hauv tus TSWV lub Tsevntaub sib ntsib, nws zaum tsaws thov Vajtswv hais tias, “Tus TSWV uas kav txhua tsav yam, kuv thiab kuv tsevneeg twb tsis tsimnyog tau tej uas koj ua rau kuv no li. ¹⁹Txawm yog kuv tau tej ntawd los tus TSWV uas kav txhua tsav yam, koj tseem pub kuv ntau tshaj tej ntawd thiab; koj tau coglus tseg hais tias koj yuav pub kuv cov xeebntxwv ua vajntxwv mus lawm yav tom ntej. Tus TSWV uas kav txhua tsav yam, koj tseem cia ib tug neeg pom tej no thiab! ²⁰Kuv tsis paub yuav hais li cas rau koj ntxiv lawm. Koj yeej paub hais tias kuv yog koj tus tubtxib. ²¹Txhua yam tseemceeb uas koj tau qhia rau kuv tas los no twb yog koj ua raws li koj pom zoo thiab koj npaj tseg lawm. ²²Tus TSWV uas kav txhua tsav yam, koj yog tus uas muaj hwjchim loj kawg nkaus! Yeej tsis muaj leejtwg yuav zoo npaum li koj; peb tsuas paub koj tib leeg thiaj yog Vajtswv xwb. ²³Tsis muaj ib haivneeg twg uas nyob hauv lub ntiajteb no yuav zoo li haivneeg Yixalayees uas koj tau cawm dim ntawm txojkev ua luag qhev los ua koj haivneeg. Tej txujci loj thiab tseemceeb uas koj ua pab lawv, tau ua rau koj lub koob meej nrov ncha moo lug thoob plaws lub ntiajteb no. Koj raws txhua haivneeg tawm thiab tshem lawv tej mlom ua ntu zus mus ua koj haivneeg ntej, cov neeg uas koj coj nram tebchaws Iziv los yeej yog koj tug. ²⁴Tus TSWV, koj yeej xaiv haivneeg Yixalayees ua koj tug mus ibtxhis, thiab koj yeej yog lawv tus Vajtswv.
²⁵“Tus TSWV uas yog Vajtswv, nimno thov koj cia li ua kom tiav raws li koj tau coglus tseg rau kuv thiab kuv cov xeebntxwv, thiab cia li ua raws li koj hais tias koj yuav ua ntawd ntag. ²⁶Koj lub koob meej thiaj yuav nrov ncha moo lug mus ibtxhis, thiab tej neeg sawvdaws yuav hais tias, ‘Tus TSWV uas muaj hwjchim loj kawg nkaus yog tus Vajtswv uas kav haivneeg Yixalayees.’ Thiab koj yuav tsa kuv cajces ua vajntxwv mus ibtxhis li. ²⁷Tus TSWV uas muaj hwjchim loj kawg nkaus yog haivneeg Yixalayees tus Vajtswv! Kuv muaj cuabkav tsa ncauj thov koj li no, rau qhov koj tau qhia txhua yam rau kuv uas yog koj tus tubtxib, thiab koj tau hais rau kuv hais tias koj yuav tsa kuv cov xeebntxwv ua vajntxwv.
²⁸“Tus TSWV uas kav txhua tsav yam, koj yog Vajtswv tiag; koj yeej ibtxwm ua raws li koj tej lus cog tseg, thiab koj tau coglus zoo kawg nkaus rau kuv. ²⁹Kuv thov koj foom koob hmoov rau kuv cov xeebntxwv kom lawv muab siab npuab koj. Koj yog tus TSWV uas kav txhua tsav yam, koj tau coglus li no mas kuv cov xeebntxwv yuav tau koj tej koob hmoov mus ibtxhis.”

7

Yawmsaub cog lus rau Davi

(1VKk. 17:1-15)

¹Thaum vajntxwv nyob ruaj hauv nws lub vaj tse, thiab Yawmsaub ua rau nws cov yeeb ncuab uas nyob ib ncig tsis tuaj ua rog rau nws lawm, ²vajntxwv hais rau Nathas uas ua xibhwb cev Vajtswv lus tias, “Saib maj, kuv nyob hauv lub tsev uas xuas ntoo ciab ua hos Vajtswv lub phij xab nyob hauv lub tsev ntaub xwb.” ³Mas Nathas hais rau vajntxwv tias, “Koj cia li mus ua txhua yam uas koj lub siab xav ua, rau qhov Yawmsaub nrog nraim koj.”
⁴Tiamsis hmo ntawd Yawmsaub hais lus tuaj rau Nathas tias, ⁵“Cia li mus hais rau kuv tus qhev Davi tias, ‘Yawmsaub hais li no tias, Koj yuav ua ib lub tsev rau kuv nyob lov? ⁶Txij thaum kuv coj nej tawm hauv Iyi tebchaws los txog hnub no, kuv tsis txeev nyob hauv lub tsev, tiamsis kuv mus mus los los nyob hauv lub tsev ntaub xwb. ⁷Txhua qhov uas kuv nrog cov Yixayee sawvdaws mus mus los los, kuv puas tau hais ib lo lus rau cov Yixayee ib tug thawj twg uas kuv txib kom saib xyuas kuv haiv neeg Yixayee hais tias, “Ua cas nej tsis ua ib lub tsev ntoo ciab rau kuv?” ’
⁸“Vim li no nimno koj cia li hais rau kuv tus qhev Davi tias, ‘Yawmsaub uas muaj hwjchim loj kawg nkaus hais li no tias, Kuv coj koj tawm hauv lub tshav zaub uas koj yug yaj los ua tus thawj kav kuv haiv neeg Yixayee. ⁹Koj mus qhovtwg los kuv nrog nraim koj qhov ntawd, thiab kuv rhuav tshem koj cov yeeb ncuab huvsi ntawm koj lub xubntiag mus. Kuv yuav pub kom koj muaj koob meej ib yam li tej uas muaj koob meej loj hauv ntiajteb no. ¹⁰Kuv yuav tu ib lub chaw cia rau kuv haiv neeg Yixayee nyob, thiab kuv yuav muab lawv cog cia nyob ruaj khov rau hauv lub chaw uas yog lawv tug, tsis muaj leejtwg yuav tuaj zes lawv. Tej neeg limhiam ntais ntuj yuav tsis tuaj tsim txom lawv dua li lawm yam li yav tag los ¹¹txij thaum kuv tsa cov thawj kav kuv haiv neeg Yixayee. Kuv yuav ua rau koj tej yeeb ncuab sawvdaws tsis ua rog rau koj lawm. Dua li ntawd Yawmsaub hais rau koj tias Yawmsaub yuav pub kom koj muaj caj ces ua vaj mus li. ¹²Thaum koj hnub nyoog tag mus nrog koj tej poj koob yawm txwv nyob lawd, kuv yuav tsa ib tug tub uas koj yug los nyob koj chaw thiab kuv yuav tsa nws ua vajntxwv kav ruaj khov. ¹³Nws yog tus uas yuav ua lub tuam tsev rau kuv lub npe, thiab kuv yuav tsa nws lub zwm txwv nyob mus ib txhis. ¹⁴Kuv yuav ua nws leej txiv thiab nws yuav ua kuv tus tub. Thaum nws ua txhaum kuv yuav siv neeg rab nplawm qhuab qhia nws, thiab kuv yuav siv neeg nplawm nws. ¹⁵Tiamsis kuv yuav tsis muab kuv txojkev hlub uas ruaj khov rho ntawm nws mus yam li uas kuv tau rho ntawm Xa‑u uas kuv muab rhuav tshem ploj ntawm koj mus. ¹⁶Koj caj ces thiab qhov uas lawv ua vajntxwv yuav nyob ruaj khov rau ntawm kuv xubntiag mus ib txhis li. Koj lub zwm txwv yuav raug muab tsa nyob ruaj khov mus ib txhis.’ ” ¹⁷Nathas hais tej lus no huvsi rau Davi raws li tej uas nws ua yog toog.

Davi tej lus thov

(1VKk. 17:16-27)

¹⁸Ces vajntxwv Davi txawm nkag rau hauv lub tsev ntaub zaum ntawm Yawmsaub xubntiag mas hais tias, “Au Vajtswv Yawmsaub, kuv yog leejtwg, kuv caj ces yog leejtwg es koj coj kuv los txog txij no? ¹⁹Au Vajtswv Yawmsaub, tej no yog tej yam me me ntawm koj lub qhov muag xwb. Koj tseem hais tseg txog kuv uas yog koj tus qhev caj ces rau ntau xyoo tom hauv ntej. Au Vajtswv Yawmsaub koj tau qhia tej no rau neeg.⚓ ²⁰Kuv Davi yuav hais dabtsi ntxiv rau koj thiab? Au Vajtswv Yawmsaub, koj yeej paub kuv uas yog koj tus qhev. ²¹Twb yog vim koj saib rau koj tej lus cog tseg thiab vim yog raws li koj lub siab nyiam koj thiaj ua tej haujlwm loj no huvsi thiab qhia rau koj tus qhev paub. ²²Au Vajtswv Yawmsaub, koj loj kawg, tsis muaj leejtwg zoo cuag li koj. Dhau koj lawm yeej tsis muaj dua ib tug vajtswv txij li peb lub qhov ntsej tau hnov. ²³Haiv neeg twg hauv lub ntiajteb no yuav zoo thooj li koj haiv neeg Yixayee, uas Vajtswv mus txhiv los ua nws haiv neeg thiab ua rau nws lub npe nto moo lug? Nws ua tej yam uas loj kawg thiab txaus ntshai rau lub tebchaws tab meeg lawv, yog nws haiv neeg uas nws txhiv tawm hauv Iyi tebchaws thiab hauv tej neeg tej dab los.⚓ ²⁴Au Yawmsaub, koj tsim tsa koj haiv neeg Yixayee los ua koj li teej tug mus ib txhis li, thiab koj ua lawv tus Vajtswv. ²⁵Au Vajtswv Yawmsaub, thov koj tuav tej lus uas koj hais txog kuv uas yog koj tus qhev thiab hais txog kuv caj ces nyob ruaj mus ib txhis, thiab thov koj ua raws li koj tau hais cia lawd.
²⁶“Koj lub npe yuav raug qhuas mus ib txhis hais tias, ‘Yawmsaub uas muaj hwjchim loj kawg nkaus yog Vajtswv uas kav cov Yixayee,’ thiab Davi uas yog koj tus qhev caj ces yuav nyob ruaj khov ntawm koj lub xubntiag mus li. ²⁷Au Yawmsaub uas muaj hwjchim loj kawg nkaus uas yog cov Yixayee tus Vajtswv, koj twb qhia rau kuv uas yog koj tus qhev paub tias, koj yuav tsim kuv kom muaj caj ces ua vaj mus li. Vim li no kuv uas yog koj tus qhev thiaj muaj cuabkav tsa ncauj thov koj. ²⁸Au Vajtswv Yawmsaub, koj yeej yog Vajtswv, koj tej lus yeej yog lus tseeb, thiab koj tau cog tej lus zoo no rau koj tus qhev. ²⁹Yog li no nimno thov koj txaus siab foom koob hmoov rau koj tus qhev caj ces kom nyob ruaj rau ntawm koj lub xubntiag mus ib txhis. Au Vajtswv Yawmsaub, koj twb hais cia li ntawd lawm, thiab koj tej koob hmoov yeej yuav muaj rau kuv uas yog koj tus qhev caj ces mus ib txhis.”