26

Uxiya ua vajntxwv kav Yuda

(2Vntx. 14:21-22, 15:1-7)

¹Cov pejxeem sawvdaws hauv Yuda txawm muab Uxiya⚓ uas hnub nyoog muaj kaum rau xyoo tsa ua vajntxwv nyob nws txiv Amaxiya chaw. ²Thaum vajntxwv Amaxiya tuag mus nrog nws tej poj koob yawm txwv nyob mas Uxiya tsim kho lub moos Elau thiab rov muab rau Yuda kav. ³Thaum Uxiya pib kav nws hnub nyoog muaj kaum rau xyoo thiab nws nyob hauv Yeluxlee kav tau tsib caug ob xyoos. Nws niam npe hu ua Yekhauliya yog neeg hauv Yeluxalees. ⁴Nws ua tej uas Yawmsaub pom tias zoo, ib yam li txhua yam uas nws txiv Amaxiya tau ua lawd. ⁵Nws rau siab ntso nrhiav Vajtswv tag Xekhaliya sim neej uas qhia nws paub ntshai Vajtswv. Thiab ncua sijhawm uas nws nrhiav Yawmsaub, mas Vajtswv pub nws vam meej.
⁶Nws tawm mus ua rog rau cov Filixatee mas tsoo lub moos Ka thiab lub moos Yane thiab lub moos Asadau tej ntsa loog pob tag. Thiab nws tsim muaj moos rau hauv Asadau li kav xyuam thiab rau lwm qhov hauv Filixatee tebchaws. ⁷Vajtswv pab nws ua rog ntaus cov Filixatee thiab cov Alam uas nyob hauv thaj nyuag tebchaws Kunpa‑as, thiab ntaus cov Me‑uni. ⁸Cov Asmoo kuj them se rau Uxiya mas nws lub koob meej thiaj nrov nto moo mus txog Iyi ciam teb, rau qhov nws muaj zog heev. ⁹Dua li ntawd Uxiya tseem tsim tej chaw tsom faj hauv Yeluxalees rau ntawm lub rooj loog ntawm lub kaum loog thiab lub Rooj Loog Hav thiab rau ntawm lub kaum ntsa loog, thiab ua kom ruaj khov. ¹⁰Thiab nws tsim tej chaw tsom faj rau hauv tebchaws moj sab qhua, thiab khawb ntau lub pas dej rau ntawm tej pov roob Sefela thiab rau hauv nruab tiag vim nws muaj tsiaj txhu coob, thiab nws muaj cov neeg ua teb thiab cov uas tu txiv hmab pem tej roob thiab rau hauv tej teb uas qoob zoo, vim nws nyiam ua teb. ¹¹Dua li ntawd Uxiya muaj tej pab tub rog uas npaj txhij ua rog muab faib ua tej pab raws li Ye‑i‑ee uas yog tus tub sau ntawv thiab tus thawj rog Ma‑axeya tau txheeb cia, raws li vajntxwv tus tub teg tub taws Hananiya qhia. ¹²Cov thawj hauv txhua cum uas kav cov tub rog siab loj siab tuab huvsi muaj ob txhiab rau pua leej. ¹³Cov no ua thawj kav 307,500 leej tub rog uas muaj zog ua tau rog uas yuav pab tau vajntxwv tawm tsam yeeb ncuab. ¹⁴Thiab Uxiya npaj daim hlau thaiv thiab hmuv thiab mom hlau thiab tsho hlau thiab rab hneev thiab qe zeb uas yuav fiav ntawm txoj hlua. ¹⁵Hauv Yeluxalees nws muab tej qhaub uas tej Kws txawj ua nruab rau saum tej chaw tsom faj thiab ntawm tej kaum loog cia thiaj tau tua rab xub thiab qe zeb loj. Nws lub koob meej nrov nto moo mus deb, vim yog nws tau txais kev pab phimhwj kawg mus txog thaum nws muaj zog heev.
¹⁶Tiamsis thaum nws muaj zog lawd nws txawm ua lub siab khav theeb thiaj li ua rau nws raug kev puam tsuaj. Nws ua tsis ncaj rau Yawmsaub uas yog nws tus Vajtswv. Nws nkag mus hlawv hmoov tshuaj tsw qab rau saum lub thaj uas hlawv tshuaj tsw qab hauv Yawmsaub lub tuam tsev. ¹⁷Mas tus pov thawj Axaliya thiab Yawmsaub cov pov thawj yim caum leej uas siab loj siab tuab raws vajntxwv mus rau hauv. ¹⁸Lawv tav vajntxwv Uxiya thiab hais rau nws tias, “Uxiya, tsis yog koj li haujlwm mus hlawv tshuaj tsw qab xyeem rau Yawmsaub, yog cov pov thawj uas yog Aloo caj ces uas twb tu kom dawb huv lawd li haujlwm hlawv tshuaj tsw qab. Koj cia li tawm hauv lub chaw pe Vajtswv no mus, rau qhov koj ua txhaum lawm, thiab koj yuav tsis tau koob meej dabtsi ntawm Vajtswv Yawmsaub li.”
¹⁹Ces Uxiya txawm chim kawg. Nws tseem tuav rawv lub yias rau ncaig taws hauv nws txhais tes yuav hlawv tshuaj tsw qab, ces thaum nws chim rau cov pov thawj ntawd mob lig mob ruas txawm tshwm plaws rau ntawm nws hauv pliaj tab meeg cov pov thawj ntawm lub thaj hlawv tshuaj tsw qab ib sab hauv Yawmsaub lub tuam tsev. ²⁰Tus pov thawj hlob Axaliya thiab cov pov thawj sawvdaws ntsia ntsoov Uxiya, ua ciav nws mob ruas rau ntawm nws hauv pliaj. Ces lawv txawm muab nws thawb tawm mus sai sai. Thiab nws maj nroos tawm mus rau qhov Yawmsaub nplawm nws lawm. ²¹Ces vajntxwv Uxiya txawm mob ruas mus txog hnub uas nws tuag. Vim yog nws mob ruas nws thiaj nyob nws ib lub tsev vim nws raug muab txiav tawm hauv Yawmsaub lub tuam tsev. Nws tus tub Yauthas ua tus uas saib xyuas vajntxwv lub tsev thiab kav cov pejxeem.
²²Lwm yam haujlwm uas Uxiya ua txij thaum pib mus txog thaum kawg mas Amoj tus tub Yaxaya uas yog xibhwb cev Vajtswv lus twb muab sau cia lawm. ²³Uxiya thiaj li tuag mus nrog nws tej poj koob yawm txwv nyob mas lawv muab nws log ze nws tej poj koob yawm txwv rau hauv thaj teb uas yog vajntxwv li, rau qhov lawv hais tias, “Nws yog ib tug mob ruas.” Mas nws tus tub Yauthas sawv nws chaw ua vajntxwv kav.

26

Cov Yudas Tus Vajntxwv Uxiyas

(2 Vajntxwv 14.21-22; 15.1-7)

¹Cov Yudas txawm muab Amaxiyas tus tub Uxiyas uas hnubnyoog muaj kaum rau xyoo tsa ua vajntxwv hloov nws txiv chaw. ( ²Tom qab uas Amaxiyas tuag lawm, Uxiyas rov mus txeeb tau lub nroog Elas thiab muab txhim kho dua tshiab.)
³Thaum Uxiyas ua vajntxwv nws hnubnyoog muaj kaum rau xyoo, thiab nws nyob hauv lub nroog Yeluxalees kav tau plaub caug ob xyoos. Nws niam hu ua Yehauliyas uas nyob hauv lub nroog Yeluxalees. ⁴Uxiyas coj raws li nws txiv tus yamntxwv, nws ua haum tus TSWV lub siab nyiam. ⁵Nws ua lub neej hwm tus TSWV raws li Xakhaliyas qhia nws, Vajtswv thiaj foom koob hmoov rau nws lub neej vammeej mus tas Xakhaliyas tiam.
⁶Uxiyas mus ua rog rau cov Filitees. Nws tsoo lub nroog Nkas, lub nroog Yanias thiab lub nroog Asedaus tej ntsayeej tawg pob tas, thiab nws txhim ntsayeej thaiv tej nroog uas nyob ze lub nroog Asedaus thiab tej nroog hauv tebchaws Filitees. ⁷Vajtswv pab Uxiyas tua yeej cov Filitees, cov Alav uas nyob hauv Nkunpa-as thiab cov Munis. ⁸Cov Amoos them nyiaj thiab kub ntau heev rau Vajntxwv Uxiyas, nws muaj hwjchim heev, thiab nws lub koob meej nrov ncha mus txog tebchaws Iziv.
⁹Uxiyas ua tej chaw tsomfaj rau ntawm lub Roojvag Ceskaum, rau ntawm lub Roojvag Hav thiab rau ntawm tus ntsayeej uas nkhaus hlo hauv lub nroog Yeluxalees. ¹⁰Nws tseem ua tau ntau lub chaw tsomfaj rau tom ntug nroog, thiab khawb tau ntau lub qhovdej, rau qhov nws muaj tsiaj txhu coob heev nyob rau zaj taw roob thiab hauv tej tiaj nrag sab hnubpoob. Uxiyas nyiam ua liaj ua teb, nws thiaj kom cov pejxeem cog txiv hmab txiv ntoo ntau heev rau saum tej laj roob thiab hauv tej teb uas av zoo.
¹¹Uxiyas muaj cov tubrog uas kawm tiav kev tua rog coob heev. Vajntxwv tus thawj tubrog Hananiyas thiab ob tug teev ntawv uas yog Ye-iyees thiab Ma-axeyas sau cov tubrog ntawd tej npe huv tibsi cia rau hauv ntawv. ¹²Tagnrho cov thawj tubrog muaj ob txhiab rau puas leej. ¹³Lawv muaj peb puas xya txhiab tsib puas leej tubrog uas txawj tua rog heev, pab vajntxwv tua nws cov yeebncuab. ¹⁴Uxiyas muab tej cuabyeej ua rog, tsis hais daim thaiv hniav ntaj, hmuv, kausmom hlau, tsho hlau, hneevnti thiab xub, thiab qe zeb ntaus zes hlua rau cov tubrog. ¹⁵Nyob rau hauv lub nroog Yeluxalees, Uxiyas kom luag ua tau ib co cuabyeej tua xubvos thiab ib co tua pobzeb tso rau saum tej chaw tsomfaj thiab ntawm tej kaum ntsayeej uas thaiv lub nroog. Uxiyas lub koob meej nrov ncha moo lug mus rau txhua qhov, thiab nws muaj hwjchim heev rau qhov Vajtswv yog tus pab nws.

Uxiyas Raug Txim Vim Khavtheeb

¹⁶Thaum uas Uxiyas muaj hwjchim lawm, nws txawm khavtheeb heev thiaj ua rau nws raug kev puastsuaj. Nws ua txhaum rau tus TSWV uas yog nws tus Vajtswv, vim nws mus rau hauv lub Tuamtsev thiab hlawv hmoov tshuaj tsw qab rau saum lub thaj. ¹⁷Tus povthawj Axaliyas thiab yim caum leej povthawj uas muaj zog thiab siab tawv heev txawm raws vajntxwv qab mus rau hauv. ¹⁸Lawv cheem vajntxwv hais tias, “Uxiyas! Koj tsis muaj cai hlawv hmoov tshuaj tsw qab fij rau tus TSWV. Tsuas yog cov povthawj uas yog Aloos cov xeebntxwv uas twb ua kevcai ntxuav lawm thiaj ua tau xwb. Koj cia li tawm hauv qhov chaw dawbhuv no mus. Koj tau ua txhaum tawmtsam tus TSWV uas yog Vajtswv, mas koj yuav tsis tau koob hmoov ntawm Vajtswv lawm.”
¹⁹Uxiyas tseem tabtom sawv ntawm lub thaj ib sab hauv lub Tuamtsev thiab tuav rawv lub tais hlawv hmoov tshuaj tsw qab. Uxiyas chim heev rau cov povthawj, ces tamsim ntawd nws lub hauvpliaj mob ruas tawg pleb nrees. ²⁰Ces Axaliyas uas yog tus povthawj hlob thiab cov povthawj saib ntsoov Uxiyas lub hauvpliaj ua rau lawv ntshai kawg. Lawv thiaj ntiab Uxiyas kom cia li tawm hauv tus TSWV lub Tuamtsev mus. Uxiyas txawm tawm ceev nrooj mus, rau qhov tus TSWV twb rau txim rau nws lawm.
²¹Vajntxwv Uxiyas mob ruas mus txog hnub uas nws tuag, vim nws mob ruas, nws thiaj nyob nws ib lub tsev; nws mus tsis tau rau hauv tus TSWV lub Tuamtsev li lawm. Nws tus tub Yauthas thiaj ua tus saib lub loog thiab tswjhwm lub tebchaws.
²²Txhua yam uas Vajntxwv Uxiyas ua thiab nws tej kev tswjhwm, Yaxayas tus uas cev Vajtswv lus uas yog Amauxes tus tub muab sau tseg cia lawm. ²³Uxiyas tuag thiab luag coj nws mus faus ze rau ntawm cov vajntxwv lub toj ntxas, tiamsis vim nws mob ruas, luag thiaj tsis muab nws faus rau hauv cov vajntxwv lub toj ntxas. Thiab nws tus tub Yauthas ua vajntxwv hloov nws chaw.