32

Cov Axilias Yuav Tua Lub Nroog Yeluxalees

(2 Vajntxwv 18.13-37; 19.14-19,35-37; Yaxayas 36.1-22; 37.8-38)

¹Vajntxwv Hexekiyas muaj lub siab ncaj ncees ua tus TSWV tes haujlwm txhua yam tiav. Tom qab ntawd, Xenakhelis uas yog tus vajntxwv kav lub tebchaws Axilias txawm tuaj tua lub tebchaws Yudas. Nws xub tuaj vij cov nroog uas muaj ntsa yeej thaiv thiab kom nws cov tubrog tsoo tej ntsayeej mus rau hauv nroog. ²Thaum Hexekiyas pom hais tias Xenakhelis yuav tua lub nroog Yeluxalees, ^3-4ces nws thiab nws cov nomtswv txiav txim siab txhub tej qhovdej sab nraum ntug nroog, kom thaum cov Axilias tuaj txog ntawm lub nroog Yeluxalees lawv tsis txhob tau dej haus. Cov nomtswv thiaj coj ib pab neeg coob heev mus meem tej qhovdej tsis pub kom dej ntws tshwm qhov twg li. ⁵Vajntxwv kho tus ntsayeej uas thaiv lub nroog tej ntu uas puas lawm, thiab ua tej chaw tsomfaj rau saum tus ntsa yeej, thiab ua ib txheej ntsayeej rau sab nraum. Dua li ntawd, nws kho tus ntsayeej uas thaiv Daviv lub nroog, thiab nws ua tau ib co hmuv thiab ib co thaiv hniav ntaj ntau heev. ⁶Thiab vajntxwv tsa ib cov thawj tubrog ua cov saib, thiab lawv tuaj sib sau rau ntawm lub roojvag nroog lub chaw las tshav. Vajntxwv hais rau lawv tias, ⁷“Nej cia li ua siab tawv qhawv thiab tsis txhob ntshai tus vajntxwv uas kav lub tebchaws Axilias thiab nws cov tubrog. Tus uas tuaj peb tog muaj zog dua tus uas tuaj lawv tog. ⁸Nws lub zog tsuas yog zog neeg xwb, tiamsis peb muaj tus TSWV uas yog peb tus Vajtswv pab peb tua rog.” Vajntxwv tej lus txhawb cov pejxeem lub zog heev.
⁹Tom qab ntawd, thaum Xenakhelis thiab nws cov tubrog tseem nyob hauv lub nroog Lakhis, nws tso xov tuaj rau Hexekiyas thiab cov Yudas uas nyob hauv lub nroog Yeluxalees hais tias, ¹⁰“Kuv yog Xenakhelis uas yog tus vajntxwv kav lub tebchaws Axilias. Kuv nug hais tias dabtsi ua rau nej tso siab nyob hauv lub nroog Yeluxalees uas luag twb vij tas lawm? ¹¹Hexekiyas hais rau nej tias tus TSWV uas yog nej tus Vajtswv yuav pab nej kom dim ntawm peb lub hwjchim, tiamsis yog Hexekiyas dag nej thiab yuav cia nej tshaib plab thiab nqhis dej tuag xwb. ¹²Nws yog tus uas rhuav tej chaw pehawm tus TSWV thiab tej thaj, thiab tseem hais rau cov Yudas thiab cov neeg uas nyob hauv lub nroog Yeluxalees tias, nej tsuas mus pe thiab hlawv hmoov tshuaj tsw qab rau saum tib lub thaj xwb. ¹³Nej puas tau paub tej uas kuv cov yawgkoob thiab kuv tau ua rau lwm haivneeg lawm? Cov neeg ntawd, tej vajtswv puas pab tau lawv dim ntawm tus vajntxwv uas kav lub tebchaws Axilias? ¹⁴Thaum twg cov tebchaws ntawd tej vajtswv pab tau lawv dim ntawm peb tes? Yog li ntawd, dabtsi ua rau nej xav hais tias nej tus Vajtswv yuav pab tau nej dim? ¹⁵Nimno nej tsis txhob cia Hexekiyas dag nej thiab coj nej yuam kev li ntawd. Nej tsis txhob ntseeg nws tej lus! Tsis muaj ib haivneeg twg tus vajtswv yuav pab cawm tau nws haivneeg dim ntawm cov Axilias tus vajntxwv txhais tes li. Yog li ntawd, nej tus Vajtswv los yeej yuav cawm tsis tau nej li thiab!”
¹⁶Cov Axilias cov nomtswv hais lus phem rau tus TSWV uas yog Vajtswv thiab rau Vajntxwv Hexekiyas uas yog tus TSWV tus tubtxib. ¹⁷Xenakhelis sau ib tsab ntawv tuaj thuam tus TSWV uas yog cov Yixalayees tus Vajtswv hais tias, “Lwm haivneeg tej vajtswv twb cawm tsis tau lawv dim ntawm kuv txhais tes, txawm yog Hexekiyas tus Vajtswv los yeej cawm tsis tau nws haivneeg dim ntawm kuv txhais tes li thiab.” ¹⁸Cov Axilias cov nomtswv cem ua lus Henplais nrov nrov kom cov neeg hauv Yeluxalees uas tuaj nyob saum tus ntsaj yeej ntshai thiab poob siab thiab kom lawv thiaj txeeb tau lub nroog yoojyim. ¹⁹Lawv hais txog lub nroog Yeluxalees tus Vajtswv ib yam li hais txog lwm haivneeg tej vajtswv uas yog neeg txhais tes puab.
²⁰Ces Vajntxwv Hexekiyas thiab Yaxayas tus uas cev Vajtswv lus uas yog Amauxes tus tub txawm quaj thov Vajtswv pab. ²¹Tus TSWV thiaj tso ib tug timtswv los tua cov Axilias cov nomtswv thiab cov tubrog tuag tas. Ces cov Axilias tus vajntxwv thiaj txajmuag ntsuav rov qab mus rau pem tebchaws Axilias lawm. Muaj ib hnub thaum nws nyob hauv nws lub tsev teev nws tus vajtswv, nws ob tug tub txawm muab ntaj tua nws tuag rau hauv.
²²Yog li ntawd, tus TSWV thiaj cawm Vajntxwv Hexekiyas thiab cov neeg uas nyob hauv lub nroog Yeluxalees dim ntawm Xenakhelis uas kav lub tebchaws Axilias thiab ntawm lwm pab yeebncuab txhais tes. Tus TSWV cia cov Yudas tau nyob thaj yeeb lug tsis pub lwm haivneeg tuaj tua lawv. ²³Muaj neeg coob nqa khoom tuaj fij rau tus TSWV thiab pub rau Hexekiyas hauv lub nroog Yeluxalees. Yog li ntawd, txij thaum ntawd los txhua haivneeg thiaj hwm Hexekiyas heev.

Hexekiyas Mob thiab Khavtheeb

(2 Vajntxwv 20.1-3,12-19; Yaxayas 38.1-3; 39.1-8)

²⁴Thaum ntawd, Vajntxwv Hexekiyas mob hnyav thiab yuav tuag. Nws thov thiab tus TSWV ua ib qhov cim qhia rau nws hais tias nws tus mob yuav zoo. ²⁵Tiamsis Hexekiyas khavtheeb heev, nws tsis nco tus TSWV tej txiaj ntsig uas kho nws zoo, tus TSWV thiaj chim rau nws, rau cov Yudas thiab rau cov neeg hauv lub nroog Yeluxalees. ²⁶Ces Hexekiyas lees txim qhov uas nws khavtheeb thiab cov neeg hauv lub nroog Yeluxalees los lees txim ib yam nkaus. Yog li ntawd, tus TSWV thiaj tsis rau txim rau lawv mus txog thaum Hexekiyas tuag.

Hexekiyas Npluanuj thiab Vammeej

²⁷Vajntxwv Hexekiyas npluanuj thiab txhua tus hwm nws heev; nws ua tau ntau chav tsev rau nws tej nyiaj tej kub, tej qe zeb muaj nqis, tej tshuaj tsw qab, tej thaiv hniav ntaj thiab lwm yam uas muaj nqis. ²⁸Nws ua ntau lub txhab rau nplej, rau txiv hmab thiab roj txiv ntoo; ua ntau lub nkuaj kaw nws tej nyuj thiab ua ntau lub nkuaj kaw nws cov yaj. ²⁹Vajtswv foom koob hmoov rau Hexekiyas muaj yaj, muaj nyuj coob thiab muaj lwm yam ntau heev, nws thiaj rhawv tau ntau lub nroog. ³⁰Vajntxwv Hexekiyas tauv tus Dej Kihoos thiab khawb kwj tso dej ntws rau sab hnubpoob ntawm Daviv lub nroog. Txhua yam uas Hexekiyas ua puavleej vammeej. ³¹Cov Npanpiloos tso ib cov nomtswv tuaj nug Hexekiyas txog tej txujci uas tus TSWV ua hauv nws lub tebchaws, Vajtswv cia Hexekiyas ua raws li nws lub siab nyiam, rau qhov Vajtswv xav sim Hexekiyas siab.

Hexekiyas Tuag

³²Dua li lwm yam uas Vajntxwv Hexekiyas ua, thiab nws muab siab npuab tus TSWV, puavleej muab sau cia rau hauv Amauxes tus tub Yaxayas uas yog tus cev Vajtswv lus zaj yogtoog, thiab hauv Phau Ntawv keebkwm uas teev cov Yixalayees thiab cov Yudas tej vajntxwv lub neej lawm. ³³Hexekiyas tuag thiab luag coj nws mus faus rau ntawm cov vajntxwv lub toj ntxas theem siab. Tagnrho cov Yudas thiab cov neeg hauv lub nroog Yeluxalees puavleej tuaj ua kevcai hwm thaum nws tuag. Thiab nws tus tub Manaxes ua vajntxwv hloov nws chaw.

32

Xenakhawli tuaj ntaus Yeluxalee

(2Vntx. 18:13-37, 19:14-19,35-37; Yxy. 36:1-22, 37:8-38)

¹Thaus dhau tej xwm txheej nuav hab tej num kws Hexikhiya mob sab ua nuav lawd, Axilia tug vaajntxwv Xenakhawli txawm tuaj ua rog rua Yuta hab tsuam chaw vej tej moos kws muaj ntsaa loog, npaaj sab yuav txeeb kuas tau. ²Thaus Hexekhiya pum tas Xenakhawli tuaj yuav ua rog rua Yeluxalee, ³nwg txawm nrug nwg cov thawj rog hab cov tub rog sab luj sab tuab ntaus tswvyim txhub tej qhov dej txhawv kws nyob ib ncig lub nroog, mas puab kuj paab nwg ua. ⁴Cov pejxeem sau zog coob coob tuaj, mas puab txhub txhua lub qhov dej txhawv hab txhub lub hauv dej kws ndwg hlaa lub tebchaws. Puab has tas, “Ua caag yuav ca Axilia tej vaajntxwv tuaj ntswb tej dej kws ntau le nuav?” ⁵Hexekhiya rau sab ntso ua tej ntsaa loog kws pob taag dua tshab hab ua tej chaw tsom faaj sau ntsaa loog, hab tseed ua dua ib txheej ntsaa loog rua saab nrau, hab nwg ua lub loog Milau huv Tavi lub nroog khov dua. Nwg kuj ua tej cuab yeej ua rog hab tej daim hlau thaiv ntau kawg. ⁶Nwg tsaa cov thawj rog saib cov pejxeem hab sau puab lug ua ke rua huv lub tshaav puam ntawm rooj loog lug rua nwg hab has lug txhawb puab lub sab has tas, ⁷“Ca le ua khov kho hab ua sab luj sab tuab. Tsw xob ntshai tsw xob poob sab rua Axilia tug vaajntxwv hab tej paab tub rog coob coob kws nrug nwg tuaj hov, tsua qhov tug kws nrug peb luj dua tug kws nrug nwg. ⁸Nwg tsuas yog muaj txhais npaab nqaj tawv xwb tassws peb muaj Yawmsaub kws yog peb tug Vaajtswv nrug nraim peb kws paab peb hab nyob peb chaw ua rog.” Hexekhiya tej lug txhad txhawb tau cov pejxeem tug zug.
⁹Dhau ntawd thaus Axilia tug vaajntxwv Xenakhawli hab nwg cov tub rog huvsw tseed saamswm vej lub moos Lakhi, mas nwg tso nwg cov tub teg tub taw moog rua lub nroog Yeluxalee moog cuag Yuta tug vaajntxwv Hexekhiya hab cuag cov tuabneeg Yuta suavdawg kws nyob huv Yeluxalee, has tas, ¹⁰“Axilia tug vaajntxwv Xenakhawli has le nuav tas, Mej vaam khom daabtsw es mej yuav nyob huv Yeluxalee thev qhov kws raug vej le nuav? ¹¹Thaus Hexekhiya has rua mej tas, ‘Yawmsaub kws yog peb tug Vaajtswv yuav cawm peb dim huv Axilia tug vaajntxwv txhais teg,’ tsw yog Hexekhiya coj mej yuam kev moog tuag tshaib tuag nqhes lov? ¹²Tug Hexikhiya nuav nwg tsw yog tug kws rhuav tshem Vaajtswv tej chaw sab hab tej thaaj kws xyeem rua Vaajtswv lov? Hab has rua cov Yuta hab cov huv Yeluxalee tas, ‘Mej yuav tsum pe rua tuab lub thaaj hab hlawv xyeem rua lub thaaj hov xwb.’ ¹³Mej tsw paub tas kuv hab kuv tej laug tub ua le caag rua txhua haiv tuabneeg huv lwm tebchaws lawm lov? Cov tuabneeg huv tej tebchaws hov le daab paab cawm tau puab tej tebchaws dim huv kuv txhais teg lov? ¹⁴Tej daab huvsw huv tej tebchaws kws kuv tej laug muab ua puam tsuaj taag nrho muaj ib tug daab twg kws paab tau nwg cov tuabneeg dim huv kuv txhais teg? Mas mej tug Vaajtswv tseed yuav paab tau mej dim huv kuv txhais teg lov? ¹⁵Vem le nuav tsw xob ca Hexekhiya daag ntxag mej lossws coj mej yuam kev, tsw xob ntseeg nwg, tsua qhov tsw muaj ib tug daab huv haiv tuabneeg twg hab lub tebchaws twg kws cawm tau nwg haiv tuabneeg dim huv kuv txhais teg lossws huv kuv tej laug txhais teg. Mej tug Vaajtswv yimfuab tsw txawj paab mej dim huv kuv txhais teg le lauj!”
¹⁶Xenakhawli cov tub teg tub taw tseed thuaj Vaajtswv Yawmsaub hab Hexekhiya kws yog Vaajtswv tug tub qhe ntau dua le nuav. ¹⁷Hab Xenakhawli tseed sau ntawv has saib tsw taug Yawmsaub kws yog cov Yixayee tug Vaajtswv hab thuaj has tas, “Cov tuabneeg huv ib tsoom tebchaws le daab paab tsw tau puab haiv tuabneeg dim huv kuv txhais teg le caag, Hexekhiya tug Vaajtswv kuj yuav paab tsw tau nwg haiv tuabneeg dim huv kuv txhais teg le hov hab.” ¹⁸Tes puab txawm qw tej lug hov nrov nrov ua lug Yuta rua cov tuabneeg Yeluxalee kws nyob sau lub ntsaa loog nov es kuas puab ntshai hab poob sab heev sub txhad le txeeb tau lub nroog hov. ¹⁹Puab has txug Yeluxalee tug Vaajtswv ib yaam le puab has txug ib tsoom tuabneeg huv nplajteb tej daab kws yog tuabneeg txhais teg ua.
²⁰Tes vaajntxwv Hexekhiya hab Amoj tug tub Yaxaya kws yog xwbfwb cev Vaajtswv lug txawm quaj thov txug zaaj nuav rua sau ntuj. ²¹Yawmsaub txhad khaiv ib tug tubkhai ntuj lug mas nwg tua cov tub rog sab luj sab tuab hab cov thawj tub rog hab cov kws kaav tej paab tub rog huvsw tuag taag rua huv vaajntxwv Axilia lub yeej. Yog le nuav Xenakhawli txhad le rov qaab moog rua nwg lub tebchaws ua poob ntsej muag kawg. Thaus nwg moog rua huv lub tsev kws teev nwg tug daab nwg cov tub qee leej xuas ntaaj muab nwg tua rua hov ntawd. ²²Yawmsaub txhad cawm Hexekhiya hab cov kws nyob huv Yeluxalee dim huv Axilia tug vaajntxwv Xenakhawli txhais teg hab huv nwg tej yeeb ncuab suavdawg txhais teg le nuav. Yawmsaub pub puab tau su tsw ua rog⚓ rua txhua faab. ²³Tuabneeg coob coj hov txhua chaw tuaj rua huv Yeluxalee pub rua Yawmsaub hab coj tej kws tswm txaj tuaj pub rua Yuta tug vaajntxwv Hexekhiya, Hexekhiya txhad tau koob meej taab meeg ib tsoom tebchaws suavdawg txwj thaus ntawd lug.

Hexekhiya mob

(2Vntx. 20:1-3, 12-21; Yxy. 38:1-3, 39:1-8)

²⁴Lub swjhawm ntawd Hexekhiya mob nyaav heev tub yuav tuag, mas nwg thov Yawmsaub. Yawmsaub kuj teb nwg hab ua ib yaam txujci phemfwj tshwm rua nwg. ²⁵Tassws Hexekhiya tsw ncu tej txaj ntswg kws Yawmsaub paab nwg, vem yog nwg lub sab khaav theeb. Vem le nuav txujkev npau tawg txhad lug raug nwg hab cov Yuta hab Yeluxalee. ²⁶Tes Hexekhiya txawm txu nwg lub sab khaav theeb hov hab cov tuabneeg kws nyob huv Yeluxalee kuj ua ib yaam le nwg, tes Yawmsaub txujkev npau tawg txhad tsw lug raug puab rua huv Hexekhiya swm neej.

Hexekhiya nplua nuj

²⁷Hexekhiya muaj nyaj txag ntau kawg hab muaj koob meej luj, mas nwg ua tej txhaab nyaj rua nwg rau nyaj rau kub, rau tej qai zeb hlaws muaj nqes, rau txum lom, rau tej daim phaj hlau thaiv hab tej pestwj tswm txaj txhua yaam. ²⁸Hab nwg ua txhaab rau qoob, rau cawv txwv maab hab roj, hab ua nkuaj rua txhua yaam tsaj txhu hab nkuaj yaaj. ²⁹Hab nwg tswm tej moos rua nwg hab nwg muaj tej paab yaaj tej paab tshws tej paab nyuj ntau nplua mag, vem yog Vaajtswv pub cuab txhaj cuab taam rua nwg ntau heev. ³⁰Tug vaajntxwv Hexekhiya nuav yog tug kws cais lub hauv dej Kihoo saab peg kuas ndwg moog rua Tavi lub nroog saab nub poob. Hexekhiya vaam meej rua nwg tej num huvsw. ³¹Thaus cov thawj huv lub nroog Npanpiloo khaiv tuabneeg tuaj nug txug tej txujci phemfwj kws tshwm rua huv lub tebchaws, mas Vaajtswv muab nwg tso nyob kaab ntsaab sub txhad swm tau nwg hab paub txhua yaam kws nyob huv nwg lub sab.
³²Lwm yaam num kws Hexekhiya ua hab tej yaam zoo kws nwg ua, tub muab sau ca rua huv tej zaaj yug quas toog kws Amoj tug tub Yaxaya kws yog xwbfwb cev Vaajtswv lug has nyob rua huv phoo ntawv kws has txug Yuta hab Yixayee tej vaajntxwv. ³³Tes Hexekhiya txawm tuag moog nrug nwg tej laug nyob. Puab muab nwg log rua sau caaj roob kws yog Tavi caaj ceg le toj ntxaa. Taag nrho cov Yuta hab cov kws nyob huv Yeluxalee suavdawg tuaj paam nwg lub nteeg luj kawg fwm nwg. Mas nwg tug tub Manaxe sawv nwg chaw ua vaajntxwv kaav.