1Tus TSWV hais rau kuv hais tias, 2“Koj cia li mus rau nram tus puab laujkaub av lub tsev, kuv muaj lus yuav hais rau koj nrad.” 3Yog li ntawd, kuv thiaj mus rau nram tus puab laujkaub av lub tsev, kuv pom nws tabtom puab laujkaub. 4Thaum nws puab ib lub laujkaub twg tsis zoo, nws txawm rov muab cov av zuaj puab ua dua lwm yam. 5Thaum ntawd tus TSWV hais rau kuv hais tias, 6“Nej cov Yixalayees, nej xav hais tias kuv tsis muaj cai ua rau nej ib yam li tus puab laujkaub av ua rau cov av nplaum ntawd no los? Cov av nplaum nyob hauv tus puab laujkaub txhais tes li cas, nej nyob hauv kuv txhais tes ib yam li ntawd. 7Yog thaum twg kuv hais tias kuv yuav rho, yuav rhuav lossis yuav ua kom ib haivneeg lossis ib lub tebchaws twg puastsuaj mus, 8tiamsis yog haivneeg ntawd tso lawv tej kev phem kev qias tseg, kuv yuav hloov siab tsis ua raws li tej lus uas kuv twb hais tseg lawm. 9Yog kuv hais rau ib haivneeg lossis ib lub tebchaws twg hais tias kuv yuav txhim kho haivneeg lossis lub tebchaws ntawd kom vammeej, 10tiamsis haivneeg ntawd ua kev phem kev qias tsis mloog kuv lus, kuv yuav hloov siab tsis ua raws li tej lus uas kuv hais. 11Yog li ntawd, koj cia li qhia rau cov Yudas thiab cov neeg uas nyob hauv lub nroog Yeluxalees hais tias kuv tabtom npaj tawmtsam thiab yuav rau txim rau lawv. Koj hais kom lawv cia li tso lawv tej kev txhaum tseg, tig rov los ua qhov zoo thiab xyaum ua lub neej tshiab. 12Lawv yuav teb koj hais tias, ‘Peb tsis ua li ntawd, peb yuav tawv ncauj thiab ua phem ua qias raws li peb lub siab nyiam.’ ”
Cov Yixalayees Tso Tus TSWV Tseg
13Tus TSWV hais tias, “Cia li nug txhua haivneeg saib puas muaj neeg hnov dua tej xwm no los tsis muaj? Cov Yixalayees ua txhaum loj kawg li lawm. 14Puas yog tej hauv roob siab hauv tebchaws Lenpanoos yeej ibtxwm muaj daus? Puas yog tej dej uas txhawv txias zias saum tej roob yeej ntws tsis tu li? 15Tiamsis kuv haivneeg tso kuv tseg; lawv mus hlawv tshuaj tsw qab fij rau tej mlom. Lawv taug kev mus qhov twg los dawm lawv kotaw; lawv tsis ua raws li tej kevcai thaum ub lawm; lawv tsis taug kev, lawv plos hav fab xwb. 16Lawv ua rau lub tebchaws no liamsim tas, luag yuav saib tsis taus lub tebchaws no mus ibtxhis; tej neeg uas dhau kev yuav xav tsis thoob thiab co hau nto. 17Kuv yuav ua rau kuv haivneeg tawg khiav ri sua tabmeeg lawv tej yeebncuab ib yam li tej hmoov av uas cov cua sab hnubtuaj tuaj ntsawj. Kuv yuav tig nraubqaum rau lawv; thaum lawv raug kev puastsuaj kuv yuav tsis pab lawv.”
Cov Yixalayees Tuavhauv Tawmtsam Yelemis
18Thaum ntawd sawvdaws hais tias, “Peb cia li tuavhauv tawmtsam Yelemis! Peb yeej muaj cov povthawj qhia peb, muaj cov neeg uas muaj tswvyim qhia tau peb thiab muaj cov cev Vajtswv lus uas yuav cev Vajtswv lus rau peb. Peb cia li nrhiav lus kom Yelemis, peb tsis txhob mloog nws tej lus.” 19Yog li ntawd, kuv thiaj thov tus TSWV hais tias, “Tus TSWV, thov koj mloog kuv tej lus thov thiab mloog tej lus uas cov yeebncuab txob thuam kuv. 20Lawv muab kev phem pauj kev zoo los? Lawv khawb qhov tos kuv kev. Koj nco ntsoov hais tias kuv tau tsa ncauj thov koj kom txo koj tej kev chim tsis txhob rau txim rau lawv. 21Tus TSWV, nimno thov cia kom lawv tej menyuam tuag tshaib tuag nqhis thiab tuag rau hniav ntaj hniav riam. Cia tej pojniam nyob ua pojntsuam tsis muaj txiv thiab tsis muaj menyuam; cia tej txivneej tuag mob tuag ntsaj, thiab cia tej tub hluas tuag rau hauv tshavrog. 22Thov koj txib ib pab neeg mus huab lawv tej vajtse thaum lawv tsis nco qab kom lawv quaj ntshai tshee hnyo. Lawv khawb qhov thiab cuab hmuv tos kuv kev. 23Tus TSWV, koj paub hais tias lawv tuavhauv yuav tua kuv povtseg. Thov koj tsis txhob tshem lawv tej kev txhaum lossis zam txim rau lawv li. Thov koj ua kom lawv ntog nrom kus swb hlo thiab rau txim hnyav rau lawv thaum koj tseem chim.”
18
Tug Kws puab laujkaub aav
1Yawmsaub has lug tuaj rua Yelemi tas, 2“Ca le sawv tseeg moog rua ntawm tug Kws puab laujkaub aav lub tsev, kuv yuav has lug rua koj noog hov ntawd.” 3Kuv txawm nqeg moog rua ntawm tug Kws puab laujkaub aav lub tsev, nwg saamswm ua num ntawm lub tshuab puab laujkaub. 4Mas lub laujkaub aav kws nwg saamswm puab hov txawm pam rua huv tug Kws puab laujkaub txhais teg, nwg txawm muab puab dua ib lub lawv le nwg pum zoo ua. 5Tes Yawmsaub has lug tuaj rua kuv tas, 6“Cov Yixayee 'e, kuv yuav ua rua mej ib yaam le tug Kws laujkaub nuav ua tsw tau lov?” Yawmsaub has le nuav ntaag. “Cov Yixayee 'e, saib maj, mej nyob huv kuv txhais teg yaam nkaus le cov aav nplaum nyob huv tug Kws puab laujkaub txhais teg. 7Thaus twg kuj xwj kuv tshaaj tawm txug haiv tuabneeg twg lossws lub tebchaws twg has tas kuv yuav muab dob hab muab rhuav tshem hab ua kuas puam tsuaj, 8yog tas haiv tuabneeg kws kuv tau has txug ntawd tig ntawm puab txujkev phem, kuv kuj yuav hloov sab tsw ua tej xwm txheej phem kws kuv tub txav sab yuav ua rua puab. 9Hab thaus twg kuj xwj kuv tshaaj tawm txug haiv tuabneeg twg lossws lub tebchaws twg has tas kuv yuav tswm tsaa hab muab cog ca, 10yog tas haiv tuabneeg hov ua tej kws kuv pum tas phem kawg tsw noog kuv tej lug, kuv kuj yuav hloov sab tsw ua qhov zoo kws kuv txav sab yuav ua rua puab. 11Vem le nuav, koj ca le has rua cov Yuta hab cov kws nyob huv Yeluxalee tas, Yawmsaub has le nuav tas, ‘Saib maj, kuv saamswm npaaj xwm txheej phem rua mej hab ntaus ib txuj tswvyim tawm tsaam mej. Mej txhua tug ca le tig ntawm mej txujkev phem rov lug, ca le khu dua mej lub neej hab tej kws mej ua huvsw.’ 12“Tassws puab has tas, ‘Tsw muaj qaabhau. Peb yuav ua lawv le kws npaaj tseg hab peb txhua tug nyag taug nyag yuav tawv ncauj ua lawv le nwg lub sab phem.’ ” 13Vem le hov Yawmsaub has le nuav tas, “Ca le moog nug thoob plawg ib tsoom tebchaws saib leejtwg txeev tau nov tej yaam le nuav. Yixayee kws yog tug nkauj dawb huv tau ua yaam kws txaus ntxub kawg. 14Tej daus xwb daus npu sau lub roob Lenpanoo yuav pluj ntawm tej pob tsuas Xili‑oo lov? Tej dej sau roob yuav qhuav lov, yog tej haav dej txag kws ndwg lug? 15Tassws kuv haiv tuabneeg nov qaab kuv lawm, puab hlawv moov xyaab xyeem rua tej daab. Puab dawm txujkev kws puab taug, yog txuj qub kev thau u, puab taug tej kev miv, tsw taug txuj nam kev luj, 16ua rua puab lub tebchaws ua chaw ceeb hab ntshai, ua lub chaw rua luas thuaj moog ib txhws. Txhua tug kws hlaa moog yuav ceeb hab ntshai hab cu taubhau quas nyo. 17Kuv yuav ua kuas puab tawg rw quas sua moog ntawm puab cov yeeb ncuab hauv ntej yaam le raug cua ntsawj saab nub tuaj. Nub kws puab raug xwm txheej phem hov kuv yuav tig nraus qaum rua puab tsw tig xubndag.”
Cov pejxeem tuav huv ua phem rua Yelemi
18Puab txawm has tas, “Peb ca le ntaus tswvyim txuv Yelemi, tsua qhov txuj kevcai yuav tsw pluj ntawm cov pov thawj, hab tej lug sablaaj yuav tsw pluj ntawm cov tuabneeg txawj ntse, hab Vaajtswv tej lug yuav tsw tu ntawm cov xwbfwb cev lug. Peb ca le xuas nplaig tawm tsaam nwg, tsw xob quav ntsej noog nwg tej lug ib lus le.” 19Au Yawmsaub, thov noog kuv hab tig ntsej noog kuv cov yeeb ncuab tej lug. 20Tswm nyog ua kev phem pauj kev zoo lov? Puab kuj tseed khawb qhov taub txuv kuv txujsa. Thov ncu txug tas kuv sawv ntsug rua ntawm koj xubndag paab puab thov hab thov koj thim koj txujkev npau tawg ntawm puab. 21Vem le nuav thov koj muab puab tej mivnyuas cob rua kev tshaib nqhes, hab muab puab cob rua nav ntaaj nav rag tug fwjchim. Thov ca puab tej quaspuj tsw muaj mivnyuas hab ua puj ntsuag. Thov ca cov txwvneej raug mob kis tuag taag, ca cov tub hluas raug nav ntaaj tuag taag rua huv tshaav rog. 22Thov ca nov lub suab quaj qw huv puab tej tsev rua thaus koj coj tub rog tuaj lws puab taamswm, tsua qhov puab tau khawb qhov taub cuab kuv, hab ua rooj hlua cuab kuv kwtaw. 23Au Yawmsaub, koj yeej paub txhua yaam kws puab tuav huv yuav tua kuv pov tseg. Thov tsw xob zaam puab tej kev txhum lossws ntxuav puab lub txem ntawm koj lub qhov muag moog. Thov muab puab laim tseg rua ntawm koj xubndag, ca le rhuav tshem puab rua thaus koj tseed chim.