24

¹Tsis txhob khib cov neeg phem,
tsis txhob ntshaw nrog lawv nyob ua ke,
²rau qhov lawv lub siab
ntaus tswvyim ua nruj ua tsiv,
thiab lawv daim tawv ncauj
hais tej lus uas yuav mus ua phem.

³Siv tswvyim thiaj ua tau lub tsev,
thiab muaj kev thoob tsib to nrog
ua lub tsev nyob ruaj khov.
⁴Thiab muaj kev txawj ntse
thiaj ua rau tej chav tsev
muaj cuab txhiaj cuab tam
zoo zoo nkauj puv nkaus.
⁵Tus uas muaj tswvyim muaj zog heev,
tus uas txawj ntse kuj muaj zog tuaj.
⁶Yog muaj cov txawj ntse qhia
mas koj thiaj nqes tes ua rog tau,
thiab muaj ntau leej ua chaw sablaj
koj thiaj kov yeej.
⁷Tswvyim nyob siab dhau tus ruam,
ntawm lub rooj loog⚓
nws tsis rua qhov ncauj hais.

⁸Tus uas ntaus tswvyim ua phem
luag yuav hu tias tus thab plaub.
⁹Qhov uas ntaus tswvyim
ua tej yam ruam kuj txhaum,
thiab tus uas thuam luag
yog tus uas neeg ntxub kawg.

¹⁰Yog koj poob siab nthav
rau hnub uas koj raug ceeblaj,
koj kuj tsis muaj zog.
¹¹Cia li cawm cov uas
raug cab mus tua kom dim,
cia li pab tus uas raug cab
nrhaj nrhuj nrheev mus tua kom dim.
¹²Yog koj hais tias, “Peb tsis paub zaj no li,”
mas Vajtswv uas tshuaj saib lub siab
yuav tsis pom lov?
Tus uas zov rawv koj tus ntsuj plig
tsis paub thiab lov?
Nws yuav tsis pauj rau neeg
raws li lawv tau ua los lawm lov?

¹³Kuv tub 'e, cia li noj zib ntab
vim yog yam uas zoo,
thiab zib ntab uas nrog ntawm
lub tsev ntab kuj qab zib heev.
¹⁴Yuav tsum paub tias tswvyim
zoo ib yam li ntawd rau koj tus ntsuj plig,
yog koj tau tswvyim,
koj lub hauv ntej yuav zoo
thiab koj yuav tsis plam tej uas koj vam.

¹⁵Tsis txhob zov tos nrhw ib yam li tej neeg
limhiam uas yuav lws tus ncaj ncees lub tsev,
tsis txhob ua nruj ua tsiv rau nws lub tsev,
¹⁶rau qhov tus ncaj ncees
txawm ntog xya zaus los tseem sawv los thiab,
tiamsis tus neeg limhiam
raug vij sub vij sw muab ntxuav pov tseg.

¹⁷Tsis txhob zoo siab xyiv fab
rau thaum koj tus yeeb ncuab ntog,
thiab tsis txhob zoo siab rau thaum nws dawm,
¹⁸ntshai tsam Yawmsaub pom
ces yuav tsis txaus siab
thiab nws yuav thim qhov uas nws npau taws
rau koj tus yeeb ncuab.

¹⁹Koj tsis txhob nyuaj siab
rau tej neeg uas ua phem
thiab tsis txhob khib cov uas ua limhiam,
²⁰rau qhov tus neeg phem
tsis muaj lub hauv ntej zoo,
thiab tus neeg limhiam lub teeb
yuav raug muab tua.

²¹Kuv tub 'e, cia li hwm thiab paub ntshai
Yawmsaub thiab vajntxwv,
tsis txhob nrog tej neeg uas fav xeeb
ua ib lub siab,
²²rau qhov ob tug yuav ua
vij sub vij sw tshwm los sai sai,
mas leejtwg yuav paub tej kev puam tsuaj
uas ob tug ua?

Tej lus ntuas ntxiv

²³Tej lus no yog cov uas muaj tswvyim hais.

Qhov uas saib dej ua ntu saib neeg ua plhu
mas tsis zoo li.
²⁴Tus uas hais rau tus neeg limhiam tias,
“Koj tsis txhaum,”
mas yuav raug tej pejxeem cem foom
thiab raug tej tebchaws ntxub.
²⁵Tiamsis cov uas qhuab ntuas
tus neeg limhiam
yuav tau nyob kaj siab
thiab yuav tau koob hmoov.
²⁶Tus uas teb lo lus tseeb
mas zoo li nwj daim tawv ncauj.
²⁷Cia li npaj koj tej haujlwm sab nraud
thiab ua txhua yam kom txhij hauv koj daim teb,
dhau ntawd kuj ua koj lub tsev.
²⁸Tsis txhob lam ua timkhawv tom
koj kwvtij zej zog uas tsis tau ua txhaum,
thiab koj daim tawv ncauj tsis txhob dag.
²⁹Tsis txhob hais tias, “Kuv yuav ua rau nws
yam li nws tau ua rau kuv lawm,
kuv yuav ua pauj tej uas nws twb ua lawm.”
³⁰Kuv hla hauv tus tub nkeeg daim teb
thiab tus tsis thoob tsib lub vaj txiv hmab,
³¹ua ciav pos tuaj puv nkaus,
nroj tsuag tuaj ntom qas nti,
thiab tej ntsa laj kab pob zeb pob tag.
³²Kuv pom thiab ua tib zoo xav,
kuv ntsia ntsoov
mas kuv thiaj tau kev qhuab qhia.
³³Tsaug ib nyuag tsig zog,
ib nyuag qe muag, khawm tes so ib pliag,
³⁴mas txojkev pluag yuav los txog koj
yam nkaus li tub sab tuaj lws,
thiab kev txom nyem yuav los
yam nkaus li tus coj ntaj coj riam tuaj lws.