39

Cov Npanpiloos Tuaj

(2 Vajntxwv 20.12-19)

 1Lub sijhawm ntawd Npaladas tus tub Melaudas Npaladas uas ua vajntxwv kav lub tebchaws Npanpiloos hnov hais tias Vajntxwv Hexekiyas mob, nws sau ib tsab ntawv thiab xa ib co khoom tuaj rau Hexekiyas. 2Hexekiyas tos txais lawv thiab coj lawv mus ncig saib nws tej txhab nyiaj, txhab kub, tej txujlom, tej roj tsw qab thiab nws tej cuabyeej ua rog. Tsis tshuav ib yam dabtsi hauv nws tej txhab lossis hauv nws lub tebchaws uas nws tsis tau coj lawv mus saib li. 3Ces Yaxayas tus uas cev Vajtswv lus txawm tuaj cuag Vajntxwv Hexekiyas thiab nug nws hais tias, “Cov neeg ntawd tuaj qhov twg tuaj thiab lawv hais li cas rau koj?”
 Hexekiyas teb hais tias, “Lawv tuaj tim tebchaws Npanpiloos uas deb heev tuaj.”
  4Yaxayas nug hais tias, “Lawv pom dabtsi hauv koj lub loog?”
 Hexekiyas teb hais tias, “Lawv pom txhua yam huv tibsi; tsis tshuav ib yam nyob hauv tej txhab uas kuv tsis tau qhia rau lawv li.”
  5Ces Yaxayas txawm hais rau Vajntxwv Hexekiyas hais tias, “Tus TSWV uas muaj hwjchim loj kawg nkaus hais li no: 6Saib lauj, lub sijhawm twb los ze zuj zus rau txhua yam uas nyob hauv koj lub loog no lawm, thiab txhua yam uas koj cov yawgkoob khaws cia puag thaum ub los txog niaj hnub no yuav raug luag coj mus kom tas rau tim tebchaws Npanpiloos tsis seem ib yam dabtsi hlo li; tus TSWV hais li ntawd. 7Koj cov tub uas koj yug thiab koj tej xeebntxwv puavleej yuav raug lawv ntes coj mus thiab muab sam cia nyob ua haujlwm hauv tus vajntxwv uas kav lub nroog Npanpiloos lub loog.”
 8Vajntxwv Hexekiyas teb Yaxayas hais tias, “Tus TSWV tej lus uas koj hais no zoo kawg li.” Vim kuv xav hais tias, “Yuav muaj kev thajyeeb thiab kev kaj siab rau tiam uas kuv tseem ua neej nyob no.”

39

Hexekhiya txais tog Npanpiloo cov tim xyoob

(2Vntx. 20:12-19)

 1Thaus ntawd Npalantaa tug tub Melauntanpalantaa kws ua vaajntxwv huv Npanpiloo khaiv cov tim xyoob coj tsaab ntawv hab tshaav ntuj moog pub rua Hexekhiya vem yog nwg nov xuv tas Hexekhiya mob hab nquag lawm. 2Mas Hexekhiya zoo sab txais tog puab hab coj puab moog saib nwg tej txhaab nyaj, saib tej nyaj, tej kub, tej txum lom, tej roj tswm txaj, hab saib lub txhaab kws rau cuab yeej ua rog, yog txhua yaam kws nyob huv nwg tej txhaab. Tsw tshuav ib yaam huv nwg lub tsev hab thoob plawg huv nwg lub tebchaws kws nwg tsw muab qha rua puab saib. 3Mas Yaxaya kws yog xwbfwb cev Vaajtswv lug tuaj cuag vaajntxwv Hexekhiya, hab has rua nwg tas, “Cov tuabneeg nuav tuaj has daabtsw? Hab puab tuaj hovtwg tuaj cuag koj?” Hexekhiya teb tas, “Puab tuaj deb deb le tuaj, yog tuaj Npanpiloo tebchaws tuaj.” 4Yaxaya nug tas, “Puab pum daabtsw huv koj lub vaaj lub tsev?” Hexekhiya teb tas, “Puab pum txhua yaam huv kuv lub vaaj lub tsev, tsw tshuav ib yaam huv kuv tej txhaab kws kuv tsw tau muab qha rua puab saib le.”
  5Tes Yaxaya txawm has rua Hexekhiya tas, “Ca le noog Yawmsaub kws muaj fwjchim luj kawg nkaus tej lug. 6Saib maj, lub caij lub nyoog saamswm lug txug kws txhua tsaav txhua yaam huv koj lub vaaj lub tsev hab tej kws koj tej laug khaws tau ca lug txug nub nua yuav raug muab coj moog rua Npanpiloo, tsw tshuav ib yaam daabtsw hlo le. Yawmsaub has le nuav ntaag. 7Hab koj tej tub kws koj yug muaj qee leej yuav raug muab coj moog hab puab yuav ua nraug saam rua huv vaajntxwv Npanpiloo lub tsev.” 8Mas Hexekhiya has rua Yaxaya tas, “Yawmsaub tej lug kws koj has nuav kuj zoo.” Tsua qhov nwg xaav huv lub sab tas, “Yuav muaj kev thaaj yeeb hab nyob kaaj sab lug moog taag kuv swm neej.”