32

Xenakhawli tuaj ntaus Yeluxalees

(2Vntx. 18:13-37, 19:14-19,35-37; Yxy. 36:1-22, 37:8-38)

 1Thaum dhau tej xwm txheej no thiab tej haujlwm uas Hexikhiya mob siab ua no lawd, Axilia tus vajntxwv Xenakhawli txawm tuaj ua rog rau Yuda thiab tsuam chaw vij tej moos uas muaj ntsa loog, npaj siab yuav txeeb kom tau. 2Thaum Hexekhiya pom tias Xenakhawli tuaj yuav ua rog rau Yeluxalees, 3nws txawm nrog nws cov thawj rog thiab cov tub rog siab loj siab tuab ntaus tswvyim txhub tej qhov dej txhawv uas nyob ib ncig lub nroog, mas lawv kuj pab nws ua. 4Cov pejxeem sau zog coob coob tuaj, mas lawv txhub txhua lub qhov dej txhawv thiab txhub lub hauv dej uas ntws hla lub tebchaws. Lawv hais tias, “Ua cas yuav cia Axilia tej vajntxwv tuaj ntsib tej dej uas ntau li no?” 5Hexekhiya rau siab ntso ua tej ntsa loog uas pob tag dua tshiab thiab ua tej chaw tsom faj saum ntsa loog, thiab tseem ua dua ib txheej ntsa loog rau sab nraud, thiab nws ua lub loog Milau hauv Davi lub nroog khov dua. Nws kuj ua tej cuab yeej ua rog thiab tej daim hlau thaiv ntau kawg. 6Nws tsa cov thawj rog saib xyuas cov pejxeem thiab sau lawv los ua ke rau hauv lub tshav puam ntawm rooj loog los rau nws thiab hais lus txhawb lawv lub siab hais tias, 7“Cia li ua khov kho thiab ua siab loj siab tuab. Tsis txhob ntshai tsis txhob poob siab rau Axilia tus vajntxwv thiab tej pab tub rog coob coob uas nrog nws tuaj ntawd, rau qhov tus uas nrog peb loj dua tus uas nrog nws. 8Nws tsuas yog muaj txhais npab nqaij tawv xwb tiamsis peb muaj Yawmsaub uas yog peb tus Vajtswv nrog nraim peb uas pab peb thiab nyob peb chaw ua rog.” Hexekhiya tej lus thiaj txhawb tau cov pejxeem lub zog.
  9Dhau ntawd thaum Axilia tus vajntxwv Xenakhawli thiab nws cov tub rog huvsi tseem tabtom vij lub moos Lakhi, mas nws tso nws cov tub teg tub taws mus rau lub nroog Yeluxalees mus cuag Yuda tus vajntxwv Hexekhiya thiab cuag cov neeg Yuda sawvdaws uas nyob hauv Yeluxalees, hais tias, 10“Axilia tus vajntxwv Xenakhawli hais li no tias, Nej vam khom dabtsi es nej yuav nyob hauv Yeluxalees thev qhov uas raug vij li no? 11Thaum Hexekhiya hais rau nej tias, ‘Yawmsaub uas yog peb tus Vajtswv yuav cawm peb dim hauv Axilia tus vajntxwv txhais tes,’ tsis yog Hexekhiya coj nej yuam kev mus tuag tshaib tuag nqhis lov? 12Tus Hexikhiya no nws tsis yog tus uas rhuav tshem Vajtswv tej chaw siab thiab tej thaj uas xyeem rau Vajtswv lov? Thiab hais rau cov Yuda thiab cov hauv Yeluxalees tias, ‘Nej yuav tsum pe rau tib lub thaj thiab hlawv xyeem rau lub thaj ntawd xwb.’ 13Nej tsis paub tias kuv thiab kuv tej poj koob yawm txwv twb ua li cas rau txhua haiv neeg hauv lwm tebchaws lawm lov? Cov neeg hauv tej tebchaws ntawd li dab pab cawm tau lawv tej tebchaws dim hauv kuv txhais tes lov? 14Tej dab huvsi hauv tej tebchaws uas kuv tej poj koob yawm txwv muab ua puam tsuaj tag nrho muaj ib tug dab twg uas pab tau nws cov neeg dim hauv kuv txhais tes? Mas nej tus Vajtswv tseem yuav pab tau nej dim hauv kuv txhais tes lov? 15Vim li no tsis txhob cia Hexekhiya dag ntxias nej lossis coj nej yuam kev, tsis txhob ntseeg nws, rau qhov tsis muaj ib tug dab hauv haiv neeg twg thiab lub tebchaws twg uas cawm tau nws haiv neeg dim hauv kuv txhais tes lossis hauv kuv tej poj koob yawm txwv txhais tes. Nej tus Vajtswv yimhuab tsis txawj pab nej dim hauv kuv txhais tes li lauj!”
  16Xenakhawli cov tub teg tub taws tseem thuam Vajtswv Yawmsaub thiab Hexekhiya uas yog Vajtswv tus tub qhe ntau dua li no. 17Thiab Xenakhawli tseem sau ntawv hais saib tsis taus Yawmsaub uas yog cov Yixayee tus Vajtswv thiab thuam hais tias, “Cov neeg hauv ib tsoom tebchaws li dab pab tsis tau lawv haiv neeg dim hauv kuv txhais tes li cas, Hexekhiya tus Vajtswv kuj yuav pab tsis tau nws haiv neeg dim hauv kuv txhais tes li ntawd thiab.” 18Ces lawv txawm qw tej lus ntawd nrov nrov ua lus Yuda rau cov neeg Yeluxalees uas nyob saum lub ntsa loog hnov es kom lawv ntshai thiab poob siab heev xwv thiaj li txeeb tau lub nroog ntawd. 19Lawv hais txog Yeluxalees tus Vajtswv ib yam li lawv hais txog ib tsoom neeg hauv ntiajteb tej dab uas yog neeg txhais tes ua.
  20Ces vajntxwv Hexekhiya thiab Amoj tus tub Yaxaya uas yog xibhwb cev Vajtswv lus txawm quaj thov txog zaj no rau saum ntuj. 21Yawmsaub thiaj txib ib tug tubtxib saum ntuj los mas nws tua cov tub rog siab loj siab tuab thiab cov thawj tub rog thiab cov uas kav tej pab tub rog huvsi tuag tag rau hauv vajntxwv Axilia lub yeej. Yog li no Xenakhawli thiaj li rov qab mus rau nws lub tebchaws yam poob ntsej muag kawg. Thaum nws mus rau hauv lub tsev uas teev nws tus dab nws cov tub qee leej xuas ntaj muab nws tua rau qhov ntawd. 22Yawmsaub thiaj cawm Hexekhiya thiab cov uas nyob hauv Yeluxalees dim hauv Axilia tus vajntxwv Xenakhawli txhais tes thiab hauv nws tej yeeb ncuab sawvdaws txhais tes li no. Yawmsaub pub lawv tau so tsis ua rog⚓ rau txhua fab. 23Neeg coob coj qhov txhia chaw tuaj rau hauv Yeluxalees pub rau Yawmsaub thiab coj tej uas tsim txiaj tuaj pub rau Yuda tus vajntxwv Hexekhiya, Hexekhiya thiaj tau koob meej tab meeg ib tsoom tebchaws sawvdaws txij thaum ntawd los.

Hexekhiya mob

(2Vntx. 20:1-3,12-21; Yxy. 38:1-3, 39:1-8)

 24Lub sijhawm ntawd Hexekhiya mob hnyav heev twb yuav tuag, mas nws thov Yawmsaub. Yawmsaub kuj teb nws thiab ua ib yam txujci phimhwj tshwm rau nws. 25Tiamsis Hexekhiya tsis nco tej txiaj ntsig uas Yawmsaub pab nws, vim yog nws lub siab khav theeb. Vim li no txojkev npau taws thiaj los raug nws thiab cov Yuda thiab Yeluxalees. 26Ces Hexekhiya txawm txo nws lub siab khav theeb ntawd thiab cov neeg uas nyob hauv Yeluxalees kuj ua ib yam li nws, ces Yawmsaub txojkev npau taws thiaj tsis los raug lawv rau hauv Hexekhiya sim neej.

Hexekhiya nplua nuj

 27Hexekhiya muaj nyiaj txiag ntau kawg thiab muaj koob meej loj, mas nws ua tej txhab nyiaj rau nws rau nyiaj rau kub, rau tej qe zeb hlaws muaj nqes, rau txuj lom, rau tej daim phiaj hlau thaiv thiab tej twj siv tsim txiaj txhua yam. 28Thiab nws ua txhab rau qoob, rau cawv txiv hmab thiab roj, thiab ua nkuaj rau txhua yam tsiaj txhu thiab nkuaj yaj. 29Thiab nws tsim tej moos rau nws thiab nws muaj tej pab yaj tej pab tshis tej pab nyuj ntau nplua mias, vim yog Vajtswv pub cuab txhiaj cuab tam rau nws ntau heev. 30Tus vajntxwv Hexekhiya no yog tus uas cais lub hauv dej Kihoo sab ped kom ntws mus rau Davi lub nroog sab hnub poob. Hexekhiya vam meej rau nws tej haujlwm huvsi. 31Thaum cov thawj hauv lub nroog Npanpiloo txib neeg tuaj nug txog tej txujci phimhwj uas tshwm rau hauv lub tebchaws, mas Vajtswv muab nws tso nyob kab ntsab xwv thiaj sim tau nws thiab paub txhua yam uas nyob hauv nws lub siab.
  32Lwm yam haujlwm uas Hexekhiya ua thiab tej yam zoo uas nws ua, twb muab sau cia rau hauv tej zaj yog toog uas Amoj tus tub Yaxaya uas yog xibhwb cev Vajtswv lus hais nyob rau hauv phau ntawv uas hais txog Yuda thiab Yixayee tej vajntxwv. 33Ces Hexekhiya txawm tuag mus nrog nws tej poj koob yawm txwv nyob. Lawv muab nws log rau saum caj qaum roob uas yog Davi caj ces li toj ntxa. Tag nrho cov Yuda thiab cov uas nyob hauv Yeluxalees sawvdaws tuaj pam nws lub ntees loj kawg hwm nws. Mas nws tus tub Manaxe sawv nws chaw ua vajntxwv kav.

32

Xenakhawli tuaj ntaus Yeluxalee

(2Vntx. 18:13-37, 19:14-19,35-37; Yxy. 36:1-22, 37:8-38)

 1Thaus dhau tej xwm txheej nuav hab tej num kws Hexikhiya mob sab ua nuav lawd, Axilia tug vaajntxwv Xenakhawli txawm tuaj ua rog rua Yuta hab tsuam chaw vej tej moos kws muaj ntsaa loog, npaaj sab yuav txeeb kuas tau. 2Thaus Hexekhiya pum tas Xenakhawli tuaj yuav ua rog rua Yeluxalee, 3nwg txawm nrug nwg cov thawj rog hab cov tub rog sab luj sab tuab ntaus tswvyim txhub tej qhov dej txhawv kws nyob ib ncig lub nroog, mas puab kuj paab nwg ua. 4Cov pejxeem sau zog coob coob tuaj, mas puab txhub txhua lub qhov dej txhawv hab txhub lub hauv dej kws ndwg hlaa lub tebchaws. Puab has tas, “Ua caag yuav ca Axilia tej vaajntxwv tuaj ntswb tej dej kws ntau le nuav?” 5Hexekhiya rau sab ntso ua tej ntsaa loog kws pob taag dua tshab hab ua tej chaw tsom faaj sau ntsaa loog, hab tseed ua dua ib txheej ntsaa loog rua saab nrau, hab nwg ua lub loog Milau huv Tavi lub nroog khov dua. Nwg kuj ua tej cuab yeej ua rog hab tej daim hlau thaiv ntau kawg. 6Nwg tsaa cov thawj rog saib cov pejxeem hab sau puab lug ua ke rua huv lub tshaav puam ntawm rooj loog lug rua nwg hab has lug txhawb puab lub sab has tas, 7“Ca le ua khov kho hab ua sab luj sab tuab. Tsw xob ntshai tsw xob poob sab rua Axilia tug vaajntxwv hab tej paab tub rog coob coob kws nrug nwg tuaj hov, tsua qhov tug kws nrug peb luj dua tug kws nrug nwg. 8Nwg tsuas yog muaj txhais npaab nqaj tawv xwb tassws peb muaj Yawmsaub kws yog peb tug Vaajtswv nrug nraim peb kws paab peb hab nyob peb chaw ua rog.” Hexekhiya tej lug txhad txhawb tau cov pejxeem tug zug.
  9Dhau ntawd thaus Axilia tug vaajntxwv Xenakhawli hab nwg cov tub rog huvsw tseed saamswm vej lub moos Lakhi, mas nwg tso nwg cov tub teg tub taw moog rua lub nroog Yeluxalee moog cuag Yuta tug vaajntxwv Hexekhiya hab cuag cov tuabneeg Yuta suavdawg kws nyob huv Yeluxalee, has tas, 10“Axilia tug vaajntxwv Xenakhawli has le nuav tas, Mej vaam khom daabtsw es mej yuav nyob huv Yeluxalee thev qhov kws raug vej le nuav? 11Thaus Hexekhiya has rua mej tas, ‘Yawmsaub kws yog peb tug Vaajtswv yuav cawm peb dim huv Axilia tug vaajntxwv txhais teg,’ tsw yog Hexekhiya coj mej yuam kev moog tuag tshaib tuag nqhes lov? 12Tug Hexikhiya nuav nwg tsw yog tug kws rhuav tshem Vaajtswv tej chaw sab hab tej thaaj kws xyeem rua Vaajtswv lov? Hab has rua cov Yuta hab cov huv Yeluxalee tas, ‘Mej yuav tsum pe rua tuab lub thaaj hab hlawv xyeem rua lub thaaj hov xwb.’ 13Mej tsw paub tas kuv hab kuv tej laug tub ua le caag rua txhua haiv tuabneeg huv lwm tebchaws lawm lov? Cov tuabneeg huv tej tebchaws hov le daab paab cawm tau puab tej tebchaws dim huv kuv txhais teg lov? 14Tej daab huvsw huv tej tebchaws kws kuv tej laug muab ua puam tsuaj taag nrho muaj ib tug daab twg kws paab tau nwg cov tuabneeg dim huv kuv txhais teg? Mas mej tug Vaajtswv tseed yuav paab tau mej dim huv kuv txhais teg lov? 15Vem le nuav tsw xob ca Hexekhiya daag ntxag mej lossws coj mej yuam kev, tsw xob ntseeg nwg, tsua qhov tsw muaj ib tug daab huv haiv tuabneeg twg hab lub tebchaws twg kws cawm tau nwg haiv tuabneeg dim huv kuv txhais teg lossws huv kuv tej laug txhais teg. Mej tug Vaajtswv yimfuab tsw txawj paab mej dim huv kuv txhais teg le lauj!”
  16Xenakhawli cov tub teg tub taw tseed thuaj Vaajtswv Yawmsaub hab Hexekhiya kws yog Vaajtswv tug tub qhe ntau dua le nuav. 17Hab Xenakhawli tseed sau ntawv has saib tsw taug Yawmsaub kws yog cov Yixayee tug Vaajtswv hab thuaj has tas, “Cov tuabneeg huv ib tsoom tebchaws le daab paab tsw tau puab haiv tuabneeg dim huv kuv txhais teg le caag, Hexekhiya tug Vaajtswv kuj yuav paab tsw tau nwg haiv tuabneeg dim huv kuv txhais teg le hov hab.” 18Tes puab txawm qw tej lug hov nrov nrov ua lug Yuta rua cov tuabneeg Yeluxalee kws nyob sau lub ntsaa loog nov es kuas puab ntshai hab poob sab heev sub txhad le txeeb tau lub nroog hov. 19Puab has txug Yeluxalee tug Vaajtswv ib yaam le puab has txug ib tsoom tuabneeg huv nplajteb tej daab kws yog tuabneeg txhais teg ua.
  20Tes vaajntxwv Hexekhiya hab Amoj tug tub Yaxaya kws yog xwbfwb cev Vaajtswv lug txawm quaj thov txug zaaj nuav rua sau ntuj. 21Yawmsaub txhad khaiv ib tug tubkhai ntuj lug mas nwg tua cov tub rog sab luj sab tuab hab cov thawj tub rog hab cov kws kaav tej paab tub rog huvsw tuag taag rua huv vaajntxwv Axilia lub yeej. Yog le nuav Xenakhawli txhad le rov qaab moog rua nwg lub tebchaws ua poob ntsej muag kawg. Thaus nwg moog rua huv lub tsev kws teev nwg tug daab nwg cov tub qee leej xuas ntaaj muab nwg tua rua hov ntawd. 22Yawmsaub txhad cawm Hexekhiya hab cov kws nyob huv Yeluxalee dim huv Axilia tug vaajntxwv Xenakhawli txhais teg hab huv nwg tej yeeb ncuab suavdawg txhais teg le nuav. Yawmsaub pub puab tau su tsw ua rog⚓ rua txhua faab. 23Tuabneeg coob coj hov txhua chaw tuaj rua huv Yeluxalee pub rua Yawmsaub hab coj tej kws tswm txaj tuaj pub rua Yuta tug vaajntxwv Hexekhiya, Hexekhiya txhad tau koob meej taab meeg ib tsoom tebchaws suavdawg txwj thaus ntawd lug.

Hexekhiya mob

(2Vntx. 20:1-3, 12-21; Yxy. 38:1-3, 39:1-8)

 24Lub swjhawm ntawd Hexekhiya mob nyaav heev tub yuav tuag, mas nwg thov Yawmsaub. Yawmsaub kuj teb nwg hab ua ib yaam txujci phemfwj tshwm rua nwg. 25Tassws Hexekhiya tsw ncu tej txaj ntswg kws Yawmsaub paab nwg, vem yog nwg lub sab khaav theeb. Vem le nuav txujkev npau tawg txhad lug raug nwg hab cov Yuta hab Yeluxalee. 26Tes Hexekhiya txawm txu nwg lub sab khaav theeb hov hab cov tuabneeg kws nyob huv Yeluxalee kuj ua ib yaam le nwg, tes Yawmsaub txujkev npau tawg txhad tsw lug raug puab rua huv Hexekhiya swm neej.

Hexekhiya nplua nuj

 27Hexekhiya muaj nyaj txag ntau kawg hab muaj koob meej luj, mas nwg ua tej txhaab nyaj rua nwg rau nyaj rau kub, rau tej qai zeb hlaws muaj nqes, rau txum lom, rau tej daim phaj hlau thaiv hab tej pestwj tswm txaj txhua yaam. 28Hab nwg ua txhaab rau qoob, rau cawv txwv maab hab roj, hab ua nkuaj rua txhua yaam tsaj txhu hab nkuaj yaaj. 29Hab nwg tswm tej moos rua nwg hab nwg muaj tej paab yaaj tej paab tshws tej paab nyuj ntau nplua mag, vem yog Vaajtswv pub cuab txhaj cuab taam rua nwg ntau heev. 30Tug vaajntxwv Hexekhiya nuav yog tug kws cais lub hauv dej Kihoo saab peg kuas ndwg moog rua Tavi lub nroog saab nub poob. Hexekhiya vaam meej rua nwg tej num huvsw. 31Thaus cov thawj huv lub nroog Npanpiloo khaiv tuabneeg tuaj nug txug tej txujci phemfwj kws tshwm rua huv lub tebchaws, mas Vaajtswv muab nwg tso nyob kaab ntsaab sub txhad swm tau nwg hab paub txhua yaam kws nyob huv nwg lub sab.
  32Lwm yaam num kws Hexekhiya ua hab tej yaam zoo kws nwg ua, tub muab sau ca rua huv tej zaaj yug quas toog kws Amoj tug tub Yaxaya kws yog xwbfwb cev Vaajtswv lug has nyob rua huv phoo ntawv kws has txug Yuta hab Yixayee tej vaajntxwv. 33Tes Hexekhiya txawm tuag moog nrug nwg tej laug nyob. Puab muab nwg log rua sau caaj roob kws yog Tavi caaj ceg le toj ntxaa. Taag nrho cov Yuta hab cov kws nyob huv Yeluxalee suavdawg tuaj paam nwg lub nteeg luj kawg fwm nwg. Mas nwg tug tub Manaxe sawv nwg chaw ua vaajntxwv kaav.