21

¹Tus TSWV tswj vajntxwv lub siab yoojyim ib yam li nws tswj tus dej.
²Koj yuav xav hais tias txhua yam uas koj ua yeej yog, tiamsis tus TSWV yuav txiav txim raws li tej uas koj ua lawm.
³Ua ncaj ua ncees thiab ua zoo, txaus tus TSWV siab dua coj tej khoom tuaj fij rau nws.
⁴Lub qhovmuag uas qaujles thiab lub siab uas khavtheeb, yog kev txhaum.
⁵Nquag thiab ua tib zoo npaj koj thiaj muaj nplua mias. Yog koj lam tau lam ua, koj yuav muaj tsis txaus.
⁶Tej nyiaj uas tau los ntawm kev tsis ncaj ncees, tsis ntev yuav ploj mus; tej nyiaj ntawd yuav coj koj mus raug kev ploj kev tuag.
⁷Cov neeg siab phem tej kev phem yuav ua rau lawv raug kev puastsuaj, rau qhov lawv ua tsis ncaj.
⁸Cov neeg txhaum taug txojkev nkhaus xwb, tiamsis cov neeg uas tsis muaj txim txhaum ua qhov zoo.
⁹Nyob saum rutsev zoo dua nrog tus pojniam uas yws taus nyob ua ke hauv tsev.
¹⁰Cov neeg siab phem nrhiav nrhw txojkev ua phem. Lawv tsis hlub leejtwg li.
¹¹Thaum tus neeg khavtheeb raug txim, ua rau tus neeg ruam ntse tuaj. Tus neeg txawj ntse kawm tau tej uas luag qhia nws.
¹²Vajtswv yog tus ncaj ncees, nws paub txhua yam uas nyob hauv tus neeg siab phem tsev, thiab nws yuav ua kom tus ntawd raug kev puastsuaj.
¹³Yog koj ntsaws qhovntsej tsis kam mloog cov neeg txomnyem lub suab quaj thov, thaum koj quaj thov luag pab yuav tsis muaj leejtwg hnov.
¹⁴Yog muaj leejtwg chim rau koj, cia li muab ib yam khoom mus pub rau nws, yuav ua rau nws txojkev chim ploj mus.
¹⁵Thaum muaj txojkev ncaj ncees, yog kev zoo siab rau cov neeg ncaj ncees, tiamsis cov neeg siab phem tas kev cia siab.
¹⁶Txhua tus uas tso txojkev ua zoo tseg, txojkev tuag nyob tos rawv lawv.
¹⁷Tus uas nyiam kev lomzem yuav pluag. Tus uas nyiam quav cawv yuav tsis nrog luag muaj nyiaj.
¹⁸Qhov uas cov neeg siab phem, ua phem rau cov neeg ncaj ncees, yog lawv lob kev txomnyem rov rau lawv ris.
¹⁹Mus nyob tom tiaj suabpuam zoo dua li nrog tus pojniam uas tsawm taus thiab yws taus nyob ua ib tse.
²⁰Cov neeg txawj ntse yeej ua neej npluanuj thiab muaj zoo vaj zoo tsev nyob, tiamsis cov neeg ruam khwv tau nyiaj npaum twg los lawv muab siv tas nrho.
²¹Ua siab dawb siab zoo thiab ua ncaj ua ncees, koj thiaj muaj sia nyob ntev; thiab luag thiaj yuav hwm thiab nyiam koj.
²²Tus thawj tubrog uas txawj ntse muaj peevxwm txeeb tau lub nroog uas muaj cov tubrog uas muaj zog heev tiv thaiv thiab rhuav tau tus ntsayeej uas luag tso siab rau.
²³Yog koj tsis xav raug teebmeem, koj yuav tsum ceevfaj tej lus uas koj hais.
²⁴Qhia tus neeg muaj plhus rau kuv thiab kuv yuav qhia tus neeg uas muab hlob, khavtheeb, thiab tsis txawj xav rau koj.
²⁵Tus neeg tubnkeeg uas tsis kam mus ua haujlwm, yog nws rov muab nws tua povtseg; ²⁶tej uas nws ua, nws tsuas xav hais tias saib yuav tau dabtsi. Tus neeg ncaj ncees, nws pub tau rau luag ntawm lub siab dawb paug.
²⁷Tus TSWV ntxub tej khoom theej txhoj uas cov neeg siab phem coj tuaj fij rau nws, qhov uas nws ntxub tshaj mas yog lawv tsis ua los ntawm lub siab dawb paug.
²⁸Tus neeg dag tej lus timkhawv yeej tsis txaus ntseeg, tiamsis tus neeg uas ua tib zoo xav tej lus yeej yuav tau.
²⁹Cov neeg ncaj ncees ua tib zoo xav rau tej uas lawv ua, tiamsis cov neeg siab phem ua txuj ua li lawv yog tus zoo heev.
³⁰Yog tus TSWV tawmtsam koj lawm, neeg lub tswvyim, txojkev txawj ntse thiab kev totaub yeej pab tsis tau koj li.
³¹Koj yog tus npaj tej nees kom txhij mus ntaus rog, tiamsis tus TSWV yog tus pab kom koj yeej.

21

¹Vajntxwv lub siab yog tus niag dej
uas nyob hauv Yawmsaub txhais tes,
Yawmsaub muab nws lub siab tig
raws li Yawmsaub pom zoo.
²Neeg pom tias txhua yam uas lawv ua
puavleej zoo,
tiamsis Yawmsaub tshuaj hauv lub siab.
³Qhov uas ua ncaj ncees thiab txiav txim ncaj,
hum Yawmsaub lub siab
heev dua li muab qhov txhia chaw xyeem.
⁴Lub qhov muag khav theeb
thiab lub siab muab hlob,
uas yog cov neeg limhiam lub teeb
mas puavleej txhaum.
⁵Tus neeg nquag tej hom phiaj
yeej coj kom nws muaj nplua mias,
tiamsis txhua tus uas maj ua dog ua dig
yeej tu pluas xwb.
⁶Tej niag txhab nyiaj uas tus nplaig dag tau
mas yog tej pa ncho
uas nyob ib vuag dua xwb
thiab yog txojkev tuag rooj hlua.
⁷Cov limhiam txojkev ua nruj ua tsiv
yuav kuav lawv mus
vim yog lawv tsis yeem ua ncaj rau luag.
⁸Cov neeg muaj txim txojkev yeej nkhaus,
tiamsis tej uas cov neeg dawb huv ua
kuj raug cai.
⁹Nyob saum ru tsev zoo dua li
nrog tus pojniam tsawm taus nyob hauv tsev.
¹⁰Tus neeg limhiam lub siab ntshaw ua phem,
nws tsis khuvleej nws tej kwvtij zej zog.
¹¹Thaum tej neeg muab hlob raug txim
mas cov neeg tsis thoob tsib kuj ntse tuaj,
thaum tus uas muaj tswvyim
raug luag qhuab qhia,
nws kuj tau kev txawj ntse.
¹²Vajtswv uas ncaj ncees ua tib zoo saib
cov neeg limhiam lub tsev,
nws muab cov neeg limhiam
laim pov tseg puam tsuaj tag.
¹³Tus uas ntsaws qhov ntsej
tsis mloog tus pluag lub suab hu,
nws yuav hu tsis muaj leejtwg hnov thiab.
¹⁴Ua twjywm pub tshav ntuj rau tus uas chim
mas kev chim yuav ploj,
muab nyiaj xiab ntsaws rau hauv xubntiag
mas kev npau taws yuav ploj.
¹⁵Thaum tu plaub ncaj
kuj ua rau cov uas ncaj ncees zoo siab,
tiamsis ua rau cov uas ua phem
poob siab nthav.
¹⁶Tus uas lug txojkev thoob tsib to nrog,
yuav mus nrog cov neeg tuag nyob ua ke.
¹⁷Tus uas nyiam kev lomzem yuav pluag,
tus uas nyiam cawv txiv hmab
thiab cov roj muaj nqes yuav tsis nplua nuj.
¹⁸Cov neeg limhiam yuav ua nqe txhiv
cov neeg ncaj ncees,
tus neeg tsis ncaj yuav theej tus ncaj chaw.
¹⁹Nyob tebchaws moj sab qhua
mas zoo dua li nrog tus pojniam
tsawm taus yws taus nyob ua ke.
²⁰Tej cuab txhiaj cuab tam muaj nqes
nyob hauv tus uas muaj tswvyim lub tsev,
tiamsis tus ruam nws noj nws li tag huvsi.
²¹Tus uas raws ncuj nciav txojkev ncaj ncees
thiab txojkev hlub
yuav tau txojsia thiab koob meej
thiab yuav vam meej.⚓
²²Tus uas muaj tswvyim nce mus ntaus tau
cov neeg uas muaj zog lub nroog,
thiab rhuav lub chaw ruaj khov
uas lawv tso siab pob tag.
²³Tus uas tswj tau nws lub qhov ncauj
thiab nws tus nplaig
kuj tsom kwm tau nws dim tej kev ceeblaj.
²⁴Tus uas tsab ua loj thiab khav theeb
npe hu ua tus muab hlob,
mas nws xyaum khav theeb
tsis yuav kev yuav cai.
²⁵Tus tub nkeeg txojkev ntshaw
yuav rov tua nws,
vim yog nws txhais tes tsis kam ua haujlwm.
²⁶Tus uas ua siab hlob
kuj ua siab hlob ib hnub tsaus ntuj,
tiamsis tus ncaj ncees
mas pheej pub tsis nkaum tes li.
²⁷Tej uas cov neeg limhiam muab xyeem
mas Yawmsaub ntxub kawg li,
thaum lawv coj tuaj ntawm lub siab
uas xav ua phem
mas Yawmsaub yimhuab ntxub.
²⁸Tus cuav timkhawv yuav puam tsuaj,
tiamsis tej lus uas tus mloog lus hais
yuav nyob mus.
²⁹Tus uas limhiam
nws ua nws lub plhu tuab kawg li,
tiamsis tus ncaj ncees
nws ua tib zoo saib nws txojkev.
³⁰Tsis muaj lub tswvyim twg
thiab kev txawj ntse thiab tej lus taw qhia twg
uas kov yeej tau Yawmsaub.
³¹Npaj nees txhij rau hnub uas ua rog lawm,
tiamsis qhov uas kov yeej
nyob ntawm Yawmsaub.