1
Suav cov Yixayee ntawm lub roob Xinai
1Txwj thaus puab tawm huv Iyi tebchaws lug mas xyoo kws ob lub ob hlis nub xab ib Yawmsaub has rua Mauxe huv lub tsev ntaub sws ntswb ntawm tebchaws moj saab qhua Xinai has tas,
2“Koj ca le muab ib tsoom pejxeem Yixayee suavdawg nce npe lawv le puab tej cum hab lawv le puab tej tsev tuabneeg, suav cov txwvneej txhua tug tej npe ib tug zuj zug.
3Koj hab Aloo ca le suav cov Yixayee txhua tug kws noob nyoog muaj neeg nkaum xyoo rov sau kws ua tau tub rog, suav ib paab ib paab zuj zug.
4Yuav tsum muaj txwvneej huv txhua xeem lug paab koj ib xeem ib tug, yog tug kws nyag ua thawj huv nyag cum.
5Cov kws yuav paab koj tej npe yog le nuav, huv xeem Lunpee yog Sente‑aw tug tub Elixu,
6huv xeem Xime‑oo yog Xulisantai tug tub Selumi‑ee,
7huv xeem Yuta yog Aminanta tug tub Nasoo,
8huv xeem Ixakha yog Xu‑a tug tub Nethanee,
9huv xeem Xenpuloo yog Heloo tug tub Elia,
10huv Yauxej cov tub mas yog huv xeem Efa‑i yog Amihu tug tub Elisama hab huv xeem Manaxe yog Pentaxu tug tub Kamali‑ee,
11huv xeem Npeeyamee yog Kinte‑auni tug tub Anpintaa,
12huv xeem Ntaaj yog Amisantai tug tub Ahiyexaw,
13huv xeem Asaw yog Aukhaa tug tub Paki‑ee,
14huv xeem Kas yog Nte‑u‑ee tug tub Eliyaxa,
15huv xeem Nathali yog Ena tug tub Ahila.”
16Cov nuav yog xaiv huv cov pejxeem lug, yog cov kws nyag ua hlub huv nyag xeem hab nyag ua thawj huv nyag cum huv cov Yixayee.
17Mauxe hab Aloo coj cov tuabneeg kws has npe nuav lug,
18mas lub ob hlis nub xab ib puab hu cov pejxeem suavdawg tuaj txoos ua ke, tes puab nce npe lawv le puab tej cum lawv le puab tej tsev tuabneeg, yog sau txhua tug kws noob nyoog muaj neeg nkaum xyoo rov sau tej npe ib leeg zuj zug,
19lawv le Yawmsaub has kuas Mauxe ua lawd. Mauxe txhad le suav puab ntawm tebchaws moj saab qhua Xinai.
20Lunpee kws yog Yixayee tug tub hlub caaj ceg lawv le puab tej cum lawv le puab tej tsev tuabneeg, lawv le cov txwvneej tej npe kws suav tau ib leeg zuj zug txhua tug kws noob nyoog muaj neeg nkaum xyoo rov sau kws ua tau tub rog,
21mas huvsw xeem Lunpee muaj 46,500 leej.
22Xime‑oo caaj ceg lawv le puab tej cum lawv le puab tej tsev tuabneeg, txhua tug kws puab suav lawv le cov txwvneej tej npe kws suav tau ib leeg zuj zug, txhua tug kws noob nyoog muaj neeg nkaum xyoo rov sau kws ua tau tub rog,
23mas huvsw xeem Xime‑oo muaj 59,300 leej.
24Kas caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
25mas huvsw xeem Kas muaj 45,650 leej.
26Yuta caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
27mas huvsw xeem Yuta muaj 74,600 leej.
28Ixakha caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
29mas huvsw xeem Ixakha muaj 54,400 leej.
30Xenpuloo caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
31mas huvsw xeem Xenpuloo muaj 57,400 leej.
32Yauxej caaj ceg kws yog Efa‑i caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
33mas huvsw xeem Efa‑i muaj 40,500 leej.
34Manaxe caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
35mas huvsw xeem Manaxe muaj 32,200 leej.
36Npeeyamee caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
37mas huvsw xeem Npeeyamee muaj 35,400 leej.
38Ntaaj caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
39mas huvsw xeem Ntaaj muaj 62,700 leej.
40Asaw caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
41mas huvsw xeem Asaw muaj 41,500 leej.
42Nathali caaj ceg lawv le puab tej cum lawv le puab tej tsev tuabneeg, lawv le tej npe kws suav tau txhua tug kws noob nyoog muaj neeg nkaum xyoo rov sau kws ua tau tub rog,
43mas huvsw xeem Nathali muaj 53,400 leej.
44Cov tuabneeg nuav yog cov kws Mauxe hab Aloo hab kaum ob tug kws ua hlub sawv cev txhua xeem huv cov Yixayee tau suav ca.
45Yog le nuav cov Yixayee suavdawg kws suav tau lawv le puab tej tsev tuabneeg kws noob nyoog muaj neeg nkaum xyoo rov sau, yog txhua tug txwvneej huv cov Yixayee kws ua tau tub rog,
46mas huvsw muaj 603,550 leej.
Tsaa cov Levi saib lub tsev ntaub
47Tassws cov Levi tsw raug suav lawv le puab tej cum rua huv.
48Tsua qhov Yawmsaub has rua Mauxe tas,
49“Xeem Levi mas koj tsw xob suav hab tsw xob muab nce npe rua huv cov Yixayee.
50Koj tsuas tsaa cov Levi lug saib Yawmsaub lub tsev ntaub kws muaj Yawmsaub tej lug hab saib txhua yaam pestwj kws swv hab txhua yaam kws nyob huv lub tsev ntaub. Puab yuav tsum phaaj nqaa Yawmsaub lub tsev ntaub hab tej pestwj kws swv hab tu hab saib lub tsev ntaub hab ua tsev ntaub nyob puag ncig Yawmsaub lub tsev ntaub.
51Thaus yuav tshais Yawmsaub lub tsev ntaub moog, cov Levi yuav muab lauj hab thaus yuav tsaa Yawmsaub lub tsev ntaub cov Levi yuav tsaa. Yog lwm tug txaav ze mas tug hov yuav raug muab tua.
52“Cov Yixayee nyag yuav tsaa nyag tsev ntaub nrug nyag cum nyob, nyag nyob nyag ib zog hab nyag nyob ntawm nyag tug chij.
53Tassws cov Levi yuav tsaa puab le tsev ntaub nyob puag ncig Yawmsaub lub tsev ntaub kws muaj Yawmsaub tej lug, sub txujkev chim txhad tsw poob rua ib tsoom pejxeem Yixayee. Cov Levi yuav tu hab saib Yawmsaub lub tsev ntaub kws muaj Yawmsaub tej lug.”
54Cov Yixayee kuj ua lawv le hov. Puab ua lawv le kws Yawmsaub has rua Mauxe lawd txhua yaam huvsw.
1
Suav cov Yixayee ntawm lub roob Xinai
1Txij thaum lawv tawm hauv Iyi tebchaws los mas xyoo uas ob lub ob hlis hnub xiab ib Yawmsaub hais rau Mauxe hauv lub tsev ntaub sib ntsib ntawm tebchaws moj sab qhua Xinai hais tias,
2“Koj cia li muab ib tsoom pejxeem Yixayee sawvdaws nce npe raws li lawv tej cum thiab raws li lawv tej tsev neeg, suav cov txivneej txhua tus tej npe ib tug zuj zus.
3Koj thiab Aloo cia li suav cov Yixayee txhua tus uas hnub nyoog muaj nees nkaum xyoo rov saud uas ua tau tub rog, suav ib pab ib pab zuj zus.
4Yuav tsum muaj txivneej hauv txhua xeem los pab koj ib xeem ib tug, yog tus uas nyias ua thawj hauv nyias cum.
5Cov uas yuav pab koj tej npe yog li no, hauv xeem Lunpee yog Sede‑aw tus tub Elixu,
6hauv xeem Xime‑oo yog Xulisadai tus tub Selumi‑ee,
7hauv xeem Yuda yog Aminada tus tub Nasoo,
8hauv xeem Ixakha yog Xu‑a tus tub Nethanee,
9hauv xeem Xenpuloo yog Heloo tus tub Elia,
10hauv Yauxej cov tub mas yog hauv xeem Efa‑i yog Amihu tus tub Elisama thiab hauv xeem Manaxe yog Pedaxu tus tub Kamali‑ee,
11hauv xeem Npeeyamee yog Kide‑auni tus tub Anpidas,
12hauv xeem Daj yog Amisadai tus tub Ahiyexaw,
13hauv xeem Asaw yog Aukhas tus tub Paki‑ee,
14hauv xeem Kas yog De‑u‑ee tus tub Eliyaxa,
15hauv xeem Nathali yog Ena tus tub Ahila.”
16Cov no yog xaiv hauv cov pejxeem los, yog cov uas nyias ua hlob hauv nyias xeem thiab nyias ua thawj hauv nyias cum hauv cov Yixayee.
17Mauxe thiab Aloo coj cov neeg uas hais npe no los,
18mas lub ob hlis hnub xiab ib lawv hu cov pejxeem sawvdaws tuaj txoos ua ke, ces lawv nce npe raws li lawv tej cum raws li lawv tej tsev neeg, yog sau txhua tus uas hnub nyoog muaj nees nkaum xyoo rov saud tej npe ib leeg zuj zus,
19raws li Yawmsaub hais kom Mauxe ua lawd. Mauxe thiaj li suav lawv ntawm tebchaws moj sab qhua Xinai.
20Lunpee uas yog Yixayee tus tub hlob caj ces raws li lawv tej cum raws li lawv tej tsev neeg, raws li cov txivneej tej npe uas suav tau ib leeg zuj zus txhua tus uas hnub nyoog muaj nees nkaum xyoo rov saud uas ua tau tub rog,
21mas huvsi xeem Lunpee muaj 46,500 leej.
22Xime‑oo caj ces raws li lawv tej cum raws li lawv tej tsev neeg, txhua tus uas lawv suav raws li cov txivneej tej npe uas suav tau ib leeg zuj zus, txhua tus uas hnub nyoog muaj nees nkaum xyoo rov saud uas ua tau tub rog,
23mas huvsi xeem Xime‑oo muaj 59,300 leej.
24Kas caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
25mas huvsi xeem Kas muaj 45,650 leej.
26Yuda caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
27mas huvsi xeem Yuda muaj 74,600 leej.
28Ixakha caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
29mas huvsi xeem Ixakha muaj 54,400 leej.
30Xenpuloo caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
31mas huvsi xeem Xenpuloo muaj 57,400 leej.
32Yauxej caj ces uas yog Efa‑i caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
33mas huvsi xeem Efa‑i muaj 40,500 leej.
34Manaxe caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
35mas huvsi xeem Manaxe muaj 32,200 leej.
36Npeeyamee caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
37mas huvsi xeem Npeeyamee muaj 35,400 leej.
38Daj caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
39mas huvsi xeem Daj muaj 62,700 leej.
40Asaw caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
41mas huvsi xeem Asaw muaj 41,500 leej.
42Nathali caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog,
43mas huvsi xeem Nathali muaj 53,400 leej.
44Cov neeg no yog cov uas Mauxe thiab Aloo thiab kaum ob tug uas ua hlob sawv cev txhua xeem hauv cov Yixayee tau suav cia.
45Yog li no cov Yixayee sawvdaws uas suav tau raws li lawv tej tsev neeg uas hnub nyoog muaj nees nkaum xyoo rov saud, yog txhua tus txivneej hauv cov Yixayee uas ua tau tub rog,
46mas huvsi muaj 603,550 leej.
Tsa cov Levi saib lub tsev ntaub
47Tiamsis cov Levi tsis raug suav raws li lawv tej cum rau hauv.
48Rau qhov Yawmsaub hais rau Mauxe tias,
49“Xeem Levi mas koj tsis txhob suav thiab tsis txhob muab nce npe rau hauv cov Yixayee.
50Koj tsuas tsa cov Levi los saib Yawmsaub lub tsev ntaub uas muaj Yawmsaub tej lus thiab saib txhua yam twj uas siv thiab txhua yam uas nyob hauv lub tsev ntaub. Lawv yuav tsum phaj nqa Yawmsaub lub tsev ntaub thiab tej twj uas siv thiab tu thiab saib lub tsev ntaub thiab ua tsev ntaub nyob puag ncig Yawmsaub lub tsev ntaub.
51Thaum yuav tshais Yawmsaub lub tsev ntaub mus, cov Levi yuav muab lauj thiab thaum yuav tsa Yawmsaub lub tsev ntaub cov Levi yuav tsa. Yog lwm tus txav ze mas tus ntawd yuav raug muab tua.
52Cov Yixayee nyias yuav tsa nyias tsev ntaub nrog nyias cum nyob, nyias nyob nyias ib zog thiab nyias nyob ntawm nyias tus chij.
53Tiamsis cov Levi yuav tsa lawv li tsev ntaub nyob puag ncig Yawmsaub lub tsev ntaub uas muaj Yawmsaub tej lus, xwv txojkev chim thiaj tsis poob rau ib tsoom pejxeem Yixayee. Cov Levi yuav tu thiab saib Yawmsaub lub tsev ntaub uas muaj Yawmsaub tej lus.”
54Cov Yixayee kuj ua raws li ntawd. Lawv ua raws li uas Yawmsaub hais rau Mauxe lawd txhua yam huvsi.