23

Philaj Taug Yexus Zaj

(Mathais 27.1-2; Malakaus 15.1-5; Yauhas 18.28-38)

¹Tagnrho cov neeg uas tuaj sablaj ntawd txawm sawv tsees coj Yexus mus cuag Philaj, ²lawv nkaug Yexus rau Philaj hais tias, “Peb ntes tus txivneej no thaum nws tabtom ntxias kom peb haivneeg ua yuam kev, thiab txwv tsis pub lawv them se rau Xixas, thiab nws khav hais tias nws yog tus Mexiyas uas yog vajntxwv.”
³Philaj nug Yexus hais tias, “Koj yog cov Yudais tus vajntxwv los?”
Yexus teb hais tias, “Koj hais yog lawm.”
⁴Ces Philaj hais rau cov thawj ntawm cov povthawj thiab cov neeg coob coob ntawd hais tias, “Kuv tsis pom tus txivneej no muaj ib qhov txhaum li.”
⁵Tiamsis lawv hajyam hais tawv tawv hais tias, “Nws tej lus qhia ua rau sawvdaws muaj kev kub ntxhov thoob lub xeev Yudas. Nws pib qhia pem lub xeev Kalilais thiab tuaj txog ntawm no.”

Helauj Taug Yexus Zaj

⁶Thaum Philaj hnov lawv hais li ntawd, nws nug hais tias, “Tus txivneej no yog neeg Kalilais los?” ⁷Thaum Philaj paub hais tias Yexus tuaj pem cheebtsam uas Helauj kav tuaj, ces nws txawm xa Yexus mus cuag Helauj, rau qhov lub sijhawm ntawd Helauj tuaj so hauv lub nroog Yeluxalees. ⁸Thaum Helauj pom Yexus, Helauj zoo siab kawg li, rau qhov nws ibtxwm hnov Yexus lub moo, thiab xav pom Yexus ntev los lawm. Helauj cia siab hais tias nws yuav pom Yexus ua ib yam txujci tseemceeb. ⁹Helauj nug Yexus ntau zaj, tiamsis Yexus tsis teb li. ¹⁰Cov thawj ntawm cov povthawj thiab cov xibhwb uas qhia Vajtswv txoj Kevcai txav zog mus nkaug Yexus rau Helauj. ¹¹Helauj thiab nws cov tubrog thuam Yexus thiab ua saib tsis taus Yexus; lawv muab ib lub tsho ntev uas zoo nkauj heev rau Yexus hnav, thiab xa nws rov qab mus rau Philaj. ¹²Txij hnub ntawd los Helauj thiab Philaj txawm sib raug zoo lawm; yav tas los nkawd ua yeebncuab.

Txiav Txim Muab Yexus Tua

(Mathais 27.15-26; Malakaus 15.6-15; Yauhas 18.39–19.16)

¹³Philaj hu cov thawj ntawm cov povthawj, cov thawjcoj thiab cov pejxeem tuaj, ¹⁴thiab nws hais rau lawv hais tias, “Nej hais tias nws ntxias kom cov pejxeem yuam kev. Nimno kuv twb taug nws zaj tabmeeg nej sawvdaws lawm, thiab tsis pom nws muaj ib qho txhaum raws li uas nej nkaug nws ntawd. ¹⁵Helauj los tsis pom nws muaj ib qho txhaum li thiab, Helauj thiaj xa nws rov los rau peb. Tus txivneej no yeej tsis tau ua ib qho txhaum uas tsimnyog yuav muab nws tua povtseg. ¹⁶Yog li ntawd, kuv yuav kom luag muab nws nplawm thiab tso nws mus.” ¹⁷[Raws li ibtxwm, txhua zaus uas ua Kevcai Hla Dhau, Philaj yuav tsum tso ib tug neeg raug txim raws li cov pejxeem thov.]
¹⁸Cov neeg coob coob ntawd hais nrov nrov hais tias, “Muab nws tua povtseg! Thiab tso Npalanpas los rau peb!” ¹⁹(Npalanpas raug kaw rau hauv tsev lojcuj, vim nws ntxeev nom ntxeev tswv hauv lub nroog thiab nws tua neeg.)
²⁰Philaj xav tso Yexus, nws thiaj rov hais rau cov neeg coob coob ntawd ib zaug ntxiv thiab. ²¹Tiamsis lawv hajyam qw nrov nrov hais tias, “Muab nws ntsia rau saum ntoo khaublig! Muab nws ntsia rau saum ntoo khaublig!”
²²Philaj rov hais rau lawv ib zaug hais tias, “Vim li cas? Nws ua txhaum dabtsi? Kuv tsis pom nws muaj ib qho txhaum uas tsimnyog yuav muab nws tua! Kuv yuav kom luag muab nws nplawm thiab tso nws mus.”
²³Tiamsis cov neeg coob coob ntawd qw tas zog kom Philaj muab Yexus ntsia rau saum ntoo khaublig. Thaum kawg lawv kovyeej Philaj. ²⁴Philaj txawm txiav txim rau Yexus raws li lawv thov. ²⁵Thiab Philaj tso tus txivneej uas lawv thov rau lawv. Tus ntawd yog tus uas raug kaw rau hauv tsev lojcuj, nws ntxeev nom ntxeev tswv thiab tua neeg. Ces Philaj muab Yexus rau lawv raws li lawv siab nyiam.

Muab Yexus Ntsia rau Saum Ntoo Khaublig

(Mathais 27.32-44; Malakaus 15.21-32; Yauhas 19.17-27)

²⁶Thaum lawv tabtom coj Yexus tawm mus; lawv ntsib ib tug txivneej hu ua Ximoos uas nyob hauv lub nroog Kulenes uas nyob pem yajsab tuaj yuav mus rau hauv lub nroog. Lawv ntes nws thiab yuam kom nws kwv tus ntoo khaublig nrog Yexus mus.
²⁷Cov neeg coob coob uas raws Yexus qab ntawd, muaj ib co pojniam tsa suab hlo quaj nrov nrov, rau qhov lawv hlub Yexus heev. ²⁸Yexus tig mus saib lawv thiab hais tias, “Cov pojniam uas nyob hauv lub nroog Yeluxalees! Nej tsis txhob quaj kuv, tiamsis cia li quaj nej thiab nej tej menyuam. ²⁹Thaum txog lub sijhawm ntawd, sawvdaws yuav hais tias, ‘Cov pojniam uas ibtxwm xeeb tsis taus menyuam, thiab cov pojniam uas tsis tau xeeb dua menyuam thiab tsis tau pub dua mis rau menyuam noj, yog cov uas hmoov zoo!’ ³⁰Lub sijhawm ntawd, yuav muaj neeg hais rau tej roob hais tias, ‘Nphau los tsuam peb!’ thiab yuav hais rau tej pov roob hais tias, ‘Pob los txhub peb!’ ³¹Yog lawv twb ua li no rau tsob ntoo uas tseem nyoos, thaum tsob ntoo qhuav lawm, lawv yuav ua li cas rau?”
³²Lawv coj ob tug txivneej uas ua tubsab mus tua nrog Yexus. ³³Thaum lawv mus txog ntawm qhov chaw uas hu ua “Pob Txha Taubhau,” lawv muab Yexus ntsia rau saum ntoo khaublig thiab muab txhos rau qhov ntawd, thiab muab ob tug tubsab ntsia rau saum ntoo khaublig, muab ib tug txhos rau ntawm Yexus sab xis thiab muab ib tug txhos rau ntawm Yexus sab laug. ³⁴Yexus hais tias, “Txiv, thov koj zam txim rau lawv! Rau qhov lawv tsis paub hais tias lawv ua dabtsi.”
Lawv muab Yexus cev ris tsho los twv saib leejtwg yuav tau yam twg. ³⁵Tej neeg sawvdaws sawv ibcag saib. Cov Yudais cov thawjcoj thuam Yexus hais tias: “Nws twb pab tau lwm tus dim; yog hais tias nws yog tus Mexiyas uas Vajtswv xaiv tiag, nws cia li pab kom nws dim!”
³⁶Cov tubrog thuam Yexus thiab lawv muab cawv txiv hmab qaub los cev rau Yexus haus, ³⁷thiab hais tias, “Yog koj yog cov Yudais tus vajntxwv tiag, koj cia li pab kom koj dim!”
³⁸Muaj ib cov lus sau rau ntawm ib daim txiag uas nyob ncaj ntawm Yexus taubhau rau saud hais tias, “Tus no yog cov Yudais tus vajntxwv.”
³⁹Ob tug tubsab uas lawv muab ntsia rau saum ntoo khaublig ntawd, ib tug thuam Yexus hais tias, “Koj tsis yog tus Mexiyas los? Koj cia li pab koj thiab pab kom wb dim!”
⁴⁰Tiamsis muaj dua ib tug cem hais tias, “Koj tsis ntshai Vajtswv los? Koj twb raug txim ib yam nkaus li nws thiab. ⁴¹Wb raug txim li no yeej tsimnyog qhov uas wb ua txhaum; tiamsis tus no tsis tau ua txhaum dabtsi li.” ⁴²Nws hais rau Yexus hais tias, “Thaum koj rov qab los ua Vajntxwv, thov koj nco txog kuv thiab.”
⁴³Yexus hais rau nws hais tias, “Kuv qhia tseeb rau koj hais tias, hnub no koj yuav tau nrog kuv nyob saum qhov chaw uas kaj siab lug.”

Yexus Tuag

(Mathais 27.45-56; Malakaus 15.34-41; Yauhas 19.28-30)

⁴⁴Thaum hnub ntseg, lub hnub tsis ci lawm, thiab lub tebchaws tsaus ntuj nti mus txog thaum peb teev; ⁴⁵daim ntaub uas thaiv hauv lub Tuamtsev txawm ntuag rhe ua ob daig. ⁴⁶Yexus hu nrov nrov hais tias, “Txiv, kuv muab kuv txojsia tso rau hauv koj txhais tes!” Yexus hais li ntawd tas, nws txawm tuag lawm.
⁴⁷Tus thawj tubrog pom muaj li ntawd, nws qhuas Vajtswv hais tias, “Yog tiag, tus no yeej yog neeg ncaj ncees!”
⁴⁸Thaum cov neeg uas tuaj saib pom li no, lawv ntaus hauv siab thiab rov qab mus tsev lawm. ⁴⁹Cov neeg uas ibtxwm paub Yexus, thiab cov pojniam uas nrog Yexus tuaj pem lub xeev Kalilais tuaj, lawv sawv deb deb saib tej no.

Faus Yexus

(Mathais 27.57-61; Malakaus 15.42-47; Yauhas 19.38-42)

^50-51Muaj ib tug txivneej hu ua Yauxej, tuaj pem lub nroog Alimathas hauv lub xeev Yudas tuaj. Nws yog ib tug neeg zoo uas sawvdaws hwm, thiab nws niaj hnub tos Vajtswv lub Tebchaws uas yuav los thiab nws yog cov Yudais ib tug nomtswv, tiamsis thaum lawv sablaj yuav txiav txim rau Yexus, nws tsis pom zoo tej uas lawv ua ntawd. ⁵²Nws mus cuag Philaj thiab thov Philaj muab Yexus lub cev rau nws. ⁵³Ces nws muab Yexus lub cev txo, muab qhwv thiab muab kwv mus tso rau hauv lub qhov ntxa uas luag txaug rau hauv ib phab pobzeb, yeej tsis tau muaj leejtwg coj neeg mus tso rau hauv li. ⁵⁴Hnub ntawd yog hnub uas npaj qhov txhia chaw tseg rau Hnub Xanpataus uas twb los yuav txog.
⁵⁵Cov pojniam uas nrog Yexus tuaj pem Kalilais tuaj, lawv nrog Yauxej mus, lawv pom lub qhov ntxa, thiab Yauxej muab Yexus lub cev tso li cas los lawv pom huv tibsi. ⁵⁶Lawv rov mus tsev, lawv npaj tej tshuaj tsw qab thiab tej roj tsw qab, yuav nqa mus pleev Yexus lub cev.
Hnub Xanpataus lawv so raws li Vajtswv txoj Kevcai qhia tseg lawm.

23

Yexus nyob ntawm Philaj xubntiag

(Mth. 27:1-2, 11-14; Mk. 15:15; Yh. 18:28-38)

¹Lawv sawvdaws txawm sawv tsees coj Yexus mus cuag Philaj. ²Lawv pib kom Yexus hais tias, “Peb pom tus no tabtom ntxeev peb lub tebchaws. Nws txwv kom peb tsis txhob them se rau Xixa thiab hais tias nws yog tus Khetos, yog ib tug vajntxwv.” ³Philaj txawm nug Yexus tias, “Koj yog cov Yudai tus vajntxwv lov?” Yexus hais tias, “Yog li koj hais.” ⁴Philaj txawm hais rau cov pov thawj hlob thiab cov neeg ntawd tias, “Kuv tsis pom tus no muaj ib qho txhaum kiag li.” ⁵Tiamsis lawv hais tawv qhawv tias, “Tus no tshum cov pejxeem thiab qhuab qhia thoob plaws Yudia txij ntua Kalilais los txog ntawm no.”

Yexus nyob ntawm Helauj xubntiag

⁶Thaum Philaj hnov li ntawd, nws txawm nug tias tus ntawd yog neeg Kalilais lov? ⁷Thaum nws paub tias Yexus nyob hauv Helauj li kav xyuam, nws txawm xa Yexus mus cuag Helauj uas tseem nyob hauv Yeluxalees rau lub sijhawm ntawd. ⁸Thaum Helauj pom Yexus nws kuj zoo siab heev rau qhov nws twb xav pom Yexus ntev los lawm rau qhov nws twb hnov txog Yexus, thiab nws vam tias yuav pom Yexus ua ib yam txujci tseem ceeb. ⁹Nws txawm nug Yexus ntau qhov tiamsis Yexus tsis teb li. ¹⁰Cov pov thawj hlob thiab cov xibhwb qhia Vajtswv kevcai kuj sawv ntawd siv zog kom Yexus heev kawg. ¹¹Helauj thiab nws cov tub rog kuj saib tsis taus thuam luag Yexus. Thaum muab ib cev tsoos zoo nkauj kho rau Yexus hnav, Helauj txawm xa Yexus rov mus rau Philaj. ¹²Helauj thiab Philaj txawm sib raug zoo rau hnub ntawd, rau qhov yav tag los ob tug ua yeeb ncuab.

Yexus raug teem txim tuag

(Mth. 27:15-26; Mk. 15:6-15; Yh. 18:39-19:16)

¹³Philaj txawm hu cov pov thawj hlob thiab cov thawj thiab cov pejxeem tuaj txoos ua ke, ¹⁴thiab hais rau lawv tias, “Nej coj tus no tuaj cuag kuv hais tias nws tshum cov pejxeem kom fav xeeb. Kuv twb tshuaj saib nws tab meeg nej los kuv tsis pom tias nws muaj kev txhaum raws li nej kom nws, ¹⁵thiab Helauj kuj tsis pom nws muaj kev txhaum rau qhov Helauj twb xa nws rov los cuag kuv. Saib maj, tus no yeej tsis muaj ib qhov txhaum uas tsim nyog muab rau txim tuag. ¹⁶Vim li no kuv yuav muab nws nplawm thiab tso nws dim.”⚓ ¹⁸Tiamsis cov neeg ib txhij qw hais tias, “Muab tus no tua pov tseg, es tso Npalanpa rau peb.” ¹⁹Npalanpa yeej raug kaw hauv tsev lojfaj vim yog tshum neeg fav xeeb hauv lub nroog thiab tua neeg. ²⁰Philaj tseem xav tso Yexus dim thiaj hais rau lawv dua ib zaug, ²¹tiamsis lawv qw nrov hais tias, “Muab nws teem, muab nws teem rau saum khaublig ntoo.” ²²Philaj hais rau lawv zaum peb tias, “Ua cas muab teem? Nws tau ua txhaum dabtsi? Kuv tsis pom nws ua txhaum dabtsi uas yuav tsim nyog tuag. Vim li no kuv yuav muab nws nplawm thiab tso nws mus.” ²³Tiamsis lawv qw nrov nrov txhib kom muab Yexus teem rau saum khaublig ntoo, ces lawv lub suab txawm kov yeej. ²⁴Philaj thiaj txiav txim raws li lawv thov. ²⁵Nws thiaj tso tus uas lawv thov ntawd yog tus raug kaw hauv tsev lojfaj vim yog tshum neeg fav xeeb thiab tua neeg. Thiab nws muab Yexus cob rau lawv ua raws li lawv lub siab.

Teem Yexus saum khaublig ntoo

(Mth. 27:32-44; Mk. 15:21-32; Yh. 19:17-27)

²⁶Thaum lawv tabtom coj Yexus mus, lawv yuam Ximoos uas yog neeg Khulene taug kev pem yaj sab tuaj. Lawv txawm muab tus khaublig ntoo rau nws kwv raws Yexus qab mus. ²⁷Muaj neeg coob coob thiab ib co pojniam uas ntaus hauv siab quaj ntsuag raws Yexus qab mus. ²⁸Yexus tig los ntsia lawv thiab hais tias, “Yeluxalees cov ntxhais 'e, tsis txhob quaj kuv, cia li quaj nej tus kheej thiab nej cov menyuam nawj. ²⁹Rau qhov yuav txog lub sijhawm uas luag yuav hais tias, ‘Cov pojniam mooj thiab lub plab uas tsis tau xeeb dua menyuam thiab tej txiv mis uas menyuam tsis tau ntxais dua tau nyob kaj siab lug.’ ³⁰Lub sijhawm ntawd lawv yuav pib hu rau tej roob tias, ‘Cia li nphau los tsuam peb,’ thiab hu rau tej pov roob tias, ‘Cia li txhub kiag peb.’⚓ ³¹Thaum tsob ntoo nyoos, lawv twb ua li no, ces thaum tsob ntoo qhuav lawm lawv tseem yuav ua li cas?”
³²Lawv kuj coj dua ob tug yawg neeg phem mus tua pov tseg nrog Yexus ua ke. ³³Thaum lawv mus txog lub chaw uas hu tias roob Txha Taubhau, lawv txawm muab Yexus teem rau saum khaublig ntoo rau qhov ntawd, thiab muab ob tug neeg phem ntawd teem nrog Yexus, sab xis ib tug sab laug ib tug. ³⁴Yexus hais tias, “Au kuv Txiv, thov daws lawv lub txim, vim lawv tsis paub tias lawv ua dabtsi.” Lawv muab nws cev tsoos tsho los rho ntawv faib rau lawv. ³⁵Cov neeg kuj sawv ntawd ntsia ntsoov. Cov thawj kuj thuam luag Yexus hais tias, “Nws cawm tau luag dim, yog nws yog Vajtswv tus Khetos uas Vajtswv xaiv cia lawd, kuj cia nws cawm nws tus kheej dim los maj!” ³⁶Cov tub rog kuj thuam luag nws, thiab tuaj muab cov kua qaub⚓ cev rau nws haus, ³⁷thiab hais tias, “Yog koj yog cov Yudai tus vajntxwv, cia li cawm koj tus kheej dim los maj!” ³⁸Ntawm Yexus lawm saud muaj ib co lus sau cia hais tias, “Tus no yog cov Yudai tus vajntxwv.”
³⁹Ib tug uas raug teem rau saum khaublig ntoo ntawd, kuj hais tuam mom Yexus tias, “Koj yog tus Khetos los tsis yog? Cia li cawm koj thiab wb ob leeg dim los maj!” ⁴⁰Tiamsis muaj dua ib tug txwv nws hais tias, “Koj tsis ntshai Vajtswv lov? Koj twb raug txim ib yam nkaus thiab. ⁴¹Wb ob leeg yeej raug txim raws li txojcai, vim wb tau saws raws li wb tau ua los lawm, tiamsis tus no tsis tau ua ib qho txhaum kiag li.” ⁴²Ces nws txawm hais tias, “Yexus, thaum koj nkag rau hauv koj lub tebchaws thov koj nco txog kuv.” ⁴³Yexus hais rau nws tias, “Kuv hais tseeb rau koj tias, hnub no koj yeej yuav tau nrog kuv nyob hauv lub chaw zoo kawg nkaus.”⚓

Yexus tuag

(Mth. 27:45-56; Mk. 15:33-41; Yh. 19:28-30)

⁴⁴Thaum ntawd kwvlam tav su txawm tsaus ntuj ntais thoob plaws lub tebchaws mus txog hnub qaij peb teev. ⁴⁵Lub hnub kuj tsaus nti, daim ntaub uas thaiv hauv lub tuam tsev txawm ntuag rhe ua ob daig. ⁴⁶Yexus txawm tsa suab qw nrov hais tias, “Kuv Txiv, kuv muab kuv tus ntsuj plig cob rau hauv koj txhais tes.” Yexus hais li ntawd tag nws txawm tu siav nrho.
⁴⁷Thaum tus thawj rog uas kav ib puas leej pom tej uas tshwm los no, nws txawm qhuas Vajtswv hais tias, “Tseeb tiag lauj, tus no yeej yog ib tug ncaj ncees.” ⁴⁸Cov neeg coob uas tuaj saib tej xwm txheej no thaum pom lawd kuj ntaus hauv siab rov qab mus tsev. ⁴⁹Txhua tus uas paub Yexus thiab cov pojniam uas nrog Yexus tuaj pem Kalilais tuaj kuj sawv deb deb ntsia tej xwm txheej no.

Muab Yexus log

(Mth. 27:57-61; Mk. 15:42-47; Yh. 19:38-42)

⁵⁰Muaj ib tug yawg npe hu ua Yauxej uas nyob hauv cov Yudai lub moos Alimathia yog ib tug hauv cov thawj lub rooj sablaj, nws yog ib tug neeg zoo thiab ncaj ncees. ⁵¹Nws tsis pom zoo qhov uas lawv tau hais hum thiab lawv ua li ntawd, thiab nws tos rawv Vajtswv lub tebchaws. ⁵²Yauxej txawm mus cuag Philaj thov Yexus lub cev tuag. ⁵³Thaum Yauxej txo Yexus lub cev tuag los lawd nws muab ib daim ntaub mag qhwv, coj mus tso rau hauv lub qhov ntxa uas txaug cia rau hauv phab zeb, uas tsis tau log tuag li. ⁵⁴Hnub ntawd yog hnub uas npaj rau hnub Xanpatau uas twb yuav txog. ⁵⁵Cov pojniam uas nrog Yexus tuaj pem Kalilais tuaj kuj raws qab mus pom lub qhov ntxa ntawd thiab pom tias lawv muab Yexus lub cev tuag tso li cas. ⁵⁶Ces cov pojniam ntawd txawm rov qab mus npaj tshuaj tsw qab thiab roj tsw qab. Hnub Xanpatau lawv txawm so raws li kevcai.