30

Aku tej lus

¹Yakhe tus tub Aku uas nyob hauv lub moos Maxas tej lus.⚓
Aku hais rau Ithi‑ee, nws hais rau Ithi‑ee
thiab Ukhas tias,⚓
²“Qhov tseeb kuv ruam dhau
uas yuav ua tau neeg,
kuv tsis paub tab li tej neeg.
³Kuv tsis tau kawm paub tswvyim,
thiab tsis paub Vajtswv tus uas dawb huv.
⁴Leejtwg tau nce mus rau saum ntuj kag
thiab nqes rov los?
Leejtwg muab tau cua los tuav
rau hauv xib teg?
Leejtwg muab ntaub qhwv tau dej cia?
Leejtwg tu ciam rau lub ntiajteb nyob?
Nws lub npe hu li cas,
thiab nws tus tub npe hu li cas?
Nej yeej los paub.

⁵“Muab Vajtswv txhua lo lus tshuaj saib
mas pom tias muaj tseeb tiag,
Vajtswv yog daim hlau
thaiv cov uas mus nraim cev rau hauv nws.
⁶Tsis txhob ntxiv ib lo lus rau hauv nws tej lus,
ntshai tsam nws yuav ntuas koj
thiab luag yuav pom tias koj yog tus dag.
⁷Vajtswv, kuv thov ob yam ntawm koj,
thov pub rau kuv ua ntej uas kuv tsis tau tuag.
⁸Thov muab tej lus tsis muaj tseeb
thiab tej lus dag ntiab khiav deb ntawm kuv,
thov tsis txhob cia kuv pluag
thiab tsis txhob cia kuv nplua nuj,
thov pub rau kuv noj kom txaus nkaus xwb,
⁹tsam kuv noj tsau ces tsis lees yuav koj
thiab hais tias, ‘Yawmsaub yog leejtwg?’
lossis tsam kuv pluag thiab ua tub sab
thiab ua puas tsuas kuv tus Vajtswv lub npe.

¹⁰“Tsis txhob thuam tus tub qhe
rau tus lospav mloog,
tsam tus tub qhe foom koj
ces koj yuav raug txim.
¹¹Muaj tej tus foom tsis zoo rau nws txiv,
thiab tsis foom koob hmoov rau nws niam.
¹²Muaj tej tus nws xam pom tias nws dawb huv,
tiamsis kuj tsis tau ntxuav
kev phem kev qias pov tseg.
¹³Muaj tej tus mas nws taubhau siab,
thiab lub qhov muag saib tsis taus lwm tus.
¹⁴Muaj tej tus nws kaus hniav yog hniav ntaj,
thiab nws hniav yog hniav riam,
mas nws yuav noj cov pluag
kom tag hauv ntiajteb
thiab cov neeg txom nyem
kom ploj tag hauv ib tsoom neeg.

¹⁵“Npliaj hiab muaj ob tug menyuam
yog maum, pheej qw hais tias, ‘Pub, pub.’
Muaj peb yam pheej tsis tsau,
muaj plaub yam tsis hais ib zaug
tias, ‘Txaus lawm,’ yog li no,
¹⁶tub tuag teb thiab tus pojniam mooj,
thiab lub ntiajteb pheej nqhis dej,
thiab hluavtaws tsis hais ib zaug tias,
‘Txaus lawm.’

¹⁷“Lub qhov muag uas thuam leej txiv
thiab saib tsis taus leej niam thiab tsis mloog lus,
yuav raug uab lag uas nyob hauv hav tho
thiab raug dav noj twm noj.
¹⁸Muaj peb yam uas kuv phimhwj kawg,
muaj plaub yam
uas kuv tsis nkag siab, yog li no,
¹⁹qhov uas tus dav ya saum nruab ntug,
thiab qhov uas nab ntaug saum pob zeb,
thiab qhov uas lub nkoj
mus rau hauv nruab nrab hiavtxwv,
thiab qhov uas hluas nkauj
hluas nraug sib nyiam.

²⁰“Tus pojniam uas mus deev luag txiv
ua lub neej zoo li no,
nws noj tag so qhov ncauj ces nws hais tias,
‘Kuv tsis tau ua txhaum dabtsi li.’
²¹Muaj peb yam uas ua rau lub ntiajteb
ntseeg nkaws,
muaj plaub yam uas lub ntiajteb
thev tsis taus, yog li no,
²²tus qhev tau ua vajntxwv,
thiab tus ruam tau noj tsau npo,
²³thiab tus pojniam
uas tsis muaj leejtwg nyiam tau txiv,
thiab tus nkauj qhev
tau nyob nws tus poj lospav chaw.

²⁴“Muaj plaub yam hauv ntiajteb no
uas me kawg
tiamsis muaj tswvyim tshaj plaws, yog li no,
²⁵ntsaum yog ib co uas tsis muaj zog
tiamsis thaum lub caij sau qoob
ntsaum kuj npaj tej uas noj khaws cia,
²⁶ntxim tsua kuj yog ib co uas tsis muaj zog
los nws ua zes rau hauv tej kem zeb,
²⁷kooj txig tsis muaj vajntxwv
los nws tseem mus tau ua ib kab sab,
²⁸quav toj quav taug
koj ntes tau hauv koj txhais tes
los nws tseem tau nyob hauv vajntxwv tsev.

²⁹“Muaj peb yam uas txawj mus kev zoo nkauj,
muaj plaub yam uas txawj
tshais ruam zoo saib, yog li no,
³⁰tsov ntxhuav uas yog tus tsiaj
uas muaj zog tshaj plaws
thiab tsis thim khiav ntawm lwm yam li,
³¹tus lau qaib cooj uas mus kev khov kho,
thiab tus txiv tshis,
thiab tus vajntxwv uas mus kev
ua cov pejxeem ntej qas ntxhia.

³²“Yog koj tsis paub tab es koj tsab ua loj
lossis yog koj ntaus tswvyim ua phem,
cia li muab koj txhais tes
pos koj lub qhov ncauj.
³³Yog tso kua mis txhia tau kua mis nyeem,
yog tso qhov ntswg thiaj tau ntshav,
thiab yog tshum kom chim
thiaj tau kev sib cav sib ceg.”

30

Ankus Tej Lus

¹Ntawm no mus yog Yakes tus tub Ankus tej lus tseemceeb:
“Vajtswv tsis nrog kuv nyob,
Vajtswv tsis nrog kuv nyob, thiab tsis muaj leejtwg pab kuv.
²Kuv ruam ib yam li tus tsiaj, kuv tsis
muaj kev txawj ntse li neeg muaj.
³Kuv yeej ibtxwm tsis tau kawm dua
kev txawj ntse, thiab kuv yeej tsis
paub hais tias muaj Vajtswv.
⁴Leejtwg tau nce mus saum ntuj ceebtsheej
thiab nqis rov qab los?
Leejtwg ntes tau cua rau hauv nws lub xibteg?
Lossis muab ib daim ntaub los qhwv tau dej?
Lossis muab tej ciam av ntiajteb los sib lo ua ke?
Yog koj paub, nws yog leejtwg?
Leejtwg yog nws tus tub?
⁵“Vajtswv yeej ceev tej lus uas nws tau cog tseg; nws zoo ib yam li daim hlau thaiv hniav ntaj rau txhua tus uas nrhiav txojkev pab. ⁶Tsis txhob ntxiv ib lo lus rau tus TSWV tej lus nyob tsam nws cem koj, thiab nws yuav paub hais tias koj yog tus neeg dag.”

Tej Pajlug uas Hais Ntxiv

⁷Vajtswv, thov koj pub kuv muaj ob yam no ua ntej kuv tuag: ⁸tsis txhob pub kuv ua ib tug neeg dag thiab tsis txhob cia kuv npluanuj dhau lossis pluag dhau; pub kom kuv muaj txaus noj txaus haus xwb. ⁹Yog kuv muaj ntau dhau lawm, ntshai kuv yuav hais tias kuv tsis vamkhom koj; tiamsis yog kuv pluag dhau lawm, tej zaum kuv yuav mus ua tubsab thiab ua rau kuv tus Vajtswv txajmuag.
¹⁰Tsis txhob nkaug ib tug tubtxib twg rau nws tus tswv hlo li, nyob tsam koj yuav raug foom tsis zoo thiab tau ris lub txim ntawd.
¹¹Muaj tej tus neeg foom tsis zoo rau nws txiv thiab tsis nco nws niam txiaj ntsig.
¹²Muaj tej tus xav hais tias nws yog neeg ncaj ncees, tiamsis nws ua phem ua qias kawg li.
¹³Muaj tej tus xav hais tias nws thiaj yog neeg zoo xwb, ua li cas nws xav hais tias nws zoo tshaj lwm tus!
¹⁴Muaj tej tus neeg limhiam mus huab cov pluag thiab cov txomnyem tug, qhov ntawd yog tus neeg siab phem kev nrhiav noj nrhiav haus.
¹⁵Ib tug maumpeeb muaj ob tug menyuam, nkawd npe hu ua “Muab rau kuv!”
Muaj plaub yam uas pheej tsis txaus siab li:
¹⁶tubtuag teb,
tus pojniam uas muaj tsis taus menyuam,
av qhuav xav tau dej nag,
thiab hluavtaws kub toj tua tsis tau.
¹⁷Tus neeg uas nws luag nws txiv plig lossis tuammom nws niam thaum nws niam laus lawm, nws yuav raug dav npoj noj lossis uablag yuav thos nws ob lub qhovmuag.
¹⁸Muaj plaub yam uas ua rau kuv xav tsis thoob thiab tsis totaub, tej ntawd yog li no:
¹⁹Tus dav ya saum nruab ntug,
tus nab nkag saum pobzeb,
lub nkoj khiav taus nta yees saum nplaim dej hiavtxwv,
thiab pojniam txivneej txawj sib nyiam.
²⁰Tus pojniam uas tsis ncaj yog li no: nws ua txhaum kev nkauj kev nraug tas, nws mus da dej, thiab hais tias, “Kuv yeej tsis tau ua txhaum dabtsi.”
²¹Nyob hauv ntiajteb no muaj plaub yam uas ua rau neeg tsis txaus siab:
²²Tus qhev tau los ua vajntxwv,
tus neeg ruam muaj txhua yam noj,
²³tus pojniam uas txhua tus ntxub tau txiv yuav,
thiab tus ntxhais qhev tau los nyob
nws tus niam tsav cuab chaw.
²⁴Muaj plaub yam tsiaj uas me heev nyob hauv ntiajteb no, tiamsis ntse kawg li:
²⁵Ntsaum: lawv tsis muaj zog,
tiamsis thaum lub caij ntuj qhua
lawv sau tej khoom noj los khaws tseg.
²⁶Ntximtsua: lawv tsis muaj zog,
tiamsis lawv ua lawv tej zes rau hauv tej qhovtsua.
²⁷Kooj: lawv tsis muaj vajntxwv,
tiamsis lawv ya ua ke tsheej pab.
²⁸Nabqa tsiav: koj ntes tau tuav hauv koj xibteg,
tiamsis nws tseem tau nyob hauv vajntxwv tej loog.
²⁹Muaj plaub yam uas thaum lawv mus kev mas zoo saib kawg li yog:
³⁰tsov ntxhuav muaj zog tshaj lwm
yam tsiaj thiab tsis ntshai dabtsi li,
³¹tus laug tshis thiab tus lau qaib cooj
uas mus kev khov kho,
thiab tus vajntxwv uas sawv ntawm
nws tsoom pejxeem hauv ntej.
³²Yog koj ruam dhau es ua neeg khavtheeb thiab tuav tswvyim ua phem; cia li tseg thiab ua tib zoo xav! ³³Yog koj nyoj mis nyuj, ces koj tau roj mis; yog koj ntaus luag cajntswg, ces luag qhovntswg yuav los ntshav; thiab yog koj mus thab kev chim, koj yuav raug kev kub ntxhov.