14

Yexus yog txojkev mus cuag leej Txiv

¹“Nej tsis txhob txhawj tsis txhob nyuaj siab. Nej tso siab rau Vajtswv,⚓ cia li tso siab rau kuv thiab. ²Hauv kuv leej Txiv lub tsev muaj chaw nyob ntau heev. Yog tsis muaj li ntawd kuv yeej hais rau nej lawm. Kuv mus tu chaw tseg rau nej.⚓ ³Thaum kuv mus tu chaw tseg rau nej tiav lawd, kuv yeej yuav rov los dua thiab coj nej mus nrog kuv nyob, xwv kuv nyob qhovtwg nej thiaj tau nyob qhov ntawd. ⁴Thiab nej paub txojkev uas mus txog lub chaw uas kuv yuav mus ntawd lawm.” ⁵Thauma hais rau Yexus tias, “Tus Tswv, peb tsis paub tias koj yuav mus qhovtwg. Peb yuav paub txojkev ntawd tau li cas?” ⁶Yexus hais rau nws tias, “Kuv yog txojkev ntawd, yog qhov tseeb thiab yog txojsia. Tsis muaj leejtwg mus cuag tau leej Txiv tsuas yog mus ntawm kuv mus xwb. ⁷Yog nej twb paub kuv lawm nej yeej yuav paub kuv leej Txiv thiab. Txij no mus nej yuav paub nws thiab pom nws.”
⁸Fili hais rau nws tias, “Tus Tswv, thov qhia leej Txiv tshwm rau peb pom mas peb thiaj txaus siab.” ⁹Yexus hais rau nws tias, “ Fili, kuv nrog nej nyob ntev txog tav no lawm, nej tseem tsis paub kuv thiab lov? Tus uas pom kuv kuj yog pom leej Txiv. Koj yuav hais tau li cas tias, ‘Thov qhia leej Txiv tshwm rau peb pom’? ¹⁰Koj tsis ntseeg tias kuv nyob hauv leej Txiv thiab leej Txiv nyob hauv kuv lov? Tej lus uas kuv hais rau nej ntawd kuv tsis tau hais raws li kuv lub siab xwb. Tiamsis leej Txiv uas nyob hauv kuv ua nws tes haujlwm. ¹¹Nej cia li ntseeg kuv hais tias kuv nyob hauv leej Txiv thiab leej Txiv nyob hauv kuv. Yog tsis ua li ntawd, cia li ntseeg vim tej haujlwm no. ¹²Kuv hais tseeb rau nej tias tus uas tso siab rau kuv yuav ua tej haujlwm uas kuv ua no thiab. Thiab nws tseem yuav ua tej haujlwm loj dua tej no vim kuv yuav mus cuag leej Txiv. ¹³Yam twg uas nej tuav kuv lub npe thov, kuv yuav ua yam ntawd kom leej Txiv thiaj tau koob meej ci ntsa iab ntawm leej Tub. ¹⁴Yog nej tuav kuv lub npe thov ib yam dabtsi, kuv yuav ua yam ntawd.

Cog lus yuav pub Vaj Ntsuj Plig

¹⁵“Yog nej hlub kuv, nej yuav tuav rawv kuv tej lus nkaw. ¹⁶Kuv yuav thov leej Txiv mas nws yuav pub dua ib tug los taw qhia nej, nws yuav nrog nej nyob mus li. ¹⁷Tus ntawd yog Vaj Ntsuj Plig uas qhia qhov tseeb, uas lub ntiajteb txais tsis tau vim yog ntsia tsis pom thiab tsis paub nws. Nej cov paub nws vim nws nrog nej nyob thiab yuav nyob hauv nej. ¹⁸Kuv yuav tsis muab nej tso pov tseg ua ntsoj ua ntsuag. Kuv yuav los cuag nej. ¹⁹Tshuav tsis ntev lub ntiajteb yuav tsis pom kuv tiamsis nej yuav pom kuv. Vim kuv muaj txojsia nyob nej kuj yuav muaj txojsia nyob thiab. ²⁰Hnub ntawd nej yuav paub tias kuv nyob hauv leej Txiv thiab nej nyob hauv kuv thiab kuv nyob hauv nej. ²¹Tus uas muaj kuv tej lus nkaw thiab tuav rawv tej lus ntawd, tus ntawd thiaj yog tus uas hlub kuv. Thiab tus uas hlub kuv ntawd kuv leej Txiv yuav hlub nws, thiab kuv yuav hlub nws thiab qhia kuv rau nws pom.”
²²Yudas uas tsis yog Ikhali‑au hais rau Yexus tias, “Tus Tswv, ua li cas koj yuav qhia koj tshwm rau peb pom xwb tsis qhia rau lub ntiajteb pom?” ²³Yexus teb nws tias, “Yog leejtwg hlub kuv, tus ntawd yuav tuav rawv kuv tej lus, thiab kuv leej Txiv yuav hlub nws thiab wb ob leeg yuav los cuag nws thiab nrog nraim nws nyob. ²⁴Tus uas tsis hlub kuv kuj tsis tuav rawv kuv tej lus. Thiab tej lus uas nej hnov no tsis yog kuv li lus tiamsis yog leej Txiv uas txib kuv los li lus.
²⁵“Kuv hais tej lus no rau nej rau thaum kuv tseem nrog nej nyob. ²⁶Tiamsis tus uas taw qhia, yog Vaj Ntsuj Plig tus dawb huv uas leej Txiv yuav txib los hauv kuv lub npe, nws yuav qhia txhua yam rau nej thiab ua rau nej nco txog txhua yam uas kuv twb hais rau nej lawd. ²⁷Kuv muab txojkev nyob kaj siab lug cob rau nej. Kuv pub kuv txojkev nyob kaj siab lug rau nej, kuv pub tsis thooj li lub ntiajteb pub. Nej lub siab tsis txhob txhawj thiab tsis txhob ntshai. ²⁸Nej twb hnov kuv hais rau nej tias, ‘Kuv yuav ncaim mus thiab kuv yuav rov los cuag nej.’ Yog nej hlub kuv nej kuj yuav xyiv fab rau qhov uas kuv mus cuag leej Txiv, vim leej Txiv loj dua kuv. ²⁹Nimno kuv twb hais tej no rau nej ua ntej uas tsis tau tshwm los, xwv thaum muaj tej no tshwm los nej thiaj li ntseeg. ³⁰Kuv yuav tsis nrog nej tham li no dua li lawm rau qhov tus uas kav ntiajteb tabtom los. Tus ntawd tsis muaj hwjchim loj dua kuv. ³¹Tiamsis kuv ua raws li leej Txiv kom kuv ua, xwv lub ntiajteb thiaj paub tias kuv hlub leej Txiv. Cia li sawv tsees, peb mus lauj.”

14

Yexus Yog Txojkev uas Mus Cuag Leej Txiv

¹Yexus hais rau nws cov thwjtim hais tias, “Nej tsis txhob txhawj thiab tsis txhob nyuaj siab, nej cia li ntseeg Vajtswv thiab ntseeg kuv. ²Hauv kuv Txiv lub tsev muaj ntau chav, thiab kuv tabtom yuav mus tu chaw rau nej. Yog tsis muaj li ntawd, kuv yeej yuav tsis qhia li no rau nej. ³Thaum uas kuv tu tau chaw rau nej lawm, kuv yuav rov qab los thiab tos nej mus nrog kuv nyob; kuv nyob qhov twg nej yeej yuav nrog kuv nyob qhov ntawd. ⁴Qhov chaw uas kuv yuav mus nej twb paub kev mus lawm.”
⁵Thaumas hais rau Yexus hais tias, “Tus Tswv, peb tsis paub xyov koj yuav mus qhov twg; yog li ntawd, peb yuav ua li cas paub kev mus?”
⁶Yexus teb Thaumas hais tias, “Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau.” ⁷Yexus hais rau lawv hais tias, “Nimno nej twb paub kuv lawm, nej yeej yuav paub kuv Txiv thiab txij no mus nej yuav paub nws thiab pom nws.”
⁸Filis hais rau Yexus hais tias, “Tus Tswv, thov koj qhia Leej Txiv rau peb pom kom peb txaus siab.”
⁹Yexus teb hais tias, “Filis, kuv twb nrog nej nyob ntev los lawm, ua li cas koj tseem tsis tau paub kuv thiab? Tus uas pom kuv, tus ntawd twb pom Leej Txiv lawm. Ua li cas koj tseem yuav hais tias, ‘Thov koj qhia Leej Txiv rau peb pom thiab’? ¹⁰Filis, koj tsis ntseeg hais tias kuv nyob hauv Leej Txiv thiab Leej Txiv nyob hauv kuv los?” Yexus hais rau nws cov thwjtim hais tias, “Tej lus uas kuv qhia rau nej no tsis yog kuv tej lus. Tiamsis yog Leej Txiv tus uas nyob hauv kuv, ua nws tes haujlwm xwb.” ¹¹Nej cia li ntseeg tej lus uas kuv hais tias, kuv nyob hauv Leej Txiv thiab Leej Txiv nyob hauv kuv. Txawm yog nej tsis ntseeg li kuv hais los nej yuav tsum ntseeg tej haujlwm uas kuv ua. ¹²Kuv qhia tseeb rau nej hais tias tus uas ntseeg kuv yuav ua tej haujlwm uas kuv ua; tsis yog li ntawd xwb, nws tseem yuav ua tau ntau dua tej uas kuv ua, rau qhov kuv mus cuag Leej Txiv lawm. ¹³Thiab yog nej tuav kuv lub npe thov ib yam dabtsi kuv yuav pub yam ntawd rau nej, tej uas Leej Tub ua ntawd yuav ua rau Leej Txiv tau ntsejmuag. ¹⁴Yog nej tuav kuv lub npe thov kom kuv ua ib yam dabtsi, kuv yuav ua yam ntawd rau nej.

Txib Vaj Ntsujplig Tus Dawbhuv Los

¹⁵“Yog nej hlub kuv, nej yeej yuav ua raws li kuv tej lus samhwm. ¹⁶Kuv yuav thov Leej Txiv, thiab nws yuav txib dua ib tug Pab los, tus ntawd yuav nrog nej nyob mus ibtxhis. ¹⁷Nws yog Vaj Ntsujplig, nws yuav qhia Vajtswv zaj uas yog qhov tseeb rau nej. Neeg ntiajteb tsis lees yuav nws, rau qhov lawv tsis pom nws lossis tsis paub nws. Tiamsis nej paub nws, rau qhov nws nrog nej nyob thiab nws yuav nyob hauv nej lub siab.
¹⁸“Kuv yuav tsis tso nej ua ntsuag ib zaug li; kuv yuav rov qab los cuag nej. ¹⁹Tshuav tsis ntev neeg ntiajteb yuav tsis pom kuv lawm, tiamsis nej yuav pom kuv; nej yuav muaj txojsia nyob, rau qhov kuv muaj txojsia nyob. ²⁰Thaum txog hnub ntawd nej yuav paub hais tias kuv nyob hauv Leej Txiv thiab nej nyob hauv kuv ib yam li kuv nyob hauv nej.
²¹“Tus uas lees yuav kuv tej lus qhia thiab ua raws li tej lus ntawd, tus ntawd yog tus uas hlub kuv. Tus uas hlub kuv, kuv Txiv yuav hlub tus ntawd; kuv yuav hlub tus ntawd thiab qhia kuv rau nws paub.”
²²Yudas (tus uas tsis yog Yudas Ixakali-us) hais tias, “Tus Tswv, ua li cas koj yuav qhia koj rau peb paub xwb, koj ho tsis qhia koj rau neeg ntiajteb paub?”
²³Yexus teb Yudas hais tias, “Tus uas hlub kuv yeej ua raws li kuv tej lus qhia. Kuv Txiv yuav hlub tus ntawd; kuv Txiv thiab kuv yuav los cuag nws thiab nrog nws nyob. ²⁴Tus uas tsis hlub kuv yeej tsis ua raws li kuv tej lus qhia. Thiab tej lus uas nej hnov kuv qhia ntawd tsis yog kuv tej lus tiamsis yog Leej Txiv tus uas txib kuv los tej lus.
²⁵“Nimno kuv tseem nrog nej nyob, kuv thiaj qhia tej no rau nej. ²⁶Tus Pab uas yog Vaj Ntsujplig tus Dawbhuv uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm.
²⁷“Kuv muab kuv txojkev kaj siab tso rau nej; txojkev kaj siab uas kuv muab pub rau nej, kuv tsis muab rau nej li neeg ntiajteb muab. Nej tsis txhob txhawj, tsis txhob nyuaj siab thiab tsis txhob ntshai. ²⁸Nej twb hnov kuv hais rau nej hais tias, ‘Kuv yuav mus, tiamsis kuv yuav rov qab los cuag nej.’ Yog nej hlub kuv, nej yeej yuav zoo siab qhov uas kuv mus cuag Leej Txiv; rau qhov nws muaj hwjchim loj dua kuv. ²⁹Nimno kuv qhia tej no rau nej, thaum muaj lawm nej thiaj yuav ntseeg kuv. ³⁰Kuv yuav tsis tau nrog nej tham ntev lawm, rau qhov tus uas kav lub ntiajteb tabtom los lawm. Nws tsis muaj hwjchim kav kuv, ³¹tiamsis kuv ua ib puas tsav yam raws li Leej Txiv kom kuv ua, neeg ntiajteb thiaj paub hais tias kuv hlub Leej Txiv.
“Cia li sawv peb mus.