1Hnub ntawd Denpaulas thiab Npalaj uas yog Anpinau-as tus tub thiaj hu zaj nkauj no: 2Ua tus TSWV tsaug lauj! Cov Yixalayees ua siab tawv qhawv sib tua; cov pejxeem txaus siab hlo mus ntaus rog. 3Tej vajntxwv, nej cia li ua tib zoo mloog! Tej nomtswv, nej cia li tig pobntseg mloog! Kuv yuav hu nkauj thiab ntaus nkauj nogncas qhuas cov Yixalayees tus Vajtswv uas yog tus TSWV. 4Tus TSWV, thaum koj tawm saum roob Xe-iles los, thaum koj tawm tom tiaj nrag Edoos los, lub ntiajteb ua zog koog, thiab nag laub lug saum nruab ntug los. Tseeb tiag, dej yeej nchuav laub lug saum cov huab los. 5Tej ncov roob ua zog koog tabmeeg tus TSWV saum roob Xinais, tabmeeg tus TSWV uas yog cov Yixalayees tus Vajtswv.
6Anaj tus tub Sankas tiam thiab Ya-ees tiam, tsis muaj tsheb nees khiav thoob tebchaws lawm, tej neeg taug kev me lawm xwb. 7Denpaulas, cov Yixalayees tej nroog muab tso tseg nphob xuav cia; tej nroog ntawd nyob khoob lug mus txog hnub uas koj los kav, koj zoo ib yam li cov Yixalayees leej niam ntag. 8Thaum cov Yixalayees mus teev luag tej vajtswv, ces txawm muaj kev tsov kev rog tuaj ntaus lawv lub tebchaws. Nej plaub caug txhiab leej Yixalayees no puas muaj ib tug nqa daim thaiv hniav ntaj lossis nqa hmuv? 9Kuv lub siab yeej nyob rawv nrog cov Yixalayees tej thawj tubrog, nrog cov neeg uas txaus siab mus ntaus rog. Ua tus TSWV tsaug lauj! 10Nej cov uas caij tej neesluav dawb uas caij rawv saum lub eeb, thiab nej cov uas mus kotaw nej nco ntsoov qhia zaj no rau sawvdaws. 11Ua tib zoo mloog! Tej suab uas cov neeg coob coob qw nrov ntshoo nrooj ncig tej qhovtshij sib qhia txog qhov uas tus TSWV thiab cov Yixalayees muaj yeej.
Ces tus TSWV haivneeg tawm hauv lawv tej nroog tuaj. 12Ntaus thawj los mas, Denpaulas, cia li ntaus thawj los mas! Hu nkauj los mas! Ntaus thawj ntxhias los mas! Anpinau-as tus tub Npalaj, cia li sawv mus tuaj tom hauvntej, coj cov neeg uas koj ntes tau khiav mus los mas! 13Ces txhua tus neeg uas ncaj ncees tuaj cuag lawv tej thawjcoj; tus TSWV haivneeg uas tuaj cuag nws, npaj nroos mus sib tua xwb. 14Lawv nqis pem xeev Efalayees tuaj rau hauv hav, raws xeem Npeenyamees thiab cov pejxeem qab. Cov thawj tubrog tuaj pem Makhiles tuaj, cov nomtswv tuaj pem xeev Xenpuloos tuaj. 15Xeem Ixakhas tej thawjcoj nrog Denpaulas tuaj; yog lawm, xeem Ixakhas thiab Npalaj lawv sawvdaws tuaj huv tibsi, thiab lawv puavleej raws nws qab mus rau nram lub hav lawm. Tiamsis xeem Lunpees hais tsis sib haum; lawv thiaj tsis tuaj. 16Vim li cas lawv thiaj nrog pab yaj nyob tuaj tom qab? Yuav nkaum nkoos mloog cov tswv yaj lub suab cuab cov yaj xwb los? Yog lawm, xeem Lunpees hais tsis sib haum, lawv thiaj tsis tuaj. 17Xeem Khas nyob tim tus dej Yauladees sab hnubtuaj, thiab xeem Das nyob hauv tej nkoj. Xeem Aseles nyob raws ntug hiavtxwv; lawv nyob ntawm ntug xwb. 18Tiamsis xeem Xenpuloos thiab xeem Nathalis txaus siab muab lawv txojsia mus ntaus rog. 19Tej vajntxwv sau nthwv tuaj sib tua, rau hauv lub nroog Tanas ntawm tus dej Menkidaus; cov Kana-as tej vajntxwv tuaj sib tua, tiamsis lawv nqa tsis tau tej nyiaj mus li. 20Tej hnubqub tua saum nruab ntug tuaj; tej hnubqub ya saum nruab ntug tuaj tua Xixelas. 21Tus dej Kisoos huam los tshoob lawv mus povtseg lawm, tus dej Kisoos yog tus dej uas ntsawj ceev heev. Kuv yuav tawm mus, kuv lub siab cia li xyivfab hlo! 22Ces cov nees yuav dhia rag ntws los, muab lawv tej rau txauj av nplawg ntia.
23Tus TSWV tus timtswv hais tias, “Cia li foom tsis zoo rau lub nroog Melauzes, lo lus foom uas yog kev iab kev daw yuav raug cov neeg hauv lub nroog ntawd. Vim lawv tsis tawm mus ua tubrog pab tus TSWV tua cov yeebncuab.”
24Ya-ees yog tus uas muaj hmoo tshaj plaws tej pojniam, nws yog Henpeles uas yog neeg Kenais tus pojniam, nws muaj hmoo tshaj tej pojniam uas nyob hauv tej tsevntaub huv tibsi. 25Xixelas thov dej haus, tiamsis nws muab mis nyuj rau Xixelas haus; nws hliv mis nyuj rau hauv lub tais uas zoo nkauj heev rau Xixelas haus. 26Ya-ees ib sab tes nqa tus tswg tsevntaub, thiab ib sab tes nqa rab rauj; nws ntaus thiab tsoo Xixelas txha taubhau tawg kiag; nws npuj ntxhias Xixelas taubhau tshab plaws. 27Xixelas cia li zuav zog txhos caug ntua vau hlo rau ntawm Ya-ees kotaw tuag xyab luas cia.
28Xixelas niam tuaj tom qab daim ntxaij ntawm qhovrai saib ntsoov rau tim ncaujke. Nws thiaj nug hais tias, “Vim li cas twb lig heev lawm, tsis pom Xixelas lub tsheb nees los li ne? Vim li cas nws tus nees rov los qeeb ua luaj li?” 29Nws ib tsoom pojniam uas ntse heev teb nws, thiab nws pheej hais tujtaws hais tias, 30“Lawv tseem tsis tau pom tej uas mus huab tau los thiab muab sib faib, lawv muab tej hluas nkauj faib rau cov tubrog ib leeg ib tug lossis ob tug, lawv muab tej ntaub uas kim kim faib rau Xixelas, thiab muab tej ntaub uas txaij nraug zees los rau poj vajntxwv khiab cajdab.”
31Tus TSWV, thov kom cov yeebncuab tuag tas ib yam li ntawd ntag, tiamsis thov kom koj cov phoojywg ci ntsa iab ib yam li thaum lub hnub nyuam qhuav tawm tuaj!
Ces lub tebchaws txawm muaj kev thajyeeb tau zoo nyob kaj siab lug tau plaub caug xyoo.
5
Ntenpaula hab Npala zaaj nkauj
1Ntenpaula hab Anpinau‑aa tug tub Npala hu zaaj nkauj rua nub hov tas, 2“Ca le qhuas Yawmsaub, tsua qhov Yixayee cov thawj xub nqeg teg hab cov pejxeem tau xyiv faab xyiv yeem paab. 3Au tej vaajntxwv, ca le noog. Tej thawj, ca le tig ntsej noog. Kuv yuav hu nkauj rua Yawmsaub, kuv seev suab hu nkauj rua Yawmsaub kws yog Yixayee tug Vaajtswv.
4“Au Yawmsaub, thaus koj tawm ntawm Xe‑i moog ua rog, thaus koj taug kev tawm Entoo tebchaws moog, lub nplajteb kuj ua zug quas kais, lub ntuj tso naag lug, tej fuab tso naag lug tuam tsaam. 5Tej roob kuj ua zug quas kais rua ntawm Yawmsaub xubndag, yog Xinai tug Vaajtswv, yog Yawmsaub kws yog Yixayee tug Vaajtswv.
6“Ntu kws Anav tug tub Saaka nyob hab ntu kws Ya‑ee nyob, tej kev luj tsw muaj tuabneeg taug, cov kws moog moog lug lug tsuas taug miv kev xwb. 7Tej tub qoob tub loos huv Yixayee tebchaws kuj tseg tsw ua teb lawm, tsw ua moog txug thaus kuv,⚓ Ntenpaula sawv lug kaav, txug thaus kuv sawv lug ua nam huv Yixayee tebchaws. 8Thaus xaiv tej daab tshab lug teev kev ua rog kuj tuaj txug ntawm rooj loog. Yeej tsw pum ib daim hlau thaiv ua rog hab ib raab muv rua huv plaub vaam tug tub rog huv Yixayee le. 9Kuv lub sab dai quas dhuas Yixayee cov thawj, hab cov pejxeem kws xyiv faab xyiv yeem moog paab. Ca le qhuas Yawmsaub.
10“Mej cov kws caij tej neeg luav dawb, cov kws nyob sau ntaub pua eeb neeg hab cov kws xuas kwtaw taug kev ca le has zaaj nuav. 11Ca le noog zaaj lug txaj kws has ntawm qhov dej. Puab has txug qhov kws Yawmsaub kov yeej, has txug nwg cov tub qoob tub loos Yixayee kov yeej.
“Thaus hov Yawmsaub cov tuabneeg kuj moog ua ib txwg ib txwg rua ntawm rooj loog. 12‘Ntenpaula, ca le tswm lug, tswm lug. Ca le tswm lug tswm lug hu nkauj. Npala ca le sawv tseeg, Anpinau‑aa tug tub, ca le coj cov kws koj nteg tau moog.’ 13Thaus hov cov kws muaj meej kws tseed tshuav nyob nqeg lug, Yawmsaub cov pejxeem nqeg lug nrug kuv ua rog rua cov kws muaj zug heev. 14Cov kws cog caag rua huv Amalej tau nqeg peg Efa‑i lug. Npeeyamee, puab lawv koj hab koj cov kwvtij qaab. Cov thawj nqeg ntawm Makhi lug hab cov kws coj tug cwj thawj rog tawm huv Xenpuloo lug. 15Ixakha cov kws ua thawj kuj nrug Ntenpaula lug, Ixakha kuj nrug Npala lug. Puab lawv nwg qaab dha moog rua huv lub haav. Xeem Lunpee cov quas cum sab faab tsw txawj ua txuj twg. 16Ua le caag mej nyob ntawm nkuaj yaaj tog, noog lub suab raaj kws tshuv rua yaaj xwb? Xeem Lunpee cov quas cum sab faab tsw txawj ua txuj twg. 17Kile‑a kuj nyob saab dej Yalatee nub tuaj. Ntaaj nyob daabtsw ntawm lub nkoj txwg? Asaw nyob tuabywv ntawm ntug havtxwv, nyob tuabywv huv tej tsev ntawm tshaav nkoj. 18Xenpuloo yog cov kws zoo sab tso nyog txujsa moog paab. Nathali kuj ib yaam nkaus rua huv tej tshaav rog peg toj sab.
19“Cov vaajntxwv tuaj, puab tuaj ua rog, cov Khana‑aa tej vaajntxwv ua rog ntawm Tha‑ana ntawm ntug dej Mekintau. Puab tsw txeeb tej nyaj txag le. 20Tej nub qub sau ntuj kuj ua rog, tej nub qub kuj tuaj sau ntuj ua rog rua Xixela. 21Tug nam dej Khisoo kuav puab moog, yog tug nam dej Khisoo kws hlub kawg le. Kuv lub sab, ca le taug kev moog tuaj zug moog. 22Lub suab neeg dha rau nrov quas dawg, yog cov neeg dha noj tuam pwm. 23Yawmsaub tug tubkhai ntuj has tas, ‘Ca le tsawm foom Melau, ca le foom nyaav kawg rua cov tuabneeg huv lub moos hov vem yog puab tsw tuaj paab Yawmsaub, tsw paab Yawmsaub ua rog rua cov kws muaj zug.’